MATAYO 13

Isɛ i mooneli

(Endja pongono ta Mlk 4, 1-9; Luk 8, 4-8)

1Oko ta isu dia, Yesu aimaka ta ndako ko akɛkɛ boda ta yɔngɔ e duwa. 2Emumu e bato ebolamaka mbuti na nde, na bea Yesu atiteaka ta bwato ko adaa. Bato basusu baemaka o ngondo. 3Abalaka na bu meako minɛnɛ na masɛ. Abalaka: «Mooneli omɔti akɛkɛ ta gbie e nde tine boona. 4Yana adaka yo bomɛsɛ kona, ekenge emɔti ekona ekwaka ta yɔngɔ e ndjea: mbulu iduaka ko iikomakaka. 5Ekenge ekina ekona ekwaka ta mabanga yana edaka na mokpɔtɔ mokɛkɛ. Kona ikandoaka tine mokpɔtɔ moidaka monɛnɛ. 6Endolo ehole eimana moyi ta busa, moangodjaka bisanga bikona: ikakanaka tine nginga idindaka ta kpɔtɔ. 7Ekenge ekina ekona ekwaka ta ndanda e ndjubɛ. Ndjubɛ ikandoaka ko imbambamedjaka kona bokandoa. 8Endolo ikina kona ikwaka ta mokpɔtɔ mopele ko ibotaka mingbɔndu: imɔti ibotaka mbuma mokama, ikina mbuma tuku isamano ko ikina tuku isato.» 9Ko Yesu abalaka: «Kina boo yona odi na matoi ma booka aoke!»

Tina ndani Yesu bobalaka na masɛ

(Endja pongono ta Mlk 4, 10-12; Luk 8, 9-10)

10Na bea batingami babatamaka mbuti na Yesu ko bamohɔdjɔkɔ: «Tina ndani wabalaka na bu na masɛ?» 11Yesu abasɔmbedjaka: «Ino odihini djebeli, tine bodjeba mbombi e bokumu bo diko, endolo te bo. 12Tengasa moto odi na moeka adiabi lonɛnɛ ko aimeabi na bodieli; endolo adi moto yona otaki bamokatoabi nongo moeka odaki na nde. 13Endjani tina ekababalee mbi na masɛ: tine boo nongo bakaendja, bataenɛ ko nongo bakooka, batasipoa. 14Na bea ekokedjamaka tina e bobo mibalo mibalaka mbaeli o Ndjakomba Isaya:

“Okakabini soti, endolo osipoetebini;

Oendjakabini soti, endolo oenɛketebini.

15Tengasa bato bi baimei milema mipipo;

basadipi matoi ko miso ma bobo

oko badae pɛ booka ko pɛ boenɛ,

esada boo basipoe, basɔmbɔtɔne milema ko nabaheledje,

obali mbi Ndjakomba.”»

16«Endolo sepi e miso ma bino, tine maenɛkɛ; sepi e matoi ma bino, tine maokaka! 17Soti nabalaka na nu: ba mbaeli ba Ndjakomba banɛnɛ ko bato ba bodjo adi Ndjakomba badaka na posa e boenɛ meako menɛkɛno, endolo baimienɛ; badaka na posa e booka, meako mokakano, endolo baimioka#13, 17 Endja pongono ta 1Piɛ 1, 10-12..»

Tingo e isɛ i moneli

(Endja pongono ta Mlk 4, 13-20; Luk 8, 11-15)

18«Na bea okani tingo e isɛ i mooneli. 19Ekadabo moto aoki bobala tine Bokumu bo diko ko aisipoaka, adi elenge yɔngɔ e ndjea yena ekwaka kona: Satana adoi ko akatoi kona eonamaka ta molema mo nde. Edi kona yena ekwaka ta yɔngɔ e ndjea. 20Bakina badi elenge mokpɔtɔ mo mabanga yana akwaka kona: baokaka mobalo ko bamoasɔkɔ pɛpɛlɛ na mongandi. 21Endolo baditi na nginga adi bo bɛnɛ, badimaka mooehole mokɛkɛ. Ko na bea ehole aduake saya kaoko imeko ta tine mobalo mo Ndjakomba, basundoli pɛpɛlɛ edimeli. 22Bakina badi elenge kona, yena ekwaka ta ndanda i ndjubɛ: baoki mobalo, endolo makɛsɛdji ma ngondo ko pangolaki i madieli ma ngondo imbambamedji mobalo ko mobotiti eka. 23Ngɔngɔ bakina basɔi kona ta mokpɔtɔ mopele: baoki mobalo ko bamosipoi; baboti mbuma, bamɔti mokama, bakina tuku isamano ko bakina tuku isato.»

Isɛ i mondjani mobe

24Yesu abatueyaka ikina isɛ: «Bokumu bo diko boboani na moda mu: moto omɔti aonaka kona ipele ta gbie e nde. 25Ehole ehwɛkɛ bato, moloni o nde aduaka boona mondjani mobe ta ndanda e gbie e mbuma i bule ko akɛkɛ. 26Ehole ekandoaka kona ko ibotaka mbuma, modjani mobe motɔkɔ pongono. 27Basali ba moswa gbie baduaka bamotɔndeaka: “Molehi, onaki kona epele ta e gbie e wɛ? Na bea mondjani mobe mu modongi djɔ?” 28Abasɔmbedjaka: “Edi moloni moto okɔi bea.” Na bea basali bamohɔdjɔkɔ naikina: “Opali boo lokɛ bopikoa mondjani mobe momina?” 29“Moswa gbie asɔmbedjaka: Ngasa! Tengasa okapikoani mondjani mobe, wapikoakeni pongono bule. 30Kinani ikandoeni isusu engbanga mbunoko ehole e bobuka mbuma ko ta ehole emina, nabalabi na babukeli: dongedjani boso modjani mobe ko monangani bibole tine bomotumba, ngɔngɔ obukeni bule oiseni ta ebombelo.”»

Isɛ i mbuma e motade

(Endja pongono ta Mlk 4, 30-32; Luk 13, 18-19)

31Yesu abatueyaka ikina isɛ: «Bokumu bo diko boboani na mbuma e motade yena eoni moto ta gbie e nde. 32Edi kona ekɛkɛ ta tei e mbuma isusu; endolo ta ehole ekandoi yo, eimei kona enɛnɛ ta tei ekona isusu i gbie: eimei mole, na bea mbulu o diko itongake mopo ta tape i yu.»

Isɛ i lepile

(Endja pongono ta Luk 13, 20-21)

33Yesu abatueyaka isɛ ikina: «Bokumu bo diko boboani na lepile yena etombi mwali ko bobongoanedja na ekenge enɛnɛ e palini mbunoko mobɔtu mosusu mogbaloi.»

Eleho na ndjea e masɛ

(Endja pongono ta Mlk 4, 33-34)

34Yesu abalaka meako misusu na emumu e bato na ndjea e masɛ; aibabaleaka napɛ bobatueya masɛ. 35Akɔkɔ bea tine bokokedja mobalo mo mbaeli o Ndjakomba:

«Nabalakabi na masɛ,

notɔndeakabini meako mi mbombi donga boyoa bo ngondo#13, 35 Ndj 78, 2..»

Yesu atingodji isɛ i mondjani mobe

36Na bea Yesu akinaka emumu e bato ko akweaka ta ndako. Batingami ba nde baduaka adi yo ko bamohɔdjɔkɔ: «Lotingodja tina e isɛ i mondjani mobe ta gbie.» 37Yesu asɔmbedjaka: «Moto okone kona epele edi Mwana o Moto; 38gbie edi ngondo, kona epele edi bato bakasume Bokumu bo diko; kona ebe edi bana ba satana; 39moloni okone mondjani mobe edi djabulu, bobuka edi suka e ngondo ko babukeli badi babwɛndji. 40Moda mokapikoebo mondjani mobe tine bomodumba ta mosa, oko bea edabi suka e ngondo. 41Mwana o Moto alomabi babwɛndji ba nde, tine bodongedja donga ta Bokumu bo nde, bilambo bisusu bikataedje bato mabaku ko na bato babe. 42Babadumbabi ta ipombe i mosa, oho banɛnɛ bayeakabi ko bakpɛkɛnɛkɛbi mino. 43Na bea, bato ba bodjo adi Ndjakomba bangɛsɛbi elenge moyi ta Bokumu bo Sange e bobo#13, 43 Endja pongono ta Dan 12, 3.. Yona odi na matoi ma booka aoke!»

Isɛ i kuma ebolama

44«Bokumu bo diko boboani na kuma ebolamaka ta gbie. Moto oetɔngɔli aebombi ta tine sepi e nde. Alumake na sepi boo akɛ botɛkɛ losusu lodi na nde bɛngi asombe gbie emina.

45«Bokumu bo diko boboani na moto okakɔe mombongu mobohomba mayaka ma motuya. 46Ekadabo adihi iyaka i motuya monɛnɛ, akɛke botɛkɛ leka lo nde losusu ko asombe oko iyaka imina.»

Isɛ i modjanga

47«Bokumu bo diko boboani naikina elenge modjanga mua modumbi bo ta duwa ko motaedji swi mindumba na mindumba. 48Ekadabo modjanga motaedji swi, baowoi bamotubake o ngondo, tine bohɔ swi: baisake swi bapele ta mitinga ko badumbake leka lobe. 49Edabi bea ta suka e ngondo: babwɛndji baduabi bogbɔtodja bato babe na bato bapele 50tine bobadumba bato babe ta ipombe i mosa; edabi oho biyo ko na bokpɛkɛnɛ mino.»

Bodieli boyanie ko boyou

51Yesu abahɔdjɔkɔ: «Osipoini meako mi mina?» Basɔmbedjaka: «Okobea!» 52Na bea Yesu abalaka na bu: «Edi oko bea, molehi o mobeko yona oimei motingami o Bokumu bo diko, aboani na moswa ndako yona oimedjaka ta ngbongolo e kuma e nde: leka loyanie ko na loyou.»

Bato ba Nasaleta baloni bodima Yesu

(Endja pongono ta Mlk 6, 1-6; Luk 4, 16-30)

53Ngɔngɔ i Yesu bobala masɛ mia, adongaka ta polo yena 54ko asɔmbɔkɔ ta ibonga ikandoaka yo#13, 54 ibonga etingondji Nasaleta. Endja pongono ta 2, 32 ko ta Luk 4, 16.. Abangaka boleha ta sinagoga ko bato basusu badaka ena bakamoaka. Babalaka: «Adihi yo djebeli ye djɔ? Moda ndani akɔkɔ bimbete bi bokamoa bea? 55Iyo te mwana o sapate? Malia te nange e nde? Djake, Esepu, Simo ko Yuda baditi bange i nde? 56Ko bangɛnɛ i nde loditi na bu iya?» 57Na tina emina baimodimeaka. Na bea Yesu abalaka na bu: «Mbaeli bokumaka polo isusu, dongedja oko ta ibonga i nde ko ta pako e nde#13, 57 Endja pongono ta Luk 4, 24; Yoa 4, 44..» 58Yesu akɔ oho baabimbete bi ngindola tina e taka e bodima bo bobo.

നിലവിൽ തിരഞ്ഞെടുത്തിരിക്കുന്നു:

MATAYO 13: ngc

ഹൈലൈറ്റ് ചെയ്യുക

പങ്ക് വെക്കു

പകർത്തുക