Ujọn 6
6
Ujeso a ke bendi asi lisi kugbe lihwo le ke afee le bendi asi lihwo lizi
(Mat 14:13-21; Mak 6:30-44; Luk 9:10-17)
1Nyọng ashin ki mbee, Ujeso a bo gbe ndo he igbindi umbwo angwu be ko le Ugalili. Be mbee ko umbwo umen ana le Utiberias. 2Nya ana a ma ndọ ashi u gye ha, bendi be tye kwuo pwọm he likọye be nde bikwole-kuhwo biwọm abi a shi he bendi-angbam ambee-ale. 3Ujeso le bendi-utung bema be ma mbo ukwel tang he kusi, bel kwu ko. 4Ha he kunyọng kumen ana, kunyọng kipam Ijuus ashi be ko le kipam agbele-gyọng ku ma fel kpee-kpee.
5Ujeso a bel ashi shun kel-kel-kel, a nde le bendi be tye kwuo be ba hwaa le he. A kung bii Ufilip le, “He kung nyin li nde ibred ndyeb ke bendi aben puu be zi?” 6Ujeso a kung Ufilip le he kusi he u gyo ashi u kọng a. Ujeso ugyang a ma ngye ashi nyin u shi ọ ma.
7Ufilip a fan he le, “Ma li kung unde aki he kigem lize ọ, u ha ndu kpa ndyeb ibred le undi-undi u zi ye.”
8Undi-utung Ujeso ken angwu be ko le Andru, unwaa-nam Usaimọn Pita, a kung de Ujeso le, 9“Unwa-ani ungikye u yi nyin angwu u yi le bikem ibred bidyọng le ikwan ifee. Ukpọ inwaa biwọm anyin i kpel kigegang bendi aben na a?”
10Ujeso a de bendi-utung bema le, “Ma de be le be kwu ko.” Bikpam bi ma go ha kaang, be ha bel kwu ha. Bendi puu be bel kwu ko. He liwu libel, bekandi bengikye befe-befe be maa mbee asi lisi kugbe lihwo le kugbe kafee le bendi asi lihwo. 11Ujeso a kung ibred ana, u pee Unim. A kung angi bun puu kung ke bendi abe be kwu ko. A mbee kung ikwan shi kitaa a ken. Undi uyang-yang a zi gwul kitaa a kee.
12Be gwul puu, Ujeso a de bendi-utung bema le, “Ma gbọng bigem abi be zi bi teng, he uwun ken ọ u ban kididing ye.” 13Bendi-utung bema be gbọng abi puu, bi sho bitetel lihwo le bi bifee.
14Bendi puu abe be yi ha, be nde kikwole-kuhwo ashi Ujeso a shi, be kung de le, “Kigyang-kigyang, ungikye angwun u yi utye-ugie kisọm Unim angwu le-iti Unim a ma de le u ba ba he igye anyin a.” 15Ujeso a ngye le bendi abena be ma kam le be kwa he kusu he ikeb. He ashina a bo gbe le ha gye he kigie ukwel ashi le hel ututeb.
Ujeso a tan he likwu umbwo
(Mat 14:22-33; Mak 6:45-52)
16Likwu-lukwu li gyeb, bendi-utung Ujeso be shul gye he ungwu umbwo ukandi, 17le ngwee he kinọng lishọ tem, be gya he igbindi umbwo angwel, he be gye he Ukapanum. Nya ana be maa gye, kusu ku gye be. Ha he kunyọng kumen ana, Ujeso a ma wa be hwaa le be ye. 18Kufem ku keb apu-ale umbwo a keb ato-ale kibibi-kibibi. 19Be gye kushu wu mbee ilamba ikie ha inde, be nde Ujeso u tan he likwu umbwo ndọ ashi hwaa le be. Be fel he kushel kaang. 20Ujeso a kung de be le, “Ki yi-m mi a, ma shel ye.” 21Be ma gọ igọ kpe-e ngwee ha he kinọng kushu-kwan. Nyọng a ngwee ha ngwee-ngwee, kinọng ki wu he ugoigye he kipi be ma ndọ ashi gye.
22Ashi a taa, bendi abe be ma so le he igbindi umbwo he kipi Ujeso le bendi-utung bema be ma be, be nde le kinọng ki ma teng nya ken a, be ngye le nyọng bendi-utung Ujeso be ma kung kinọng ashina gbe, Ujeso a ma gye utung ha abe ye. 23Binọng lishọ bisuso bi ma be le he Utiberias be naa gwaa ha he kiteng kimen ashi uhwu-hwo bendi be ma zi lizi angi Ada Ujeso a ma pee Unim he kuhwo angi. 24Nyọng bendi abena be nde le Ujeso u tem yi ha ye, bendi-utung bema ọ be tem shi ha ye, be mbo ngwee he binọng lishọ abina bo ndo he Ukapanum, be la shun Ujeso.
Ujeso na u yi lizi angi li ke likpan
25Nyọng bendi abena be wu he ungwu umbwo, be gbe kpe igbindi, be nde Ujeso ha, be bii he le, “Itisha ukandi, he kunyọng ahwu kung wo gbe tang nyin?”
26Ujeso a fan abe le, “Mi da amen kigyang-kigyang, ma tan kee mi likọye ma ma zi ibred angyel gwul a, ma kee mi le gbe ma nde bikwole-kuhwo abi mi shi a ye. 27Ma shi aki kee lizi angi he kanwaa kunyọng zang li mbee i a ye, ma shi aki kee angi li ngyọ igye kpam hwan. Life li ka bendi likpan ligyang angyel angi li yi le likel ye. Kitaa lizi ashina na mi Unwaa undi-gye, mi ke men abe Unim Atyagi a tyung amen gboo le ufe na a sọm mi.”
28Be kung bii Ujeso le, “Kibang kitaa kiwọm ashi li shi he ki nyin Unim?”
29Ujeso a fan abe le, “Kiwọm ashi ma shi he ki nyin Unim ki yi le ma bọng ha ami angwu ufe a sọm be he igye anyin.”
30Be kung de-e le, “Gbe ki yi kitaa ana, kibang kikwole-kuhwo ashi wo shi li nde shi le ashi atyan, li ha bọng ha awo? Kibang ashi wo shi tyung li? 31Le-iti nyọng betie-tyan be maa tan he igbaa-libeb, be ma zi lizi angi li be le he kusi angi be ko le imana, nya ana be fee he kushia Unim le, ‘Unim a sọm lizi le he kusi ke be le be zi.’ #6:31 Ligye 16:4; Unehimaya 9:15; Agyam 78:24, 25”
32Ujeso a ha de be le, “Ndọ mi de men kigyang, lizi angi le-iti Umosis a ma ke betie-men ana, li yi ligyang angi le he lifung-atabe a ye. Atyagi na u ke men ligyang angi le he lifung-atabe. 33Lizi angi Unim u ke bendi, li yi angi li be le he lifung-atabe le likpan ke igye a.”
34Be kung de-e le, “Ukandi, ke li lizi limen ana mbee kunyọng.”
35Ujeso a fan abe le, “Mi na mi yi lizi limen ana angi li ke bendi likpan. Undi uyang-yang angwu a be hwaa le mi, itung i tem ndo he ye. Undi uyang-yang angwu a bọng ha ami, kigyọ ki tem gyo he ye. 36Ukpọ, ki yi nya ana mi be de men a. Ma na men ma nde-m le ashi ọ, ma bọng ha ami ye. 37Bendi puu abe Atyagi a kung fe-m he kubwo, be ba hwaa le mi. Undi uyang-yang angwu a be hwaa le mi, mi ndo he tem item ye, 38likọye mi be le he lifung-atabe le mi shi nyin Atyagi angwu a sọm mi a, mi be le mi shi nyin kuhwo-gi a ye. 39Kiwọm ashi ki nyin Atyagi angwu a sọm mi ki yi le mi nim undi ken ọ le he liwu bendi abe a kung fe-m he kubwo ye, mi kam abe, mi be wum abe he liti angi igye anyin i be mbee. 40Atyagi a kee le bendi puu abe be nde-m, mi Unwaama, be bọng ha ami, be kwu le likpan kunyọng angi li ngyọ igye. Mi ba wum abe le he lihwu he liti angi igye anyin i mbee.”
41Bekandi Ijuus be keb inem anem-ale gbe le Ujeso likọye a de le ufe u yi lizi angi li shul le he lifung-atabe be he itang. 42Be de le, “Ujeso ugyang, nde le unwaa Ujosef a ukpọ? Li ngye atyam le anam. Fe, ki shi na a, u fel de le ufe abe le he lifung-atabe a?”
43Ujeso a de be le, “Ma tyang inem anem-ale he liwu limen. 44Ki yi le undi angwu u ha ndu be hwaa le mi faale afa-ale Atyagi angwu a sọm mi be he igye anyin na a be le he ye. Undi uyang-yang angwu a be hwaa le mi, mi ba wum he le he lihwu he liti angi igye anyin i mbee. 45Bitye-ugie kisọm Unim be ma fee ndọ le-iti le: ‘Unim u hwọ bendi puu.#6:45 Azaya 54:13’ Undi uyang-yang angwu a gyo igie Atyagi, u hwọ kpe kiwọm le ha, u ba hwaa le mi. 46Ki yi le undi angwu a wa be nde Atyagi le ashi ye, mi angwu mi be le he Unim ufe-ufe na mi nde-e. 47Mi da amen kigyang a le undi uyang-yang angwu a bọng ha ami u kwa le likpan angi li yi le likel ye. 48Mi na mi yi lizi angi li ke bendi likpan. 49Ma na le-iti betie-men be ma zi lizi angi be ko le imana he igbaa-libeb ọ, befe puu be ma hwo. 50Ukpọ lizi ligyang angyel angi li be le he lifung-atabe be he itang, undi uyang-yang angwu a zi angi, u tem hwa ye. 51Mi na mi yi lizi limen angi li be le he lifung-atabe be he itang angi li ke bendi likpan. Undi uyang-yang angwu a zi lizi limen i, u kwa le likpan ngyọ igye kpam. Lizi angi mi ke bendi le he be be kwu le likpan li yi inyia-hwo igi a.”
52He kuhwo igie angi Ujeso a ma kọng ana, bekandi Ijuus be ma fel he ingyo keb abi-ale bende le, “Ki shi na a, u de le u kung inyia-hwo ima ka li li zi?”
53He ashina, Ujeso a kung de be le, “Mi da amen kigyang a le, gbe ma zi inyia-hwo Unwaa Undi-gye ye, ma ngwo anung ama ye, ma kwa le likpan ha amen ye. 54Ukpọ undi uyang-yang angwu a zi inyia-hwo igi, u ngwo anung agi, u kwa le likpan angi li ngyọ igye kpam, mi be wum he le he lihwu he liti angi igye anyin i mbee. 55Inyia-hwo igi na i yi lizi ligyang angyel, anung agi a shi kingwu-ngwo kigyang ashel. 56Undi uyang-yang angwu a zi inyia-hwo igi, u mbee ngwo anung agi, ha u yi ubibi ken ha ami, mi shi ubibi ken he ahe. 57Atyagi angwu a sọm mi na u ke likpan. Nya ana mi kpe likpan le ha ufe a, na undi uyang-yang angwu a zi inyia-hwo igi u kwu le likpan gbe ha ami. 58Mi mbee bwan da amen le, inyia-hwo igi na i yi lizi ligyang angyel angi li be le he lifung-atabe be he itang; lizi angi betie-men be ma zi he ugbaa-libeb ana na li yi lizi ligyang angyel a ye, likọye ma na be ma zi angi ọ, be ma hwo, ukpọ undi uyang-yang angwu a zi lizi angi mi ke-e, u tem hwa ye ngyọ igye.” 59Ujeso a ma kọng igie angina le-iti nyọng a ma hwọ bendi he ushọm Unim angwu be kwu liwu he kubọng Ukapanum.
Bendi-utung Ujeso gbam be gbe tyang he
60Bendi-utung Ujeso gbam abe be ma gyo igie angi Ujeso a kọng ana, be de le, “Igie anyin i yi ikaa-ikaa ọ. Ayang u shi kimen ana mbee?”
61Ujeso a ngye ha lityam lima le be nem inem gba le igie ima. A kung bii abe le, “Ashi mi kọng i ki wee amen abwo a? 62Kibang ashi ma be kọng, gbe ma be nde-m mi Unwaa undi-gye mi tem item gye he kusi he kipi mi ma yi? 63Ukatia Kunyọng na u ke likpan, agwo a ka kiwọm ye. Igie angi mi kọng ha amen i, i sho le Ukatia Kunyọng le likpan. 64Ukpọ men besuso ma bọng ha ami ye.” (Kung le ha linde-linde, Ujeso a ngye bendi abe be be bọng he ahe ye, u mbee ngye angwu u be ndyeb he zi.) 65Ujeso a mbee de le, “Fe na ki tan le shi mi de men le, ki yi le undi angwu u ha ndu be hwaa le mi faale afa-ale Atyagi na a ke-e ikeb na ye.”
66He ashin bendi gbam abe be ma pwọm Ujeso be tem item, tem pwọm he gye kushu ye.
67Ujeso a kung bii bendi-utung bema abe lihwo le be befee le, “Ha men ufe? Men ọ ma mbee tem a?”
68Usaimọn Pita a fan he le, “Ada, bel li nya mbee tem la hwaa le ayang a, gbe wo ufe-ufe na igie igang i ke likpan angi li ngyọ igye. 69Bel li tọ bọng ha awo, li mbee ngye le wo yi Unwaa Unim angwu u yi katia a.”
70Ujeso a kung de be le, “Nde le ma ngye le mi na mi waa amen bendi lihwo le be befee? Ukpọ undi ken u yi undi ubibi a.” 71(Ashi a ma kọng ana, a ma kọng gbe le Ujudas, unwaa Usaimọn Iskariyọt a. Ma na Ujudas a ma yi he liwu bendi-utung bema abe lihwo le be befee ọ, a ma kam le u ndyeb he za.)
നിലവിൽ തിരഞ്ഞെടുത്തിരിക്കുന്നു:
Ujọn 6: KUIL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
