जोहा 21

जिसु एयाय चेलाको ठेने सोदोरेन

1नोवाको तायोम जिसु दो चेलाको ठेन आरहोंए सोदोरेना, तिबेरियास दोरयाँव ठेन; आर नोनका लेकाय सोदोरेना। 2सिमोन पातरास आर जावाको मेताय थोमा आर गा़लिल रेयाक् कानारेन नाथानेल आर साबदायरेन होपोनकिन आर उनिरेन चेलाको मोदरेन आर बार होड़ मित् ठेनको ताहेंकाना। 3सिमोन पातरासे मेतात्‌कोवा, “हाको सासाप् इञ चालाक्‌काना।” मेतादेयाको, “आले हों आम साँवतेले चालाक्‌आ।” ओडोक चालावेनते ला़उका़रेको देच्एना आर इना़ ञिंदा़ दो चेले हों बाको साप्‌लेत्‌कोवा।#लुक 5:5

4आदो आङगाक्‌कान ताहेंकानरे जिसु दो ढिपरेये तेङगोयेना, एनहों चेलाको दो बाको बाडायलाक्आ जिसु कानाय मेनते। 5आदो जिसुइ मेतात्‌कोवा, “हेंदा बाछा, जाहान हाको मेनाक्‌कोवा?” रोड़ रुवा़ड़ादेयाको, “बा़नुक्‌कोवा।” 6आदोए मेतात्‌कोवा, “मा ला़उका़ एतोम सेच् झा़लि चापादपे, खानपे ञामकोवा।” आदोको चापात्‌केदा आर आयमा हाको इया़ते ओना दो बाको ओर राकाप् दाड़ेयादा।#लुक 5:6

7खानगे जिसुइ दुला़ड़ेदे ताहेंकान चेला दो पातरासे मेतादेया, “प्रोभु कानाय।” सिमोन पातरास दो प्रोभु कानाय मेनतेये आँजोमकेत् खान, आङगरोपतेये पाठेयेना, एनते किचरिच्‌ दोए तोत्‌आकात्‌ ताहेंकाना आर दोरयाँवरेये दोन चाडोयेना। 8घुटु खोन सा़ङगिञ दो बाको ताहेंकाना, एकेन बार साय मोका गान; आदो ओनको एटाक् चेलाको दो ला़उका़तेको हेच्एना, हाकोते पेरेच् झा़लि ओर ओरते। 9आदो ढिपतेको राकाप्एन खान, कुइला़ सेङगेल ओरोप्आकानको ञेलकेदा आर ओनारे हाको खादलेआकान आर पिठा़।

10जिसुइ मेतात्‌कोवा, “नितपे साप्‌केत्‌को हाको खोन आ़गुकोताबोनपे।” 11सिमोन पातरास दो ला़उका़रे देच्‌काते मित् साय मोंड़ेगेल पेया ला़टु ला़टु हाकोते पेरेच् झा़लि ढिपतेये ओर राकाप्‌केदा; आर उना़क्‌को ताहेंकानरे हों झा़लि दो बाङ ओड़ेच्‌लेना। 12जिसुइ मेतात्‌कोवा, “देला हिजुक्‌ते जोमपे।” चेलाको मोदरे ओकोय हों बाको दिललाक्आ कुलि बुजहा़उ ला़गित्, “आम दोम ओकोय काना?” प्रोभु कानाय मेनतेको बाडायकेत्‌ते। 13जिसु दो हेच्एनते पिठा़इ हालाङकेदा आरे एमात्‌कोवा आर ओनकागे हाको हों। 14जिसु दो गोच्‌को खोन बेरेत्‌काते नोवा दो तेसार धाव आच्‌रेन चेलाको ठेने सोदोरेना।

जिसु आर पातरास

15आदोको जोमकेत् खान जिसु दो सिमोन पातरासे मेतादेया, “हेंदा जोहान होपोन सिमोन नोको खोन बा़ड़तिम दुला़ड़ेदिञ काना?”

उनिये मेतादेया, “हें प्रोभु, बाडायगेयाम दुला़ड़ेत्‌मे कानाञ।”

मेतादेयाय, “इञरेन भिडि होपोनको आ़तिञकोम।”

16आरहों दोसार धावे मेतादेया, “हेंदा जोहान होपोन सिमोन दुला़ड़ेदिञाम?”

उनिये मेतादेया, “हें प्रोभु, बाडायगेयाम दुला़ड़ेत्‌मे कानाञ मेनते।” मेतादेयाय, “इञरेन भिडिको गुपिकोम।”

17तेसार धावे मेतादेया, “हेंदा जोहान होपोन सिमोन दुला़ड़ेदिञाम?”

दुला़ड़ेदिञाम मेनते तेसार धावे मेतादेते पातरासे मोन दुक एना आरे मेतादेया, “ए प्रोभु सानामाक्एम बाडायगेया, आमेम बाडाया दुला़ड़ेत्‌मे कानाञ मेनते।”

जिसु उनिये मेतादेया, “इञरेन भिडिको आ़तिञकोम। 18सा़रि सा़रिगेञ मेतामकाना, जुवा़नेम ताहेंकानरे दो आमतेम पाठेक्‌कान ताहेंकाना आर जाहाँतेगे सानायेत्‌मे ताहेंकान ओनतेम दाड़ानकान ताहेंकाना; मेनखान हाड़ामलेनरे आमाक् ति किनेम तिया़रतामा आर एटाक् होड़े पाठेकामा आर ओका सेच् बाङ सानामे ओनतेये इदिमेया।” 19ओना दोए मेनकेदा, नोवा उदुग ला़गित्, ओका लेकान गुजुक्‌ते इसोरे ठोनोक ओचोयेया। आर नोवाय रोड़केत् खाने मेतादेया, “पाँजाञमे।”

जिसु आर एटागिच्‌ चेला

20पातरास दो आ़चुरेनते जिसुइ दुला़ड़ेदेकान ताहेंकान चेला पाँजाकाने ञेलकेदेया, ओने उनि केदोक् जोखेच् उनियाक् कोड़ामरे टेंडारकातेये मेनलेत्, “हेंदा प्रोभु, ओकोय कानाय आम सोसोपरोतिच् दो?” 21पातरास दो उनिये ञेलकेदेते जिसुइ मेतादेया, “हेंदा प्रोभु आर उनि रेयाक् दो चेत्?”

22जिसुइ मेतादेया, “आ़उरिञ हिजुक् हा़बिच् ताहें हाताड़ोक् इञ मोनेजोङ खान आम दो चेत्? आम दो इञ पाँजाञमे।”

23ओनाते नोवा काथा बोयहाको तालारे पासनावेना बाङमा, उनि चेला दो बाय गुजुक्आ, एनहों जिसु दो बाय मेतादेया बाय गुजुक्आ मेनते, मेनखान “आ़उरिञ हिजुक् हा़बिच् ताहें हाताड़ोक् इञ मोनेजोङ खान, आमाक् दो चेत्?”

24नुय कानगेयाय उनि चेला, नोवाको रेयाङ गोहा एमोक्इच् आर नोवाको ओल आकात्इच् दो आरले बाडाया उनियाक् गोहा दो सा़रि काना।

मुचा़त्‌

25आर आ़डि उता़र एटागाक्‌को मेनाक्आ ओकाको जिसुइ का़मिलेत्, ओने ओनाको मित् मित्‌ते ओललेन खान, इञ बुजहा़उरे ओनाको ओलकोक् पुथि दो धा़रतिरे हों ओहो साहोंप्‌लेना।

നിലവിൽ തിരഞ്ഞെടുത്തിരിക്കുന്നു:

जोहा 21: NTSPt25

ഹൈലൈറ്റ് ചെയ്യുക

പങ്ക് വെക്കു

പകർത്തുക