Matayu 23
23
Yesu anguwang'ung'ulikila wavula wa laghililo na Mafalisayo
Maliku 12:38-39; Luka 11:43-46; 20:45-46
1Hinu Yesu akayalongela mapinga gha wandu pamonga na wavulwa ghaki weni kuwela pala. 2Wavula wa laghililo na Mafalisayo ndiwa wapeghilwi uweso wa kughalambula laghililo lya Musa. 3Hinu inguwapala muwatundamili na kughola vila wanguwalongela mgholi. Ila mkotoho kukovekela yala wanguyaghola kwaikiva wangughola ng'ogha yala wanguyatangasa. 4Weni uwopa mihigu mitopehu na kuwatwika wandu mmakombi, ila weni wawesa ng'ogha kuyavisa hata kwa kyala kuipapa. 5Weni wangughola matendu ghao hyogha ili wandu wawalole. Na kangi wanguvala ngoi zyeni mayandiko gha laghililo kunani gha wuso na kumawoku, kangi wangutanula vihundu vyeni kuning'inila kulihabiti lyau. 6Wangupala kutama kuvitamilu vya kuulongolo kumhambu na vila vitamilu vigholilwi maha nesu kulighuta lya kukonganika Wayahudi. 7Wangupala kujambuswa na wandu kwa kutundamilwa msoku na kupala kukemwa na wandu, “Mvula.” 8Ila mwenga wandu wakotoho kuwakema, “Mvula,” Kwaikiva mvula wa mwenga ni mmonga hela, na mwenga wogha ni wavulwa ghangu. 9Mkotoho kumkema mundu yeyosi “Tati” haku kumlimawogha, kwaikiva Tati wa mwenga ni mmonga hela, yula mwenikuwela kundumba. 10Kangi mkotoho kukemwa “Vilongosi,” kwaikiva kilongosi wa mwenga ni mmonga hela, na mweni ni Kilisito. 11Mundu yeyosi mwenikupala kuwela kilongosi wa mwenga, aweli mundu wa kunyenyekela na kuwatumikila wandu waghangi. 12Mundu yeyosi atejiyinula Sapanga atemuhulusa, na yula atejihulusa Sapanga atemuyinula.
Yesu angung'ung'ulikila umbindingu
Maliku 12:40; Luka 11:39-42, 44, 52; 20:47
13“Mtenyokolwa mwenga wavula wa laghililo na Mafalisayo, wenikuwela wambindingu! Mngutata mlyango wa unkosi wa kundumba kuulongolo gha mihu gha wandu. Kunu mwenga mwaweni mnguyingila ng'ogha mghati, wala kuwalekesela wenikupala kuyingila wayingili.” 14Mtenyokolwa mwenga wavula wa laghililo na Mafalisayo, wenikuwela wambindingu! Mngulyegha vya wahoviliwi na walumi ghao, kwa kujighola yiwa walungwana kwa kuyupa mayupu matali. Kwaikiva gha nagha mtepokela unyokolu mkulunga nesu.
15“Mtenyokolwa mwenga wavula wa laghililo na Mafalisayo, wandu wambindingu! Mnguyenda mwanja mbahali na kumlima kuyumu ili mumpati mundu mmonga aweli mkovekela wa dini gha Kiyahudi. Pamumpata kala, mngumghola kuwela mundu wa kuyenda mlyoto lijimika ng'ogha handa mwenga mwaweni.”
16“Mtenyokolwa mwenga vilongosi wangalikulola! Mwenga mnguvula yiwa mundu pakalapa kwa kilapu kya Lighuta lya Sapanga kilapu haki kyahela makakala, ila yula atelapa kwa zahabu gha Lighuta lya Sapanga kilapu haki kingumkola.” 17Mwenga mngalikulola wasihisihi! Ni niki kikulu nesu. Zahabu au Lighuta lya Sapanga lyenikughola hai zahabu ijumilwi kuulongolo gha Sapanga? 18Kangi mnguvula yiwa mundu pakalapa kwa kihanja kya kuyeghela litambiku haki kilapo ng'ogha, ila mundu pakalapa kwa litambiku lyeni kuvikwa kunani gha kihanja haki, hayu kawopwa kwa kilapu haki. 19Mwenga mngalikulola nesu! Ni niki hai yeni kuwela gha maha nesu, hila hupo, au kihanja kila kingughola litambiku lijumilwi kuulongolo gha Sapanga? 20Hinu mundu mwenikulapa kwa kihanja kya kuyeghela litambiku hayu kalapa kuhaki kihanja na vyogha vyeni kuwela kunani ghaki. 21Na mweni kulapa kwa Lighuta lya Sapanga, hulapa kwa lila Lighuta lya Sapanga na kwa hayu angutama mghati ghaki. 22Na yula angulapa kwa kunani kwa Sapanga hayu kalapa kukitamilo kya Sapanga, na kwa hayu mweni kutama kunani ghaki.
23“Mtenyokolwa mwenga wavula wa laghililo na Mafalisayo, wandu wambindingu! Mnguhomosa wandu lilundila lya ikumi, hata mahamba yeni kunungila maha nesu, bizali na msusa, na kunu mnguleka mighalu gha maha gha laghililo handa vila haki, luhungu, na kukwinila hagha ndiwa mpalilwi nesu kuyakovikela bila kuisemwa ghala maghangi.” 24Mwenga Vilongosi mngalikulola! Mnguhusia wangosi kukinyweghelo kunu mnguleka ngamia, na mngumila!
25“Mtenyokolwa mwenga wavula wa laghililo na Mafalisayo mwenga wandu wambindingu! Mnguwofula kitekelu na bakuli kwa panji, ila mghati mnguleka kukimema upokola na uwimi.” 26Mafalisayo ungalikulola! Uwofuli huti kitekelu mghati na panji kutewela maha hilahila.
27“Mtenyokolwa mwenga wavula wa laghililo na Mafalisayo, wambindingu! wenikuwela handa mamambi yalembilwi chokaa kwa panji yanguwoneka maha, ila mghati yamema mihupa gha mundu ahovili na ndaka wekaweka.” 28Hilahila kwa panji mwenga mnguwoneka kwa wandu muwela ng'ogha na sambi, ila kwa mghati mmema umbindingu na uhakata.
Unyokolu unguhika
Luka 11:47-51
29“Mtenyokolwa mwenga wavula wa laghililo na Mafalisayo, wambindingu! Mnguchenga mamambi gha walota na kuchengela mamambi gha wandu wa maha.” 30Kangi mwenga mngulonga, “Ikiva twenga tungalikala lipindi lya watati wa twenga, tungalikonganika ng'ogha na weni pakuwakoma walota.” 31Hinu mnguhighilisa maweni yiwa mwenga ni wana wa wandu wawakomili walota. 32Kwa nagha, myendelesi lihengu liwelili likigholwa na watati wa mwenga lya kuwakoma walota! 33Mwenga kiwelekwa kya njoka wenikuwela na sumu! Mtewesaghuli kuhyeta utoso wa kulyoto lijimika ng'ogha bila mwihu? 34Kwaikiva gha nagha ninguwayeghela walota na wandu weni luhala na wavula, mtewakoma na mtewawamba kulipingika wamonga ghao, na waghangi mtewatova hyatu kumighuta gha kukonganika Wayahudi na kuwahakula kukila mmbwani. 35Hinu mighalu hai hyogha itewela kunani gha mwenga kwaikiva gha mwahi wogha wa wandu wa maha uyitilwi kunani gha lutupi. Ena kuhuma , pala uyitika mwahi wa Abeli mwenikuwela kahela uhakata, mbaka hula wa Zakaria, mwana wa Barakia, mwenikuwela mumkomili kulighuta lya Sapanga paghati gha mahala pajumilwa na Sapanga na luhanja lwa saba. 36Ninguwalongela chakaka, kiwelekwa haki kitepokela unyokolu kwaikiva gha mighalu hai.
Yesu anguulilila mbwani wa Yelusalemu
Luka 13:34-35
37“Mwenga wandu wa Yelusalemu! mwenga wandu wa Yelusalemu munguwakoma walota na kuwatova maganga wala walaghililwi kwa wenga. Mihanja mininga niyesili kuwakungula wana ghako kwa nenga, handa vila nguku angukungula wana ghaki pahi gha mbapatilu zyaki, ila upalili ng'ogha.” 38Mloli Sapanga ateleka Lighuta lya mwenga lipala. 39Ningukulongela, mtenilola ng'ogha kangi mbaka lipindi mtelonga, “Ahighilwi hayu anguhika kwa lihina lya Bambu.”
നിലവിൽ തിരഞ്ഞെടുത്തിരിക്കുന്നു:
Matayu 23: NTMbBL2025
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
The New Testament in Mbunga @The Word for The World International and Mbunga Language translation, 2025. All rights reserved.
