Mututo 39
39
Ku eziwa liapalo za buprisita
(Mut 28.1-14)
1Ba ezeza baprisita liapalo ze nde za boya bwa ngu bo bu basizwe butala, bupuzwa ni bufubelu, ili ze apalwa ha ku sebezwa mwa Sibaka se si Kenile. Ba ezeza Aruni liapalo ze kenile, ka mo Mushe n'a laelezwi ki Muñ'a Bupilo.
2Efoda ya ezwa ka bwanda bwa gauda, ka lisila la boya bwa ngu le li basizwe butala, bupuzwa ni bufubelu, ni ka lisila la bwanda bo bu indilwe bwa line ye nde. 3Ba tula gauda ku i eza mashiti a masisani, mi ba a pumaka tuemba to tusisani ku tu lukelela fa lisila la boya bwa ngu bo bu basizwe butala, bupuzwa ni bufubelu, ni fa lisila la line ye nde le li kabisizwe ka bukwala. 4Ba eza tusila twa fa maheta a efoda, to tu ne tu kopanyizwe kafa ni kafa kuli tu kone ku ñomelwa. 5Lukanda lo lu indilwe ka bukwala lwa eza nto i liñwi ni yona efoda, mi lwa ezwa ka ku swana ni yona, ili ka gauda, ni ka lisila la boya bwa ngu le litala, le lipuzwa ni le lifubelu, ni ka lisila la bwanda bo bu indilwe bwa line ye nde, sina mw'a n'a laelezwi Mushe ki Muñ'a Bupilo. 6Ba eza macwe a onikisi, mi a kweswa mwa tukwati twa gauda, mi sina siswayiso sa ku kantisa mañolo, a falaulwa mabizo a bana ba Isilaele. 7A beiwa fa tusila twa fa maheta a efoda, kuli a be macwe a hupulisa Muñ'a Bupilo bana ba Isilaele, sina Muñ'a Bupilo mw'a n'a laelezi Mushe.
Ku eziwa lisila la fa sifuba
(Mut 28.15-30)
8Kwa ezwa lisila la fa sifuba, mi la kabiswa ka bukwala sina efoda. La ezwa ka gauda, ka lisila la boya bwa ngu le litala, le lipuzwa ni le lifubelu ni ka lisila la bwanda bo bu indilwe bwa line ye nde. 9Ba li eza ka ku likanelela mo ni mo, mi ba li tatahanya habeli ku eza butelele bwa singandi mwa bupala ni mwa butelele. 10Kwa beiwa mibamba ye mine ya macwe a butokwa ku lona. Mwa mubamba wa pili kwa beiwa licwe la rubi, la topazo, ni la karabunkele. 11Mwa mubamba wa bubeli kwa beiwa la emeralda, la safiro, ni la daimani. 12Mwa mubamba wa bulalu kwa beiwa la yasinto, la agata, ni la ametisto. 13Mwa mubamba wa bune kwa beiwa la berilo, la onikisi ni la jaspe. A kweswa mwa tukwati twa gauda. 14Ne ku na ni macwe a lishumi ni a mabeli, a n'a ni mabizo a bana ba Isilaele. A n'a falauzwi sina likantiso, le liñwi ni le liñwi ni libizo la lo luñwi lwa masika a lishumi ni a mabeli. 15Kwa ezwa liñetwani za gauda luli ze bondilwe sina mihala za ku beya fa lisila la fa sifuba. 16Kwa ezwa tukwati to tubeli ni masale a mabeli a gauda, mi masale ao a mabeli a tamelelwa mwa malulu a kwahalimw'a lisila la fa sifuba. 17Ka masale ao, kwa tamelelwa mihala ye mibeli ya gauda. 18Kwa tamelelwa hape mafelelezo a mihala ye mibeli kwa tukwati to tubeli, mi kamukwaocwalo, mihala ya kopanyezwa fapil'a masila a fa maheta a efoda. 19Kwa ezwa masale a mabeli a gauda, mi a beiwa mwa malulu a kwatasi a lisila la fa sifuba, mwahali fakaufi ni efoda. 20Kwa ezwa hape masale a mabeli a gauda, mi a beiwa kwatasi, fapil'a masila a fa maheta a efoda, kwatuko a mungundo, fahalimw'a lukanda lo lunde lo lu indilwe lwa efoda. 21Masale a lisila la fa sifuba a tamwa kwa masale a efoda, ka muhala o mutala kuli lisila la fa sifuba li t'o yema fahalimw'a lukanda li sa shenyi, sina mw'a n'a laelezwi Mushe ki Muñ'a Bupilo.
Ku eziwa liapalo ze ñwi za baprisita
(Mut 28.31-43)
22Kwa ezwa siapalo se sitelele sa kwatas'a efoda se si ezizwe feela ka bwanda bwa boya bwa ngu bo butala. 23Mulala mo ku zwela toho n'o swana ni mulala wa siapalo sa litalo. Kwa mafelelezo a mulala ne ku beilwe lisila le li lukilwe ka bukwala le li u potoloha, kuli u si ke wa pazuha. 24Mungundo o kwatasi wa potoloswa ka manjobo a swana sina likobe, ili a matala, a mapuzwa ni a mafubelu a ezizwe ka boya bwa ngu ni bwanda bo bu indilwe bwa line ye nde. 25Kwa ezwa tulangu twa gauda, mi twa beiwa mwahal'a manjobo ku potolosa mungundo wa kwatasi. 26Ka mukwaocwalo, ne ku na ni mubamba wa tulangu ni manjobo ku potoloha mungundo wa kwatasi a siapalo s'a n'a sebelisa muprisita, sina mw'a n'a laelezwi Mushe ki Muñ'a Bupilo.
27Kwa ezezwa Aruni ni bana ba hae lihembe ka bwanda bo bu indilwe bwa line ye nde. 28Kwa eziwa tukwe ya buprisita ni likepesi ka lisila la line ye nde, ni tuputula twa lisila la bwanda bo bu indilwe bwa line ye nde. 29Kwa eziwa ni lukanda lo lu ezizwe ka lisila la bwanda bo bu indilwe bwa line ye nde ni ka lisila la boya bwa ngu le li basizwe butala, bupuzwa ni bufubelu, le li kabisizwe ka bukwala sina mw'a n'a laelezwi Mushe ki Muñ'a Bupilo. 30Kwa ezwa kabiso ya bulena ka gauda ye nde, mi kwa falaulwa fateñi, sina mo ku falaulelwa sikantiso sa mañolo, manzwi a, “Ku sumekezwi Muñ'a Bupilo.” 31Kabiso ka tamelelwa fahalimw'a tukwe ya buprisita ka muhala o mutala, sina mw'a n'a laelezwi Mushe ki Muñ'a Bupilo.
Musebezi wa felelezwa
(Mut 35.10-19)
32Musebezi kaufela wa Tabelenakele, yona Tende ya Kopano, ya fela cwalo. Maisilaele ba eza lika kamukana mw'a n'a laelezwi Mushe ki Muñ'a Bupilo. 33Ba tiseza Mushe Tabelenakele, tende ya fahalimu, ni lika za mwateñi kaufela. Ba mu tiseza liñomeliso, mabala, mabalelo, mitiyo ni matomelo a yona, 34litalo la poho ya ngu le li basizwe bufubelu fahalimu, ni litalo le liñwi le linde la kwatasi, hamohocwalo ni lisila la ku i sileleza, 35likwati le li na ni matapa a kupuzo, mitiyo ni sikwahelo sa lona, 36tafule ni lisebeliso za yona kaufela, linkwa ze filwe Mulimu, 37sipahekelo sa lilampi sa gauda ye nde, hamoho ni lilampi za teñi, lisebeliso za yona kamukana ni mafula a mwa lilampi, 38katala ka gauda, mafula a ku toza, insense ya muunko o munde, ni lisila la kwa munyako wa tende, 39katala ka kopa ni lukwakwa lwa kona lwa kopa ye indilwe, mitiyo ni lisebeliso za kona kaufela, mukeke wa ku tapela ni lilaho la ona, 40masila a lapa, mitiyo, matomelo, lisila la kwa munyako wa lapa, mihala ya lona, likonkwani za tende ni lisebeliso kaufela ze tusa mwa Tabelenakele ili yona Tende ya Kopano, 41liapalo za bukabali ze sebeliswa ki baprisita mwa Sibaka se si Kenile, liapalo ze kenile za muprisita Aruni ni liapalo za bana ba hae ha ba eza musebezi wa buprisita. 42Maisilaele ne ba ezize musebezi kaufela sina mw'a n'a laelezwi Mushe ki Muñ'a Bupilo. 43Mushe a tatuba lika kaufela mi a bona kuli ne ba li ezize kaufela sina mw'a n'a laelezi Muñ'a Bupilo. Cwale Mushe kih'a ba tohonolofaza.
നിലവിൽ തിരഞ്ഞെടുത്തിരിക്കുന്നു:
Mututo 39: Lozi09
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Lozi Interconfessional Bible, Catholic Edition © Bible Society of Zambia, 2009.
