Jọn 16
16
Ubiak Ye Idara Edu ke Iso
1“Ami ñketiñ kpukpru ñkpọ emi nnọ mbufo man mbufo ediduọ ekpọñ usuñ. 2Mmọ eyebin mbufo esio ke mme ñkpri ufọk akam; ndien ke akpanikọ, ini ke edi emi owo ekededi emi ediwotde mbufo edikerede ete ke imọ inam utom inọ Abasi. 3Mmọ eyenam mme oruk ñkpọ emi ye mbufo koro mmọ mikediọñọke Ete mme Ami. 4Ami ñketiñ emi nnọ mbufo, man kadaña emi ini oro edikemde mbufo ekpeti ete ke Ami mma nduri mbufo utọñ. Ami ñketiñke emi nnọ mbufo ke editọñọ koro Ami ñkedude ye mbufo.
5Edi idahaemi, mmọñ ñnyọñ ntiene Enyemi ọkọdọñde Mi, edi owo mbufo baba kiet ibupke Mi ite, ‘Afo aka mmọñ?’ 6Edi ke emi mma ñketiñ nnọ mbufo, esit mbufo ọyọhọ ye mfuhọ 7Edi Ami ntiñ nnọ mbufo, edi ke ufọn mbufo ke Ami ñyom ndinyọñ. Ke mibọhọke Ami ñnyọñ, idọñesit oro ididighe itiene mbufo. Edi edieke Ami ñnyọñde, Ami ñyedọñ Enye edi ebine mbufo.
8Ndien ke Enye ama edi Enye eyeyarade owut ererimbot ndudue esie kabaña idiọkñkpọ, ye kabaña edinen ido ye ikpe. 9Kabaña idiọkñkpọ, koro mme owo minimke Mi ke akpanikọ. 10Kabaña edinen ido, koro Ami ke ñnyọñ mbine Ete Mi ke ebiet emi mbufo midikwe Mi aba. 11Ndien kabaña ikpe koro andida ubọñ ererimbot emi, (Setan) ikpe etip enye”. 12“Ami mmenyene se iwakde ikan emi nditiñ nnọ mbufo, emi mbufo midikemeke ndimum kpukpru. 13Edi ke Enye, Spirit akpanikọ, ama edi, Enye eyeda mbufo usuñ oduk ke kpukpru akpanikọ. Enye iditiñke ikọ idem Esie. Enye editiñ kpa se Enye okopde, ndien Enye eyetiñ ọnọ mbufo se iditibede ke ini iso. 14Enye eyenọ Mi ubọñ, koro Enye edibọ se Ami ñnyenede nditiñ itiñ inọ mbufo. 15Kpukpru se Ete enyenede, edi Okim. Ntak edi oro Ami ñkọdọhọde nte ke Spirit edibọ se Ami nnọde ndien etiñ ọnọ mbufo.” 16“Ke esisit ini mbufo idikwe Mi aba; ndien ke esisit ini ama ebe mbufo eyefiak ekut Mi.”
17Do ke ubak mme mbet Esie eketiñ ye idem mmọ ete, mme se Enye etiñde emi ọwọrọ nso, ke Enye ndidọhọ nte: “Ke esisit ini mbufo idikwe Mi aba,” ye “Ke esisit ini ama ebe, mbufo eyefiak ekut Mi, ye koro Ami ñnyọñ mbine Ete.” 18Mmọ ema ekaiso ndibup, “Nso ke ikọ emi ‘Ke esisit ini,’ ọwọrọ? Ñnyin idiọñọke se Enye etiñde abaña.”
19Jisọs ama ọfiọk ete ke mmọ eyom ndibup Imọ mbaña mme ikọ emi, do ke Enye ọkọdọhọ mmọ ete, “Nte mbufo ebup idem mbufo mbume ebaña ikọ emi Ami ndọhọde nte, ‘Ke esisit ini mbufo idikwe Mi aba’, ye, ‘Ke esisit ini ama ebe, eyefiak ekut Mi?’ 20Ami ntiñ akpanikọ nnọ mbufo nte, ke mbufo eyetua enyuñ efuhọ ke ini emi ererimbot ediade idara. Mbufo eyefuhọ, edi mfuhọ mbufo eyekabarede edi idara. 21Ñwan emi oyomde ndiman eyen okop ubiak koro ini esie ekemde; edi ke enye ama akaman eyen esie ama, enye efre mme ubiak esie ke ntak idaraesit, koro eyen amana oduk ke ererimbot. 22Kpa ntre ke edi ye mbufo; idahaemi edi ini emi mbufo enyenede mfuhọ, edi Ami ñyetọñọ ntak ñkut mbufo ndien mbufo eyedia idara, ndien baba owo kiet idibọhọ idara mbufo. 23Usen oro ama edi, mbufo idibupke Mi baba ñkpọ kiet aba. Ami ntiñ akpanikọ nnọ mbufo nte, ke Ete Mi eyenọ mbufo ñkpọ kiet ekededi emi mbufo edibupde ke enyiñ Mi. 24Tutu esim emi mbufo ibupke baba ñkpọ kiet ke enyiñ Mi. Ebup, ndien mbufo eyebọ, ndien idara mbufo eyeyọhọ ọduọi.”
25“Okposuk edi nte Ami ntiñde mme ikọ emi nnọ mbufo ke ñke, ini ke ededi emi Ami mme nditiñke ikọ aba ye mbufo ke ñke, edi nditiñ ikọ ye mbufo añwa añwa mbaña Ete. 26Usen oro ama edi, mbufo eyebup Ete ñkpọ ke enyiñ Mi. Ami ndọhọke nte ke Ami ndibip Ete ñkpọ ke ibuot mbufo. 27Baba, koro Ete ke idem Esie ama mbufo eti eti, koro mbufo emade Mi, enyuñ enimde ke akpanikọ ete ke edi Ete ọkọdọñ Mi. 28Ami ñkoto Ete ndi ke ererimbot, ndien idahaemi Ami ke ñkpọñ ererimbot emi mfiak mbine Ete.”
29Ndien mme mbet Jisọs ema edọhọ ete, “Idahaemi Afo eyetiñ ikọ añwa añwa usinke aba ñke ndomokiet. 30Ñnyin imokut idahaemi ite ke Afo ọmọfiọk kpukpru ñkpọ, ndien inaha owo baba kiet obup Fi mme mbume. Emi anam ñnyin inim ke akpanikọ ite ke Afo oto ke Abasi edi.”
31Jisọs ama obup mmọ ete, “Nte mbufo emenim ndien ke akpanikọ ke akpatre? 32Edi ini ke ededi, ndien ososim ama, emi edisuande mbufo, owo kiet kiet eyefiak ọnyọñ ufọk esie, ndien mbufo eyekpọñ Mi ikpọñ. Okposuk edi oro, ami ndighe ikpọñ, koro Ete Mi odude ye Ami. 33Ami ntiñ mme ikọ nnọ mbufo, man otodo mbufo ekpenyene emem ke edidiana kiet ye Ami. Ke ererimbot emi, mbufo eyenyene mfina. Edi esọñ esit! Ami mmakan ererimbot.”
നിലവിൽ തിരഞ്ഞെടുത്തിരിക്കുന്നു:
Jọn 16: OOÑE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
