Luk 19
19
Ema Enọ Utib Edinam Akpanikọ
1Jisọs ama oduk Jeriko, ndien nte Enye akasañade ebe, 2ọbọ etibe ukara emi ekekerede Sakiọs emi ekedide owo inyene ama odu do. 3Enye ama oyom ndikut mme Jisọs ekedi anie, edi sia enye ekedide ibio owo, enye ikekemeke ke ntak otu owo. 4Do, enye ama efehe ebe iso, ndien ama aka ọkọdọk enyọñ eto kiet emi ekotde Sikamọn man enye ekeme ndikut Jisọs, koro Jisọs ke akasaña edi ndibe ke usuñ oro.
5Ke ini Jisọs ekesimde itie eto oro, Enye ama atuak ada, onyuñ emenede enyin ese enyọñ ọdọhọ enye ete, “Sakiọs, suhọde di ke usọp. Ami ñyom ndidañ ke ufọk fo mfin emi.”
6Sakiọs ama ọsọsọp idem afap eto ọsuhọde edi, onyuñ ada Jisọs ọnyọñ ufọk esie ye ọkpọsọñ inemesit ye idara.
7Kpukpru owo ema ekut edinam emi ndien ema etọñọ ndikuni, ete, “Enye aka esen ke ufọk anam idiọkñkpọ.”
8Sakiọs ama adaha ada ke enyọñ onyuñ ọdọhọ Jisọs ete, “Kpañ utọñ Ete, ọtọñọde ke emi ami ñyenọ mme ubuene mbahade inyene mi iba, edieke ami ñkediade owo ekededi ñwo, ami ñyefiak ñyak utim ikanañ nnọ enye.”
9Jisọs ama ọbọrọ enye ete, “Edinyaña omoduk edi ke ufọk emi mfin, koro owo emi ñko edi kiet ke otu nditọ Ebraham. 10Koro Eyen Owo ekedi ndiyom ñnyuñ ñnyaña se ikesopde.”
11Kadaña emi mmọ ekekpañde utọñ ekop mme ikọ emi, Jisọs ama adian mbuk efen do ọnọ mmọ, koro Enye ama ekpere Jerusalem, ñko mme owo oro ema ekere ete, ke Obio Ubọñ Abasi ọmọñ ọwọrọ owut idem kpa ke ndo ndo oro.
12Enye ama ọdọhọ ete, “Owo ñkoñkoñ emana kiet ama aka ke anyan idut kiet man ekemek enye Ọbọñ, ndien enye afiak ọnyọñ. 13Mbemiso enye ọkpọñ ufọk ndika isañ, enye ama okot mme mbon utom esie owo duop, onyuñ ọnọ mmọ owo kiet kiet bọn duop emi edide ukpe okuk utom ọfiọñ ita. Enye ama ọdọhọ mmọ ete, ‘Esin okuk emi ke uñwana tutu ami ñnyọñ ndi.’ ” 14“Edi ndusuk mbon obio mmọ ema esua enye enyuñ edọñ mme isuñutom ekedọhọ enye ete, ‘Ñnyin iyomke owo emi edi Edidem ñnyin.’ ”
15Ke usuñ kiet ekededi, ema enam enye Ọbọñ, enye ñko ama ọnyọñ edi ufọk. Ini kiet enye ama ọdọñ ete mme nditọ ufọk esie emi enye ọkọnọde mmọ okuk edi edinam ibat ke iso imọ, man imọ idiọñọ udori emi mmọ ekediade.
16“Akpa owo ama edi editiñ ete, ‘Ete, bọn duop fo odoro bọn duop efen ke esit.’ ”
17Eteufọk esie ama ọdọhọ ete, “Amanam eti eti, eti eyen ufọk mi! Sia afo ama akanam akpanikọ ke ekpri ñkpọ emi, da ukara ke mme obio mi duop.”
18Udiana owo onyuñ edi ndien ọdọhọ ete, “Ete, bọn ition fo odoro bọn ition efen.”
19Ete ufọk esie ama ọbọrọ enye ete, “Afo da ukara ke mme obio mi ition.”
20Eyen ufọk esie efen ama onyuñ edi, ndien ama ọdọhọ ete, “Ete, sese bọn fo mi. Ami ñkedip enye ke ukwọhọde inua. 21Ami mma ñkop ndik mbaña fi koro afo edide owo emi ọsọñde ido eti eti, afo esibọ se midighe okuo onyuñ ọdọk se mukọtọhọ.” 22“Eteufọk esie ama ọbọrọ enye ete, ‘Ami ñyekpe ikpe ye afo oto ke ikọ inua fo, afo oburobut eyen ufọk! Nte afo ukudiọñọke ete ke ami nsọsọñ ido, nsinyuñ mbọbọ se midighe okim, ñnyuñ ndọdọk se mme ñkọtọhọ? 23Ndien nsidi ntak emi afo mukunimke okuk mi ke itie unim okuk, man ñkpebọ esisit udori ke esit ke ami mma ñnyọñ ndi?’ ” 24“Do ke enye ọkọdọhọ mme mmọ emi ekedade do ete, ‘Ebọ enye okuk oro, enyuñ edian enọ enye emi ekenyenede bọn duop.’ ”
25Mmọ ema edọhọ Enye ete, “Ete, enye enyenyene bọn duop!”
26“Enye ama ọbọrọ ete, ‘Ami ndọhọ mbufo nte, owo ekededi emi enyenede ediwak, eyedian eñwen enọ enye, edi ama edi enye emi minyeneke nyene, kpa se enye ekenyenede, eyebọ enye. 27Ndien idahaemi, kabañade mme asua mi emi mikeyomke mi ndi Edidem mmọ, eda mmọ edi mi enyuñ ewot mmọ ke iso mi.’ ”
Mmọ Esaña Ekpere Jerusalem
28Ke Jisọs ama okokure ikọ Esie, Enye ama aka iso ke isañ Esie ndika Jerusalem. 29Ke ini mmọ ekperede obio emi ekotde Betfek ye Betani ke ibuot obot emi ekotde Obot Ọlif, Enye ama ọdọñ mbet Esie iba, onyuñ ọdọhọ mmọ ete,
30“Eka ke obio iñwañ oko ke iso mbufo, ndien nte mbufo edukde, mbufo eyekut eyen enañ emi eyiride do, emi owo ndomokiet akanam midoroke, etat enye, enyuñ eda enye edi esọk Mi. 31Edieke owo ndomokiet obupde mbufo ete, nsidi ntak emi mbufo etatde eyen enañ mbakara oro? Edọhọ enye ete, ‘Ọbọñ oyom enye.’ ”
32Mme mmọ emi ekedọñde ema eka ekekut eyen enañ mbakara oro kpa nte Enye eketiñde ọnọ mmọ. 33Nte mmọ ekekade iso nditat eyen enañ mbakara emi, andinyene enye ama obup mmọ, ete, “Nsidi ntak mbufo eyomde nditat eyen enañ mbakara oro?”
34Mmọ ema ebọrọ ete, “Ọbọñ oyom enye.” 35Mmọ ema eda enye esọk Jisọs. Ndien mmọ emen ọfọñidem mmọ ebri ke edem enañ emi enyuñ eñwam Jisọs ndidọk ntie ke enyọñ esie.
36Nte Enye akawatde aka, mme owo ke ekeduọñọ mme ọfọñidem mmọ ke ọkpọusuñ. 37Ke ini Enye ama ekekpere Jerusalem, ke ebiet emi usuñ ọsuhọrede aka Obot Ọlif, akwa otu mbet Esie ema etọñọ ndikọm Abasi ñnyuñ ntoro Enye ke ọkpọsọñ uyo kabaña kpukpru mme utibe ñkpọ emi mmọ ekekutde. 38Ọbọñ ọdiọñ Edidem emi edide ke enyiñ Abasi! “Emem odu ke enyọñ, ubọñ onyuñ enyene Abasi.”
39Ndusuk mme Farisi ke otu owo oro ema edọhọ Jisọs ete, “Andikpep, sua nọ mme mbet Fo.”
40Jisọs ama ọbọrọ mmọ ete, “Edieke mmọ edopde uyo, kpukpru itiat ke mben usuñ emi eyedaha eda esio ñkpo idara.”
41Nte Enye akasañade ekpere Jerusalem, onyuñ ada okut esit obio, Enye ama atua eyet abaña enye. 42Ndien ama ọdọhọ ete, “Edieke afo, kpasuk afo, ọkpọdiọñọde mfin emi se ikpedade emem isọk fi, edi ke emi emedip fi, unyuñ ukemeke ndikut. 43Mme usen ke edi emi etienede fi, emi mme asua fo edikanarede fi ikuk inyuñ ibọp fi isin, ndien esaña ebine fi ke kpukpru ituñ. 44Mmọ eyebiat fi ofuri ofuri ye mme mmọ emi eduñọde ke esit fo, mmọ idikpọñke baba itiat kiet ke ebiet emi; koro afo mukọdiọñọke ini emi Abasi ekedide ndinyaña fi!”
Jisọs Odu Ke Edisana Ebiet
45Jisọs ama oduk ke esit ufọk akam onyuñ ọtọñọ ndibin mme anyam urua nsioño. 46Enye ama ọdọhọ mmọ, ete, “Ewewet ete, ufọk Mi edidi ufọk akam, edi mbufo emekabade enam enye edi ebedeñ mbio ñwo.”
47Jisọs ama aka iso ndikpep ñkpọ ke ufọk akam kpukpru usen. Mme ikpọ oku, mme ekpep mbet, ye mme mbuot ekeyom usuñ nte ekpewotde Enye. 48Edi mmọ ikekemeke ndikut usuñ ndinam uduak mmọ, koro kpukpru owo ekemade Enye, enyuñ ekpañ utọñ enọ ikọ Esie.
നിലവിൽ തിരഞ്ഞെടുത്തിരിക്കുന്നു:
Luk 19: OOÑE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
