थरप्या तका का काम 18

कुरिन्तुस नगर में

1ईंका केड़े पोलुस एतेंसऊँ कुरिन्तुस ग्यो। 2वटे वींने अक्‍विला नाम को एक यहूदी मनक मल्यो, जिंको जनम पुन्तुस में व्यो हो। वो आपणी घरवाळी प्रिस्किला के हाते इटलीऊँ अटे आयो हो, काँके वटे रोम के राजा क्लोदियुस हंगळा यहूदियाँ ने रोमऊँ बारणे जाबा की आग्या दिदी ही। पोलुस वाँके नके ग्यो। 3वीं हाराई को धन्धो एकीस हो, ईं वाते वीं हाते रेन काम करबा लागा। वणा को काम डेरा वणाबा को हो। 4वीं हरेक सबद का दन यहूदियाँ के परातना घर जाईन, यहूदियाँ अन युनानियाँऊँ बात-बच्यार करता हा अन वाँने मनाबा की कोसीस करता हा।

5जद्याँ सिलास अन तिमुतियुस मकिदुनियाऊँ आया, तो पोलुस आको दन बचन हुणाबा की धुन में हो अन यहूदियाँ ने गवई देतो हो के “ईसू ही मसी हे।” 6पण जद्याँ वीं विरोद करबा अन रिस्याँ बळवा लागा, तो पोलुस आपणाँ गाबा जाटकन वाँकाऊँ क्यो, “यद्याँ थाँ अबे नास वेवो तो, याँ जिमेदारी थाँकीस हे अन ईंका वाते मूँ जिमेदार ने हूँ। अबे मूँ जो यहूदी ने हे वाँका नके जाऊँ।” 7वटूँ चालन वो तीतूस युस्तुस नाम का परमेसर का भगत का घरे ग्यो, जिंको घर यहूदियाँ का परातना घर का जोड़ीस हो। 8तद्याँ वटे परातना घर के मुक्ये आपणाँ हंगळा परवार हमेत विस्वास किदो। ओ हुणन कुरिन्तुस नगर का नरई लोगाँ विस्वास किदो अन बतिस्मो लिदो।

9परबू एक रात में पोलुस ने दरसावो देन क्यो, “दरप मती, अन बचन हूणातो रे, छानो मती रे, 10काँके मूँ थारे हाते हूँ, अन कुई थने नकसाण करबा के वाते हमलो ने केरी, काँके अणी नगर में नरई लोग मारा हे”। 11ईं वाते पोलुस वणी नगर में परमेसर का वसना ने डोड़ वर तईं हिकाया।

12जदी गलिया नाम को अखाया देस को राजपाल बण्यो, यहूदी लोगाँ एगट करन पोलुस ने पकड़ लिदो, अन वींने न्याव-गादी का हामे लाया 13अन क्यो “यो मनक लोगाँ ने भोळारियो हे के, परमेसर की परातना अस्यान करो, ज्या वेवस्ता के नेमा के विरोद में हे।”

14जदी पोलुस बोलवा मेई हो, गलिया यहूदियाँऊँ क्यो, “हो यहूदियाँ, आ बात जूटी अन फोकटी वेती, तो मूँ थाँकी हूणतो। 15पण यद्याँ ओ थाँका सबद, खुद का नेमा अन नाम को बात-बच्यार हे तो थें जाणो हो, मूँ अणा चिजाँ को न्याव ने करणो छारियो हूँ” 16अन वणी वाँ हाराई ने न्याव-गादी का हामेऊँ बारणे खन्दा दिदा। 17तद्याँ हंगळा लोगाँ परातना घर का मुक्या सोस्तिनेस ने पकड़न न्याव-गादी का हामे कुट्यो, पण राजपाल गलिया ईं बाताँ ने मन में ने लिदी।

पाछो अन्ताक्या आणो

18पोलुस नरई दन तईं वटे रियो। पछे वटा का भई-बेनाऊँ हिक लिदी अन किंकरिया में टाट कड़ई, काँके वणी बोलमा बोली ही। अन जाँज में बेटन सिरिया में जाबा लागो, वींका हाते प्रिसकिल्‍ला अन अक्‍विला भी हा। 19वणी इपिसुस नगर में जान वणा दुई ने वटेईस छोड़्या अन यहूदियाँ का परातना घर में जान यहूदियाँऊँ बात-बच्यार करबा लागो। 20जद्याँ वणा वींऊँ क्यो के, माँके हाते थोड़ाक दन ओर रे तो पोलुस वाँकी बात कोयने मानी। 21पण पोलुस ओ केन वाँका नकेऊँ ग्यो, “यद्याँ परमेसर की मरजी वेई तो थाँका नके पाछो आऊँ”। तद्याँ वो इपीसुसऊँ जाँज में बेटन चाल पड़्यो।

22अन केसरिया नगर वेतो तको यरूसलेम ग्यो अन वटे विस्वास्याँ की मण्डळीऊँ नमस्कार करन अन्ताक्या नगर ग्यो।

23पछे थोड़ाक दन वटे रियो, ईंका केड़े गलातिया अन फरूगिया का देसा में विस्वास्याँ ने विस्वास में गाटा करतो ग्यो।

इपिसुस अन कुरिन्तुस नगराँ में अपुलोस

24अपुलोस नाम को यहूदी मनक, जिंको जनम सिकन्दरिया में व्यो हो, जो हव भण्यो-पड़यो हो अन पुवितर सास्तर ने बड़या तरियऊँ जाणतो हो, इपिसुस में आयो। 25वींने परबू का गेला पे चालबा की हिकावण दिदी ही, अन वो मन लगान बड़िया तरियऊँ परबू का बारा में हूणातो अन हिकातो हो, पण बेस वो यहुन्ना का बतिस्मो की बाताँइस जाणतो हो। 26वो यहूदियाँ का परातना घर में बना दरप्या बोलतो हो। प्रिसकिल्‍ला अन अक्‍विला वींकी बाताँ ने हुणन वींने आपणाँ घरे लेग्या अन वणी वाँने परमेसर का गेला का बारा में एकदम सई तरियऊँ हमजाया। 27जदी वणी होच्यो के वटूँ अखाया जाऊँ तो इपिसुस का विस्वास्याँ वींने धिजो बन्दायो अन अखाया का विस्वास्याँ ने लिक्यो के वीं ईंकी आवभगत करे। अन वणी वटे जान लोगाँ की मदत किदी जणा परमेसर की करपाऊँ विस्वास किदो हो। 28वो पुवितर सास्तरऊँ यहूदियाँ का हामे तागतऊँ वाद-विवाद करन ओ साबत करतो रियो के, ईसू ही मसी हे।

सध्या निवडलेले:

थरप्या तका का काम 18: एम टी आर

ठळक

सामायिक करा

कॉपी करा

तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन

नुवो नेम (मेवड़ी नया नियम)बद्दल अधिक जाणून घ्या