Jọn 12
12
Ami Ndiduhọ Ye Mbufo Mbighi Ñkaha
1Akayak usen itiokiet ndikem usen usọrọ uwọrọ ufin. Jisọs ama ekesim Betani, ebiet emi Lasarọs okoduñde, enye emi Jisọs akanamde eset ke ñkpa. 2Ema enam udia mbubreyo enọ Jisọs do, ndien Mata akañwam ndinọ udia oro, ke ini Lasarọs eketiede ke okpokoro ye Jisọs. 3Do ndien ke Meri ekemen ọyọhọ ekpeme ata nsọñurua enem ufuọñ aran emi edade ñkpọ emi ekotde Nard enam, ọduọk Jisọs ke ukot ndien ada idet ibuot esie ọkwọhọde Enye ukot mbiba. Ndien ufọk oro ama ọyọhọ ye ufuọñ enem utebe aran oro.
4Edi kiet ke otu mbet Jisọs, Judas Iskariọt, emi akanade nte atap Enye ke ini iso, ama afaña. 5“Ntaha owo mikenyamke enem ufuọñ aran emi, ndien emen okuk esie enọ mme ubuene-e? Aran emi ama ọyọhọ okuk owo utom kiet ke isua kiet.” 6Enye iketiñke emi koro enye ekekerede ñkpọ abaña mme ubuene, edi koro enye ekedide inọ; nte akama okuk, enye ama esiñwañwam idem esie ke se esesin ke ekpat okuk emi enye akamade ke edu inọ.
7Jisọs ama ọbọrọ enye ete, “Sana enye yak, koro akana nte enye afam enem ufuọñ aran emi enim abaña usen emi edibukde Mi. 8Mbufo eyenyene nditọ ubuene mi ye mbufo kpukpru ini ke otu mbufo, edi mbufo idinyeneke Mi kpukpru ini.”
9Akwa otu owo ema ekop ete ke Jisọs mmọ ke Betani, do mmọ ema eka do; mmọ ikakaha do ibaña Jisọs ikpọñ ikpọñ, edi ekedi man ekut Lasarọs emi Jisọs akanamde eset ke ñkpa ñko. 10Do mme ikpọ oku ema enyuñ enam ekikere ndiwot Lasarọs ñko; 11koro oto ke ntak esie ediwak mme Ju ema ekpọñ mmọ emi ekedade mmọ usuñ ekabade enim Jisọs ke akpanikọ.
Otu Owo Edara Jisọs
12Ke udiana usen, akwa otu owo emi ekedide usọrọ ema ekop ete ke Jisọs odu ke usuñ isañ ke ndidi Jerusalem. 13Mmọ ema ekama mme ndak eyop ebine Enye ke usuñ, ke efefiori ete, “Osana! Edidiọñ enyene Edidem Isrel emi edide ke enyiñ Ọbọñ.”
14Jisọs ama okut ekpri eyen enañ mbiomo ndien Enye ọdọk etie ke edem esie, nte ikọ Abasi ọdọhọde ete, 15“Ekufehe Edidem mbufo mbon Jerusalem, sese Ọbọñ mbufo ke edi; awat ke enyọñ abak enañ mbiomo.”
16Mme mbet Esie ikediọñọke mme ñkpọ emi ke akpa ifet; edi ke ini emi ema ekemenerede Jisọs esin ke ubọñ ke mmọ eketi ete ke Ñwed Abasi ama etiñ ntem abaña Enye, ndien ke mmọ ekenam nte ekewetde enọ Enye.
17Ndien otu owo emi ekedude ye Enye ema eka iso ndisuan etop nte ke Enye ama okot Lasarọs osio ke otu mme akpaña ñkpa. 18Mme ediwak owo ke ntak emi mmọ ekekopde ete ke Enye ama anam utibe ñkpọ ñkpaidem ema ewọñọ eka ndisobo ye Enye.
19Do ke mme Farisi eketiñ kiet ye eken ete, “Mbufo emekut, ñkpọ iduhọ emi ñnyin ikemede ndinam. Sese nte ofuri ererimbot etienede Enye!”
20Mme mbon Krik ema edu ke otu mme mmọ oro ekekade ndituak ibuot ke ini usọrọ oro. 21Mmọ ema eka ebine Filip emi okotode Betsaida ke Kalili ye ebeñe, enyuñ edọhọ ete, “Ete, ñnyin imoyom ndikut Jisọs.” 22Filip ama eketiñ ọnọ Andru; Andru ye Filip ema eketiñ enọ Jisọs.
23Jisọs ama ọbọrọ ete, “Ini oro edisim idahaemi, emi edinọde Eyen Owo akamba ubọñ. 24Ami ntiñ akpanikọ nnọ mbufo nte ke ebede ñkpasip ibokpot ọduọ ke isọñ onyuñ akpa, enye eyesuk edi kpa ñkpasip kiet. Edi edieke enye akpade, enye eyesioño mme ñkpasip efen. 25Owo ekededi emi amade uwem esie eyeduọk enye; edi owo emi asuade uwem esie ke ererimbot emi eyenim enye enọ nsinsi uwem.
26Owo ekededi emi oyomde ndinam ñkpọ nnọ Mi, enyene nditiene Mi, man otodo eyen utom Mi okpodu ye Ami ke ebiet emi Ami ndude. Ete Mi eyekpono enye emi anamde ñkpọ ọnọ Mi.” 27Idahaemi, Esit Mi etimede ndien Ami nditiñ nso? Nte Ami ndidọhọ nte, Ete kuyak awa ñkanika emi esim Mi? Baba, emi edi ntak emi Ami ñkedide, man otodo ami mbe ke utọ ini ukut emi. 28Ete, da ubọñ ye ukpono nọ enyiñ Fo. Do ke uyo eketiñ ikọ oto enyọñ ete, “Ami mmenọ enye ubọñ ndien Ami ñyetọñọ ntak nnam ntre.” 29Mme otu owo emi ekedade do ema ekop uyo oro, ndien ema edọhọ ete, “Obuma asiaha.” Mme mmọ eken ema edọhọ ete, “Enjel eketiñ ikọ ye Enye.”
30Edi Jisọs ama ọdọhọ mmọ ete, “Ikedighe ke ntak Mi ke uyo oro eketiñde ikọ edi, ekedi ke ntak mbufo. 31Ini edikpe ikpe ererimbot emekem; ini edidorode andikara ererimbot emi nduọk ekem. 32Edi ke ema emenerede Mi ekpọñ isọñ, Ami ñyeduri kpukpru owo nnọ idem Mi.” 33Enye eketiñ emi ndiwut utọ uduot ñkpa emi Enye edikpade.
34Mme otu owo ema ebọrọ Enye ete, “Mme mbet ñnyin etiñ enọ ñnyin nte ke Andinyaña eyedu uwem ke nsinsi, ndien Afo ekeme didie ndien ndidọhọ nte ke ana nte emenede Eyen Owo ke enyọñ? Anie edi Eyen Owo oro?”
35Jisọs ama ọbọrọ ete, “Mbufo eyenyene uñwana oro ke otu mbufo ebighi esisit. Eka iso esaña ke usuñ mbufo ke ini mbufo enyenede uñwana oro, mbak ekim edisim mbufo. Koro owo emi asañade ke ekim idiọñọke ebiet emi enye akade. 36Enim uñwana ke akpanikọ ke ini mbufo enyenede enye, man otodo mbufo ekabarede edi nditọ uñwana.” Ke ini Enye ama eketiñ ikọ ama, Jisọs ama ọkpọñ mmọ onyuñ edip idem Esie ke enyin mmọ.
37Kpasuk ye emi Jisọs ama akanam kpukpru mme idiọñọ ñkpọ ñkpaidem ke iso mmọ, mmọ ikenyimeke. 38Akana edi ntre man ọkọsọñọ ikọ emi Asiak Uduak Abasi Aisaya eketiñde ete, “Ọbọñ anie enim etop ñnyin ke akpanikọ, mme anie ke Abasi okowut odudu esie?” 39Ke ntak emi mmọ ikekemeke ndinim ke akpanikọ, koro Aisaya ama onyuñ ọdọhọ ete, 40“Abasi ama ekim mmọ enyin, onyuñ ọsọñ mmọ esit, mbak mmọ edida enyin mmọ ekut usuñ, enyuñ ekere ñkpọ ke esit mmọ efiọk, ndien mmọ idinyuñ iwọñọkede itiene Mi man Ami ñkọk mmọ.” 41Aisaya eketiñ emi koro enye ama okut ubọñ Jisọs onyuñ etiñ abaña Enye.
42Kpa ke utọ ini emi ediwak mme ada ukara mme Ju ema enim Jisọs ke akpanikọ; edi ke ntak mme Farisi mmọ iketiñke ikọ ibaña Enye añwa añwa, mbak edibin mmọ esioño ke ufọk ukpepñkpọ. 43Koro mmọ ekema itoro ubọk owo ekan itoro ubọk Abasi.
44Do ke Jisọs eketiñ ke ọkpọsọñ uyo ete, “Owo ekededi emi enimde Mi ke akpanikọ, inimke Mi ikpọñ ke akpanikọ, edi etiene enim Enyemi ọkọdọñde Mi ke akpanikọ ñko. 45Owo ekededi emi okutde Mi, okut Enyemi ọkọdọñde Mi ñko. 46Ami mmedi ke ererimbot nte uñwana, man owo kiet ekededi emi enimde Mi ke akpanikọ okusine ke ekim. 47Owo ekededi emi okopde etop Mi ndien isukke ibuot inọ Mi, Ami ndikpehe enye ikpe. Koro Ami ñkedighe ndikpe ererimbot ikpe, edi ndinyaña enye. 48Owo ekededi emi esinde Mi mme inyuñ ibọhọ etop Mi, enyene enye emi edikpede ikpe ye enye. Ikọ emi mma ñketetiñ edidi ekpe ikpe esie ke akpatre usen. 49Koro Ami ñketiñke ikọ ke odudu idem Mi, edi Ete emi ọkọdọñde Mi, okowuk Mi abaña se ñnyenede nditiñ ye usuñ emi Ami ñnyenede nditiñ. 50Ami mmọfiọk nte ke ewuhọ Esie ada nsinsi uwem edi. Ke ntre, se ededi emi Ami ntiñde, Ami ntiñ ukem ukem se Ete Mi ọkọdọhọde Mi ntiñ.”
നിലവിൽ തിരഞ്ഞെടുത്തിരിക്കുന്നു:
Jọn 12: OOÑE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
