MATAYO 9
9
Yesu aheledji momi ondɔ mako
(Endja pongono ta Mal 2, 1-12; Luk 5, 17-26)
1Yesu atiteaka ta bwato, akatisaka ibeke tine bokɛ ta ngando e nde. 2Bamolwɛkɛ momi ondɔ mako asambi ta bokaki. Ehole enɛkɛ Yesu bodima bo bobo, abalaka na momi ondɔ mako: «Mwana o mbi, sapingedja! Pekato i wɛ iyɛmi!» 3Na bea ekenge e balehi ba mobeko basabaleanaka: «Moto iyo asingaka Ndjakomba#9, 3 Endja pongono ta Lew 24, 16.!» 4Yesu asipoaka malɛno ma bobo ko abalaka na bu: «Tina ndani odini na malɛi mabe bea? 5Modjɔ monɔi na bopɛpɛtɛ bobala: “Pekato i wɛ iyɛmi”, kaoko bobala “angɔ ko dala?” 6Napalaki odjebeni boo Mwana o Moto adi na bokondji bo boyɛ pekato ta ngondo.» Na bea abalaka na momi ondɔ mako: «Angɔ ko tomba bokaki bo wɛ ko yana ta ndako e wɛ!» 7Momi omina angɔkɔ ko ayanaka ta ndako e nde. 8Ehole enɛkɛ emumu e bato bea, balumaka na bɔɔ ko baimeaka bokumedja Ndjakomba yona opi sueya e moda mu adi bato.
Yesu abei Matayo
(Mlk 2, 13-22; Luk 5, 27-39)
9Yesu adongaka ta polo emina ko ta bonɔ bo nde aenɛkɛ momi omɔti na kombe e Matayo adi ta bilo ekaputedje bo puti. Abalaka na nde: «Kimanani!» Matayo angɔkɔ ko amokimanaka. 10Ehole edaka Yesu boyaka ta ndako e Matayo, baputedji ba puti banɛnɛ ko bato bakina ba gala ibe baduaka ayaka mesa emɔti na nde, engbanga na batingami ba nde. 11Ehole enɛkɛ bapalusai bea, bahɔdjɔkɔ batingami ba Yesu: «Tina ndani molehi o bino ayaka na baputedji ba puti ko na bato ba gala ibe?» 12Yana aokaka Yesu bapalusai bobala, abalaka: «Bato bapɛ bipeko te bahombe monganga, edii bato ba bipeko bakahombe monganga. 13Kɛni aikoeni tingo e mibalo mi: “Nakasepe na molema mua mokokee bato ndjokwa bonɔ mbeka i tito.” Tengasa naidua ahomba bato ba bodjo endolo bato babe.»
Yesu ko bokia miya
(Endja pongono ta Mlk 2, 18-22; Luk 5, 33-39)
14Batingami ba Yoane Mobatisi baduaka adi Yesu ko bamohɔdjɔkɔ: «Tina ndani iso na bapalusai bokiaka, endolo batingami ba wɛ tebakie?» 15Yesu abasɔmbedjaka: «Walɛdjɛkɛni bato babeami ta tɛkɛ e moki baboani boda na ndjokwa ta ehole edi momi o moki engbanga na bu? Ngasa! Edabi na ehole emɔti, momi o moki adaetebi na bu; na bea bakiakabi.
16«Moto aboaniti atonge esendja eyou na epasa esendja eyanie; tengasa epasa esendja eyanie ealake esendja eyou ko ipose lanɛngɛke naikina. 17Te baisake mana mayanie ta mbola iyou; esakada boo mbola ibatoe, mana masopee ko mbola igwɛ. Boisaka mana ma yanie ta mbola iyanie ko na bea mabaneamake bopele.»
Yesu anɔi epeko ko yogo na ngulu
(Endja pongono ta Mlk 5, 21-43; Luk 8, 40-56)
18Ehole ebalaka Yesu na bu bea, mokondji omɔti o bayuda aimeaka, akwaka magbundɔ ta boso bo Yesu ko abalaka: «Mwana o mbi mwali ahulake agwa edɛdi; endolo dua, omobake ebɔ ko ahelake!» 19Na bea Yesu angɔkɔ ko amokimanaka na emumu e batingami ba nde.
20Oko ta ehole emina, mwali omɔti apekaka na yogo e botanga makia bianga domi na babae. Aduaka ta sangɔngɔ i Yesu ko apeaka molenda mo esendja e nde. 21Tengasa asabaleaka: «Nakapea nongo sɔngɔ e esendja e nde, nahelake.» 22Yesu ahombanaka, amoenɛkɛ ko abalaka: «Mwana o mbi mwali, sapingedja! Bodima bo wɛ boheledji.» Oko ta ehole emina, mwali omina ahelaka.
23Ehole eimeaka Yesu ta ndako e mokondji o sinagoga, aenɛkɛ babomeli ba panda na emumu e bato badaka bosatungea. 24Abalaka na bu: «Imani iya, tengasa mwana agwiti, ahwɛli hiyɔ.» Endolo bato basɛkɛkɛ Yesu. 25Ehole eimaka emumu e bato sokolu, Yesu akweaka ta ekenge e ndako, apeaka mwana ta ebɔ ko moseka mwali asisoaka. 26Gala e modjɔ momina enanganaka ta ngondo emina esusu.
Yesu aheledji bato babae bagwa miso
27Ehole edongaka Yesu ena, emumu e bato ibagwa miso bamokimanaka na bogama: «Mwana o Dapiti, lokea ndjokwa!»
28Ehole eimeaka Yesu ta ndako, bato babae bagwa miso bamina babatamaka mbuti na nde. Abahɔdjɔkɔ: «Odimini boo nadi na kpatsi e bokɔ eka esɛngɛkɛno?» Bamosɔmbedjaka: «Okobea, Kumu.» 29Na bea Yesu apeaka miso ma bobo ko abalaka: «Kina boo ekɔme bokimana bodima bo bino!» 30Ko mbala emɔti, baimeaka boenɛ. Yesu abakebedjaka: «Okani bopele, moto adae pɛ bodjeba modjɔ mokɔmi na nu.» 31Enakobea bo bakɛkɛ bonanganedja gala e Yesu ta ibonga isusu.
Yesu aheledji emimi
32Ehole ayanaka bato bia babae, baduaka adi Yesu na momi omɔti odaka emimi tine atungeamaka na mwembo mobe. 33Yesu abenganaka mwembo mobe momina ko emimi omina aimeaka bobala. Emumu e bato balumaka na bokamoa ko babalaka: «Loipakenɛ modjɔ moda mu ta Isalɛlɛ!» 34Enakobea bapalusai babalaka: «Edi mokondji o miembo mibe amopaka kpatsi e bobengana miembo mibe!»
Yesu aokei emumu e bato ndjokwa
35Yesu akɛkɛ ta ngando na ngando ko ibonga na ibonga, tine boleha ta basinagoga ko botɔndɔ Bwɛndi Bopele bo Bokumu bo diko. Aheledjaka bato basusu ba bipeko ko na biɛmɛ bi bobo. 36Ehole enɛkɛ Yesu emumu e bato, abaokeaka ndjokwa, tengasa badi elenge bato bataka ndingo ko baluma na bokɛsɛdji elenge bhata bataka mobanei#9, 36 Endja pongono ta Mit 27, 17; 1Mik 22, 17.. 37Na bea Yesu abalaka na batingami ba nde: «Gbie edi enɛnɛ ko basali badi bakɛkɛ! 38Na tina emina, ongɔnɔni adi moswa gbie boo alome basali ta gbie e nde.»
നിലവിൽ തിരഞ്ഞെടുത്തിരിക്കുന്നു:
MATAYO 9: ngc
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©2025 Communauté des Eglises Travaillistes (CET)
