Mututo 10
10
Nzie
1Muñ'a Bupilo a li ku Mushe, “U ye ku Faro. Ni tatafalize pilu ya hae ni lipilu za manduna ba hae ka bomu, kuli ni eze limakazo za ka ku bona. 2Hape ni ezize cwalo kuli u kone ku taluseza bana ba hao ni baikulyowe ka mo ni ezelize Maegepita bukuba ha ne ni eza limakazo mwahal'a bona. Kaufel'a mina mu ta ziba kuli ki na Muñ'a Bupilo.”
3Mushe ni Aruni ba ya ku Faro, mi ba li ku yena, “S'a bulela Muñ'a Bupilo, Mulimu wa Maheberu, ki se, u li, ‘U ta ina nako ye kuma kai u nz'o hana ku ipeya kwatas'a ka? Lukulula sicaba sa ka, si zamaye, si y'o ni lapela. 4Haiba u tundamena ku si hanisa ku ya, kamuso luli ni ka tisa nzie mwa naha ya hao. 5I ta kwahela mubu kaufela, mane u si ke wa bonwa. I ta ca ze si ka sinyiwa ki simbwewewe kamukana, ni ku ca likota za hao kaufela. 6I ka tala mwa ndu ya hao ni mwa mandu a manduna ni a batu ba hao kamukana. I ta ba nto ye maswe hahulu ku fita ze bonwi ki bo ndat'aho kamba bo kukw'a hao, fo ba sa li ba fitela mwa naha mo.’ ” Cwale a zwa ku Faro, mi a kuta.
7Manduna ba Faro ba li ku yena, “Mutu yo u ka lu kataza nako ye kuma kai? Tuhela batu bao ba zamaye, ba y'o lapela Mulena, Mulimu wa bona. Kikuli ha u boni kuli Egepita i se i sinyehile, nji?”
8Cwale Mushe ni Aruni ba kutiswa ku Faro, mi yena a li ku bona, “Mu ka na mwa ya ku y'o lapela Mulena Mulimu wa mina. Kono ya ka ya, ki mañi?”
9Mushe a alaba, a li, “Lu ta ya kaufel'a luna hamohocwalo ni banana ni macembele. Lu ta ya ni bana ba luna ba bashimani ni ba basizana, lingu za luna ni lipuli, ni likomu za luna, kakuli lu ta y'o ezeza Muñ'a Bupilo mukiti wa silumeli.”
10Faro a li ku bona, “Muñ'a Bupilo a be ni mina haiba ni ka mi lukulula ni mabasi a mina! Ha mu boni kuli mu na ni muhupulo o maswe, nji? Mu shamezwi ki manyando. 11Hakulicwalo ku ta ya mina banna feela ku y'o lapela Muñ'a Bupilo, haiba ki sona se mu bata.” Kiha ba se ba lelekwa fapil'a Faro.
12Muñ'a Bupilo a li ku Mushe, “Nanulela lizoho la hao fahalimw'a naha ya Egepita, u tise nzie. I ta t'o ca ze mela kamukana ze siilwe ki simbwewewe.” 13Mushe kih'a nanula mulamu wa hae, mi Muñ'a Bupilo a fukisa moya wa kwa upa mwa naha lizazi kaufela, musihali ni busihu. Kakusasa, wa tisa nzie. 14#Sin 9.2-3 Ya tala mwa naha kamukana mi ya ina mwateñi, ili nzie ye ñata hahulu, ye si ka ba ya bonwa, mi ye si ke ya bonwa hape. 15Ya kwahela lifasi kaufela, mane naha ya unsufazwa ki yona. Ya ca ze mela fafasi, ni miselo ya kwa likota ye siilwe ki simbwewewe. Ne ku si na butala bo bu ne bu siyezi kwa kota kapa kwa simela mwa naha ya Egepita kamukana.
16Faro kih'a biza kapili Mushe ni Aruni, mi a li, “Ni foselize Muñ'a Bupilo, Mulimu wa mina, ni mina cwalo. 17Cwalehe, u ni swalele mulatu wa ka yona nako ye feela, mi mu lapele ku Muñ'a Bupilo, Mulimu wa mina, kuli a zwise butata bo, bo bu zieza, ku na.” 18Mushe a siya Faro, mi a y'o lapela ku Muñ'a Bupilo. 19Yena Muñ'a Bupilo a fetula moya, wa zwa mwa wiko ka maata, mi wa t'o fefulela nzie mwa Liwate le Lifubelu mi ha ku siyala nihaiba nzie i liñwi. 20Kono Muñ'a Bupilo a tatafaza pilu ya Faro, mi a hanisa Maisilaele ku zamaya.
Lififi
21 #
But 17.1-21
Muñ'a Bupilo a li ku Mushe, “Nanulela lizoho la hao kwahalimu, kuli ku tahe lififi le lituna mwa naha ya Egepita.” 22#Lipi 105.28; Sin 16.10 Mushe a nanulela lizoho la hae kwahalimu, mi kwa taha lififi le lituna mazazi a malalu mwa naha ya Egepita. 23Maegepita ne ba pupuleza mwa lififi ba sa bonani, mi ha ku na ya n'a zwile mwa ndu ya hae mwa mazazi ao a malalu. Haili Maisilaele, kamukan'a bona, ne ba inzi mwa liseli ko ne ba pila.
24Faro a biza Mushe, mi a li, “Mu ka na mwa ya ku y'o lapela Muñ'a Bupilo, mane basali ni bana ba mina ba ta ya ni mina. Konji lingu, lipuli ni likomu za mina, ki zona ze ka siyala kwanu.”
25Mushe a alaba, a li, “Kana u ta lu fa limunanu ze lu ta y'o cisa ku ezeza Muñ'a Bupilo, Mulimu wa luna, litabelo nji? 26Lu swanezi ku ya ni limunanu za luna ku si na ni ye ka siyala. Lu swanezi ku y'o keta lifolofolo ze lu ka lapela Muñ'a Bupilo, Mulimu wa luna, ka zona. Konji ha lu se lu li koo, kihona lu ka ziba ze lu ka sebelisa ha lu lapela Muñ'a Bupilo.”
27Ni teñi Muñ'a Bupilo a tatafaza pilu ya Faro, mi a ba hanisa ku ya. 28A li ku Mushe, “Zwa fapil'a ka! U tokomele kuli u si ke wa taha ku na hape, kakuli zazi l'o ka eza cwalo, u ta bulaiwa.”
29Mushe a alaba, a li, “Sina m'o bulelela, ha ni sa tola ni ku bona hape.”
നിലവിൽ തിരഞ്ഞെടുത്തിരിക്കുന്നു:
Mututo 10: Lozi09
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Lozi Interconfessional Bible, Catholic Edition © Bible Society of Zambia, 2009.
