BIKƆMELI BI BA PƆSOLU 9
9
Saulu ahombedji molema
(Boindja pongono a 22, 6-16; 26, 12-18)
1Ta ehole emina iyena, Saulu, aikinaka boanedja ko na boowa batingami ba Kumu. Aso akɛɛ ta dii nganga o Ndjakomba o monɛnɛ 2ko amowodja mikanda mi bopa bato ba ndako e miɔngɔnɔ e Bayudha e Damasi, bɛngi akatanea bato, bali na baami, bakimanaka Ndjea#9, 2 Ndjea emina edii wɛtoko einedjakadea bileho ko na mohelo ta edhimeli tina e Kumu Yesu. Boindja pongono ta 18, 25-26. 19: 9, 23. 22, 4. 24, 14, 22. 25, 3. 24, 14, 22. 25, 3. Boɛngɛ Isa 30, 21; Ndj 27, 11., abwani bobapea ko bokɛɛ na bu ta Yelusalɛmɛ. 3Ehole edaka iyo na ndjea, aimei mbuti na Damasi, mbala emɔti, bohu bomɔti bodonga ta busa, bo mokunda. 4Akwa ta kpɔtɔ ko aoka kɔpi emɔti e motɔndeaka bo: Saulu, Saulu, tina enɔngedjakadeani na wɛ nda? 5Awadja bo: «Kumu wɛ nda?» Ko kɔpi emina esɔmbedja bo: «Mbi nadii Yesu iyona onɔngedjakadea wɛ. 6Endelo angɔɔ, kwea ta ngando enɛnɛ, ko baotɔndeadea eka ndani ebwanadea wɛ bokɔ.» 7Bato badalaka na nde, baemaka na pɛ bobala nongo kɔpi emɔti; baoka moholi, endelo baiɛnɛkɛ nongo moto omɔti. 8Saulu asangɔdjɔ ta kpɔtɔ ko adipoa miso, na nongo miso mande adaaka mo bwase, endelo ainɛkɛ. Bamopea ta ebɔ bɛngi bakɛe na nde ta Damasi. 9Akɔɔ masu masato, pɛpɛ boɛnɛ ko aiyaka ko aimwaka madiba. 10Motingami omɔti adaaka ta Damasi na kombe e Ananiasi. Kumu asaɛnɛmedja na nde na ndjɛnɛ ko abala na nde bo: «Ananiasi!» Asɔmbedja: «Kumu mbi iyo.» 11Kumu abala na nde bo: «Kɛɛ ta ndjea e Bodju, ko ta ndako e Yudhasi ko wadja moto o Talase na kombe e Saulu. Angɔnɔ ta ehole emina, 12ko, na ndjea e ndjɛnɛ, aɛnɛ moto omɔti na kombe e Ananiasi akweaka ko abakeaka mɔmɔ ta diko di nde bɛngi aɛnɛ naikina.» 13Ananiasi asɔmbedja bo: «Kumu, naoki bato banɛnɛ babali na mbi tina e moto omina ko batɔndeini midjɔ mibe misusu mikɔi iyo badhimi ba wɛ ta Yelusalɛmɛ. 14Ko adoi iya na bokondji bomopi banganga ba Ndjakomba banɛnɛnɛnɛ tina e bopea bato basusu babeakadea ta kombe e wɛ.» 15Endelo Kumu amotɔndea bo: «Kɛɛ, modjɔ mo nahɔi moto iyona adae esaeli e mbi bɛngi adjebedje kombe e mbi ta bikomi bikina ko ta dii bakondji, ko na bana ba Isalɛlɛ. 16Namoinedjadea mbi mɛnɛ mondumba motungi na nde boɛnɛ saya tina e kombe e mbi.» 17Iboa Ananiasi aso akɛɛ. Akwea ta ndako, abakea mɔmɔ ta diko di Saulu ko amotɔndea bo: «Saulo, mwange mbi, Kumu Yesu osaoimanea na ndjea asadoaka wɛ alomini bɛngi osɔmbe boɛnɛ naikina ko bɛngi olume na Mwembo Mosɛnɔke.» 18Na mbala emɔti, leka lomɔti ondingo poso dji swi loimana ta miso ma Saulu, ko aso aɛnɛ naikina. Aema diko ko atomba batisimo; 19ko, ayaka, abolodja mogadjo.
Saulu alehi ta Damasi
Saulu adaaka baa masu na batingami ibia badaaka ta Damasi. 20Na mbala emɔti abangaka boleha ta ndako dji miɔngɔnɔ dji Bayudha, na botɔndea bo Yesu adii Mwana o Ndjakomba. 21Bato basusu ibia bamohokamedjaka bakamoaka ko bawadjaka bo: «Iyo te moto onɔngedjaka na ngulu mɛnɛ bato ibia bakabee kombe e Yesu ta Yelusalɛmɛ? Ko asadoa iyo iya bɛngi abapee ko akɛe na bu ta dii banganga ba Ndjakomba banɛnɛnɛnɛ?» 22Endelo Saulu alehaka oko na ingbangba: ehole ebainedjaka iyo bo Yesu adii Masiya, Bayudha ibia badikamaka ta Damasi baidiaka eka e bosɔmbedja. 23Ngɔngɔ dji moo ehole, Bayudha batomba meko e boowa Saulu, 24endelo Saulu asipoa kopolo e bobo. Bulu na moi basɛndjɛlɛ midipe mi ngando enɛnɛ, bɛngi bamoowoe. 25Iboa batingami ba Saulu bamoisa ta itunga na bulu bamopendedja ta dɔɔngɔ dikina di ekuka e ngando enɛnɛ#9, 25 Molɔngɔ mo 23-25: boɛngɛ 2Ko 11:32-33..
Saulu ta Yelusalɛmɛ
26Aimea Saulu ta Yelusalɛmɛ, ahomba mwɛngi mo boputoana na batingami; endelo ibo basusu babangaka, modjɔ mo baidhimaka bo aimea motingami. 27Iboa Balanabasi amotomba ko akɛɛ na nde ta dii bapɔsɔlu. Abatubana mondumba moɛnɛ Saulu Kumu na ndjea iyona omobalea. Abatubana pongono na swuiya bo Saulu alehaka na kombe e Yesu ta Damasi. 28Banga ehole iyena, Saulu akatana na bu, baetetanaka ta Yelusalɛmɛ ko alehaka na swueya na kombe e Kumu. 29Abalaka ko babomanaka kitɛ pongono na Bayudha ba monɔkɔ mo Gɛlɛki; endelo ibo bahombaka mwɛngi e bomoowa. 30Ehole eoka denga modjɔ momina, bakɛɛ na Saulu ta Sedjale, iho baso bamoloma ta Talase. 31Iboa Ekelesa, edaka na bogo ta Yudhea esusu, ta Galileya ko na ta Samalia; epingaka ko edaka na isuma ta dii Kumu, ekandoaka na ngulu e Mwembo Mosɛnɔke.
Ene aheli
32Petelo, moto opukanaka ta ekomi esusu, busa bomɔti akɛɛ ta dii baasɛnɔke bahelamaka ta Lida. 33Atanea iho moto omɔti na kombe ende Ene, odaaka asambi ta esambe tomba bianga bomwambe, modjɔ mo adaaka na binama bikatatake. 34Petelo amotɔndea bo: «Ene, Yesu Kilito aoheledji ehele! Angɔ ko buluka esambe e wɛ.» Na mbala emɔti, Ene asangɔdjɔ. 35Bato basusu ba Lida ko na ibia ba mbuti na esika ebatatake e Salɔni bamoɛnɛ ko baso badhimea Kumu.
Bosisoa bo Dolokasi ta bogwa.
36Edaka na motingami mwali omɔti ta Yope kombe e nde Tabita. Kombe emina ta kɔpi e gɛlɛki etingodjakadea «Dolokasi», epalakadea bobala «ndjumba». Akɔɔkɔ seko bopele ko akɔmedjaka bakwali. 37Oko ta masu imia, akwa na epeko ko aso agwa. Ngɔngɔ dji bososa mokuku mo nde, bamosambea ta ekenge emɔti e ndako e diko#9, 37 Ekenge e ndako… Ndako: boindja ta 1:13 kona nase.. 38Iyana aoka batingami bo Petelo adii ta Lida edaka mbuti na Yope#9, 38 Tomba Lida mbunoko Yope edii mbuti na kilomɛtɛlɛ 20. . Bamolomea bato babae amoangɔnɔ bo: «Pɛpɛ boyeyoako doa ta dii iso.» 39Petelo aangɔ ko akɛɛ na bu engbanga emɔti. Ehole eimea bo bakɛɛ na nde ta ekenge e ndako e diko. Bali basusu bagwa na baami baso badoa ta dii iyo ayee; bamoinedja simisi na mikoto mitonga Dolokasi ehole edaka iyo mɔsu. 40Petelo aimedja bato basusu sokolu, adaa magbunda ko aangɔnɔ. Ko ahombana ta pamba edaka ebembe ko abala bo: «Tabita, angɔ!» Adipoa miso, ko aso aɛnɛ Petelo, adaa na mobondo. 41Petelo amopea ta ebɔ ko aso amoangɔdjɔ. Ngɔngɔ djimina abea badhimi na bali ba bogwa, ko abamoinedja na bomɔ. 42Modjɔ momina modjebama ta Yope mosusu ko bato banɛnɛ badhimea Kumu. 43Petelo akɔɔ masu manɛnɛ ta Yope, ta ndako e moto omɔti kombe ende Simona iyo odaaka mobɔngedji o yobo dji tito.
നിലവിൽ തിരഞ്ഞെടുത്തിരിക്കുന്നു:
BIKƆMELI BI BA PƆSOLU 9: ngc
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©2025 Communauté des Eglises Travaillistes (CET)
