Ruka 7 मधील लोकप्रिय बायबल वचने

सामायिक करा

ꞌĪ a au he kī atu: te hara rahi o te viꞌe nei ko haka kore ꞌana, he rahi o tōꞌona haŋa mai. Te kope taꞌe rahi te hara haka kore, taꞌe rahi tōꞌona haŋa ki te ꞌAtua. He kī ia ki tū viꞌe era: «Ko haka kore ꞌana tuꞌu hara».

He ꞌata kī ki rā viꞌe e Ietū: «Ko eꞌa ꞌana a koe mai roto i te hara, he haka moe ōꞌou i te manaꞌu ꞌi ruŋa i a au. Ka oho riva-riva».

I puā era ki a Ietū, he taŋi a te vaꞌe. He haꞌamata he haka rari he oho i te vaꞌe hai matavai. I oti era he haroꞌi hai tōꞌona rauꞌoho koia ko hoŋi ꞌe ko huri hai manoꞌi.

ꞌO ira i taꞌe oho atu ai e au mau ꞌā. Ko ꞌite ꞌana e au mo kī ōꞌou: “Ka ora”, he ora tōꞌoku tāvini. A au mau nei e ai rō ꞌana te taŋata ꞌata hau rō atu te tōroꞌa ki a au, ꞌe pē ira takoꞌa ꞌā e ai rō ꞌana te vaꞌehau ko au te kape. Mo kī ōꞌoku: “Ka oho”, he oho; ꞌe mo kī ōꞌoku mo oho mai, he oho mai; ꞌe mo kī ōꞌoku ki tōꞌoku tāvini mo aŋa e tahi meꞌe, he aŋa». He māere a Ietū ꞌi tū vānaŋa era. He uꞌi ki te nuꞌu oho ꞌi muri i a ia, he kī: «ꞌĪ a au he kī atu: kai takeꞌa ꞌā e au e tahi taŋata o Itaraera haka moe i tōꞌona manaꞌu ꞌi ruŋa i a au pa he taŋata nei».

ꞌI rā hora e haka ora ꞌana e Ietū meꞌe rahi māui-ui ꞌe maꞌi o te nuꞌu, e haka eꞌa ꞌā i te tātane, ꞌe e haka ora ꞌā i te mata o te nuꞌu matapō. He kī e Ietū ki tū nuꞌu uŋa era e Iovani: —Ka hoki ka ꞌaꞌamu ki a Iovani i te meꞌe takeꞌa ꞌe ŋaroꞌa e kōrua: Ko māꞌeha ꞌā te mata o te nuꞌu matapō, ko haꞌere riva-riva ꞌā te nuꞌu vaꞌe koke. Ko ora ꞌana te nuꞌu māui-ui rēpera, ko ŋaroꞌa ꞌana te vānaŋa e te nuꞌu tariŋa pō. Ko ora mai ꞌā te nuꞌu mai te mate, ꞌe ko haka ꞌite ꞌana i te ⌊roŋo riva-riva o te ꞌAtua⌋ ki te nuꞌu veve.