Mateo 10

Jix Sicꞌ El Ebꞌ Lacawan Scuywom Naj Jesús

(Marcos 3:13-19; Lucas 6:12-16)

1Jaꞌ yet tuꞌ, jix yawtentej ebꞌ lacawan scuywom Jesús. Catuꞌ jix yakꞌon yopiso ebꞌ yin yiꞌon can el pena espíritu yin ánima. Jix yakꞌon pax can yopiso ebꞌ yin akꞌo can waꞌxoj scꞌul ánima yin yal cꞌal tzet yaꞌbꞌilal, cꞌal yin yal cꞌal tzet syaꞌilal. 2Jaꞌ sbꞌi ebꞌ tiꞌ: Simón, naj chi al-le pax Pedro, yetoj jun yuẍtaj naj chi yij Andrés. Jacobo, yetoj pax jun yuẍtaj chi yij Juan. Jaꞌ ebꞌ cawan tzunan tiꞌ, scꞌaal naj Zebedeo ebꞌ. 3Ey jun chi yij Felipe, ey jun chi yij Bartolomé. Ey jun chi yij Tomás. Ey jun chi yij Mateo, naj tejom el toolabꞌal* yet yalantoj. Ey junxa chi yij Jacobo, naj scꞌaal naj Alfeo. Ey jun chi yij Lebeo, chi yij pax naj yin Tadeo. 4Ey junxa chi yij Simón, yetbꞌi sbꞌa yetoj ebꞌ Cananeo#10:4 Ebꞌ Cananeo, chi yal yeloc apnoj sbꞌi jun bꞌulan ebꞌ chi jowi oc yin naj yaaw bꞌey Roma. Chi yoche ebꞌ chi el yalan ẍejbꞌanil naj yaaw tuꞌ, catuꞌ chi oc jun syaawil ebꞌ yul yet xꞌojli. yet yalantoj. Ey jun chi yij Judas Iscariote, naj jix aon oc Jesús yul skꞌabꞌ camich.

Jix Chejletoj Ebꞌ Lacawan Yu Jesús Yu Stoo Yal-le El Skꞌaneal

(Marcos 6:7-13; Lucas 9:1-6)

5Catuꞌ jix chejletoj ebꞌ lacawan tiꞌ yu Jesús. Jaꞌ yet cꞌamto chi too ebꞌ, jix yalon wan chejbꞌanile tiꞌ tet ebꞌ, jix yalon jaxca tiꞌ:

—Manche jex ecꞌ bꞌey wan lugar bꞌey eyecꞌ ebꞌ man Israeloj. Manaj pax bꞌey wan conobꞌlaj yul yet Samaria. 6Asan bꞌey ebꞌ qꞌueynajtoj xol ebꞌ ket Israelal chex eqꞌui. Yutol jaꞌ ebꞌ, jaxca junoj noꞌ meꞌ chi qꞌueyecꞌoj, queytuꞌ yeoc ebꞌ. 7Chi ecꞌ je yaleloj, tol jaꞌ naj Yaaw a satcan tuxa chi oc can Yaawilal titiꞌ. 8Jaꞌ ebꞌ yaꞌey yu lepra, che yakꞌ can waꞌxoj scꞌul ebꞌ, cꞌal jantaj ebꞌ yaꞌey yu yal cꞌal tzet yaꞌbꞌilal. Che pitzcꞌune can a ebꞌ camnaj. Catuꞌ che yiꞌon can el pena espíritu yin ebꞌ ánima. Tucꞌal chi wakꞌ jun opiso tiꞌ ey jex, yuxan manche je kꞌan je tool tet ebꞌ bꞌey oj je yakꞌbꞌalne tuꞌ. 9Cꞌam cꞌal niꞌoj tzet che yiꞌ yet chex toi. Manche je yiꞌ chꞌen oro, ma chꞌen plata, cꞌam junoj centavo che yiꞌtoj. 10Manche je yiꞌtoj je pa yu yet je bꞌe. Junne je camiẍ che yaocoj yet chex toi. Cꞌam che yiꞌtoj junojxa moan je xanabꞌ, cꞌam che yiꞌtoj junojxa je kꞌojoch. Chi wal wan tiꞌ ey jex, yutol masanil ebꞌ mulnawom, smoo ẍaꞌon sgasto ebꞌ. 11Jaꞌ yet chex apni bꞌey junjun conobꞌ, cꞌal bꞌey junjun aldea, jaꞌ bꞌey sna junoj mactxequel watxꞌ sbꞌeybꞌal chex eeyi, masantaꞌcꞌal chex too bꞌey junojxa lugar. 12Jaꞌ yet chex apni bꞌey junjun na, “Ey ojabꞌ je watxꞌcꞌulal yetoj Dios,” je chi tet ebꞌ. 13Ta yel ey swatxꞌcꞌulal ebꞌ yetoj Dios che yilaꞌ, oj jex chaꞌle yu ebꞌ. Ta cꞌamaj, man oj jex chaꞌle yu ebꞌ. 14Ta cꞌam chex chaꞌle yu ebꞌ, catuꞌ cꞌam pax chi ẍaꞌ ebꞌ yabꞌ tzet che yalaꞌ, chex el bꞌey sna ebꞌ tuꞌ, cꞌal yul sconobꞌ ebꞌ tuꞌ. Che tzic can el spojojal je yajan yu je txꞌoxon eloj tol cꞌam je yalon je yet yin ebꞌ, catuꞌ chex toi. 15Caw yel chi wal ey jex, jaꞌ yet oj jul jun cꞌual chi naꞌle oc yin ebꞌ ánima, yel miman syaꞌtajilal oj ẍaꞌ ebꞌ ma jex chaꞌon tuꞌ yintaj ebꞌ ánima a conobꞌ Sodoma* cꞌal Gomorra.

Jaꞌ Syaꞌilal Oj Jul Yibꞌan Ebꞌ Yet Xa Cristo

16Ilaꞌla, tol chex jin chejtoj xol ánima jaxca tol chin chejtoj noꞌ meꞌ xol noꞌ ooj. Yuxan, listo cꞌal che yute je bꞌa jaxca junoj noꞌ labꞌa caw jelan. Asan xin, suc che yute je bꞌa jaxca noꞌ uch. 17Che yil cꞌal je bꞌa, yutol ey ebꞌ oj jex iꞌontoj sattaj ebꞌ yaaw. Catuꞌ oj jex makꞌle yu ebꞌ yul-laj snail sculto ebꞌ ket Israelal. 18Oj jex iꞌletoj sattaj ebꞌ mimej yaaw, cꞌal sattaj ebꞌ rey jin yaꞌiloj. Jaꞌ tituꞌ oj skeꞌ je yalon can el jin kꞌaneal, cꞌal tet ebꞌ man Israeloj. 19Jaꞌ yet oj jex iꞌletoj sattaj ebꞌ yaaw tuꞌ, manche jex oc bꞌiscꞌulal yu tzet oj je yalaꞌ. Yutol jaꞌ yet jun txolan tuꞌ, jaꞌ Dios oj akꞌon naꞌcha el je yu tzet oj je yalaꞌ. 20Manaj jex oj jex kꞌanabꞌoj, tol jaꞌ Yespíritu cu Mam Dios oj maanen je tiꞌ, catuꞌ jaꞌ oj kꞌanabꞌ je yin. 21Jaꞌ yet jun tiempoal tuꞌ, ey ebꞌ yuẍtaj sbꞌa oj yaoc yuẍtaj ebꞌ yul skꞌabꞌ camich. Ey pax ebꞌ mame oj yaoc yuninal yul skꞌabꞌ camich. Ey bꞌey xin, oj yakꞌle jowal ebꞌ uninale yetoj smam cꞌal xutx, catuꞌ oj yaon oc smam cꞌal xutx ebꞌ tuꞌ yul skꞌabꞌ camich. 22Masanil ebꞌ ánima oj tit sjowal je yin wu cꞌal. Jal pax ebꞌ oj techa yu masanil, oj colchaoj. 23Jaꞌ yet pena chi yute sbꞌa ebꞌ ey jex, bꞌey jun conobꞌ bꞌey ey jex ecꞌoj, elanwej aoj catuꞌ chex too bꞌey junojxa conobꞌ. Caw yel chi wal ey jex cꞌam tocꞌal chi lawi je yecꞌ bꞌey masanil sconobꞌlaj ebꞌ ket Israelal tuꞌ, catuꞌ oj jin jul pax junelxa, jain Akꞌbꞌil Wopiso xol ebꞌ ket animail yu Dios.* 24Cꞌam junoj cuywom ecꞌbꞌan yeloc apnoj yintaj scuywam. Cꞌam pax junoj mooso ecꞌbꞌan yeloc apnoj yintaj spatrón. 25Ta tol laan junoj cuywom yetoj scuywam, watxꞌ ton jaxca tuꞌ chi yunne. Quey pax tuꞌ junoj mooso yetoj spatrón. Jain tiꞌ, jaxca tol yaaw na jin. Jal jex xin, jaxca tol uninale jex. Ey mac chi aloni tol Beelzebú jin, naj syaawil ebꞌ pena espíritu. Ta chi al-le jaxca tuꞌ win an, yel xacꞌal pena oj al-le je yin.

Asanne Ojabꞌ Tet Dios Chi Cu Xiwi

(Lucas 12:2-9)

26Yuxan manche jex xiw tet ánima. Yutol jaꞌ masanil jantaj tzetyetal majan ey tinaniꞌ, oj txeclo aoj. Yetoj jantaj tzetyetal ewan cꞌuan yei, oj akꞌle otajnele eloj. 27Jaꞌ wan tzet chi wal ey jex yin ewantajil, alwej el masanil tet ánima. Yetoj wan tucꞌal chin saꞌ je yabꞌe, alwej el yul-laj calle. 28Manche jex xiw tet ebꞌ chi skeꞌ jex yakꞌon camoj, yutol ¿toj oj skeꞌ yakꞌon cam je pixan ebꞌ? Jaꞌ tet Dios smoo chex xiwi, yutol chi skeꞌ jex yakꞌon camoj, catuꞌ chi yaontoj je pixan bꞌey infierno.* 29Iꞌwej je cuenta yin noꞌ niẍtej tzꞌiquin tinaniꞌ, cꞌam yeloc apnoj noꞌ, cacꞌon noꞌ chi txonle yin centavo. Caxcꞌal cꞌam yeloc apnoj noꞌ, cꞌam cꞌaltaꞌ junoj noꞌ comon cꞌal chi cami, cꞌam chi eyqꞌuey sat txꞌotxꞌ ta cꞌam chi el yin scꞌul cu Mam Dios. 30-31Jaex tiꞌ, yel miman je yeloc apnoj yintaj noꞌ tuꞌ. Jaꞌ xil je jolom masanil bꞌisbꞌil yu Dios. Yuxan, manche jex xiwi.

Jaꞌ Ebꞌ Cꞌam Chi Qꞌuixwi Yaloni, Tol Yet Cristo Ebꞌ

(Lucas 12:8-9)

32Yal cꞌal mactxequel cꞌam chi qꞌuixwi yalon sattaj ánima tol wet an, oj wal oc ebꞌ wetoj sattaj cu Mam Dios eyecꞌ satcan. 33Jal ebꞌ chi alon sattaj ánima tol man wet oj an, oj wal pax sattaj cu Mam Dios eyecꞌ satcan tol man wet oj pax ebꞌ an.

Ey Mac Oj Yakꞌle A Jowal Syaꞌiloj Cꞌal Jesús

(Lucas 12:51-53; 14:26-27)

34Manche je naꞌ tol oj oc watxꞌcꞌulal xol ebꞌ ánima yul yibꞌankꞌinal tiꞌ yutol jix jin jul an. Man oj oc watxꞌcꞌulal xol ebꞌ yutol jix jin jul an, tol oj scajle a sbꞌa ebꞌ, yutol jix jin jul an. 35Yu jix jin jul an, oj scajlen a sbꞌa naj winaj yetoj smam, cꞌal oj scajlen a sbꞌa ix ix yetoj xutx, cꞌal oj scajlen a sbꞌa ix alibꞌe yetoj yalibꞌ. 36Yuxan jacꞌal oc ebꞌ junne nail ye tuꞌ, oj scajle a sbꞌa ebꞌ. Jaꞌ ebꞌ cajat eyoc ebꞌ yul sna.#Miqueas 7:6. 37Jaꞌ mactxequel yel miman yeloc apnoj smam xutx wintaj an, man smoo oj yoc wetoj an. Jacꞌalaꞌ pax ebꞌ tol yel miman yeloc apnoj scꞌaal ma scutzꞌin yul sat wintaj an, man smoo oj ebꞌ yoc wetoj an. 38Jaꞌ ebꞌ cꞌam chi yal scꞌul chi yil syaꞌilal jin yaꞌiloj an, ebꞌ cꞌam chi yal scꞌul chi ale oc yin culus jin yaꞌiloj an, man smoo oj ebꞌ yoc wetoj an. 39Jaꞌ ebꞌ asanne scawil chi syaꞌilne yul yibꞌankꞌinal tiꞌ, oj qꞌueyel skꞌinal ebꞌ yin junelne. Jal ebꞌ bꞌejan scꞌul scam jin yaꞌiloj an, jaꞌton ebꞌ tuꞌ, oj ẍaꞌ kꞌinale tol ey cꞌal yin tobꞌalkꞌinal.

Jaꞌ Ebꞌ Oj Akꞌle Spaj Tet Yu Dios

(Marcos 9:41)

40Jaꞌ ebꞌ chex chaꞌoni, jain chin ẍaꞌ ebꞌ. Jaꞌ ebꞌ chin chaꞌon tuꞌ, lalan pax ẍaꞌon ebꞌ mac jix jin chejontej an. 41Jaꞌ mac chi chaꞌon junoj ẍejabꞌ Dios,* asan yutol ẍejabꞌ Dios, jaxca spaj jun ẍejabꞌ Dios tuꞌ oj yiꞌ, quey pax tuꞌ oj yiꞌ jun chi chaꞌon tuꞌ. Jaꞌ mac chi chaꞌon junoj mactxequel tol watxꞌ sbꞌeybꞌal, asan yutol watxꞌ sbꞌeybꞌal tuꞌ, jaxca spaj oj yiꞌ jun watxꞌ sbꞌeybꞌal tuꞌ, quey pax tuꞌ oj yiꞌ jun chi chaꞌon tuꞌ. 42Yal cꞌal mactxequel chi saꞌon asan junoj waso siiquil jaꞌ yucꞌ junoj ebꞌ jin cuywom, asan yutol jin cuywom, caxcꞌal junoj ebꞌ cꞌam yeloc apnoj. Jaꞌ jun chi saꞌon jun siiquil jaꞌ tuꞌ oj ẍaꞌ spaj siiquil jaꞌ tuꞌ.#10:42 Jaꞌ xꞌotxꞌal ebꞌ Israel caw kꞌaxan txꞌotxꞌ, catuꞌ tajin txꞌotxꞌ pax oj, yuxan jaꞌ yet chi saꞌle junoj waso siquil jaꞌ, jun watxꞌcꞌulal tet ebꞌ ecꞌabꞌwom.

നിലവിൽ തിരഞ്ഞെടുത്തിരിക്കുന്നു:

Mateo 10: knj

ഹൈലൈറ്റ് ചെയ്യുക

പങ്ക് വെക്കു

താരതമ്യം

പകർത്തുക