MATAYO 18
18
Moto onɔi monɛnɛ ta Bokumu bo diko
(Endja pongono ta Mlk 9, 33-37; Luk 9, 46-48)
1Oko ta ehole yena, batingami babatamaka mbuti na Yesu ko bamohɔdjɔkɔ: «Moto onɔi monɛnɛ ta Bokumu bo diko nda?» 2Yesu abeaka mwana omɔti mokɛkɛ, amoemeaka ta ndanda e bobo 3ko abalaka: «Edi soti, nabalaka na nu: omitisɔmbɔtɔnɔni milema bɛngi oimeeni elenge bana bakɛkɛ, okwetebini ta Bokumu bo diko. 4Na tina emina, moto mosusu odi bosatitedja elenge mwana iyo, adabi monɛnɛ ta Bokumu bo diko. 5Ko moto mosusu yona oasɔi mwana ta kombe e mbi, asɔi mbi mɛnɛ.»
Edinga ta tine mabaku
(Endja pongono ta Mlk 9, 42-48; Luk 17, 1-2)
6«Endolo moto yona okataedje ibaku adi omɔti o bana bakɛkɛbi ibadimeakani, enɔi na bopele tina e nde bomonanga ibanga inɛnɛ ta dɔli ko bomodumba ta duwa enɛnɛ. 7Ndjokwa e ngondo tine mabaku! Soti edake oko na mabaku manɛnɛ makadumbe bato ta bobe! Endolo ndjokwa adi moto yona okamimedje! 8Ekada ebɔ kaoko eko e wɛ eimei ibaku iolindaka ta bobe, elena ko edumba bohali na wɛ. Enɔi bopele tina e wɛ bokwea ta mohele mopele na ebɔ kaoko na eko emɔti, ta esika e bobanea mɔmɔ kaoko mako mabea ko bodumbama ta ipombe i mosa mo seko. 9Ko ekada diso i wɛ iimei ibaku iodumbaka ta bobe, iongodja ko idumba bohali na wɛ. Enɔi bopele tina e wɛ bokwea ta mohelo mopele na diso imɔti, ta esika e bobabanea miso mabae ko bodumbama ta geena e ipelu.»
Isɛ i bhata ebunga ko eboloi
(Endja pongono ta Luk 15, 3-7)
10«Daani na edinga, pɛ boenɛni ngasa omɔti o bana bi bakɛkɛ! Na bea notɔndeakani, babwɛndji ba bobo bakaemae seko ta boso bo Sange e mbi yona odi o diko. [ 11Tengasa Mwana o Moto adua tine boheledja bato i babunga#18, 11 Molɔngɔ mu moditi ta makomi manɛnɛ mayou. Endja pongono ta Luk 19, 10..]
12«Olɛdjini bo? Ekada moto omɔti adi na bhata mokama ko omɔti ebungi, aboaniti bokina bhata tuku ibua na ibua ta ikoli tine bokɛ bohomba yena ebungi? 13Ta soti nabalaka na nu, akaebolodja, alumake na sepi bonɔ bhata tuku ibua na ibua i badaa pɛ bobunga. 14Oko moda momina, Sange e bino yona odi o diko aboaniti bodima bobungedja omɔti o bana bi.»
Ehole ekɔi mwange e wɛ bobe
15«Ekada mwange e wɛ aokɔmei bobe, kɛɛ wɛ mɛnɛ bomotanea ko bomoinedja bobe bo nde. Akaokea, osɔmbedji mwange e wɛ ta ndjea. 16Endolo akalona bokea, bea moto omɔti kaoko bato babae engbanga na wɛ, bɛngi lokokedje moda mabalaka ikomi, “tengasa modjɔ mosusu mokabɔngedjame na tati e bato babae kaoko basato.” 17Endolo akalona bookea, tɔndea basuku ba Ekelesa; ekadabo aloni bookea basuku ba Ekelesa, motombani elenge mokɛndɛli kaoko elenge moputedji o puti. 18Okobea, edi soti, nabalaka na nu: misusu minangakabino ta ngondo minangamabi o diko; ko misusu milodjakabino ta ngondo milodjamakabi o diko. 19Okobea nabalaka na nu pongono, ekada bato babae badimeani iya ta kpɔtɔ tine bosɛngɛ eka emɔti bea, Sange e mbi yona odi o diko abapakabi yu. 20Tengasa polo eputoani bato babae kaoko basato ta kombe e mbi, mbi nadi ta ndanda e bobo.»
Isɛ i mosali olona boyɛmɛ
21Na bea Piɛlɛ abatamaka mbuti na Yesu ko amohɔdjɔkɔ: «Kumu, mbala djeka iboani na mbi boyɛ mwange e mbi ehole ekɔini yo bobe? Mbunoko mbala sambo?» 22Yesu asɔmbedjaka: «Ngasa, nabaliti mbunoko mbala sambo, endolo mbunoko mbala tuku sambo na sambo mitomba sambo. 23Na tina emina, endja moda moboani na Bokondji bo diko: mokondji omɔti atombaka meko ebobɔngedja midjɔ miendji palanga engbanga na basali ba nde. 24Ehole ebangaka yo bokɔ, bamoinedjaka mosali omɔti yona odaka na nyongo e nde enɛnɛ e palanga i bibende koto domi. 25Moto omina aidaka na mwɛngi e bosɔmbedja nyongo emina. Na bea mokondji o nde apaka simbisi e boengɛdjɛ yo, mwali o nde ko bana ba nde elenge babuli engbanga na leka lo nde losusu, bɛngi apute nyongo. 26Mosali omina akwaka magbundɔ ta boso bo mokondji ko asayeanaka: “Okapala okeani ndjokwa, naputake nyongo e wɛ esusu!” 27Mokondji aokeaka mosali omina ndjokwa: amokineaka nyongo emina ko amokinaka bokɛ. 28Ehole eimanaka mosali, asonganaka na omɔti o minande mosali yona odaka pongono na nyongo e nde: aboanaka bomosɔmbedja palanga mokama momɔti mo bibende. Amosuweaka gɔbɔli ta moholi ko abalaka: “Puta nyongo e mbi!” 29Minande mosali asadumbaka ta mako ma nde ko asayeanaka ta boso bo nde: “Okapala okeani ndjokwa, naputake nyongo e wɛ esusu!” 30Endolo minande alonaka: akɛkɛ bomopunda ko bamoisaka ta ndjango, mbunoko ehole aputakeyo nyongo e nde. 31Ehole enɛkɛ bakina ba binande basali bea, baimeaka na ndjokwa enɛnɛ ko bakɛkɛ botɔndɔ midjɔ mimina adi mokondji o bobo. 32Na bea mokondji abeaka mosali omina ko abalaka na nde: “Mosali obobila! Nayɛki nyongo e wɛ esusu tine osayeanaki. 33Eboanakiti na wɛ pongono bookea minawɛ ndjokwa elenge aokei mbi wɛ ndjokwa.” 34Mokondji aimeaka na kɛlɛ enɛnɛ ko amolomaka ta mɔmɔ ma basali ba misala mipipo mbunoko apute nyongo e nde esusu.»
35Yesu abakeaka: «Edi oko moda mua Sange e mbi yona odi o diko akɔbi na moto mosusu ta tei e bino yona odabi pɛ boyɛ minande, na molema mo nde mosusu#18, 35 Kokanedja ta 6, 15..»
നിലവിൽ തിരഞ്ഞെടുത്തിരിക്കുന്നു:
MATAYO 18: ngc
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©2025 Communauté des Eglises Travaillistes (CET)
