Luk 14
14
1Ke usen ikọ Abasi mme Ju kiet, Jisọs ama aka ndidia udia ke ufọk ọwọrọ iso owo Farisi kiet; mme owo ema ekpeme Enye eti eti. 2Do ke iso Esie, owo kiet emi ọkọdọñọde, emi ukot ye ubọk esie ekefutde, ama odu do.
3Jisọs ama obup owo Farisi oro ye mme nta ọfiọkibet ete, “Mme edi unen ndikọk owo udọñọ ke usen Sabat, mme idighe?”
4Mmọ ema edu ke ndobo uyo. Do ke Jisọs okomum owo oro, ndien ọkọk enye onyuñ anam enye ọnyọñ.
5Do ke Jisọs okobup mmọ ntem ete, “Edieke owo mbufo kiet enyenede eyen mme enañ emi ọduọde oduk obube mmọñ ke usen ibet, nte afo ukpukaha ndondo oro ukusio enye?”
6Mmọ ikenyeneke se ebọrọde.
Ekunyaña Idaha
7Ke ini Enye okokutde ete ke mme mmọ emi ekekotde udia ekemek mme ñkoññkan itie ukpono ke okpokoro udia, Enye ama ọnọ mmọ item emi. 8“Edieke ekotde mbufo usọrọ ndọ, ekusaña eka nditie ke ñkoñkoñ itie. Koro edieke owo efen emi okponde akan mbufo edide, 9enyene ufọk emi okokotde mbufo mbiba eyedi dọhọ kiet ete, ‘nọ owo emi itie fo etie.’ Ndien ke but owo kiet eyekabade akada usuhọde itie.
10Edi ke ini ekotde mbufo usọrọ, etie ke usuhọde itie, man edieke andikokot mbufo edide, enye eyedọhọ kiet ete, ‘ufan, daha da dọk ka ke eti itie.’ Ke ntre ke afo edinyene ukpono ke iso mme nsaña fo. 11Koro owo emi emenerede idem esie eyesuhọrede enye; edi owo eke ọsuhọrede idem esie, eyemenerede enye.” 12Do ke Jisọs ọkọdọhọ enyene ufọk ete, “Ke ini afo oyomde ndinam usọrọ udia uwemeyo mme udia mbubreyo, ke ukot mme ufan fo, nditọ eka fo ye mme iman fo, mme mme mbọhọiduñ fo emi edide mbio inyene; edieke afo anamde ntre, mmọ ñko eyekot fi usiene usọrọ udia, emi owut ete ke mmọ esio usiene enọ fi.
13Edi ke ini afo anamde usọrọ, kot mme ubuene, mbuñọ, ye mme nnan. 14Ndien eyediọñ fi, koro mmọ mikemeke ndisio usiene. Abasi eyesio usiene ọnọ fi, onyuñ ọnọ fi utib ke ini mme ndinen owo edisetde.”
15Ke ini owo kiet ke otu mme mmọ emi eketiede ke okpokoro udia ekekopde ikọ emi, enye ama ọdọhọ Jisọs ete, “Idara edi kpon didie ye mme mmọ emi edibuanade ke usọrọ emi ke Obio Ubọñ Abasi?”
16Jisọs ama ọbọrọ enye ete, “Owo kiet ama odu emi akanamde mme ndutim akamba usọrọ, ndien enye ama okot ediwak isen. 17Ke ema ekebeñe idem enyuñ enam ñkpọ ekure, enye ama osio eyen ufọk esie ọdọñ ete asaña asian kpukpru mmọ emi ekekotde ete ke ini ekem mmọ ndiduk ndi usọrọ.” 18“Edi kpukpru mmọ ema etọñọ nditiñ mbaña mme nsio nsio mfina mmọ man etre usọrọ oro. Owo ama ọdọhọ ete, idahaemi ke nsuk ndep obufa iñwañ, ndien ñyom ndika ñkese nte enye etiede, mbọk yak ñkudi.” 19“Owo efen ama ọdọhọ ete, ‘Ami nsuk ndep enañ duop idahaemi, ndien ñka man ñkedomo mmọ nse.’ ” 20“Owo efen ñko ama ọdọhọ ete, ‘Idahaemi ke nsuk ndọ ñwan, ke ntak oro, ñkemeke ndidi.’ ”
21“Eyen ufọk ama ọnyọñ edi, onyuñ editiñ ọnọ eteufọk esie kpukpru se mmọ ekedọhọde enye. Ete ufọk ama ayat esit eti eti, onyuñ ọdọhọ enye ete, ‘Sọsọp, wọrọ ka ke mme efak ye mme añwa mbre nyuñ kot mme ebeñe ebeñe ye mme mbuñọ, ye mme nnan.’ ” 22“Ikebighike, eyen ufọk oro ama ọdọhọ eteufọk esie ete, ‘Ami mmanam se afo ọkọdọhọde nnam, edi mme itie ke esesuhọ.’ ”
23“Ndien eteufọk ama ọdọhọ eyen ufọk esie ete, ‘Mana wọrọ ka ke mme usuñ isañ ye ke mme efak obio nyuñ kot kpukpru mme mmọ emi udukutde eduk edi, man oto do ufọk mi ọyọhọ ye mme isen usọrọ. 24Koro baba owo kiet ke otu mme mmọ emi ñkekotde ke akpa ifet iditabike ke edeme mmọ ndomo esisit udia emi ñketemde.’ ”
25Akwa otu owo ema etiene Jisọs ke edem, ndien Enye ọwọñọde onyuñ etiñ ikọ ọnọ mmọ ntem. 26“Edieke owo ndomokiet etienede Mi ndien enye isuaha ete, ye eka, ye ñwan, ye nditọ, ye nditọ eka iren, ye nditọ eka iban, Ih! kpasuk ye idem uwem esie enye ikemeke ndidi mbet Mi. 27Ndien baba owo ndomokiet ikemeke ndidi mbet Mi ke enye mimenke krọs esie ibiom itiene Mi.”
28“Edieke owo mbufo kiet oyomde ndibọp ufọk emi enyenede etiñe nte enye ikpebemke iso kaña itetie inyuñ inam ibat ibon ise, se iditakde enye, man enye otim ọfiọk mme imọ iyenyene okuk ndida mbọp ufọk oro mma? 29Koro edieke enye ama ekesin itiat idak isọñ ufọk ndien enye ikemeke ndibọp mma, kpukpru owo emi edikutde eyesak enye. 30Enyuñ edọhọ ete, ‘Sese owo emi ama ọtọñọ ndibọp ufọk edi enye ikemeke ndibọp mma.’ ”
31“Edieke edidem ekededi oyomde ndika ekọñ ye edidem efen, nte enye ikpebemke iso itie ye mme ọnọ item esie ikere mme mme udim ekọñ esie emi edide tọsin owo duop, eyenyene odudu ekem ndikan tọsin mbon ekọñ edip emi edide ndiñwana ye mmimọ?”
32“Edieke enye okutde ete ke imọ idikemeke ndikan, enye eyesio mme isuñ ọdọñ ebine udim ekọñ asua, kadaña emi mmọ edude ke anyan usuñ onyuñ ebeñe emem. 33Kpa ntre ñko, baba owo mbufo ndomokiet idikemeke ndidi mbet Mi ibọhọke enye ke akpa ifet ọsuhọde etetie onyuñ abat kpukpru se iditakde enye, onyuñ asana kpukpru mme ñkpọ emi enye enyenede ayak.”
34“Inuñ ọfọn, edi edieke enye ọduọkde inem esie, ekeme didie nditọñọ ntak nnam enye afiak edi inuñ? 35Inuñ oro idotke ndisin ke isọñ mme ndisin ke mbio ntọ iñwañ, etotop enye eduọk. Owo emi enyenede utọñ, yak enye okop.”
നിലവിൽ തിരഞ്ഞെടുത്തിരിക്കുന്നു:
Luk 14: OOÑE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
