Ujọn 2
2
Ujeso a kung umbwo bel kutyo
1He ati akie, ki ma yi le kipam libee he lishi Ugalili angi be ko le Ukena. Anam Ujeso a ma yi ha. 2Be ma hwaa Ujeso le bendi-utung bema gye kipam kimen ana. 3Be shi kipam fel he kukwo, kutyo ahwu be maa ngwo ku mbee. Anam Ujeso a kung bo le de Ujeso le, “Kutyo ku mbee.”
4Ujeso a fan he le, “Ungingye, kibang wo be le mi ha afee? Kunyọng kugi ku wa fel ye.”
5Anam a tem le de ibọyi angi i ke lizi he kudyan le, “Kiyang-yang ashi a de men le ma shi, ma shi ashi.”
6Ki ma yi itetel Ijuus a le be to bituto. He ashina, ha kiteng kimen ana be ma tyung biki umbwo bidyọng-ken abi be fe umbwo shi itetel ato-ale ibel. Biki abina bi ma dyam kaang le kiki ken ki kung utyang kigilgil mbee lisi gya ha lisi le ngi lihwo.
7Ujeso a de abe be ke lizi ha he kudyan le, “Ma fe umbwo sho biki abina puu.” Be ma fe umbwo sho bi puu ndọ he atyung yilididi.
8Ujeso a ha de be le, “Ma ndu kwan umbwo le he biki ana le ke ukandi kipam angwu a kwu he lishi kidem.” Be ma kwan umbwo angwu a bel kutyo ana le ke-e. 9Ibọyi angi i ke lizi ha he kudyan be ngye he kipi kutyo ku be, ukpọ ukandi kipam angwu a kwu he lishi kidem a ngye ye. Nyọng a tim ahwu he ungwu, ki kwu-e he kuhwo kaang. A ko ukyeb ungye, 10de-e le, “Bendi be kung kutyo ahwu ku ngbeb a ka bendi kushu. He kunyọng ahwu be ngwo kutyo kaang, be ha be le ahwu ku ngbeb ye be ke be, ukpọ, wo ufe wo shi na a ye, wo be le ahwu ku ngbeb hwo a ke likel.”
11Kikwole-kuhwo ashi Ujeso a ma shi he Ukena he kubọng Ugalili nyin na ki ma yi ukpi-kikwu kikwole-kuhwo ashi a shi. Gbe he kikwole-kuhwo ashina Ujeso a ma tyung ifem ima. He kuhwo ashi bendi-utung bema be bọng le u yi Unwaa Unim a.
12Be mbee kipam puu, Ujeso le anam le bebwaa-nam le bendi-utung bema be bo gye he Ukapanum. Be kwu ha ati zang a.
Ujeso a tie ushọm Unim
(Mat 21:12-13; Mak 11:15-17; Luk 19:45-46)
13Ha he kunyọng kumen ana, kunyọng kipam Ijuus ashi be ko le kipam agbele-gyọng ki ma fel kpee-kpee. He ashina, Ujeso a ma bo gye kipam ana he Ujeruselem. 14A le wu ha, a gbe gye he Ushọm Unim le nde bendi ha abe be maa ndyeb bigundu, itia le lilulu za, le abe be ma yi kwu he itebul be gie unde. 15A kung udongsi ndeb le bendi puu le itia ọ, bigundu ọ le ha he ushọm Unim wu he igye. U nyii kpe itebul bendi abe be gie unde wu le hel, paa unde ubel wu shaha-shaha-shaha. 16A kung de abe be maa ndyeb lilulu zi le, “Ma kung biwọm bimen be gbe gye! Mamama tyang abwo le ashele ushọm Atyagi le u fel kipi ushi o.” 17Nyọng bendi-utung bema be nde ashina, be wel le be fee he kushia Unim le-iti le, “Kigyọ ashi mi yi le shi ke ushọm Unim, ki kpa-m ityuu.”#2:17 Agyam 69:9
18Bekandi Ijuus be ngib naa ha bii he le, “Kitaa ashi kung wo nya shi he ki tyung li le wo yi le ikeb le wo sha ashin?”
19Ujeso a fan abe le, “Gbe ma kem ti Ushọm Unim angwun, mi kung ati akie a tem le he tya.”
20Be fan he le, “Kpash! Wo ngye le be kung aze asi afee le ngi adyọng-ken ha tye-e ukpọ? Wo gim le wo kung ati akie a tya he a?” 21Ushọm angwu Ujeso a maa kọng gbe le he a ma yi inyia-hwo ima a. A maa kọng gba le kukwo ahwu u be hwo, le kitaa u be wum a. 22He kunyọng ahwu Ujeso a ma wum le he lihwu, bendi-utung bema be ma wel igie angi a kọng ana. He kuhwo ashin be ma bọng biwọm abi be fee he kushia Unim le igie Ujeso.
23Nyọng Ujeso a ma yi he Ujeruselem he kunyọng kipam agbele-gyọng, a ma shi bikwole-kuhwo. He kuhwo abi, bendi gbam be ma bọng ha lizen lima. 24Ukpọ Ujeso a ma fe lityam ha abe ye, 25likọye a ngye atyam bendi-gye puu. Ki yi le undi na u ha de-e ashi ki yi he atyam bendi ye, likọye ufe-gyang a ngye biwọm puu abi bi yi he atyam abel.
നിലവിൽ തിരഞ്ഞെടുത്തിരിക്കുന്നു:
Ujọn 2: KUIL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
