Mateo 20

Skꞌaneal Wan Ebꞌ Mulnawom

1Yu jun tuꞌ, yuxan jix yal Jesús tet ebꞌ scuywom jaxca tiꞌ:

—Oj waltej ey jex tzet chi yun yeloc ebꞌ ánima yet eyoc Naj a Satcan, yaawiloj ebꞌ. Jaꞌ junel ey jun naj patrón, jaꞌ yet jun skꞌinibꞌ jix too naj seyon jaywanoj chi mulna bꞌey awbꞌil an yuva naj. 2Jix ilcha ebꞌ xin, catuꞌ jix yakꞌon swa kꞌane yetoj ebꞌ. Jix yalon naj tet ebꞌ tol jun denario* oj toolanele scꞌu junjun ebꞌ yu naj. Catuꞌ jix chejletoj ebꞌ bꞌey smulnail tuꞌ yu naj. 3Jaꞌ yet a las nueve jix eltoj naj ecꞌabꞌ txombꞌal. Catuꞌ jix yilon yin wan winaj cꞌam smulnail. 4Catuꞌ jix yalon naj tet ebꞌ jaxca tiꞌ: “Ta che yoche chex mulnai, asiꞌwej mulna wintaj an. Oj wakꞌ jantaj smoo chi wakꞌ yu je mulnail tuꞌ an,” ẍi naj tet ebꞌ. Catuꞌ jix too ebꞌ mulna yu naj tuꞌ. 5Jix eltoj naj patrón ecꞌabꞌ junelxa yet chuman cꞌu, catuꞌ jix yakꞌon jun swa kꞌane yetoj jaywanxa jaxca cꞌal jix yute yakꞌon swa kꞌane yetoj ebꞌ jix oc yin mulnail yet a las nueve. Jacꞌalaꞌ jix yun yet a las tres. 6Jix too naj ecꞌabꞌ junelxa yet a las cinco bꞌey txombꞌal. Ey wanxa winaj cꞌam smulnail jix yil tituꞌ. Catuꞌ jix yalon tet ebꞌ tuꞌ jaxca tiꞌ: “¿Tzet yuxan tucꞌal ey jex ecꞌ titiꞌ yet chi ecꞌ cꞌu? ¿Tumi cꞌam niꞌoj je mulnail?” ẍi naj patrón tet ebꞌ. 7“Cꞌam, yutol cꞌam mac chi cu ochen yin mulnail jon,” ẍi ebꞌ tet naj. “Ta queytuꞌ xin, asiꞌwej mulna bꞌey jin txꞌotxꞌ. Oj wakꞌ jantaj je tool smoo che yiꞌ,” ẍi naj tet ebꞌ. 8Jaꞌ yet jix kꞌejbꞌi, jix yalon naj patrón tet scaporal jaxca tiꞌ: “Awtetej ebꞌ jin mulnawom, catuꞌ cha wakꞌon stool scꞌu ebꞌ. Jaꞌ ebꞌ tzunan xacꞌal jix oc yin mulnail cha toolane bꞌabꞌel. Catuꞌ jaꞌ ebꞌ bꞌabꞌel jix oqui, tzunan xa cha toolane ebꞌ,” ẍi naj patrón tuꞌ. 9Yuxan jaꞌ ebꞌ yeycꞌualil xa jix oc yin mulnail tuꞌ, jaꞌ ebꞌ jix bꞌabꞌi juli. Jun denario stool ebꞌ jix ẍaꞌ. 10Jix lawi tuꞌ xin, jix jul ebꞌ sebꞌ jix oc yin mulnail tuꞌ. Jaꞌ yet jix jul ebꞌ tuꞌ, jaꞌ snaꞌon ebꞌ tol yel miman stool ebꞌ oj ẍaꞌ. Jacꞌalaꞌ pax jun denario chꞌen jix ẍaꞌ ebꞌ. 11Jaꞌ yet jix lawi ẍaꞌon stool ebꞌ tuꞌ, catuꞌ jix steelen sbꞌa ebꞌ yetoj naj patrón tuꞌ. 12Jix yal ebꞌ jaxca tiꞌ: “Jaꞌ ebꞌ naj tzunan xa jix jul mulnail tiꞌ, junxane hora jix mulna ebꞌ naj. Caw laan pax stool ebꞌ naj jix yiꞌ ketoj jon, jaon jix techa cꞌal ecꞌ cꞌu ku tiꞌ xol kꞌakꞌ,” ẍi ebꞌ tet naj. 13Catuꞌ jix yalon naj tet junjun ebꞌ naj tuꞌ jaxca tiꞌ: “Jaach wamigo, cꞌam chin qꞌuextoj tzet jix wal an. ¿Tumi man jun denario oj jix kute cu wa kꞌane xin? 14Yuxan chaꞌ ja tool tiꞌ, paxantoj. Chi el yin jin cꞌul wakꞌon stool ebꞌ tzunan xacꞌal jix oc yin mulnail tiꞌ jaxca je tool chi wakꞌ tiꞌ. 15Jain tiꞌ, ey walon wet wakꞌon jin tumin jaxca bꞌey chi el yin jin cꞌul. Ma skeꞌ stit ja jowal win an, yutol watxꞌ chi wute jin cꞌul tet junoj mactxequel,” ẍi naj patrón tuꞌ tet ebꞌ naj. 16Yuxan, jaꞌ ebꞌ cꞌam niꞌoj yeloc apnoj tinaniꞌ, yel miman oj yun yeloc ebꞌ. Jal ebꞌ miman yeloc apnoj tinaniꞌ, cꞌamxa yeloc apnoj ebꞌ tituꞌ. /Ecꞌal mac awtebꞌil yu Dios, jaywanne pax mac sicꞌbꞌil eloj,/ ẍi Jesús tet ebꞌ.

Chi Yaltej Scamichal Jesús Junelxa

(Marcos 10:32-34; Lucas 18:31-34)

17Jaꞌ yet lalan yatoj Jesús yetoj ebꞌ ánima yul sbꞌeal conobꞌ Jerusalén, jix yawten el ebꞌ lacawan scuywom xol ebꞌ, jix yalon tet ebꞌ jaxca tiꞌ:

18—Ilaꞌla, lalan katoj bꞌey Jerusalén tiꞌ. Jain tiꞌ, caxcꞌal Akꞌbꞌil Wopiso yu Dios xol ebꞌ ket animail tiꞌ, tol oj jin ale oc yul skꞌabꞌ ebꞌ yaawil yakꞌomal xaambꞌal tet Dios, cꞌal yul skꞌabꞌ ebꞌ cuywam yin sley Moisés. Catuꞌ oj yaon oc camich ebꞌ wibꞌan tituꞌ. 19Catuꞌ oj jin yaon oc ebꞌ yul skꞌabꞌ ebꞌ man Israeloj. Oj jin sbꞌuchon ebꞌ. Oj jin smakꞌ ebꞌ. Oj jin locbꞌale a yin culus yu ebꞌ. Jaxa pax yet yox cꞌual oj jin pitzcꞌunele aoj, ẍi Jesús tet ebꞌ.

Jaꞌ Tzet Kꞌanbꞌil Yu Xutx Naj Jacobo Yetoj Naj Juan Tet Jesús

(Marcos 10:35-45)

20Jix apni ebꞌ scꞌaal naj Zebedeo yetoj cꞌal xutx scꞌatan Jesús, jaꞌton naj Jacobo, yetoj naj Juan. Jix ey kaan ix txutxe tuꞌ sattaj Jesús yutol ey tzet chi yoche scꞌul chi skꞌan tet. 21Catuꞌ jix yalon Jesús tet ix jaxca tiꞌ:

—¿Tzet cha woche cha kꞌan ey jin an? ẍi Naj tet ix.

—Jaꞌ yet oj jaach oc yaawil, tol oj wal cha chaꞌey chotan ebꞌ wuneꞌ tiꞌ ja cꞌatan, junoj bꞌey ja watxꞌ kꞌabꞌ, junoj bꞌey ja qꞌuexan, ẍi ix tet Jesús. 22Catuꞌ jix yalon Jesús tet ebꞌ jaxca tiꞌ:

—Jaex tiꞌ, cꞌam chi naꞌcha el je yu tzet che kꞌan ey jin an. ¿Oj mi techa je yu je yakꞌle porobꞌal jaxca oj jin uteleoj? Jaꞌ tzet oj jul wibꞌan, jaxca tol chin akꞌle bautizar yu. ¿Yuxan ta oj techa je yu? ẍi Jesús tet ebꞌ.

—Oj techaoj, ẍi ebꞌ tet Jesús.

23—Yel toni oj jex akꞌle porobꞌal jaxca oj yun wakꞌle porobꞌal. Jaxca syaꞌiloj ecꞌ el wibꞌan an, queytuꞌ syaꞌilal oj ecꞌ el je yibꞌan. Jal pax jin jain tiꞌ, cꞌam walon wet jex jin chotbꞌan ey bꞌey jin watxꞌ kꞌabꞌ ma bꞌey jin qꞌuexan. Yutol jix waꞌnele wan lugar tuꞌ yu cu Mam Dios yu mactxequel ebꞌ oj ey chotan tituꞌ. Yuxan, oj yakꞌ tet ebꞌ, ẍi Jesús tet ebꞌ. 24Jaꞌ yet jix yabꞌen jun tiꞌ ebꞌ laonwanxa scuywom tuꞌ, jix tit sjowal ebꞌ yin ebꞌ cawan tuꞌ. 25Yuxan jix yambꞌale oc bꞌulan ebꞌ lacawan yu Jesús, catuꞌ jix yalon tet ebꞌ jaxca tiꞌ:

—Tol je yotaj xa, jaꞌ ebꞌ eyoc yaawil bꞌey junjun mimej conobꞌ, chi cꞌal yakꞌ mandar ebꞌ. Quey pax tuꞌ ebꞌ mimej winaj xol conobꞌ, yaaw xacꞌal chi yute sbꞌa ebꞌ yibꞌan ánima. 26Jal pax je xol jaex tiꞌ, man jaxca oj tuꞌ oj yunne. Ta ey mac chi yoche caw miman yopiso je xol, sowalil chi oc yakꞌomaloj servil ebꞌ yet cuywomal masanil. 27Yetoj pax oj, ta ey mac je xol chi yoche tol miman yeloc apnoj, sowalil chi oc yakꞌomaloj servil xol ebꞌ yet cuywomal. 28Ilaꞌ jin, jain Akꞌbꞌil Wopiso yu Dios xol ebꞌ ket animail tiꞌ, man yu oj wakꞌle servil yuxan jix jin jul an, tol yu wakꞌwi servil. Jix jin jul yu wakꞌon jin bꞌa camoj, yet watxꞌ ecꞌal mactxequel chi colcha can el wu an, ẍi Jesús tet ebꞌ.

Cawan Winaj Chi Ilwi Can A Yu Jesús

(Marcos 10:46-52; Lucas 18:35-43)

29Jaꞌ yet jix el ebꞌ bꞌey Jericó bꞌey eyecꞌ ebꞌ tuꞌ, ecꞌal ánima jix oc tzajan yintaj Jesús. 30Ey cawan winaj cꞌam chi skeꞌ yilwi chotan ey stiꞌ bꞌe. Jaꞌ yet jix yabꞌen ebꞌ tol jaꞌ Jesús chi ecꞌ el tituꞌ, jix a yaw ebꞌ yin ipal, jix yalon ebꞌ jaxca tiꞌ:

—Mamin, jaach yicꞌaal naj David,* okꞌ ojabꞌ ja cꞌul kin jon, ẍi ebꞌ tet Jesús. 31Catuꞌ jix tenchanele ebꞌ yu ebꞌ ánima tuꞌ, yet watxꞌ chi tzꞌini ebꞌ. Tol yel xacꞌal jix a pax sjowal yel yaw ebꞌ:

—Mamin, jaach yicꞌaal naj David, okꞌ ojabꞌ ja cꞌul kin jon, ẍi ebꞌ tet Jesús junelxa. 32Catuꞌ jix oc linan Naj Jesús tuꞌ. Jix yawtentej ebꞌ scꞌatan, catuꞌ jix yalon tet ebꞌ jaxca tiꞌ:

—¿Tzet che yoche chex wute an? ẍi Jesús tet ebꞌ.

33—Mamin, chi koche chi cu ilwi can a ja wu, ẍi ebꞌ tet Jesús. 34Catuꞌ jix okꞌ scꞌul Jesús yin ebꞌ. Jix yaon oc skꞌabꞌ Naj yibꞌan sbꞌakꞌ sat ebꞌ. Jix jajcha can sat ebꞌ yet jun txolan tuꞌ yu Naj. Jix lawi tuꞌ xin, jix oc tzajan ebꞌ yintaj Jesús.

നിലവിൽ തിരഞ്ഞെടുത്തിരിക്കുന്നു:

Mateo 20: knj

ഹൈലൈറ്റ് ചെയ്യുക

പങ്ക് വെക്കു

താരതമ്യം

പകർത്തുക