YOANE 21
21
Yesu aimanei batingami sambo
1Ngɔngɔ djimina, Yesu aimanea na ikina ta dii batingami ta mokula mo ibeke di Tibeliade. Indja mondumba mo iyo na baimanea yo: 2Simona Petelo, Toma obeaka bo Ipasa, Natanaɛlɛ odaaka o Kana ta Galileya, bana baami ba Djebede, ko na batingami bakina babae, badaaka na bu engbanga. 3Simona Petelo abala na bu bo: «Mbi nakɛi a pɛsɛlɛ.» Ibo babala nande bo: «Iso, lokɛkɛ nawɛ pongono.» Iboa bakɛɛ, ko baso batitea ta bwato. Endelo baiowa nongo eka emɔti ta bulu bomina. 4Ehole ebanga busa bohoa, Yesu aemaka ena ta mokula, endelo batingami baidjebaka bo edaka iyo. 5Iboa Yesu abala na bu bo: «Bana ba mba, oowoini swi?» Bamosɔmbedja bo: «Ngasa». 6Abala na bu bo: «Dumbani modjanga ta dɔngɔ di ebɔ e baami e bwato ko odiadeani.» Iboa baso badumba modjanga, ko baihɔnɔ bomotuba ta madiba, elɔkɔ e bo molumaka na swi#21, 6 Boɛngɛ milɔngɔ. 3 ko 6 ko Luk 5, 4-7.. 7Motingami iyona opalaka Yesu abala na Petelo bo: «Edii Kumu!» Ehole eoka Simona Petelo bo: «Edii Kumu», atomba esendja ende e diko aedinga ta bongo, modjɔ mo aeiwaka bɛngi asɔle, ko asasaba ta madiba. 8Batingami bakina babuki badoa na bwato, atuba modjanga imua molumaka na swi: baidaka bohali na mokula, mbuti na mɛtɛlɛ mokama. 9Ehole eduboa bo o ngondo, batanea mosa molanedjake na swi o diko, ko na mwɛmbɛ. 10Yesu abala na bu bo: «Doani na ndambo ekina e swi ta ibia basaowa ino.» 11Simona Petelo atitea ta bwato ko atuba modjanga o ngondo molumake na swi banɛnɛnɛnɛ: swi basusu badaaka mokama na tuku itano na basato. Nongo ko ataa swi banɛnɛ, modjanga moialeana. 12Yesu abala na bu bo: «Doa ayakeni.» Pɛpɛ nongo motingami omɔti omeka bomowadja bo: «Wɛ nda?», modjɔ mo badjebaka bo edaka Kumu. 13Yesu abatama, atomba mwɛmbɛ ko abakabanea; abapa pongono swi. 14Edaka mbala e basato#21, 14 Boindja 20, 19, 26. esainedja Yesu adii batingami bande, donga ehole esisoa yo ta tei e bato bago.
Yesu na Petelo
15Ngɔngɔ dji boyaka, Yesu awadja Simona Petelo bo: «Simona, mwana o moomi o Yoane, okapaleni bonɔɔ ibi basusu?» Amosɔmbedja bo: «Oko boa, Kumu, odjebakadea bo mbi nakaopale.» Yesu abala na nde bo: «Banea bana ba mbi ba bhata.» 16Ko amowadja mbala e babae: «Simona, mwana moomi o Yoane, okapaleni?» Amosɔmbedja bo: «Oko boa, Kumu, odjebakadea bo mbi nakaopale.» Yesu abala na nde bo: «Banea bhata ba mbi.» 17Ko amowadja naikina mbala e basato: «Simona, mwana moomi o Yoane, okapaleni?» Petelo aoka ndjokwa ta modjɔ momowadja Yesu ta mbala e basato bo: «Okapaleni?», ko amosɔmbedja bo: «Kumu, wɛ odjebakadea midjɔ misusu; odjebakadea bonie mbi nakaopale!» Yesu abala na nde bo: «Banea bhata ba mbi#21, 17 Boɛngɛ Bik 20, 28; 1 Pi 5, 2.. 18Oko boa naotɔndeakadea, sooti mɛnɛ bo: ehole edaka wɛ mondjenga, otingeaka wɛ mɛnɛ mosenge mo wɛ mo esendja ko okɛkɛ ta esika esusu epalaka wɛ; endelo ehole eimeadea wɛ mosuku, oninodjadea mɔmɔ, moto okina atingeadea mosenge mo wɛ ko aotombadea ta polo edaadea wɛ pɛpɛ bopala bokɛ.» 19Ta mibalo mimina imia, Yesu ainedjaka mondumba ndani mogwabi Petelo ko na bopa ekumu ta dii Ndjakomba. Ngɔngɔ djimina, Yesu abala na nde bo: «Kimanani.»
Yesu na motingami opalaka iyo
20Petelo ahombana ko aso aɛnɛ ngɔngɔ dji bobo motingami iyona opalaka Yesu, iyona okukamaka ta bupa bo Yesu ehole eyakaka ibo ko awadjaka Yesu bo: «Kumu, iyona omina ookabadea nda#21, 20 Boindja 13, 25.?» 21Petelo amoɛnɛ ko awadja Yesu bo: «Kumu, iboa iyo modadea na nde bo?» 22Yesu amosɔmbedja bo: «Mbi nakapala bonie iyo ayeyoe tee mbunoko nakasɔmbɔ, moindji wɛ? Wɛ, kimanani!» 23Gala emina enangana ta tei e badhimi bo motingami omina atagwabi. Enakoboa Yesu aibala na Petelo bo: «Atagwabi», endelo abalaka na nde bo: «Mbi nakapala bonie iyo ayeyoe tee mbunoko nakasɔmbɔ, moindji wɛ?» 24Edii oko motingami omina obalakadea tati e mɛko mimina imia ko amiisi ta mokanda, ko iso lodjebakadea bo tati e nde edii e sooti#21, 24 Boɛngɛ 19, 35..
Ta bosukedja
25Yesu akɔɔ midjɔ mikina mibuki minɛnɛ. Ekadaa bo lotubane modjɔ momɔti na momɔti ta mokanda, nalɛdjɛkɛdea bo ngondo mobimba ebwaniti bodia buku djikomadea iso#21, 25 Boɛngɛ 20, 30. .
നിലവിൽ തിരഞ്ഞെടുത്തിരിക്കുന്നു:
YOANE 21: ngc
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©2025 Communauté des Eglises Travaillistes (CET)
