जोहा 16

1नोवाकोञ गालमारावआकावात्‌पेया, जेमोन आलोपे ता़किजोक्। 2सुना़गोग खोनको ओडोकपेया, हें, ओकते हिजुक्‌ काना ओने उनरे जाहाँयगे आपेको गोच्‌पे दोको बुजहा़वा इसोरगेको सेवावाय काना मेनते। 3आर नोवाकोको ओनकाया, बाबा बाको बाडायाकादेते आर इञ हों बाङ। 4मेनखान नोवाकोञ गालमारावआकावात्‌पेया जेमोन ओनाको रेयाक् ओकते हेच्‌लेनरे ओनाकोपे दिसा़य, इञिञ ला़इ आकावात्‌पेया मेनते।

सोनोत जिवाक् का़मिको

नोवाको दो एतोहोप् खोन बा़ञ ला़इयात्‌पेया, एनते आपे तुलुच् इञ ताहेंकाना।

5नितोक् दो कोल आकादिञिच् ठेनिञ चालाक्‌काना, आर आपे मोदरेन ओकोय हों बापे कुलियेदिञ काना, ओकातेम चालाक्‌काना? 6नोवाकोञ ला़इयाकावात्‌पे इया़ते आपेयाक् मोन दो भाबनाते पेरेच्आकाना। 7एनरेहों सा़रियाक् इञ ला़इयापेकाना इञिञ चालाक्‌कान दो आपे ला़गित् पोरहोवानाक्‌गे। एनते बा़ञ सेनलेन खान सोक्‌होत्इच् दो आपे ठेन बाय हिजुक्आ। मेनखान इञ सेनलेनरे आपे ठेन उनिञ कोलेया। 8आरे हेच्‌लेनरे उनि दो धा़रतिरेनको का़इ रेयाङ आर सा़रियाक्‌ रेयाङ आर बिचा़र रेयाङे दुसिकोवा। 9का़इ रेयाङ दो एनते इञरे बाको पा़तिया़उक्‌कानते, 10सा़रियाक्‌ रेयाङ दो, बाबा ठेनिञ चालाक्‌कान आर आपे आरदो बापे ञेलेञते, 11बिचा़र रेयाङ दो नोवा धा़रतिरेन राजे बिचा़र दुसिआकानते, 12ला़इयापे ला़गित् आरहों आ़डि ओकोच् मेनाक्‌तिञा, मेनखान नितोक् दो बापे साहाव दाड़ेयाक्आ। 13मेनखान उनि, मेताक्‌मे सा़रियाक्‌रेन जिवे हेच्‌लेनरे सानाम सा़रियाक्‌रेये आ़युरपेया, एनते आच्‌ते दो बाय रोड़ा, बिचकोम जाहानाक्‌कोगेये आँजोम ओनाय रोड़ा, आर दाराकानाक्‌कोय जा़हिरापेया। 14उनि दो इञे ठोनोक ओचोञा, एनते इञाक् रेया‍क्‌को हातावकातेये जा़हिरापेया। 15जाहानाक्‌कोगे बाबावाक् मेनाक्‌ताय, सानामाक्‌को दो इञाक् काना, ओना इया़तेञ मेनकेदा इञाक् रेयाक्‌को हातावकातेये जा़हिरापेया मेनते,

दुक आर रा़सका़

16“थोड़ा घा़ड़िच् खानगे आर दो बापे ञेलेञा, आरहों थोड़ा घा़ड़िच् खानगेपे ञेलेञा।”

17आदो उनिरेन चेलाको मोदरेन आदोम होड़को मेपेनेना, “नोवा दो चेत् काना ओनेये मेताबोनकान, थोड़ा घा़ड़िच् खानगे आर दो बापे ञेलेञा आर आरहों थोड़ा घा़ड़िच् खानगेपे ञेलेञा आर बाबा ठेनिञ चालाक्‌काना मेनते।” 18आदोको मेनकेदा, “नोवा दो चेत् काना, ओनेये मेनेत् थोड़ा घा़ड़िच्बाबोन बाडाया चेत्‌चोय रोड़ेत्?” 19जिसुइ बाडायकेदा कुलिये सानायेत्‌कोवा, “आदोए मेतात्‌कोवा, ओकाञ मेनकेत् थोड़ा घा़ड़िच् खानगे बापे ञेलेञा आर आरहों थोड़ा घा़ड़िच् खानगेपे ञेलेञा नोवा रेयाक्‌पे कुपुलिक्‌काना? 20सा़रि सा़रिगेञ मेतापेकाना आपे दोपे राक्‌जोङा आरपे हायहायोक्आ, मेनखान धा़रतिरेनको दोको रा़सका़क्आ, आपेपे हिरदा़उक्आ, मेनखान आपेयाक् हिरदा़नि दो रा़सका़ते फेरावक्आ। 21मायजिउ दो गिदरा़ये ओमोने जोखेच् भाबना मेनाक्‌ताया, ओकतेतेत् सेटेरेनतायते, मेनखान गिदरा़इ जानामलेन खान ओना बेदोन दो आर बाय दिसा़या, धा़रतिरे मित्‌टेन मानवाय जानामेन रेयाक् रा़सका़तेगे। 22आपे हों नितोक् हिरदा़नि मेनाक्‌तापेया, मेनखान आरहोंञ ञेल रुवा़ड़पेया, आर आपेयाक् ओनतोर रा़सका़क्‌ तापेया आर आपेया रा़सका़ दो ओकोय हों बाको रेच्‌पेया। 23आर एनहिलोक् दो इञ चेत् हों बापे कुलिञा, सा़रि सा़रिगेञ मेतापेकाना, जाहानाक्‌गे बाबापे कोये इञ ञुतुमतेये एमापेया। 24नित हा़बिच् इञ ञुतुमते चेत् हों बापे कोयाकादा, कोयपे आदोपे ञामा, जेमोन आपेयाक् रा़सका़ पुरा़ होयोक्‌तापे।”

धा़रति चेतानरे जित

25“नोवा दो फेनतेञ गालमारावआकावात्‌पेया, ओकते हिजुक् काना ओने उनरे दो फेनते बा़ञ गालमारावापेया, बिचकोम पुड़छोते बाबा रेयाङ इञ जा़हिरापेया। 26एनहिलोक् दो आपे आपनारतेगे इञ ञुतुमते बाबा पे कोयेया, आर बा़ञ मेतापेकाना इञगे आपे ला़गित् बाबाञ कोयेया मेनते, 27एनते बाबा दो आच्‌गेये दुला़ड़ेत्‌पेया, इञपे दुला़ड़ाकादिञते आर इसोर ठेन खोनिञ ओडोक हेच् आकानपे पा़तिया़वाकानते। 28बाबा ठेन खोन इञ ओडोक हेच्एना आर धा़रतितेञ हेच् आकाना, आरहों धा़रति बा़गियाक्‌ते बाबा ठेनिञ चालाक्‌काना।” 29उनिरेन चेलाकोको मेतादेया, “नोक्‌ओंय नितोक् दो पुड़छोतेम रोड़ेदा आर जाहान फेन दो बाम ला़इयेदा। 30नितोक् दोले बाडायकेदा, आम दो सानामाक्‌गेम बाडाया आर जाहाँये कुलिमे रेयाक् जा़रुड़ बा़नुक्‌तामा, नोवातेगेले पा़तिया़उक् काना इसोर ठेन खोनेम ओडोक हेच् आकाना मेनते।” 31जिसुइ रोड़ रुवा़ड़ात्‌कोवा, “चेत् नितआनेच्‌पे पा़तिया़उक् काना? 32ञेलपे ओकते हिजुक्‌काना, हें हेच् आकानगेया, ओने उनरे मिमित् होड़ आपान आ़पिनाक्‌कोतेपे छिञछा़तुरोक्आ आर इञ दो एसकारगेपे बा़गियाञा, एनरेहों बा़ञ एसकारा एनते बाबा इञ तुलुच् मेनाया। 33नोवाकोञ ला़इ आकावात्‌पेया जेमोन इञरे सुलुक ताहेनतापे, धा़रतिरे हारखेत मेनाक्‌तापेया, मेनखान दिल जोङपे, धा़रति दोञ जिता़उआकादा।”

നിലവിൽ തിരഞ്ഞെടുത്തിരിക്കുന്നു:

जोहा 16: NTSPt25

ഹൈലൈറ്റ് ചെയ്യുക

പങ്ക് വെക്കു

പകർത്തുക