रोमियों 15
15
दूजाँ ने राजी राको, खुद ने ने
1आपाँ ज्यो विस्वास में गाटा हा, आपाँने वाँकी कमजोरी सेण करणी छावे ज्यो विस्वास में कमजोर हे। आपाँ बेस खुद नेईं राजी ने करा। 2आपणाँ मेंऊँ हाराई जणा दूजाँ की भलई का वाते राजी करणा छावे, ताँके वीं विस्वास में गाटा वेवे। 3#भज 69:9अटा तईं के मसी भी खुद ने राजी ने किदो हो। पण जस्यान मसी का बारा में सास्तर केवे हे के, “जणा थाँरो अपमान किदो हो, वो अपमान मारा पे आ पड़्यो हे।” 4हरेक बात ज्या सास्तर में लिकी गी, वाँ आपाँने हिक देबा का वाते हे। जणीऊँ ज्यो धिज्यो अन हिम्मत सास्तरऊँ मले हे, वणीऊँ आपाँने आस मले। 5धिज्यो अन हिम्मत देबावाळा परमेसर थाँने ईसू मसी का जस्यान एका को मन दे। 6जणीऊँ थाँ एक मन अन एक अवाज वेन आपणाँ परबू ईसू मसी का बापू परमेसर की मेमा करो।
7परमेसर की बड़ई करबा का वाते एक दूजाँ ने अपणा लो, जस्यान मसी थाँने अपणाया हा। 8में थाँने बताऊँ हूँ के, पुरबजाऊँ किदा तका परमेसर का वादा का हाँच ने हाँचो साबत करबा का वाते मसी परमेसर की हाँच का जस्यान यहूदी मनकाँ को दास बण्यो। 9#भज 18:49ईं वाते जीं यहूदी ने हे, वीं मनक भी परमेसर ने वींकी दया का वाते मेमा देवे हे, जस्यान के सास्तर में लिक्यो तको हे,
“ईंका वाते मूँ ज्यो यहूदी ने हे, वणा मनकाँ में थाँरी बड़ई करूँ,
मूँ थाँका नाम की मेमा वाँमें गाऊँ।”
10 #
वे.वि 32:43
अन ओ भी क्यो ग्यो हे के,
“हो मनकाँ, ज्यो यहूदी ने हो, परमेसर का मनकाँ का हाते राजी वेवो।”
11 #
भज 117:1
अन सास्तर अस्यान भी केवे हे,
“हो मनकाँ ज्यो यहूदी ने हो, थाँ परबू की बड़ई करो।
हाराई मनक वींकी बड़ई करो!”
12 #
यसा 11:10
ओरी पाछो, यसायो भी केवे हे,
“यिसे का वंस मेंऊँ एक परगट वेई
ज्यो वणा मनकाँ पे राज करी जीं यहूदी ने हे।
अन वीं मनक वींपे आस लगाया राकी।”
13आस देबावाळो परमेसर थाँका मना ने सान्ती अन खुसीऊँ भर देवे जस्यान वींमें थाँको विस्वास हे, जणीऊँ पुवितर आत्मा की तागतऊँ थाँ आसऊँ भरपूर वे जावो।
जीं यहूदी ने हे, वाँ मनकाँ में पोलुस की सेवा
14हो मारा भायाँ, मने पाको पतो हे के, थाँ भलईऊँ भरिया तका हो, ग्यान अन एक दूजाँ ने हिकाबा में पाको हो। 15पण ईं कागद में, मूँ थाँने आद अवाड़ का वाते थोड़ीक बाताँ साप साप लिकी हे, अन अस्यान में मने मली तकी परमेसर की दया की वजेऊँ किदो हे। 16काँके जी यहूदी ने हे, वाँ मनकाँ का वाते ईसू मसी को दास वेन, मूँ परमेसरऊँ मल्या तका हव हमच्यार को परच्यार करबा का वाते मूँ एक याजक की जस्यान काम करूँ हूँ, जणीऊँ वीं मनक भी परमेसर के चड़बा जोगी भेंट बण सके अन पुवितर आत्मा के जरिये परमेसर का वाते पुरी तरियाँ पुवितर बणे।
17ईं वाते ईसू मसी की वजेऊँ परमेसर की सेवा ज्या मूँ करूँ हूँ वींमें मूँ मेपणो करूँ हूँ। 18काँके मूँ बेस वणा बाताँ ने करबा की हिम्मत करूँ हूँ ज्याँने मसी जी यहूदी ने हे, वाँ मनकाँ ने परमेसर ने मानबा का वाते मारा बचना, मारा करम, 19तागत का हेन्याण अन अचम्बा का काम अन परमेसर की आत्मा की तागतऊँ मारी जरिये पूरो किदो। अस्यान में यरूसलेम नगरऊँ लेन इल्लुरिकुम परदेस का च्यारूँमेर मसी का हव हमच्यार का परच्यार को काम पूरो किदो। 20मारी हमेस्यान आ मनसा हे के, मूँ हव हमच्यार को परच्यार वटे करूँ, जटे कुई मसी को नाम भी ने जाणे, ईंकी वजे आ हे के, मूँ कुई दूजाँ मनक की नाकी तकी नीम पे सणई ने करूँ। 21#यसा 52:15जस्यान सास्तर में लिक्यो तको हे,
“ज्याँने वींके बारा में ने बतायो, वीं वींने देकी।
अन जणा हूण्योई कोयने, वीं हमजी।”
रोम जाबा का वाते पोलुस को बच्यार
22 #
रोमि 1:13
मूँ नरी दाण थाँका नके आबाऊँ रोक्यो ग्यो। 23पण अबे अणा परदेसाँ में मारी काम करबा की कई जगाँ ने बंची हे, अन घणा वराऊँ मूँ थाँकाऊँ मलबा का वाते तरसरियो हूँ। 24मने आस हे के, स्पेन जाती दाण मूँ थाँकाऊँ मलूँ। थाँका हाते थोड़ाक दन रकबा को आणन्द लेबा केड़े मने भरोसो हे के, आगे की जातरा का वाते मने थाँकी मदत मली।
25 #
1 कुरि 16:1–4
पण अबे तो मूँ परमेसर का पुवितर मनकाँ की सेवा करबा का वाते यरूसलेम जारिया हूँ। 26काँके मकिदुनिया अन अखाया परदेस की मण्डळ्याँ का मनकाँने यो हव लागो के, वीं यरूसलेम में परमेसर का पुवितर मनकाँ में ज्यो गरीब हे वाँने कई हे। 27#1 कुरि 9:11हा, यो तो वणा खुद ते किदो, पण वाँका वाते वाँकी जिमेदारी भी बणे हे, काँके जद्याँ जी यहूदी ने हे, वणा मनकाँ यहूदी मनकाँ का आत्मिक आसीस में पाँती लिदी हे, तो जीं यहूदी ने हे, वाँ मनकाँ की जिमेदारी हे के, वीं आपणी चिजाँऊँ वाँकी मदत करे। 28तो मूँ ओ काम करन मतलब भेळा किदा तका ईं धन ने पुरी जिमेदारी का हाते वाँने हूंपन थाँकी नगर वेतो तको स्पेन का वाते रवाना वे जाऊँ। 29अन मूँ जाणूँ हूँ के, जद्याँ मूँ थाँका नके आऊँ तो मसी का हाराई आसिरवाद लेन आऊँ।
30हो मारा भायाँ, मूँ परबू ईसू मसी अन आत्मा का परेमऊँ थाँकाऊँ अरज करूँ हूँ, मारा वाते परमेसरऊँ परातना करता तका, मारी आत्मिक लड़ई में मने जेलो दो। 31जणीऊँ मूँ यहुदया परदेस में अविस्वास्याऊँ बच्यो रेवूँ अन यरूसलेम का पुवितर मनकाँ का वाते ज्यो दान मूँ लेन जारियो हूँ वो परमेसर का पुवितर मनक हव मनऊँ अपणावे। 32अन मूँ परमेसर की मरजी जस्यान राजी मनऊँ थाँका नके आन थाँका हाते आणन्द मना सकूँ। 33सान्ती का परमेसर थाँ हाराई का हाते रेवे। आमीन।
सध्या निवडलेले:
रोमियों 15: एम टी आर
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
(c) 2010-2017, New Life Computer Institute. All rights reserved