MATAYO 23
23
Yesu akebedji bato ta tina e balehi ba mobeko ko na Bapalisai
(Boindja pongono a Mal 12, 38-39; Luk 11, 43.46; 20, 45-46)
1Iboa Yesu abala na bimumu bi bato ko na batingami ba nde bo: 2«Balehi ba mobeko ko na Bapalisai badii ta mesa e eleho ta elomu e botingodja bato mobeko mo Mose. 3Kokoledjani ko kɔɔni eka esusu ebalakadea bo na nu; endelo pɛpɛ bokwanani oko midjɔ mi bobo, modjɔ mo tebakɔe imia mikabale ibo. 4Bakanange mina mi mandi ko na bopipo ta bolwa bɛngi ba mibakeake ta malokuloku ma bato; endelo ibo bɛnɛ te bapale nongo bobɛndjɛ na mosapi 5Mikɔ mi bobo misusu, bakamikɔe oto bɛngi bato ba baɛnɛ. Iboa ta mbanda ko ta mabɔ ma bobo bakalwae biale bi bisendja bidii na Makomi ko bakakadje sɔngɔ dji bisendja djikadae na Makomi#23, 5 Biale bi bisendja: Bisendja bikadae na Makomi: Bayudha basapaka na Ndjakomba balwaka biale bi bisendja bidaaka na Makomi ma mibeko mi Ndjakomba (Boindja Mit 15, 38-41; Boi 13, 1-16; Dit 6, 4-9; 11, 13-21).. 6Bakapale bodaa ta bisika bi ekumu ta tɛkɛ ko ta bisika bi boso ta ndako dji miɔngɔnɔ mi Bayudha; 7bakapale babaiseake ndese ta bisika bi maputo ma bato ko na bobabeaka “Molehi” na bato. 8Endelo ino, pɛpɛ bopalani oko baobeakeni “Molehi”, modjɔ mo ino denga odiini oko na Molehi omɔti. 9Ko iyaya ta kpɔtɔ pɛpɛ bobeani moto omɔti “Sangwanu”, modjɔ mo Sesa adii oko omɔti, Iyona odii ta busa. 10Pɛpɛ bosabeani “Modaledji”, modjɔ mo odiini na Modaledji omɔti oko Kilito. 11Moto odii monɛnɛ ta tei e bino adae mosali o bino. 12Iyona osangɔdjɔdea bamotitedjadea, ko iyona osatitedjadea bamongɔdjɔdea.»
Yesu agamei balehi ba mobeko ko na Bapalisai
(Boindja pongono a Mal 12, 40; Luk 11, 39-52; 20, 45-47)
13«Ndjokwa e bino balehi ba mobeko ko na Bapalisai, bato ba ndango e mongi! Odipeakadeani bato ndjea bɛngi badae pɛpɛ bokwea ta Bokumu bo busa; modjɔ mo, ino bɛɛnɛ otakweadeani, ko osiakadeani bato ibia bapalakadea bokwea.
[14«Ndjokwa e bino balehi ba mobeko ko na Bapalisai, bato ba ndango e mongi! Okakatoeni leka lo bali bagwedja baami ko, okakɔɔeni yuunga dji yai dji yai bɛngi okoseakeni bato. Ta tina emina obolodjadeani etumbu enɔɔke#23, 14 Molɔngɔ imumu modiiti ta makomi manɛnɛ mayou. Boindja a Mal 12, 40..]
15«Ndjokwa e bino balehi ba mobeko ko na Bapalisai, bato ba ndango e mongi! Okakɛɛni mɛɛngɔ ta dua djinɛnɛ ko na o ngondo bɛngi baemedje nongo moto omɔti modhimi o Ndjakomba o Bayudha#23, 15 modhimi o Ndjakomba o Bayudha: Edii moto odii pɛpɛ bodaa Moyudha endelo adhimei mibeko ko na Ndjakomba o Bayudha (Boindja Bik 2, 11; 6, 5; 13, 43). Boɛngɛ Bik 10, 2., ta ndelo e mobolodji ino okamoimedjeni moto o ipelu mbala ibae bonɔ ino.
16«Ndjokwa e bino, badaledji bagwa miso! Ino okabaleni bo: “Moto akakata seleka na kombe e tepelo, iyena idiiti na modjɔ; endelo moto akakata seleka na kombe e wolo e tepelo etungi na nde bokokedja seleka e nde.” 17Bindanga! Bato bagwa miso! Eka enɔi tɛtɔ nda: wolo isa tepelo iyeye ikaimedje wolo esɛnɔke? 18Okabale naikina bo: “Moto akakata seleka na kombe e etumbelo, ediiti na modjɔ; endelo moto akakata seleka na kombe e ibondja dji dii ta diko di etumbelo, etungi na nde bokokedja seleka e nde.” 19Bato ba miso mago! Eka enɔi tɛtɔ nda: ibondja isa etumbelo ekaimedje ibondja disɛnɔke? 20Iyoyo okakate seleka na kombe e etumbelo akati na kombe e etumbelo ko na leka losusu lodii o diko di etumbelo; 21iyona o kati seleka na kombe e tepelo akati na kombe e tepelo ko na kombe e Iyona okadikame ena; 22Ko iyona okakate seleka a kombe e busa akakate seleka a kombe e kiti e bokumu bo Ndjakomba ko na kombe e Iyona okadae ta diko di kiti emina#23, 22 Boɛngɛ Isa 66, 1; Mat 5, 34..
23«Ndjokwa e bino, Balehi ba mobeko ko Bapalisai, bato ba ndango e mongi! Okaputeni ekenge emɔti e doomi e matungulu, edjembe#23, 23 Boindja Lew 27, 30; Dit 14, 22. ko na mondundumba, endelo obudjeeni bileho binɔi na tɛtɔ ta mobeko: bodju, pɛhɛ ko na edhimeli; iyena edii eka etungi e kɔɔme na pɛpɛ bobosana boputa ekenge e doomi. 24Badaledji ba miso mago! Okakɔngɔleni dhumbɛmbɛ endelo omeakeni kamela mosusu!
25«Ndjokwa e bino, balehi ba mobeko ko na Bapalisai, bato ba ndango e mongi! Okasɛnodjeni sokolu e kɔbɔ ko e saani, enakoboa ta o tei djiluma na leka loiba ko na leka lo bokoso. 26Mopalisai o miso mago! Sɛnodja boso o tei e kɔbɔ bɛngi sokolu pongono eimee esɛnoke.
27«Ndjokwa e bino, balehi ba mobeko ko na Bapalisai, bato ba ndango e mongi! Okuanakani na makila imia masuowa bo mokobo mopu, makangɛse sokolu, endelo ta tei emu maluma na mikua mi bato bago ko na djɛti dji mondumba mosusu. 28Mondumba momɔti pongono na nu, ta boso bo bato oanɛmɛkɛdeani bato ba bodju sokolu, endelo olumani na ndango e mongi ko na bobe.
29«Ndjokwa e bino, balehi ba mobeko ko na Bapalisai, bato ba ndango e mongi! Okatongeni makila ma batɛli ko okayɔeni makila ma bato ba bodju, 30ko okabaleni bo: “Loso lohelama ta ehole e bakɔkɔ bayou ba biso, ka loikweaka ta inginda di botangedja makiya ma batɛli.” 31Ino bɛɛnɛ okabaleni tati e bosapunda bo odiini batitani ba bato ibia baowa batɛli. 32Bopele! Kpokpomani mbunoko osidjeni bokɔɔ mosala mobanga na bakɔkɔ ba bino bayou! 33Ndjɔ! Ibota di mimbitɔ! Modumba ndani mobwani na nu botia etumbu e ipelu? 34Na tina emina mbi naolomeabini batɛli, bato ba konga ko na balehi ba mobeko. Owabini bakina, obakabini bakina ta ekulusu, ko bakina obomabini mbalake ta ndako dji bino dji miɔngɔnɔ ko obatuteabini engi ngando enɛnɛ. 35Ta tina emina, makiya ma bato ba bodju imia masopea ta kpɔtɔ bobanga na makiya ma Abɛlɛ, moto o bodju mbunoko ta makiya ma Djakalia, mwana moomi o Balakia, iyona oowano ta pakasa e Esika Esɛnɔke na etumbelo#23, 35 Boindja Mba 4, 8; 2Kl 24, 20-22., mabakamabi ta diko di melo mi bino. 36Naotɔndeakadeani sooti mɛnɛ bo: etumbu iyena esusu ekwabi ta dii bato ba mbota iyeye!»
Yesu ko na Yelusalɛmɛ
(Boindja pongono a Luk 13, 34-35)
37«Yelusalɛmɛ, Yelusalɛmɛ, wɛ okaoowoe batɛli ko bato ibia bakaolomee ibo okabaowoe na mabɔkɔ! Mbala djeka dji pala mbi naputoanedje baana ba wɛ, ondingo kɔkɔ o mwali akaputoanedja baana ba nde ta nase dji mapapu ma nde, endelo ino oipalani modjɔ momina. 38Ko ta tina emina, ndako e bino eodikei etengelenge#23, 38 Boɛngɛ Yil 22, 5.. 39Modjɔ mo, naotɔndeakadeani bo: banga edɛdiyeye otanɛbinini naikina, mbunoko obalebini bo: “Yɛɛ bo adjongoame Iyona okɛkɛdea adoe na kombe e Kumu#23, 39 Ndj 118, 26.!”»
നിലവിൽ തിരഞ്ഞെടുത്തിരിക്കുന്നു:
MATAYO 23: ngc
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©2025 Communauté des Eglises Travaillistes (CET)
