Matié 25

Insap i pɔpúl páát

1Yésus kanyi andíkɛ́k ɛ́ɛ́ «Pufuŋ pú mɛnɛ́mɛnɛ́ɛ áányípá ɛlɛɛ́ pɔpúl páát pɔ́mɔɔ́kɔ́l mulámba múɔ́p ó kuokólí ɔŋúlɔ. 2Pátáán mapá kati tutátúɛ, epe pátáán mapá ni iŋuɛ́lí. 3Ɔ́ kukɔ́lɔn mulámba múɔ́p, pɔpúl pá kati tutátúɛ timapíyuukɛn kelensíne; 4pɔpúl pamaápá ni iŋuɛ́lí, pɔ́ɔ, pɔ́mɔkɔ́l mulámba múɔ́pɔ ne kelensíne kí indók. 5Aná ɔŋúlɔ meénéŋélényí á kuasiám póond ɛ́ kunyɛŋɛn, peem páápítimɛn. 6Kɔ́ ɔ́tɛ́m ú putúk, nupéképék núásuumɔk: Ɔŋúlɔ ewe! Ánuámán ó kuokólí wɔ. 7Kɔ́ɔ́kɔ́ɔ pɔpúl peem mɛɛ́nyɔ́k, péétúm mulámba múɔ́p. 8Pá kati tutátúɛ kanyɛɛ́ kuówon pí iŋuɛ́lí: Ánutúfá kelensíne waanɔ́, á kiákí mulámba múásɔ́ kanyɛɛ́ ewúen. 9Pámaápá ni iŋuɛ́lí póondinyi pɔ́: Aákóo, utíɛ́kɛɛsíkɛ́n ó pusíó púásɔ́ naanɔ́! Ánuyɔɔ́k ku petúúsí núɔ́ndɔ́ waanɔ́ kɔ́ɔk. 10Pɛmɛɛlɛ́ páyuukan ɔ́ kuɔ́ndɔ́, ɔŋúlɔ wáasiám; epé pamaápá mekúyekúye peepíkin nɛɛyɛ́ á kitaŋá kí nuɔ́ndɔ́n, pééfuuk níítí ní kiansi. 11É kélém akáánɛ́, pɔpúl pá kati tutátúɛ páásiám ɔ́ kíɔ́p kisikɛl, póond ɔ́ kutɔndɔn: Ɔkɔ́n, Ɔkɔ́n, túfuunin! 12Ɔkɔ́n woondinyi ɛ́ɛ́: É kémuémue, yɔɔ́núɔ́yɔn, indipá inúmenyen. 13Á kuamaná Yésuse wɔɔkɔɔyɛt ɛ́ɛ́: Énukúle kɔk, á kiákí ɛ́ɛ́ nutipá numenyen tɛ puɔ́s tɛ kikulɛ́.»

Nsap i peelímoólí pátátɔ́

(Lúk 19.12-27)

14Kɔ́ɔk púnyi aná mɔɔnd umaámbá kuyɔɔk kɛ́ ɛŋɛnd, waapílikɛn peelímoólí pɛ́ɛ́yɛ́ weeki pɔ́ punɛ́m púɛ́yɛ́. 15Ewe weeki wɔ́ imfɔt sí muenyí itáan, omotí iyáandɛ́, ewe oloti ómoómí, siki mɔɔndɛ kɛ́ɛ́yɛ́ kí imbekí; akáánɛ́ kɔk waayɔɔk. 16Nɔ niɔ́kɔ́tɔ́n ewú umaápián imfut itáan, wɛɛnyɛlɛ́ nionyí na sɛ́ɛ, waand apútɔ sílotí itáan. 17Tɛ ewú umaápiá imfut íyáandɛ́ wɛɛl ɛlɛɛ́ ukutúan waand apútɔ iyáandɛ́ kɛ́kɛ́ɛ́yɛ́. 18Maná ewú umaápiá ɔmfut ómoómí weenyetímé ɔmbɛ́l e kúúsí woond wɛɛnɛmb muenyí mú masɛ wɛɛyɛ́ kɔ́ɔk. 19É kéléme kú kinúm kí kisikɛl, másɛ u peelímoólí waasiám, woond ó kuówon aná pémeéndésí punɛ́m púɛ́yɛ́. 20Ewú umaápiá imfut itáan weepísíit, waand etíínyi ítáan silotí, wɔ́ kɛ́ɛ́yɛ́ ɛ́ɛ́: Mása, amimfá imfut ítáan; ítáan sílotí esie yáányípɔ́t! 21Másɛ wɛɛyɛ́ kanyi kɛ́ɛ́yɛ́ ɛ́ɛ́: Anakáánɛ́ nyɛ peseé, anyi kinɔ́k kí eŋelípuólí kínyɛɛ́ indɛ́ndɛ́nɛ, á paán pá maandá aŋúɛ indɛ́ndɛ́nɛ, iŋekueki kɔk mókusol, óló asíyayápá kɔk na másɛ waawɔ. 22Ewú umaápiá imfut iyáandɛ́ weepísíit ɛ́ kíɛ́yɛ́ kisikɛl, ukanyi ɛ́ɛ́: Mása, amimfá imfut íyáandɛ́; íyáandɛ́ sílotí esie yáányípɔ́t. 23Másɛ wɛɛyɛ́ kanyi kɛ́ɛ́yɛ́ ɛ́ɛ́: Anakáánɛ́ nyɛ peseé, kinɔ́k kí éŋelí puólí kínyɛɛ́ indɛ́ndɛ́nɛ, amápá indɛ́ndɛ́nɛ á paán pá maandá, iŋɛkutɛ́k kɔk ɔ́ mɔɔkɔ́n; óló asíyayápá na másɛ waawɔ. 24Upísííten ɛ́ kíɛ́yɛ́ kitúmu, ewú umaápiá ɔmfut ómoómí kanyi ɛ́ɛ́: Mása, yeémenyen ɛ́ɛ́ anyi mɔɔnd unyɛɛ́ kulal: oókooko kɔɔ́mɔ amanyɛɛ́ atikɔ́n, ɔpɔ́ŋɔn kɔɔ́mɔ amanyɛɛ́ etipuú; 25á puwaá mɛnɛ́mɛnɛ́ɛ imɛnyɛɛ́nɛ́mbɛ́ ɔmfut wááwɔ ú muenyi e kúúsí: wɔ́ ewe, punɛ́m púáwɔ pukáánɛ́. 26Maná, másɛ wɛɛyɛ́ woondinyi wɔ́ ɛ́ɛ́: Kilɔk kí eŋelípuóli, anúnúnɔn ewe! Eémenyen ɛ́ɛ́ yoókooko kɔɔ́mɔ insiɛ́kɛl indinyimɛ́ yoond imbɔ́ŋɔn kɔɔ́mɔ insiɛ́kɛl indipuú. 27Insí ɛmɛnyɛɛ́nɛ́k ɔmfut wáámɛ ú muenyí ó nukólópóŋ: Káámɛ ó kuosiondó, insiɔ́kɔ́l ɔmfut wáámɛ nɛ ɛnsɛ́ŋ. 28Ɔ́nukɔ́l ɔmfut ukáánɛ́ kɛ́ɛ́yɛ́ núeki sɔ́k unyɛɛ́ ni imfut síát. 29Á kiákí ɛ́ɛ́ á mɔɔnd upiánɛ́, pɔ́ɔ́nyɔ́ɔ́yikinɛn wɔ́, waányípá á puyupuyɛ; maná é wɔ́ ewú utiányípá upian, tɛ epú upitáákanɛ́ ɛ́ɛ́ waápian, pɔ́ɔ́nyíkɔ́l. 30Anúnúnɔn u eŋelípuóli ewe, ánutúút wɔ́ kí imbíne i ɔɔ́ndɔ: akáánɛ́ no oŋónyi na kupípanda eŋiŋ áányípáánɛ́ɛ.

Isɔ́ɔ́sɔ í kusúkin

31«Aká Muɔ́nɔ́ u mɔɔnd óónyóóloné kɛ́ɛ́yɛ́ á puŋaŋa, embúl nɛ Peéŋele, wɔɔ́nyínyɔmbɛt kɛ́ɛ́yɛ́ kí indáŋa i nuúmu. 32Pitɔŋ kitikit áányípíkúsikan kɛ́ɛyɛ́ ó pusíó, waányáátuna pɛɛnd pɔ́ɔ nɔ pɔ́ɔ, aná ekííkí melúk áátunanɛ́ pitúúmbɛ́ɛ ni imbúnyi. 33Waányáak pitúúmbɛ́ɛ kɛ́ɛ́yɛ́ kɔ́ ɔmbɔk wɔɔnɛm, imbúnyi kɛ́ɛ́yɛ́ kɔ́ ɔmbɔ́k waakányí. 34Akáánɛ́ kɔk efuŋ áányítíánɛ́ páányípáánɛ́ kɛ́ɛ́yɛ́ kɔ́ ɔmbɔ́k wɔɔnɛ́m: Ónuóló panɔ́ epé Taatá meépinúún, núpíkin é pufuŋ púmɔɔ́pípɔ́k káánɔ́ ó pusíó kuetúm á nipund ní kúúsí. 35Á kiákí imapá ni insaná, numfá púkunya; yaapá na niíta numfá púkupúwa; imapá eŋenyí nuɛkinɛk; 36nuɔ́l kutɔɔ́ nuɛkinlɛŋ; inúma nuosiyoosin; á kiansi kí imbíne nuól nuesimbíkéliti. 37Akáánɛ́ pí indɛ́ndɛ́nɛ óónyóóndinyi wɔ́ ɛ́ɛ́: Ɔkɔ́n, nííkí tumɛɛ́kuɛ́n insaná kunúma, tuokuoyi, niíta naawɔ, tuakufá moomb má kupuwa? 38Naáni tumɛɛ́kuɛ́n eŋenyí, tuɛkunɛk, nuɔ́l kutɔɔ́, tuɛkulɛŋ? 39Nííkí tumɛɛ́kuɛ́n anúma kúnyáánɛ á kiansi kí imbíne tuól é kuesikupíkélíti? 40Efuŋ óónyóóndinyi pɔ́ ɛ́ɛ́: É kémuémue, yɔɔ́núɔ́yɔn ɛ́ɛ́ á kisikɛl kitikit numaápá nuɛlɛ pú á tuútáyútáyú, pɛ́nyɛɛ́ paandimán páámɛ, niŋuɛ numiíŋɛlɛ́ pɔ! 41Akáánɛ́ waányítían epé páányípáanɛ́ kɛ́ɛ́yɛ́ kɔ́ ɔmbɔ́k waakányí ɛ́ɛ́: Ánuupɔ́ kaáyɛ́ naamɛ, panɔ́ nunyɛɛ́ pɔnyɔmɔ́n, ánuupɔ́ é yiik í teeníík Támbák maákumɔ́ ó pusíó pú nyɔli i pikána ne Peéŋele pɛ́ɛ́yɛ́. 42Á kiákí ɛ́ɛ́ imapián insaná nutimimfá púkunya, yaapian niíta nutimimfá moomb; 43imapá eŋenyí nutiminɛk; imapá nuɔ́l kutɔɔ́ nutiminlɛŋ; inúma, iŋúɛ á kiansi kí imbíne, tɛ ɛ́ɛ́ núósiyoósíne! 44Akáánɛ́ pɔ́ kɔ́kɔ́ɔ́p póónyóóndinyi ɛ́ɛ́: Ɔkɔ́n, naánɛ́ púmaátuámɛ́n ɛ́ɛ́ tukuɛ́n insaná na niíta naawu; aŋúɛ eŋenyí nuɔ́l kutɔɔ́ anúma punyáanɛ aŋu á kiansi kí imbíne, tɛ ɛ́ɛ́ túkupísíítine? 45Akáánɛ woónyóndinyi pɔ́ ɛ́ɛ́: É kémuémue, yɔɔ́núɔ́yɔn, á kisikɛl kitikit numɛɛ́lɛ́ nutiɛlɛ́ yiípáyúpáyú puu, tɛ niŋúɛ nutimíiŋɛlɛ́ puu. 46Púányípá kɔk ɛ́ɛ́ pakáánɛ́ páanyíyuukanɛ́ kɔk, kí inséésítenyí i teeníík, pí indɛ́ndɛ́nɛ ɔ́ kusɔ́t kú tenííkée.»

നിലവിൽ തിരഞ്ഞെടുത്തിരിക്കുന്നു:

Matié 25: yav

ഹൈലൈറ്റ് ചെയ്യുക

പങ്ക് വെക്കു

പകർത്തുക