2 Piɛl 3
3
Puɔ́sí pú Ɔkɔ́n
1Pekúl páámɛ, ɔmbɔp úkáandíɛ ewe inúɔ́ŋɔ́ninɛ́ɛ; kí imbɔp síkutúan sikáánɛ́ inúɔ́ŋɔnɛ́ɛ, yeénúpítékesi epú numoópíónyítónyí ɛ́ɛ́ núpia kinɔ́k kí imbítáákítɛ́n. 2Ánupítáákɛ́t tukál etú peémímekélíe pá Támbák no pikotí petúmí mɔɔ́núɔ́yɔn, pínnyɛ pikotí pí Ɔkɔ́n no Osótí waasɔ́. 3Énumenyí ɛ́ɛ́ é metúk me kusúkin, pɛɛnd óónyóól pɔ́sɔ́tɔ́n kɔ́ɔ́p ɔ́ pilɔ́ɔ́ŋɛ́t, páányínúsikan. 4Páányínúsikan pɔ́ɔ́yɔ ɛ́ɛ́: Tíkɛ umɔɔyɛ́t ɛ́ɛ́ woónyóólukun á? Wuunaánɛ́ kɔk. Á kiákí ɛ́ɛ́ kuetúm aká pataatɛ́ɛ mekuen pumanyɛ puandá púmoómí, puandá mapása pútisendi kuetúm á nipundɛ́n. 5Kisikɛl pɔ́ɔ́yɔnɛ́ɛ anakáánɛ́ pépíélitenyeé tɔɔm insúá kásua mɛnɛ́mɛnɛ́ɛ ne kúúsí maápíluŋá á nukál nú Támbák. Kúúsí óólinon ó moomb, Támbákɛ́ɛ waaluŋa kúú ó moomb. 6Puandá púmoómí no moomb á kiandákáand kí nupɔ́l kúúsí kú insúá maákatɛ́k. 7Piluŋ pímoómí, nukál nú Támbák mɛɛ́nɛkɛ́n kúúsí nɛ mɛnɛ́mɛnɛ́ɛ ó pusíó pú yiik íkusúkin nɔ puɔ́s pú isɔ́ɔ́sɔ ne punyím pú pafalfal. 8Puandá nyɛ kɔ́ɔk pekúl páámɛ nutiányípá pékupíéliti ó pusíó pú Ɔkɔ́n, puɔ́s púmoómí nyɛ ɛlɛɛ́ tuɔŋ nukɔ́n, tuɔŋ nukɔ́n ɛlɛɛ́ puɔ́s púmoómí. 9Ɔkɔ́n tipá weélinen kɛ́ɛ́yɛ́ kí indan kisikɛl pólotí pítáákanɛ́ɛ kuélin nyɛ kɔ́ɔk, weépílimbe ó pusíó púánɔ́, utipá waamba punyím puwomom, waákamba ɛ́ɛ́ peem píkúŋɔn. 10Puɔ́sí pú Ɔkɔ́n óónyóol ɛlɛɛ́ eŋépi, puɔ́s pukáánɛ́ mɛnɛ́mɛnɛ́ɛ áányísákɛn na kinɔ́m kí kieyitine, yiik éényipiki mɛnɛ́mɛnɛ́ɛ no muótíótio, kúúsí nɛ pɛɛnd pɔ́lɔpɔnɛ́ɛ kɔ́ɔk no moólí mɔ́ɔ́p, ányípá kí isɔ́ɔ́sɔ. 11Aná maandá makáánɛ́ ɛ́ɛ́sikɛnɛnɛ́ɛ kusákɛn, Kayí kúsɔ́tɛ nuɛsikɛnɛnɛ́ɛ kusɔ́tɔn? Nuɛ́kɛsikɛɛnɛn kusɔ́tɔn aná Támbák ɔ́ɔ́yɔɔnɛ́ɛ ɛ́ɛ́ núpá nulátát nɛɛyɛ́. 12Panɔ́ nupílɔ́ɔ́ŋɔnɛ́ɛ ɛ́ɛ́ puɔ́s pú Támbák óólukun, nupeketesíé puɔ. Puɔ́sí epú puandá kitikit nɛ mɛnɛ́mɛnɛ́ɛ áányímananɛ́ɛ apika. 13Tuépétenyi kɛ́ɛ́yɛ́ kí indan mɛnɛ́mɛnɛ́ɛ wɔɔkɔ́si ne kúúsí kuukɔsi, kɔɔ́mɔ indɛ́ndɛ́nɛ áányípáanɛ́ɛ.
Ɔmbílíkínɛ́n kí iŋuɛ́lí
14Tɛ ɔɔ́pɔn pekúl páámɛ, núɛl numeépétenyi puɔ́s pukáánɛ́, énupíéki ilúndɛ ɛ́ɛ́ púnúkééki é kiyeéwe kati kinyíke, kati kipalalɛ́ɛ ke eŋis ya Támbák. 15Ɔ́nuɔ́p ɛ́ɛ́ é kupílimbit kú Ɔkɔ́n waasɔ́ nunyɛ pákupá petúkúnén. Púú pukáánɛ́ andimán waasɔ́ ne ekúl waasɔ́ Póole, mɔɔ́núɔ́ŋɔ́n kɛ́ɛ́yɛ́ kɔ́ ɔmbɔp. 16púúpú wɔɔyɔnɛ́ɛ kɛ́ɛ́yɛ́ kí imbɔp kitikit itúɛ́ sí moónyi sikáánɛ́ é piénsi pínyɛɛ́ kulal, pɛɛnd pólotí pátiányípá pápian tutátɔ́ na kati kumenye séndesíé insaŋ i tukál tukáánɛ́, yá aná pɛ́ɛlɛnɛ́ na tukál túlotí tú Támbák, páyuukan kɔ́ɔ́p é punyím 17Índɛ panɔ́ kákáánɔ́ pekúl páámɛ panɔ́ pakáánɛ́ pekésítényí. Ánupá kí iŋuɛ́lí, nutipíyapá ɛ́ɛ́ pafal pakáánɛ́ núpúlit, nutipíyapá ɛ́ɛ́ pásúkat kuátap kúánɔ́. 18Ánukumán ɔ́ niɔy ne kumenyi Ɔkɔ́n waasɔ́ ne etúkún waasɔ́ Yésus Kilíise wɔ́ wɛɛsikɛnɛnɛ́ɛ na nukanyi ne nukúm kuup kuám é teeníík ne níík anakáánɛ́.
നിലവിൽ തിരഞ്ഞെടുത്തിരിക്കുന്നു:
2 Piɛl 3: yav
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2026, CABTAL