Ujọn 5
5
Ujeso a mbee undi he umbwo Ubesaida
1Nyọng ashin ki mbee, le gbe ki ma fel kunyọng ahwu Ijuus i maa shi kipam kibel, Ujeso a mbee gye he Ujeruselem. 2Ki ma yi le kubel umbwo ususo ha he Ujeruselem gwaa he ungwu-likọng kipo itia. Be maa ko umbwo umen ana he igie Aramaik le Ubetesda. Ha, ki ma yi le bigigyo bidyọng ha ungwu-likọng. 3Ha na bendi-angbam gbam be ma nde, abe be hwọ ashi ọ, abe be hwo abee ọ, abe be hwo agwo atyetye-atyetye ọ. [Be maa kwa nyọng kunyọng ahwu umbwo u nyung he abwo. 4He kunyọng-kunyọng Udengel Unim u shul ba he itang ba nyung umbwo ana. Nyọng umbwo a nyung, ukpi-kikwu undi angwu a shul gye ha umbwo u mbee, ma u mbu kitaa lingbam kiyang-yang ọ.] 5Ki ma yi le ungikye ususo angwu a ma mbu lingbam ki fel aze lisi le ngi lihwo le ngi adyọng-ikie. 6Ujeso a le wu ha, a nde-e u yi nde ha, a ngye le a ngbam ki gbe kigbe ma. A kung bii he le, “Wo kee le wo mbee a?”
7A fan he le, “Ukandi, nyọng umbwo u nyung, ki yi le undi angwu u kwu-m abwo gye he umbwo ye, tete mi kaa le mi shul gya ha, undi ususo a tang teng mi.”
8Ujeso a de-e le, “Bo kinaa, kan ugaa ugang ndu tan.” 9Nya abwo-abwo a bo, kung ugaa uma u fel tan.
Liti angi Ujeso a ma mbee ungikye umen i li ma yi liti-uwel Ijuus a. 10He ashina, bekandi Ijuus be de angwu a ma mbee ana le, “Wo ngye le kunyin ki yi liti-uwel lityan a ye a? Uten a bọng le wo kung ugaa tan le he ye.”
11Undi umen ana a fan abe le, “Undi angwu a mbee mi, ufe na a de-m le mi kung ugaa ugi ndu tan.”
12Be kung bii he le, “Ayang a da-a le wo kung ugaa ugang ndu tan?”
13Ungikye umen i, a ngye undi angwu a mbee he ye, likọye Ujeso a shang gbe ngwee he liwu bendi, le gbe bendi be ma sho ha gbam.
14Ki gbe kigbe ye, Ujeso a ha le nde-e he Ushọm Unim, a kung de-e le, “Nde, wo mbee ma. Tem shi kiban ye, teng kibibi ashi ki ban hwo ashin ki ba hwa le wo.” 15Ungikye umen i a le de bekandi Ijuus le Ujeso na a mbee he.
Ikeb unwaa
16Le gbe Ujeso u maa sha biwọm bimen i he ati uwel Ijuus, bekandi Ijuus be maa fel tel he. 17Ha he kunyọng kumen ana Ujeso a ma de Ijuus le, “Atyagi u sha aki mbee kunyọng, ki yi kpe-kpe le mi ọ mi shi aki na ufe.” 18Igie angina i ban bekandi Ijuus, be fel kam le be gwa he likọye a ban uten liti-uwel libel, u mbee ko Unim le Atyam, ashi ki ze le a kung kuhwo-ma le u yi bizang ha Unim.
19Ujeso a fan bekandi Ijuus ana le, “Kigyang-kigyang na mi de men i le mi Unwaa Unim, mi yi le ikeb le mi sha kiwọm kiyang-yang le kuhwo-gi ye, mi kee-kee sha abi mi nde Atyagi u shi a, likọye kiwọm kiyang-yang ashi Unim u shi na mi Unwaama ọ mi shi. 20Le gbe ki nyin Atyagi le mi Unwaama, u tyung mi biwọm puu abi ufe-gyang u shi. U ba tyung mi biwọm abi bi dyam hwo abi ma nde i ọ, he ki kwu amen he kuhwo. 21Nya ana Atyagi u shi bendi abe be hwo be tem wum, u ke be likpan, kitaa a ken na mi Unwaa ọ mi kung likpan ke undi uyang-yang angwu ufe-gyang a kee. 22Atyagi u tang ushe undi ye, a kung ikeb ke-m mi Unwaama a, le mi tang ushe bendi puu. 23A shi kitaa ana le he bendi puu be ke-m mi Unwaama ife, nya ana be ke Unim Atyagi. Undi uyang-yang angwu a ke-m mi Unwaama ife ye, ha a ke Atyagi ọ ife ye, likọye Atyagi na a ma sọm mi be he igye anyin.”
24Ujeso a gye kushu kọng le, “Kigyang-kigyang mi de men le undi uyang-yang angwu a gyo igie igi, u bọng ha Atyagi Unim angwu a sọm mi be he igye i, u kwa le likpan kunyọng angi li ngyọ igye. U tem hwa ye ngyọ igye kpam. U tem naa he ushe Unim ye. 25Kigyang-kigyang na mi de men le kunyọng ku ba le ha, mi de le ku fel ọ ma, ahwu bendi abe be hwo be gyo lingbam ligi, mi Unwaa Unim. Bendi abe be gyo lingbam limen i be wum. 26Nya ana Unim Atya-tyan u yi le ikeb le u ka likpan, kitaa kimen na a ke-m mi Unwaama, ikeb le mi ke likpan. 27A mbee ke-m mi Unwaama, ikeb le mi tang ushe bendi likọye mi yi Unwaa undi-gye a.
28“Ashi mi kọng i ki kwu amen he kuhwo ye. Baale kunyọng ku fel ahwu bendi puu abe be hwo be gyo lingbam ligi, 29be wum le he lihwu. Bendi abe be ma shi binunung, be wum ba fel le likpan ligyang angyel angi li ngyọ igye. Abe be ma shi bibibi, be wum le naa he ushe Unim angwu be le kpe kingie.” 30Ujeso a gye kushu kọng le, migyang mi yi le ikeb le mi sha kiwọm kiyang-yang le kuhwo-gi ye, mi kee-kee sha kiwọm he ikeb Unim angwu a sọm mi be he igye i a. Mi tang ushe ọ na a de-m le mi tang a. He ashin, ushe ugi u yi kpa-kpa likọye mi sha ashi ki nyin mi a ye, mi sha ashi ki nyin Atyagi angwu a sọm mi a.
Ipọng gbe le Ujeso
31“Gbe mi tye ipọng gbe le kuhwo-gi, ipọng igi i yi kigyang ye. 32Ki yi le undi ususo angwu u tye ipọng gbe le mi le mi yi Unwaa Unim a. Mi ngye le u kọng kigyang gba le mi.
33“Undi umen ana na u yi Ujọn. Ufe na le-iti men ma ma sọm kisọm bii he le u de men ashi ki yi kigyang, a ma de men kigyang. 34Mi kee undi a le u kọng ke-m ye, mi kung igie angi undi-gye u kọng gbe le mi a kindee-kindee ye. Ukpọ mi kee-kee kọng abin le he men ma fel le likpan kunyọng a. 35Ujọn a ma yi na kimọ-kinde ashi ki taa kaang, ma kpe igie ima he kanwaa kunyọng zang, ma ma yi le igọ likọye kikung-gboo kima ki tyung amen kigyang.
36“Ukpọ ki yi le biwọm bisuso abi bi dyam hwo igie Ujọn abi bi tyung le Atyagi na a sọm mi. Aki amen angi Atyagi a ke-m ikeb mi shi i, a tyung le kigyang-kigyang Atyagi na a sọm mi. 37Atyagi angwu a sọm mi, ufe-gyang a kọng gbe le mi le mi yi Unwaama a. Ukpọ men ma wa gyo lingbam lima ngye ye, ma wa nde-e ngye ye, 38ma shi le igie ima he atyam amen ye, likọye ma bọng ha ami, Unwaama angwu a sọm, ye. 39Men ma kung kunyọng kaang shun kushia Unim lilili le ugim le kushia ana ku tyung amen kukwo likpan angi li ngyọ igye kpam. Kigyang-kigyang, kushia ahwuna ku kọng gba le mi a, 40ma na ọ, ma swan le ma ba hwaa le mi he men ma kpe likpan limen ana ye.
41“Mi kpa ipee bendi-gye ye, 42Ukpọ mi ngye amen, mi ngye le ki nyin amen le Unim he atyam amen ye. 43Ki nung ngwọng le ki nyin amen le Unim ye likọye ma swan imi angwu mi be he lizen Unim Atyagi. Ukpọ gbe undi abe hwaa le men he lizen lima ligyang, ma kpa he. 44Ma nya bọng naa nyọng ma kpe ipee le ha bende be-gyang, ukpọ ma shun ipee angi i be le ha Unim ufufe ye.
45“Mi na mi be bun kibibi kimen de Atya-tyan ye, Umosis angwu ma fe lityam he ahe a. 46Ki i yi le ma bọng ha Umosis, tyang ma bọng ha ami a, likọye Umosis a ma fee gbe le mi a. 47Le gbe ma bọng abi a fee ye, ki sha na a, ma bọng igie igi ife?”
നിലവിൽ തിരഞ്ഞെടുത്തിരിക്കുന്നു:
Ujọn 5: KUIL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
