Malivi 3
3
Litabelo za ku tiisa bulikani
1“Mutu kamukana h'a ka tisa ye ñwi ya likomu za hae kuli i be sitabelo se si ciwa, s'a ka ikabela ni balumeli ba bañwi hamohocwalo ni Muñ'a Bupilo, komu yeo i lukela ku ba poho kamba sitole, mi ili ye si na fo i nyazahala. 2U ta i beya lizoho fa toho, mi a i bulaele kwa munyako wa Tende ya Kopano. Baprisita ba mba ya Aruni ba ta sela mali fa maneku a mane a katala. 3Cwale ba ta ezeza Muñ'a Bupilo sitabelo sa lico ka lilama ze latelelana ze, ili lisuzo kaufela le li inzi ku za mwa mba, 4lipio ni lisuzo la zona ni lisuzo la fa sibiti. 5Baprisita ba ta li ciseza fa katala kaufel'a zona hamoho ni litabelo za ku cisa. Muunko wa sitabelo sa lico se u tabisa hahulu Muñ'a Bupilo.
6“Haiba ki ngu kapa puli ye eziswa sitabelo sa ku tiisa bulikani, i ka ba poho kamba ye sihali kono i si ke ya ba ye nyazahala. 7Haiba mutu a eza sitabelo sa ngu, u na ni ku i fitisa ku Muñ'a Bupilo. 8U ta beya lizoho la hae fa toho ya yona, mi a i bulaele fapil'a Tende ya Kopano. Baprisita ba ta sela mali a yona fa maneku a mane a katala. 9Ba ta ezeza Muñ'a Bupilo sitabelo sa lico ka lisuzo la kwa lilama za folofolo yeo, ili lisuzo kaufela la kwa muhata o pumezwi fakaufi ni mukokoto, muteto kamukana, 10lipio ni lisuzo la zona ni lisuzo kaufela la fa sibiti. 11Muprisita u ta li ciseza fa katala kaufel'a zona, ku ezeza Muñ'a Bupilo sitabelo sa lico.
12“Haiba mutu a eza sitabelo sa puli, u na ni ku i fitisa ku Muñ'a Bupilo. 13U ta i beya lizoho fa toho, mi a i bulaele fapil'a Tende ya Kopano. Baprisita ba ta sela mali a yona fa maneku a mane a katala. 14U ka ezeza Muñ'a Bupilo sitabelo sa lico ka lisuzo la lilama zeo, ili lisuzo la muteto kaufela, 15lipio ni lisuzo la zona, hamohocwalo ni lisuzo la fa sibiti. 16Zeo kaufela, muprisita u ta li ciseza fa katala ku eza sitabelo sa lico se si tabisa Muñ'a Bupilo. Lisuzo kamukana ki la Muñ'a Bupilo. 17Ha ku na Muisilaele ya ta ca lisuzo kamba mali. Wo ki ona mulao o na ni ku bulukwa ki masika kaufela kuya kuile, ko ba ta pila kamukana.”
നിലവിൽ തിരഞ്ഞെടുത്തിരിക്കുന്നു:
Malivi 3: Lozi09
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Lozi Interconfessional Bible, Catholic Edition © Bible Society of Zambia, 2009.