San Lucas 2

Jesús imuto icapa jalredauca

(Mt 1:18-25)

1Ljiapudamjitena ljiajĩ talricanatinai italricana Romalricu,#2:1 Roma: Yacalre macacue lritalricanatalri njite ljiajĩ Romanonai talricana. Roma tsakja njajica pjiumi ljiajĩ jipai lrimeenacacawa. Augusto Césardalri iipitana.#2:1 César: Talricanati shupa njajica. Lrinaa naniwetaca cushuapaca namaimaca njajĩ yuufacape lrirricuda pjiumi ljiajĩ jipai lritalricanatalri niini. 2Naniweta njajĩ inaiki, Cirenio cadanacu ljia talricanati Siria lricu. 3Nini naacawa njajĩ inaiki nauufacarrumio njajĩ naferrinaipemi, nirse carru nadana neepitana.

4Cayushupa José imutu yacalre Nazaret rikjuite, jipai Galilea ricuda lriacarru Belén riculje, Judea ricuda, jicucarrum ljiajĩ irraelitanai Italricana David; ima lrinakjuitedalrica ljiajĩ José. 5José njite rsua lriumanda María naawa nadanacarru neepitana naniweta carruna nirse, njite rsua María, jurre darruena iwawa ruwedan nacu. 6Nirse cadanacutuana, rsunaana yuukeenatsau rsupacarruena ruenipe. 7Icamina María jipaca ruenipe ipjerriti; ruñampan yamacatishu njite rucadaa lriursuawa maaficalri iñjacape malritsi iñjacarruita lricu, ima curriketsa lricua nemaacarru nainai aajĩ pantirricu.

Angelenai njite nja iwapacape oveja

8Ljiadaminitsa deepica, tsumi Belén yuuya niini piatsakja pana inaiki iwapacape naapirra oveja. 9Njite Dios imenaca enulrikjuite pada angele naikjaolre, niini lricanaca kjaida nanacu lrimatsiacashu; njite njajĩ iwapacape naapirra jurre nafiucawa. 10Niini angele yacu narsu: —"Mafietacatsawa, ima nudeeca irsu yacuti matsiadalri icatimatacada nacaolre njajĩ inaiki jalredauca lricuperri: 11Ljiadaa deepica ljiajĩ David iyacalrerricu Belén, jiicu ljiajĩ Iyumjetacaita, ljiajĩ Fanirri Dios iniwananda lriyumjetacarru njajĩ inaiki jalredauca ricuperri namatsicana yuuya, ljiajĩ Talricanati piketemdalri. 12Yuuketawatsa apada walridalritua imutucao, ñampanda yuursuawa maaficalri iñjacarruita lricu; niiniutsa yaajĩ ajãdalrica ljiajĩ nucaiterri irsu".

13Ljiadanacutsa naurrucu eenu lrikjuite paana angelenai aimadan, lriikjaolre ljiajĩ iinitacada yurrucucao naacarru matsiadalri Dios irsu, naacu cayu:

14"¡Waa matsiadalri Dios irsu, ljiajĩ yenunrsedalri pja pjiumi yuuya!

¡Njajĩ inaiki catimaperri lricapa irsu namaodacautsa naufaca naapiyawaca nacuadata capua nacaolre ricu ljiajĩ Lrimenacanda naikjaolre!".

15Nadia cadanacu eenulriculje nja angelenai, naacu narsuwaca njajĩ iwapacape pirraiti:

—Warsa waawa Belén riculje, wacapacarru ljiajĩ Waminalri icaiterri warsu lri angelete inumalrikjuite.

16Kjeyacalrim nawa Belén riculje njite naajĩcayami naumana, nauketa María, José tsakja, njite nacudapitsa lriursuawa maaficalri iñjacarruita lricu ljiajĩ yempeti walridalri imutucao. 17Nacapacadanacu ljiajĩ yempeti, njajĩ iwapacape pirraiti nacaiteca ljiajĩ yacuti matsiadalri lricaiterri narsu ljia angele lrinacu ljia yempeti María irsu, José irsu tsakja njite nja paana inaiki itsumitacape icapa ljiajĩ walridalri imutucao, 18niini pjiumi njajĩ jimicape ljia nacaiterri njajĩ iwapacape pirraiti currim njajĩ cuca nacaite, 19mitsa María dekja yaajĩ cuanshupacan, niini ruwaopiaca caidalritsa pjiumi cuanca lrinacu ljiajĩ rucapalrina jinana yuucacao. 20Njajĩ iwapacape pirraiti nadia tsenakja nawapacawa ricu naapirra, naacayao naa matsiadalri Dios irsu nacapacapua ljia yempeti cayujĩ lricaitecapishu narsu ljia angele.

José njite María nadee Jesús Dios iipana lricu

21Ocho jalredauca shapudam jicucayami Jesús; José njite María nadeecani Dios iipanalriculje nakjenanatacarrun, njite nacadaa lriipitanao Jesús. Ljiatsa ljiajĩ iipitanati lricaiterri rursu ljiajĩ angele lripjeyatua kewedancanu.

22Cuarenta jalredauca jiyapawa jicucayami Jesús, niini ljinaana yuucakena María irsu njite José tsakja nanaitja carru cayujĩ Dios inaa capishu Moisés idanaca yacuti upidalrim ricu uupi,#2:22 Dios inanda Moisés idanaca. Aajaitejĩ pajicautsan Moisés idananda lricu. nacutsuacacarru jinana nataitacarruena nadejĩca Dios irsu; njite nadeeca Jesús Dios ipana lriculje nacaitecarru lrirshuni. 23Cayupia nanaitjaca ima cayupia lricaiteca ljiajĩ Moisés idananda: —"Atsia cadaa ruenipe rsuajĩ iinarru ruinitanda rursuca, rursutsa rsuenitacani Dios irsuwawa". 24Niini nadeeca yamaapa julritu yeenipe naacarru matsiadalri Dios irsu nanaitja carro cayujĩ lricaitecapishu jlia Moisés idananda.

25Ljiadaa pia jalredauca Jerusalén ricu niini tsakja pada aatsia jiepacada Dios yacu matsia njite lriaca matsiadalri caidalritsa lrirsu. Simeón iwapapia icapa ljiajĩ inulriutsa imatsieta njajĩ irraelitanai, ljiajĩ Dios imenacanda. Espíritu Santo ikitsindata Simeón caidalritsa, 26niini lricada lriajĩ lricapacaotsa ljiajĩ Dios Imenacanda mayamica ipjeyatuan. 27Njite Espíritu Santo ipumenata Simeón icaolrerricu lriacarru Dios iipana lriculje. Njite José, María tsakja nadeeca Jesús Dios iipana lricu nanaitja carru lrirsu cayujĩ Moisés idanacapishu. 28Simeón yaajĩ cuandalrica ljiajĩ Jesús, niini lricapacadanacun ljipa lricudaitani, njite lria matsiadalri Dios irsu, lriacu cayujĩ:

29"Pjia nutalricana, pinaitjenina cayujĩ picaite capishu nursu, njua pirsudalri:

Niini pitaitacadaa picadena mayamica njua pirsudalri ima catimaca njua.

30Nucapjenina ljiajĩ Iyumjetacaita pimenacanda.

31Ljiajĩ piniwananda lriyumjetacarru nacapawerricu pjiumi njajĩ

inaiki jalredauca lricuperri.

32Camarraica narsun njajĩ jalredauca lricuperri curriperri judionaca nataita carru njajica Dios,

njite cacunaacautsa njajĩ irraeljitanai lriikjaote".

33José njite María tsakja currim njajĩ cuca nacaite njemicadanacu nja yacuti Simeón icaiterri Jesús nacu. 34Icamina Simeón icadaa yacuti matsiadalri nanacu, njite lriacu María irsu:

—Atsia cadanacuenautsa ljiajĩ yempeti, jurreutsa irraelitanai imacuadatacapeni, mitsa jurre tsakjautsa njajĩ icuadatacapeni. Lricatjinatacautsa ljiajĩ ajãdalri Dios nacu, mitsa namacuadataotsani, 35niini catjinaa cautsa cuanca nawaopiaca nacaolre ricu njajĩ inaiki. Njite pjia María, inunacalri caiwidalri ipakjantacautsa picaolrerricu lriikjaote.

36Ljiada nacu minitsa niini tsakja aapama pekirruena jiyapetacada Dios yacu irraelitanai irsu, Penuel iitu, ruipitana Ana, Aser inakjuite darrucanu. Cainirri pia yempeti cadanacutuanu, mitsa mayam ruinirri narsu piakena siete uunia. 37Ochenta y cuatro año rursuca rsuajĩ pekirrum maduiyuam. Rutatja Dios inai njite maiñjaca tsakjanu ruacarru matsiadalri Dios irsu panti macade ricu caidalritsa deepjite njite jeerriapjite tsakja. 38Ljiadanacu tsakja ruucao caacu cadanacutua Simeón María irsu njite José irsu tsakja, icamina ruaca matsiadalri Dios irsu, njite rucaite lrinacu ljiajĩ yempeti narsu njajĩ iwapacapacape Dios imenacanda, ljiajĩ inulri iyumjeta njajĩ Jerusalén#2:38 Jerusalén: Lricaiteshupa pjiumi njajĩ Judionai jalredauca lricuperri. ricuperri.

José, María, njite Jesús tsakja nadiacawa Nazaret riculje

39José, María njite Jesús tsakja nanaitjacayami pjiumi cayujĩ Moisés idananda lricu icaitecapishu, nadiawa jipai Galilea riculje, nayacalre Nazaret riculje. 40Njite Jesús itawiña matsia, kjaida tsakja lridaki ricu. Cajĩkjeni njite catimani lriajicapua Dios catsa lriinai.

José njite María nauketa Jesús Dios iipana lricu

41José, María njite Jesús tsakja naamanawa Jerusalén riculje nawacacacarrua lricumana lriipitana Pascua#2:41 Pascua: Nawacaca carrua njajĩ Israelitas nawadacarru cuanpiaca Dios iyumjetaca naferrinaipe yeenipe pjerritinai mayamicalri yuuya Egipto lricu, lripjeya piena namutucao jirrapitakjeti yuuya. cayujĩ nanaitja capishu mana njajĩ irraelitanai. 42Njite Jesús irsupiakena doce año, naa tsenakja nirseo. 43Mitsa yaamicadanacuena ljiajĩ naalri ikjaote nadia tsenakja naapana lriculje. Jesús, currim lridia nainai Jerusalén rikjuite, mitsa José njite María currim naajĩ lriufaca nauya. 44Nawadatja lrinuca nainai napeculricu nja inaiki yacapetsakja nainai, njite padaakena naicao inipulricu; naumacadanacuena nacapa nainai njajĩ njajĩalri njite nja nakitsiñape tsakja, 45mitsa currim naoketani, niini nadia tsenakja Jerusalén riculje naumajĩ carru nirsen.

46Madalridaa shapudam José njite María tsakja naajĩcayami nauma Jesús, neena nauketani Dios iipana lricu, lriufaca nacudapi njajĩ Judionai icanantacape Moisés idananda nacu. Lriwapa ljimi narsu njite lritatja tsakja ljimiuna lrinacu ljiajĩ nacaiterri nacu. 47Njajĩ jimicaperri lrirsu currim naajĩ cuajica cajĩkjecani lridietacadanacu narsu yacuti natatjawerricuni. 48José njite María tsakja nacapacadanacun currim naajĩ cuanca naacu; niini ljidua yacu lrirsu:

—¡Jurre pima wafiucawa! currim nirse wajiacacawa wajĩkje waoma pjia.

49Njite Jesús shepana, lriacu narsu:

—¿Cuada yaajĩ yuma njua? ¿Capja currica yaajĩ nursucatsa aaca njuajĩ Njunirri iipana lricu?

50Mitsa currim njajĩ cuanshupaca ljiajĩ lricaiterri narsu.

51Icamina lridiaca nainai nayacalre riculje Nazaret, njite lrinaitja minitsa narsu cayujĩ nacaite capishu lrirsu. María iwaopia pjiumi lrinacu ljia yacuti caidalritsa. 52Njite Jesús itawiñawa ljiwalripaca nacu njite iwaopiakjeti nacu tsakja. Catima Dios icapaca lrirsu njite njajĩ inaiki tsakja.

നിലവിൽ തിരഞ്ഞെടുത്തിരിക്കുന്നു:

San Lucas 2: kpc

ഹൈലൈറ്റ് ചെയ്യുക

പങ്ക് വെക്കു

പകർത്തുക