Romanos 5
5
Cametʉoyoana nirã eate maquẽ 5:1-21
Manigʉ̃mena came ñurõ pʉtʉarigue
1Cʉ̃cã tairo tirigue wapara Manigʉ̃ marĩrẽ marĩcã Jesucristore wedewõrẽ cʉoñerõcãrã “mʉjã ñurã wapa cʉoherara abiro nirã ña” ĩ ĩñawĩ. Tairo tigʉ Manigʉ̃ marĩcã ñañarẽ tirigue wapamenarã marĩ Nirũpʉ̃ Jesúre marĩrẽ cõwõãbosañerõcã tiremenarã marĩrẽ cʉ̃mena came ñurõ pʉtʉañerõcã tirigʉ niwĩ.#3:28; 4:24; Ef 2:14-17; Jn 14:27. 2Marĩ Jesucristomenarã, cʉ̃rẽ marĩcã wedewõrẽ cʉoremenarã marĩ Manigʉ̃mena diamacãrã wederucũmasĩrẽrẽ, cʉ̃cã marĩrẽ ñurõ tirere cʉora ea. Tiera marĩrẽ ĩcãdiamacãrã wãcũrucũñerõcã ti nirucũñerõcã ya. Tairo tira marĩ marĩcã cʉ̃ cʉtiropʉ ñucametʉaro niãtere wãcũrucũrãrã ñurõ ʉsearemena yuerucũmocã.#1Co 15:1; Ef 2:18; Heb 3:6. 3Atie wadorena ʉsearemena yuerucũherimocãrãda; tairora marĩrẽ ñañarõ cametʉañerõcã tirecãrẽ posacaperacãrã ʉsearemena nirucũmocãrãda. Merẽ marĩ “ñañarõ cametʉañerõcã tirere marĩcã posarera marĩrẽ õpe nʉcãmasĩrã niwʉmʉãñerõcã ya” ĩ masĩ.#2Co 12:10; Stg 1:2, 3. 4Marĩcã anorã abiro ñañarõ posarere nʉcãrãrã niwʉmʉãñerõcãrã Manigʉ̃ marĩrẽ “mʉjã ñurõ ya” ĩgʉagawi. Tora abiro marĩrẽ “mʉjã ñurõ ya” ĩyoremenarã Manigʉ̃cã queoro tirucũmocãrẽrẽ marĩ masĩnirã cʉ̃cã marĩrẽ cametʉoatere ʉsearemenarã yuerucũmocãñerõcã ya. 5Tairora ña. Merẽ Manigʉ̃ marĩrẽ Espíritu Santore nʉnirigʉ niwĩ marĩmena nirucũmocãdotigʉ. Tairo tigʉ cʉ̃ Espíritu Santomenarã marĩrẽ cʉ̃cã maĩrẽrẽ cʉocametʉara pʉtʉañerõcã yawí. Tairo tira marĩ “cʉ̃cã ‘abiro tigʉda’ ĩriguere queoro tiherigawi” ĩmasĩheriga.#Flp 1:20; Ef 1:13. 6Marĩcã marĩye ñañarẽ wapamena marĩbasurupe dairo ti camewitimasĩhera nirĩwatoare Manigʉ̃cã queoriabʉreco eariwatoa niñerõcã Jesucristo marĩye ñañarẽ wapamenarã marĩrẽ cõwõãbosarigʉ niwĩ. 7Queorojoropʉare ĩcʉ̃nopera ãpĩcã cõwõãboariguere “yʉ mʉrẽ cõwõãbosagʉda” ĩgʉ̃no icãta ĩcʉ̃no maniwĩ. Basocʉ ñujomocãgʉ̃cãrẽ cõwõãbosagʉnocã maniwĩ. Apewatoare nigʉ̃ nibogawi bigʉpʉa cʉ̃rẽ ñurõ tirigʉnorẽ cõwõãbosagʉno. 8Buri Manigʉ̃ doca marĩcã ñañarẽrẽ tira nicapetacã cʉ̃cã bʉtoro maĩrẽrẽ eñogʉ̃ Jesucristore ticorigʉ niwĩ marĩye wapare cõwõãbosañerõcã tigʉdagʉ.#Jn 15:13; 1Pe 3:18; 1Jn 3:16. 9Jesucristo cõwõãgʉ̃ cʉ̃cã di cõãriguemenarã Manigʉ̃ marĩrẽ ñurã wapa cʉoherara abiro pʉtʉañerõcã tirigʉ niwĩ. Tora abiro tigʉ ninigʉ̃ cʉ̃cã tairo tiriarosotoape cʉ̃cã nipetira ñañarãrẽ ñañarõ tiribʉreco eañerõcã Jesucristomenarã marĩrẽ cametʉomasĩgʉagawi.#3:5, 25; 1Ts 1:10; Heb 9:14. 10Manigʉ̃ marĩcã cʉ̃mena came ñurõ nihericapetacã cʉ̃ macʉ̃rẽ marĩye wapamena cõwõbosañerõcã tiremenarã marĩrẽ cʉ̃mena came ñurõ pʉtʉañerõcã tirigʉ niwĩ. Marĩcʉoro docare cʉ̃ macʉ̃ catirucũgʉ̃ nirẽmenarã marĩrẽ nemorõ doca cametʉogʉagawi cʉ̃basurupera marĩrẽ cʉ̃mena came ñurõ pʉtʉañerõcã tiyoriara niñerõcã.#8:34; 11:28; 2Co 5:18; Col 1:21-22. 11Atie wadora niheri. Marĩrẽ marĩ Nirũpʉ̃ Jesucristomenarã Manigʉ̃ cʉ̃mena came ñurõ pʉtʉarere cʉora eañerõcã yawí. Tairo tira marĩ cʉ̃mena came ñurõ nirerẽ cʉonirã cʉ̃mena bʉtoro ʉseara ña.#Ga 4:9.
Adán ĩñerõcã Cristo
12Ĩcʉ̃ ʉmʉ Adán wãmecʉtigʉmena wado atibʉrecopʉre ñañarẽ tire eariaro niwʉ̃. Cʉ̃cã tairo ñañarẽrẽ tiriguemenarã atibʉrecopʉre cõwõãrẽcã eariaro niwʉ̃. Tairo tiro atibʉreco macãrãpʉre cõwõãrẽ eariasiro nipetira basocare ñañarẽrẽ tirecʉtire eariaro niwʉ̃.#Gn 2:17; 3:6, 19; Ro 6:23; 1Co 15:21. 13Merẽ Manigʉ̃cã Moisére dotire cũãtosʉgueropʉra atibʉrecopʉre basocacã ñañarẽ tire nisiariaro niwʉ̃. Tora abiro ñañarẽrẽ ticapetacãrã tie dotire maniñerõcã Manigʉ̃ cʉ̃jãrẽ “atie dotirere cametʉanʉcãrẽ wapamena wapa cʉora ñawã” ĩheririgʉ niwĩ marĩcʉ̃.#4:15. 14Tairo nicapetacã Adánpʉmena pʉ Moisécã nirĩwatoapʉmacãrãrẽ Adáncã ĩcã dotirere cametʉanʉcãriarora abiro cametʉanʉcãhericapetacã cʉ̃jãcã ñañarẽ tiremenape cõwõãrucũñerõcã tire cʉ̃jãrẽ tairora cõwõãrucũñerõcã tirucũmocãriaro niwʉ̃. Adánrã ñawĩ cʉ̃mena cõwõãrẽrẽ atibʉrecopʉre easocoriarora abiro siro Cristomenarã atibʉrecopʉre catirere easocoriguere eñojomocãgʉ̃.#1Co 15:22, 45. 15Bicapetacã Adáncã ñañarẽ tirigue Manigʉ̃cã icãta wapa boro manirõ ñurõ tiriguera abiro niheri. Adán ĩcʉ̃rã cʉ̃cã ñañarẽ tiriasiromena basoca nipetirare cõwõãte eariaro niwʉ̃. Manigʉ̃pe marĩrẽ maĩgʉ̃ Jesucristo ĩcʉ̃ye wapamenarã nipetiraye niãte maquẽrẽ tibosagʉ icãta wapa bohegʉra cʉ̃rẽ marĩrẽ cõwõãbosañerõcã tirigʉ niwĩ.#5:12, 18-19; Is 53:11. 16“Manigʉ̃cã marĩrẽ icãta wapa boro manirõ ñurõ tiriguere Adáncã ñañarẽ tiriguemenapere tairiwãmesãñurõrã ña” ĩmasĩñamani. Merẽ Adán cʉ̃cã ĩcãrĩrã ñañarẽrẽ tiriguemenarã Manigʉ̃rẽ “mʉ cõwõãcʉra ña” ĩñerõcã tiriaro niwʉ̃. Buri Manigʉ̃cã marĩrẽ icãta wapa boro manirõ tiriguepe ñucametʉasu; marĩcʉorore cʉ̃ marĩrẽ tiemenarã marĩcã pajeri ñañarẽrẽ tiribasoca nicapetacã “mʉjã ñurã wapa cʉoherara abiro ña” ĩ ĩñawĩ ñenowapajoromenacãrẽ tairo tiyoboariaramerẽna. 17Adán cʉ̃cã ĩcʉ̃rã ñañarẽ tirigue wapamenarã nipetira basocare atibʉreco macãrãrẽ cõwõrẽ earigue mañu tairo cõwõãñerõcã tirucũmocã. Tairo tira Manigʉ̃cã cʉ̃cã ĩñamaĩrẽmena Jesucristore ĩcʉ̃rẽna marĩrẽ cõwõãbosañerõcã tiriguemena ñeno wapa boro manirõrã marĩrẽ cʉ̃cã “mʉjã ñurã wapa cʉoherara abiro ña” ĩyorape doca nemorõrã cʉ̃ Jesucristomena mama catiremena dotirucũrõãcu.#2Tm 2:12; Ap 22:5. 18Adán Manigʉ̃cã dotiriguere ĩcãrĩrã cametʉanʉcãrigue wapamenarã Manigʉ̃rẽ “nipetira basoca cõwõãna wado ñawã” ĩñerõcã tiyi. Buri tairora Manigʉ̃cã marĩrẽ Jesucristomenarã ñucametʉaro tigʉ cʉ̃cã ĩcãrĩrã marĩrẽ cõwõãbosariguemenarã nipetira basocare “ñurã wapa cʉoherara abiro ñawã” ĩ ĩñatere tiyi; catire petiherere cʉoaro ĩgʉ̃.#4:25. 19O torena apewãmerẽ Adán ĩcʉ̃menarã Manigʉ̃cã dotire cũriguere cʉ̃cã cametʉanʉcãrigue wapara pajʉ basocare cametʉanʉcãñerõcã tiro eayu. Buri tairora Jesucristo ĩcʉ̃menarã Manigʉ̃cã dotirere ñurõ yʉrigue wapamenarã pajʉ basocare “mʉjã ñurã wapa cʉoherara abiro ña” ĩñerõcã tiro eayu ĩrõ ya.#5:12; 11:32; 2Co 5:21; Flp 2:8. 20Basocare cʉ̃jãpʉre dotire nimocãcapetacã Manigʉ̃ Moisérena dotire cũyugʉ tamʉ. Tiera ñañarẽ tirere õpe sotoa bauniñerõcã tisãtora abiro tiatere nʉniyorigue niyu. Buri tora abiro ñañarẽ tirecʉtirecã sotoa biwʉmʉãcapetacãrã Manigʉ̃pe marĩrẽ cʉ̃cã maĩrẽmenarã tiesotoapera Jesucristomenarã ñucametʉanʉcãrõ tiyi.#7:7, 8; Ga 3:19; 1Tm 1:14. 21Anorã abiro ñañarẽ tirecʉtirecã dotirucũrẽmenarã cõwõãrẽ watiriarora abirora Manigʉ̃ cʉ̃cã maĩrẽmenarã catire petihere watiriguecã dotirucũmocã. Tairo tigʉ Manigʉ̃ tiemenarã marĩrẽ “mʉjã ñurã wapa cʉoherara abiro nirã ña” ĩ ĩñawĩ. Ĩñerõcã tairora marĩrẽ Jesucristomenarã catire petiherere nʉniwĩ.#3:12, 14; 6:23; Jn 1:17.
നിലവിൽ തിരഞ്ഞെടുത്തിരിക്കുന്നു:
Romanos 5: yui
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2026, SIL Global. All rights reserved.
