Mututo 24
24
Bulikani bwa tiiswa
1Cwale Muñ'a Bupilo a li ku Mushe, “Kambama fa lilundu, u tahe ku na hamoho ni Aruni, Nadabi, Abihu ni bahulu ba Isilaele ba mashumi a supile. Mu t'o kubama kwahulenyana, mu lapele. 2Ki Mushe feela ya ka sutelela ku na. Ba bañwi ba si ke ba sutelela fakaufi, hape ni sona sicaba si si ke sa taha ni yena.”
3Mushe a y'o bulelela sicaba litaelo za Muñ'a Bupilo kamukana, ni milao ya hae kaufela. Batu ba alaba hamoho, ba li, “Lu ta eza lika kaufela z'a bulezi Muñ'a Bupilo.” 4Mushe a ñola litaelo za Muñ'a Bupilo kamukana. Habusa, i sa li kakusasa, a yaha katala kwatas'a lilundu, mi a toma macwe a kupuzo a lishumi ka a mabeli, ka masika a lishumi ka a mabeli a ba Isilaele. 5Cwale a luma micaha ya Maisilaele ku y'o eza litabelo za ku cisa, mi a bulaya lipoho ku ezeza Muñ'a Bupilo sitabelo sa buitumelo. 6Mushe a nga kalulo ye ñwi ya mali, mi a' beya mwa mikeke. Haili a siyezi, a' hasa fa katala. 7Kiha s'a nga Buka ya Bulikani, a i balela sicaba ka ku tiisa, mi batu ba li, “Lu ta eza lika kaufela z'a laezi Muñ'a Bupilo. Lu ta mu utwa.”
8 #
Mat 26.28; Mar 14.24; Luk 22.20; 1 Bakor 11.25; Maheb 9.19-20; 10.29 Cwale Mushe a nga mali a mwa mikeke, mi a' hasa batu a nz'a li, “A, ki mali a tiisa bulikani bw'a isweli Muñ'a Bupilo ni mina, ka ku mi fa litaelo zeo kamukana.”
9Mushe, Aruni, Nadabi, Abihu ni bahulu ba mashumi a supile ba kambama fa lilundu. 10Ba bona Mulimu wa Isilaele. Kwatas'a mahutu a hae ne ku na ni se ne si bonahala inge bulilo bwa macwe a butokwa a safiro, bo bu ne bu benya sina lihalimu. 11H'a si ka utwisa bazamaisi bao ba Isilaele butuku. Ba sin'o bona Mulimu, kihona ba ca, ba nwa.
Mushe h'a li fa Lilundu la Sinai
12Muñ'a Bupilo a li ku Mushe, “Kambamela ku na fa lilundu, u t'o ina kwanu. Ni ta ku fa matapa a macwe, a na ni milao ni litaelo ze ni ñozi kuli u lute sicaba.” 13Mushe a itukisa ni mutang'a hae Joshua, mi ba kambama fa Lilundu la Mulimu. 14Mushe a li kwa bahulu, “Mu lu litele fa, ku fitela lu kuta. Bo Aruni ni Huri ki ba, ba inzi ni mina. Ya na ni pilaelo kaufela a ye ku bona, ba y'o i talima.”
15Mushe a kambamela fa lilundu, mi la kwahelwa ki lilu. 16Kanya ni maata a Muñ'a Bupilo a taha fa Lilundu la Sinai, mi la kwahelwa ki lilu mazazi a silezi. Ka lizazi la busupa, Muñ'a Bupilo a nz'a li mwahal'a lilu, a biza Mushe. 17Kwa Maisilaele, kanya ya Muñ'a Bupilo n'e bonahala inge mulilo o n'o ca fahalimw'a lilundu. 18#Mul 9.9 Mushe a kena mwa lilu, mi a kambama fa lilundu. A y'o ina kwateñi mazazi a mashumi a mane ni masihu a teñi.
നിലവിൽ തിരഞ്ഞെടുത്തിരിക്കുന്നു:
Mututo 24: Lozi09
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Lozi Interconfessional Bible, Catholic Edition © Bible Society of Zambia, 2009.
