Evikholwa 13
13
Baranaba nende Saulo Vawulwa Nokhuchumwa
1Khwali nende avanabii nende avekesi mukanisa lia Antiokia: Baranaba, Simoni oyu valanganga vachi Omumali, Lusia wa Kurene, Manaeni mulala khu avesiina sia Herode omuchuki nende Saulo. 2Olu vali nivenamira Omwami alala nokhweyima esiokhulia, Roho Muchwenufu kawola, “Njaulire Baranaba nende Saulo vakholere emilimo eki navalangira.” 3Nivakhamala okhweyimana esiokhulia alala nokhusala, vamala vavasalira mana vavalekhula vachie.
Avachumwa Verwacha Kupro
4Baranaba nende Saulo vachumwa nende Roho Muchwenufu vachia Seleukia, okhuchula eweneyo vachira muliacho vola mwikinga lia Kupro. 5Olu vola Salami, verwacha ekhuwa lia Nyasaye musinagogi ya Avayahudi. Vawukula Yohana okhuva omuyetereri wawe. 6Vakenda mwikinga mwosi vola awunju aalangwa mbo Pafo, vanyolao owamayia mulala, omunabii wowuveyi owa Avayahudi, owalangwa mbo Bari Yesu. 7Kali alala nende omwemirisi wekinga elio olangwa mbo Sergio Paulo, omunju omukesi. Kalanga Baranaba nende Saulo mana kavacheveresa nikenya okhuwulira ekhuwa lia Nyasaye. 8Owamayia mbo Elima (Njeliali elicha lilie mu Olugiriki) kavakania natema okhwikalira omwemirisi oyo achakhola achio kalonda esuvira lia Avakristo ta. 9Nausa Saulo, owalangwa elicha lindi mbo Paulo, kamukhang'asa mumoni nikechuye Roho Muchwenufu 10mana kawola, “Ewe mwana wa setani, ewe omusiku wowulungi, owechula owuveyi wosi nowulung'a, sunyala walekhakho okhukotiakotia engira enungi echia Omwami tawe? 11Khanu chekeresa, omukhono kwa Omwami kwenya okhukhwikhakho. Ochia okhuofula mana khusikha siolanire sikene onyale okhuwonakho enyanga tawe.” Awene nawene kawona efumbi nesirima kanja okhwavasa natakha omunju amutire omukhono. 12Olu omuchuki kawona akali nikakholekhire kamala kasuvira, esikira amekeso ka Omwami kamusindusa muno.
Mwitookho lia Antiokia mu Pisidia
13Paulo navasie vengira eliacho okhuchula Pafo vachia vola mwitookho lia Perga eliri Pamfulia. Yohana kavalekhayo kakoola Yerusalemu; 14vachianakana okhuchula Perga vola mwitookho lia Antiokia eliri Pisidia. Olutalo lwesabato vamala vengira musinagogi mana vekhala aasi. 15Nivakhasoma amalako ka Musa nende amaandiko kavanabii, avemirisi vesinagogi vavachumira ekhuwa nivawola, “Vasiefwe nimulikho nekhuwa liokhutinyirisa avanju, liwole.” 16Paulo kenyokha kekesa nomukhono kukwe mana kawola, “Vana va Israeli, nende enywe mwesi avaria Nyasaye muchekerese. 17Nyasaye wa Avaisraeli kachoola avakuka vefwe mana kalomba avanju vava avakhongo olu vali nivamenyire Misri, mana kavachusayo khulwowunyali wuwe. 18Kavefwira musichimi khulwemiaka amakhumi kane 19Kasalania evialo saba eviali nivimenyire Kanaani mana khulwemiaka emia chine nende amakhumi kachanu kavaweresa amalova ngomukavo kwemiandu, mbo vamenyemo. 20Okhuchula olwo kavaweresa avakhalaki mbo vave nivavemirira okhwola muvise via nabii Samueli. 21Vamala vasava mbo vosi vavekho nomwami ngevialo vindi; Nyasaye kavawa Saulo, omwana wa Kishi, owekholo ya Benyamini mbo ave mwami wawe khumiaka amakhumi kane. 22Olu kali nikakhamuchusakho, kamala kemekha Daudi okhuva omwami wawe, oyu kamala kachusira owuloli nawola achi, ‘Daudi omwana wa Yese ono ngwoyu mbwenemo oyu omwoyo kwange kwenyire, omunju oli khwoseresa ako kosi aka nenya kakholekhe.’ 23Okhuvichira mulwiwulo lwa Daudi, Nyasaye kalechera avana va Israeli Omuwonia, oli Yesu Kristo, nga kali ni kalaka. 24Yesu nasiri okhwicha, Yohana kerwacha owuvatiso weliekanira khuvanju vosi Avaisraeli. 25Olu Yohana kali namalirisa emilimo kikie kawola achi, ‘Mupara mbo nise anu? Sinise oyo oyu mwalindanga tawe. Nausa enyuma wange alikho kacha oyo oyu ata ese sinyala okhukangulula esiya chiesiracho sisie tawe.’
26“Vasiefwe, avana venju ya Abrahamu, nende avo avaria Nyasaye mwinywe, amakhuwa kouwonia wuno wuchumiywe efwe. 27Okhuvera mbo avamenya va Yerusalemu nende avami vawe, sivamumanya ta, nundi sivawulira amakhuwa kavanabii akasomwa wuli lutalo lwesabato ta, voseresa amakhuwa kavanabii olu vamukhalakira esikhalakiro siefwa. 28Nolu kava mbo sivamunyolakho nende esikha siosisiosi esiolana okhukhalakirwa efwa tawe, vasava Pilato mbo amukhalakire esikhalakiro siefwa. 29Olu vali nivakhoseresa kosi akali nikaandikwa okhulondana naye, vamuchusa khumusalaba mana vamuyira musirindwa. 30Nausa Nyasaye kamwinyosa okhuchula muvafu, 31mana khunyinga enyingi kawonekhera avo avachula naye Galilaya nivachia Yerusalemu. Avo khanu njavaveri vave emberi wavanju va Israeli. 32Efwe khanu khuvalechera amakhuwa malayi mbo ako aka Nyasaye kalakirisa ava papa vefwe, 33kakhakoseresa khwifwe avana vawe okhuvichira mukhusisimusa Yesu okhuchula muvafu. Nga kaandikwa mu Saburi yakhaviri,
‘Oli Mwana wange,
nyingayino khuwukuye.’
34Okhuvera mbo kamwinyosa okhuchula muvafu, mbo alove khukolayo nundi aolereyo tawe, Nyasaye kawola kano,
‘Njia okhukhuwa ekhavi enjwenufu nundi echiang'ali echi nalaka Daudi.’
35Nundi mu Saburi yindi awola achi,
‘Suchia okhulekha omuchwenufu wuwo aole ta.’
36Daudi nikakhakhalavanira elienya lia Nyasaye munyinga chichie kamala kafwa, kasikhwa alala nende ava papa vave mana kaola, 37nausa oyo oyu Nyasaye kenyosa okhuchula muvafu sikaola ta. 38Khanu kenyekha mumanye vasiefwe mbo okhuverwa owoni wenywe khuchulana nende omunju ono, 39ne nundi okhuvichira muniye, wulimunju osuvira alekherwa mu kosi aka muchakhalekheywe nende amalako ka Musa tawe. 40Khanu muve meso mbo akavanabii vawola kachamwekholekhakho ta:
41‘Chekerese, enywe avamocheresa, yesindukhe ata mufwe;
esikira mbo ndakholanga esinju munyinga chienywe,
esinju esi muchalisuvira ata nolu omunju avawolera.’ ”
42Nga Paulo nende Barnaba vachula, avanju vavasava mbo vavawolerekho amakhuwa kano nundi musabato yilondakho. 43Olu omukhung'ano kwomusinagogi kwawa, Avayahudi avangi nende avalondi vedini ya Avayahudi valonda Paulo nende Baranaba. Avachumwa vavalomalomakho mana vavatinyirisa vachianakane okhumenya mumbavasi chia Nyasaye.
44Esabato yalondakho, avanju aambi etookho liosi vakhung'ana alala okhuwulira ekhuwa lia Nyasaye. 45Olu Avayahudi vawona avanju nivewusise evituma, vava neuva, vanja okhukalusania aka Paulo kali nawoye nokhumutukha. 46Paulo nende Baranaba valomaloma namaani nivawola, “Kenyekhanga wusa kachio mbo ekhuwa lia Nyasaye lichangirire okhulomaloma khwinywe. Ne esikira mbo mulilovire, nundi mwekhalakira mbo simwolanire okhunyola owulamu wuchaliwa tawe, khanu khwakhalekhana nanywe khuchiira Avachali Avayahudi. 47Esikira Omwami achulakirisise nawola mbo,
‘Ekhukholire ove owulafu wa Avachali Avayahudi,
mbo oleche owuwonia musialo siosi.’ ”
48Olu Avachali Avayahudi vawulira kano vasangala muno mana vafumia ekhuwa lia Nyasaye, avovosi avali nivawuywe mbo vanyole owulamu wa wuli lwosi vasuvira. 49Ekhuwa lia Omwami liasalana mumbeka chiosi. 50Nausa Avayahudi vachwanjwania avakhasi vakhongo avali nivasuviye nende avasacha vakhongo mwitookho omwo mana vameta esinyasio khu Paulo nende Baranaba, vamala vavatimania eweneyo. 51Avachumwa avo vasisimula olufu khuvirenge viawe mukhusinyikha mana vachia awunju mbo Ikonio. 52Avalondi vechulamo owusangafu nende Roho Muchwenufu.
നിലവിൽ തിരഞ്ഞെടുത്തിരിക്കുന്നു:
Evikholwa 13: LNTPP
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©The Bible Society of Kenya, 2024
