आ का़ 21
21
पावल जेरुसालेमतेये सेनोक् कान
1आदो ओनको ठेन खोनले बिदा़येन खान जाहाज लाड़ावकाते मित् मोहंडा सेन इदियेनते कोसतेले हेच्एना, आर दोसार हिलोक् दो रोडोसते आर ओंडे खोन दो पाताराते 2आर फोयनिकिया़ते पारोम चालाक् ला़गिदोक्कान मित्टेन जाहाजले ञामकेत्ते, ओनारे देच्एनतेले लाड़ावकेदा, 3आर कुपरोसले ञेल ञामकेत् खान, ओने कोञे ओटोकात्ते जाहाजते सुरिया़ सेच्ले चालावेना, आर तुररेले फेडेना; एनते ओंडेगे जाहाज रेयाक् माल फेड जा़रुड़ ताहेंकाना। 4आदो चेलाकोले सुटिक ञामकेत्कोते, ओंडे एयाय माँहाँले ताहेंयेना; आर ओनको दो जिउ होतेते पावलको मेतादेया, जेमोन जेरुसालेमते दो आलोय सेनोक्। 5आदो ओनाको दिनले ताहें पुरा़वेन खान, ओडोकेनतेले चालाव इदियेना आर सानामकोगे, मायजिउको आर गिदरा़को साँवते नागराहा बाहरे हा़बिच्को इदि गोत्कात्लेया, आर जालापुरि ढिपरे इखड़ुमेनतेले कोयाना। 6आर बिदा़क् जोपोहार बाड़ाकाते जाहाजरेले देच्एना आर ओनको दो आकोवाक् ओड़ाक्तेको रुवा़ड़ेना। 7आदो तुर खोन तोलेमाइसरेले सेटेरेनते जाहाजते दाड़ान दोले मुचा़त्केदा आर बिसवा़सिकोले जोहारात्कोवा आर ओनको ठेन मित् दिनले ताहेंयेना। 8आर दोसार हिलोक् दो ओडोकेनते का़इसा़रिया़तेले हेच्एना, आर भागे सोमबात पोपोरचारिच् फिलिप ओड़ाक्ते बोलोकाते उनि ठेनले ताहेंयेना, उनि दो ओनको एयायको मोदरेने ताहेंकाना ओकोय दो जेरुसालेमरे गोक्ड़ो ला़गित्को बाछाव ओचोलेन। 9आर उनिरेन पोनया होपोनेराको ताहेंकानताया, कुँवा़ँरि कुड़िको, ओने ओनकोको ना़बि बाड़ायेत् ताहेंकान 10आदो ओंडे ढेर दिनले ताहेंकानरे, आगाबुस ञुतुमान मित्टेन ना़बि जिहुदिया़ खोने हेच्एना। 11आर उनि दो आले ठेन हेच्एनते पावलाक् पाठेक्आक् साप्काते आयाक् जाङगा आर ति तोलकातेये मेनकेदा, “सोनोत जिउ नोनकाय मेनेदा, नोवा पाठेक्आक् ओकोयाक् काना, उनि दो जिहुदिको जेरुसालेमरे नोनकागेको तोलेया, आर जिहुदि बाहरेरेनकोवाक् तिरेको सोपरोतएया।” 12नोवा ओनाकोले आँजोमकेत् खान, आले हों आर ओंडेनको हों जेरुसालेमते आलोय राकाप् चालाक्आ मेनते उनि ले नेहोंरादेया। 13खानगे पावले रोड़ रुवा़ड़केदा, चेत्पे चेकायेदा, राराक् कान आर इञाक् मोनपे गेजेरेत् तिञ दो? एनते इञ दो तोल ओचोक् मोतोच् दो बाङ, बोरोङ प्रोभु जिसुवाक् ञुतुम खा़तिरते जेरुसालेमरे गोच् ओचोक् होंञ सापड़ावगेया। 14आदो बाय रेबेनलेनतेले थिर हापेयेना, मेनकेदाले प्रोभुवाक् मोने बाड़े पुरा़उक् मा। 15आर ओनाको दिन तायोम दो मोटरा झोटराकाते जेरुसालेमतेले राकाप् सेनएना। 16आर का़इसा़रिया़रेन आदोम आदोम चेलाको हों आले तुलुच्को चालावेना, ओनको दो कुपरोसरेन मानासोन ञुतुमान मित्टेन मारे चेला ठेनको इदि केत्लेया, ओने उनि ठेनगेले डेराक् ला़गिदोक्कान ताहेंकान।
पावल जाकब ए हिरियेदे
17जेरुसालेमरेले सेटेरेन खान, बिसवा़सिको दो आ़डि रा़सका़तेको आताङ दारामकेत्लेया। 18आर दोसार हिलोक् पावल दो आले साँवते जाकब ठेने बोलोयेना, आर सानाम मुरुबिको दो ओंडेको हेच्एना। 19आर जोहार बाड़ावात्को खान एके एकेतेये ला़इ इदिकेदा, ओकाको इसोर दो जिहुदि बाहरेरेनको तालारे आयाक् साप्दाप् का़मि होतेतेये का़मिआकात् ताहेंकान। 20आर ओनको दो ओनाको आँजोमकेत् खान इसोरको सारहावकेदेया, आरको मेतादेया, जिहुदिको मोदरेन पा़तिया़उ आकानको हाजार हाजार मेनाक्कोवा, आर सानामकोगे आ़न ला़गित् आँटोक्को कानाको। 21आर आम रेयाङको ला़इ तियोक् आकावात्कोवा, बाङमा आम दो जिहुदि बाहरेरेनको तालारे मेनाक्को सानाम जिहुदिको मोसे खोन भिङग्ड़ा़उक् एम चेत्आको काना, ओनेम मेनेत्ते, आकोरेन गिदरा़को आलोको खातनाकोमा आर चा़लि लेका हों आलोको सेनोक्मा। 22आदो चेत्? आमेम हेच् आकान मेनते खा़टिगेको आँजोमा नाहाँक्। 23ओना इया़ते आलेले मेतामकान लेकायमे, आले ठेन पोन होड़ मेनाक्कोवा, ओकोयको मानानआकात्।#नुमेरि ६:१३-२१ 24ओनको इदि तोराकोते ओनको तुलुच् साफा सोनोतोक्मे, आर ओनको लागावाको खोरोच एमोक्मे, जेमोन बोहोक्को होयोक्, आदो सानामकोको बाडाया, आम रेयाक्को ला़इ ओचोआकानाक् दो आ़उड़ियाक्गेया, बिचकोम आम आपनार हों आ़न दोहोकातेम चोलोनेदा मेनते। 25मेनखान पा़तिया़उ आकान जिहुदि बाहरेरेनको दो आलेगे नोवा निटकातेले चिठियात्कोवा, बाङमा, ओनको दो बोङगा सामाङाक्को खोन, माँयाँम खोन, लिमबा़त् गोच्कोवाक् जेल खोन, लोटघुटि खोन साहाड़ाकानको ताहेन।#आपोस का़मि १५:२९ 26खानगे पावल दो ओनको होड़ इदि तोराकेत्कोते दोसार हिलोक् ओनको तुलुच् साफा सोनोतेनते कोयजोङ ओड़ाक्रेये बोलोयेना, आर साफा सोनोतोक् दिनको पुरा़उक् रेयाक्ए ला़इ सोदोरकेदा, ओनको मिमित् होड़ ञुतुमते दान आ़उरि सामाङोक् हा़बिच्।
कोयजोङ ओड़ाक्रे पावले साप् ओचोयेन
27आर ओनाको एयाय दिन पुरा़उक् ला़गिदोक्कान ताहेंकानरे, आ़सिया़रेन जिहुदिको दो कोयजोङ ओड़ाक्रे पावलको ञेलकेदे खान, जोतो गादेल होड़को आ़उला़उकेत्कोवा, आर उनिरे हातको लागावकेदा, नोनका होहोवाते, 28“ए इसराएल होड़को गोड़ोंवाबोनपे हो, नुय कानगेयाय उनि होड़ दो ओने उनि आबोरेन होड़को आर आ़न आर नोवा ठा़ँइ उपा़रते गोटा टा़न्डि सानामकोय चेत्आकोकान, आर ओना छाडा जुना़निको हों कोयजोङ ओड़ाक्रेये आदेरलेत्कोते नोवा सोनोत ठा़ँये भोंडआकादा।” 29(लाहारे एनते ओनको दो उनि तुलुच् नागराहारे एफेसिरेन तरोफिमुसको ञेललेदेया आरको बुजहा़वेत् ताहेंकाना, पावल दो उनि कोयजोङ ओड़ाक्तेये आ़गु आदेरलेदेया मेनते)#आपोस का़मि २०:४
30आर गोटा नागराहा गुलमालावेना, आर होड़को ञिर जारवायेना, आर पावलको साप्केदेते कोयजोङ ओड़ाक् खोनको ओर ओडोककेदेया, आर साटमेनते दुवा़रकोको सिञकादा। 31आर उनिको गोजे ला़गिदोक्कान ताहेंकानरे पालटोन खातारेन माराङ सुबेदार दो खोबोर सेटेरादेया, गोटा जेरुसालेम आ़उला़उ आकाना मेनते। 32खानगे उनि दो इना़ तापतेगे पालटोनको आर सुबेदारकोवानते ओनको ठेने ञिर सेनएना, आदो माराङ सुबेदार आर पालटोनकोको ञेलकेत्को खान पावल दादालको थिरेना।
33खानगे माराङ सुबेदार दो सेन सोरकाते उनिये गिरिपतारकेदेया, आर बारया सिकड़िते तोलेये हुकुमकेदा, आरे कुलिआना, “ओकोय कानाय आर चेत्ए चेकावाकादा” मेनते। 34आर गादेल होड़को मोदरेन आदोम दो मित् लेकाको होहोयेत् ताहेंकाना, आदोम दो एटाक् लेका, आदो गुलमाल इया़ते खा़टितेत् बाय बाडाय ञाम दाड़ेयात् खाने हुकुमकेदा, जेमोन पालटोन गाड़तेये इदि ओचोक्। 35आर सिड़हिको ठेने सेटेरेन खान पालटोनको होतेते गोक् ओचोक् होयेनताया, गादेल होड़कोवाक् जुलुम इया़ते; 36एनते गादेल होड़ दो पाँजा पाँजातेको होहो आ़गुयेत् ताहेंकाना, “गोच् गिडिकायमे नुय दो।”
गादेल होड़को तालारे पावलाक् नेहोंर काथा
37आर पालटोन गाड़तेको आदेरे ला़गिदोक्कान ताहेंकानरे, पावल दो माराङ सुबेदारे मेतादेया, “आम तुलुच् मित्टेन काथाञ रोड़केया?” आदोए मेनकेदा, “जुना़नि पा़रसिम बाडाया? 38एनडेखान उनि मिसरि दोम बाङ काना, ओने उनि नोवाको दिन लाहारे हुलकाते डा़कुको मोदरेन पोन हाजार होड़ हाहाङकारतेये इदिकेत्को?” 39मेनखान पावले मेनकेदा, “इञ दो ता़रसुसरेन जिहुदि होड़ कानाञ, किलिकिया़ रेयाक् मित्टेच् नामडाक नागराहारेनगे, आर इञ नेहोंराम काना, नोको होड़ गालमारावाको ला़गित् आड़ाक्आञमे।” 40आदोए आड़ाक्आदे खान, पावल दो सिड़हिरे तेङगोकाते होड़को तितेये इसा़रावात्कोवा, आर आ़डि थिर ठिककाते, इबरि पा़रसितेये गालमारावात्कोवा।
നിലവിൽ തിരഞ്ഞെടുത്തിരിക്കുന്നു:
आ का़ 21: NTSPt25
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
The New Testament Books in Santhali Language © The Word for the World International and Santhali Translation Project, Nepal, 2025
