मत्ती 5
5
धुरन खाईकोए
(लुक ६:२०-२३)
1सिमिवन मोह्ङग रङरङ येसु धुरन लाह्ः वैवै छ्युङ्बो रे चेलाव र्वार्वा नुन धेँवछोँ छ्युङ्बो। 2आलै नुई ख्युकाङ्मोः खाईकोए भिनैभिनै झाम र्वाबो:
तेम्मा स्याङ्पा
3“धन्न आत्माग बिखारीव, तैङर्वाङिन स्वर्गन राज्य ख्युन जेङ्पा।” 4धन्न छरा खेनानव, तैङर्वाङिन ख्युई सान्तोना देन्नान ङ्याह्। 5धन्न नम्रव, तैङर्वाङिन ख्युई पिर्थीबिन आङ देन्नान ङ्याह्। 6धन्न परमेस्वरन इच्छ्यान भिह्तु गुसिनान रे त्यु बुल्नानव, तैङर्वाङिन ख्यु बरङ्नान ङ्याह्। 7धन्न दया खेनानव, तैङर्वाङिन ख्युई परमेस्वरलम दया देन्नान ङ्याह्। 8धन्न सम छाङ्म राह्नानव, तैङर्वाङिन ख्युई परमेस्वरग रङ्नान ङ्याह्। 9धन्न दीफान्नानव, तैङर्वाङिन ख्यु परमेस्वरन सन्तान र्वानान ङ्याह्। 10धन्न परमेस्वरन इच्छ्यान भिह्तु तेह्पफान्नानव, तैङर्वाङिन स्वर्गन राज्य ख्युन जेङ्पा।#१ पत्र ३:१४ 11“धन्न जेङ्पा ङेन, जब सिमिवजै ङन खातिर ङेनकोन ल्हुई झानान ङ्याह् रे तेह्पफान्नान ङ्याह्, रे लबारन ल्होई र्वार्वा ङेनकोन बिरोधग तैस्याङ पुरून ल्होई अलः र्वानान ङ्याह्।#१ पत्र ४:१४ 12तब स्याँ, रे मिह्दा किम्म रा, तैङर्वाङिन स्वर्गः ङेनकोन इनाम किम राह्नान ङ्याह्। तैङर्वाङिन झामखेखेई ङेन खेरे ङून भबिस्यबक्ताकाङ्मोः ख्युई तेपफाम्पा ङ्याह्।”#२ इति ३६:१६; प्रे ७:५२
चा रे ताह्म
(मर्क ९:५०; लुक १४:३४-३५)
13“ङेन पिर्थीबिन चा जेङ्पा, जेङ्नै चान तोह्प्लाः वैङिन मन तैजै ह्याङ स्युर्पा दोङ्चे? मन ता खोलोः पच्चे रे सिमिन लेह्ई लेच्चेन नङ्म घङ तये फान्त्वानान मराह्नान।” 14“ङेन सन्सारन ताह्म जेङ्पा। धुरग नाम्पान सहर पेर मतैङ।#यूह ८:१२; ९:५ 15सिमिवजै लज्युङ पार्पार खेखे फाक्तिनजै ता मकप्ङ, जेङ्नै सामदानग नाह्ङ्ङ रे यिम ङिह्पा पुरून भिह्तु नुई साल्म बिङ्ङ।#मर्क ४:२१; लुक ८:१६; ११:३३ 16झामखेखेई ङेनकोन ताह्म सिमिवन ङू चम्कि राःयो, रे ख्युई ङेनकोन धोन लः रँयो, रे स्वर्गः ङिह्पान ङेनकोन पान महिमा ख्याःयो।”#१ पत्र २:१२
कानुन्न भारेः लम्पा
17“मोसाई बिम्पान कानुन आथबा भबिस्यबक्तावजै र्वापान ल्होई पह्म्मः ङा स्वापा जेङ्पा र्वार्वा नछुवा। ङा मन पह्म्मः नङ्पा, जेङ्नै पुरा खेमः स्वापा जेङ्पा।#रोम १०:४ 18तैङर्वाङिन तेम्माई ङा ङेनकाङ्मोः र्वाचे, जबथाल स्वर्ग रे पिर्थीबि ताह्ताह् मवैङ तबथाल कानुन्न ल्होई पुरू पुरा मरारे तै खेखेई अछेर कत्याम या थोप्लादी यङ ताह्ताह् वैनान मह्या।#लुक १६:१७ 19अन्नकारन सुई अन आग्यावन बर्ग पुरून खेरे कत्याःमः मङ्यान्दरा, रे सिमिकाङ्मोः उजुई खेमः लह्नदरा, स्वर्गन राज्यग नु पुरून खेरे कत्याम राह्नान ङ्याह्। जेङ्नै सुई मन आग्याव पालन खेदरा रे लह्नदरा, स्वर्गन राज्यग नु किम राह्नान ङ्याह्। 20तैङर्वाङिन ङा ङेनकाङ्मोः र्वाचे, ङेनकोन परमेस्वरन इच्छ्या कानुन लन्नान्न सिमि रे फरिसीवन खेरे ह्याल्म मराङिन ङेन तैस्याङ खेनै स्वर्गन राज्यग जाःनान मह्या।”
सेह्ताङन भारेः लम्पा
21“ङेनजै ताह्पा ङ्याह्, ताङ्बोन सिमिकाङ्मोः झाःम र्वापा ङ्याह्, ‘नाई सिमि नसह्रा, रे सुई सिमि सह्ङ्ङ नु धलन सम स्योरस्योर लैम राह्नान ङ्याह्।’#कानुन २०:१३; कानुन ५:१७ 22जेङ्नै ङा ङेनकाङ्मोः र्वाचे, सुस्याङ जेँन भाईन ङ्याबो सेह्ताङ खेँ नु धलन सम स्योरस्योर लैम राह्नान ङ्याह्, रे सुई जेँन भाइन अपमान खेँ, नु सिमि जोम्पू झब भिन मतैनान राह्नान ङ्याह्। जेङ्नै सुई जेँन भाइग ‘ना मुर्ख’ र्वाङ, नु ङ्यालान मेह्ग वैचेन जोखिमग राह्नान ङ्याह्।” 23“अन्नकारन नाई बेदीग जेँन भेति फुल्तौ नान भाईन समग नान बिरोधग तयाः ङ्याह् र्वानान नाः ह्याका राङिन, 24नान भेति स्याह्ई बेदीन ङू ख्योवा, रे वया। ङू जेँन भाईन ङ्याबो दीचे ख्या, रे मन्न छाम्म स्वास्वा जेँन भेती फुला।” 25“नान बैरीन ङ्याबो अदालतग वैतौ लमगै दिया, तेमन्ता बैरिजै नाः न्यायधीसन लाह्ग थोत्तरा, रे न्याधीसजै अधिक्रितन लाह्ग थोत्तरा, रे ना झ्यालखानाः थेप्नान ङ्याह्। 26तेम्माई, ङा ङेनकाङ्मोः र्वाचे, नाई सोह्ङ पुरु मफाःन बेर ना स्याह्लै बुप्नान मह्या।”
ब्यभिचारन भारेः लम्पा
27“ङेनजै झाम र्वापा ताह्पा ङिह्पाऊ, ‘नाई ब्यभिचार#5:27 पातार, नावा घोल्वा, धोन अलः आदि खेनान। नख्या।’#कानुन २०:१४; कानुन ५:१८ 28जेङ्नै ङा ङेनकाङ्मोः र्वाचे, सुई कान चिमिचाः नावा घोल्वान ईछ्याई सेह्ङ्ङ, नुई ङूलै जेँन समग नुन ङ्याबो ब्यभिचार खेतह्पा राह्नान। 29यदि नान मी याईपाई नाः तीपा खेफाङ्ङिन मनग छ्यूछ्यू पह्रा, तैङर्वाङिन नान ल्हो पुरू ङ्यालाः पच्चेन खेरे बरु नान अङ्गवन बर्ग ती मोल्चे नान भिह्तु ल: राह्नान।#मत्ती १८:९; मर्क ९:४७ 30नान याईपा लाह्ई नाः तीपा खेफाङ्ङिन मनग थुमथुम पह्रा। तैङर्वाङिन नान ल्हो पुरू ङ्यालाः वैचेन खेरे बरु नान अङ्गवन बर्ग ती मोल्चे नान भिह्तु ल: राह्नान।#मत्ती १८:८; मर्क ९:४३
मिह्जी भानान्न भारेः लम्पा
(मर्क १०:११-१२; लुक १६:१८)
31“झाम रे र्वापा ङ्याह्, कि ‘सुई जेँन मिसाः ख्योवाङ, नुई मिसाः ख्योवानान्न हिगा सह्राःयो।’#कानुन २४:१-४; मत्ती १९:७; मर्क १०:४ 32जेङ्नै ङा ङेनकाङ्मोः र्वाचे, सुई जेँन मिसा: ब्यभिचारन कारन नङ्म घङ कारनजै ख्योवादरा, नुई मिसाः ब्यभिचारिनी दोङ्नान, रे सुई ख्योवापान चिमिचान ङ्याबो मिह्जी खेदरा, नुई पातार खेनान ङ्याह्।#मत्ती १९:९; मर्क १०:११-१२; लुक १६:१८; १ कोर ७:१०-११
रेनरुपान भारेः लम्पा
33“ह्याङ ङेनजै ताह्पा ङ्याह्, कि ताङ्बोन सिमिकाङ्मोः र्वापा ङ्याह्, ‘नाई लबारन रेन नरुवा, जेङ्नै परमप्रभुन भिह्तु रुपान रेन नाई पुरा ख्या।’#लेवी १९:१२; गन्ती ३०:२; कानुन २३:२१ 34जेङ्नै ङा ङेनकाङ्मोः र्वाचे, रेन रुई नरुवा। स्वर्गन मिह्नग रेन नरुवा, तैङर्वाङिन मन परमेस्वरन सिङ्हासन जेङ्पा,#याक ५:१२; यसै ६६:१; मत्ती २३:२२ 35न ता पिर्थीबिन, तैङर्वाङिन मन नुन ल्हे नाम्पु जेङ्पा, न ता यरूसलेमन, तैङर्वाङिन मन मकेकुकेन किम झलीन सहर जेङ्पा।#यसै ६६:१; भजन ४८:२ 36जेँन थोप्पान रेन नरुवा, तैङर्वाङिन नाई छमदीग पाह्ल्म या म्याह्म्म दोङ मतैनान। 37ङेनजै र्वापान ल्होई चन ‘जेङ्पा’ र्वाङिन ‘जेङ्पा,’ ‘नङ्पा’ र्वाङिन ‘नङ्पा’ मात्र राःयो। अन्न खेरे ह्याल्म चन अलःलम स्वाङ।”
खूँ नान्नान्न भारेः लम्पा
(लुक ६:२७-३६)
38“झाम र्वापा ङेनजै ताह्पा ङ्याह्, ‘मीन पूँ मी, रे सोन पूँ सो।’#प्रस २१:२४; लेवी २४:२०; कानुन १९:२१ 39जेङ्नै ङा ङेनकाङ्मोः र्वाचे, सिमि अलःन ङ्याबो थाप्चि नख्या। सुई नान धामा याईपाः फ्याङदरा, नू घङ धामा यङ ताह्। 40यदि कान सिमिजै मुद्दा खेखे नान भन्दि वच्चे फाङ्ङिन, नू नान कोत यङ भिना। 41यदि सुई नाः ङन ङ्याबो किलोमितरदी थाल भै र्वार्वा धिपी खेङिन, नुन ङ्याबो किलोमितर ङेह् थाल वया। 42नान ङ्याबो तोल्नानग भिना, रे नान ङ्याबो छेर वस्सुम खेनानग अस्वीकार नख्या।
बैरिग मया ख्या
43“ङेनजै झाम र्वापा ताह्पा ङ्याह्, ‘नान खिम्जेःग मया ख्या, रे नान बैरी मस्याङ्चे ख्या।’#लेवी १९:१८ 44जेङ्नै ङा ङेनकाङ्मोः र्वाचे, जेँन बैरिकाङ्मोः मया ख्या, रे ङेनकाङ्मोः तेह्पफान्नानवन भिह्तु सोअताबा,#रोम १२:१४ 45रे ङेन स्वर्गः ङिह्पान जेँन पान ङोह्जोव राह्नान ङ्याह्। नुई अलः रे लः ङ्योरुमग ङिह्मान ताप बिन्नान, आलै धर्मी रे पापी ङ्योरुमग नाङ्का झ्युफान्नान। 46तैङर्वाङिन यदि ङेन जेँग मया खेनानकाङ्मोः मात्र मया खेङिन ङेनकाङ्मोः पुरस्कार तै ङ्याह्? तै कर तुईनानवजै र्वार्वा उजुई मखेनान तै? 47ङेनजै जेँन थिक्कोवग मात्र ध्वाः खेङिन घङवन खेरे ह्याल्म तै खेपा? तै यहूदीन खोलोःन सिमिवजै र्वार्वा उजुई मखेँ तै? 48अन्नकारन कताःम ङेनकोन स्वर्गः ङिह्पान पा वाम्म ङ्याह्, ङेन र्वार्वा उजुई वाम्म रात्वानान।”#लेवी १९:२; कानुन १८:१३
നിലവിൽ തിരഞ്ഞെടുത്തിരിക്കുന്നു:
मत्ती 5: NTKST25
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
The New Testament Books in Kaike Language © The Word for the World International and Kaike Translation Project, Nepal, 2025
मत्ती 5
5
धुरन खाईकोए
(लुक ६:२०-२३)
1सिमिवन मोह्ङग रङरङ येसु धुरन लाह्ः वैवै छ्युङ्बो रे चेलाव र्वार्वा नुन धेँवछोँ छ्युङ्बो। 2आलै नुई ख्युकाङ्मोः खाईकोए भिनैभिनै झाम र्वाबो:
तेम्मा स्याङ्पा
3“धन्न आत्माग बिखारीव, तैङर्वाङिन स्वर्गन राज्य ख्युन जेङ्पा।” 4धन्न छरा खेनानव, तैङर्वाङिन ख्युई सान्तोना देन्नान ङ्याह्। 5धन्न नम्रव, तैङर्वाङिन ख्युई पिर्थीबिन आङ देन्नान ङ्याह्। 6धन्न परमेस्वरन इच्छ्यान भिह्तु गुसिनान रे त्यु बुल्नानव, तैङर्वाङिन ख्यु बरङ्नान ङ्याह्। 7धन्न दया खेनानव, तैङर्वाङिन ख्युई परमेस्वरलम दया देन्नान ङ्याह्। 8धन्न सम छाङ्म राह्नानव, तैङर्वाङिन ख्युई परमेस्वरग रङ्नान ङ्याह्। 9धन्न दीफान्नानव, तैङर्वाङिन ख्यु परमेस्वरन सन्तान र्वानान ङ्याह्। 10धन्न परमेस्वरन इच्छ्यान भिह्तु तेह्पफान्नानव, तैङर्वाङिन स्वर्गन राज्य ख्युन जेङ्पा।#१ पत्र ३:१४ 11“धन्न जेङ्पा ङेन, जब सिमिवजै ङन खातिर ङेनकोन ल्हुई झानान ङ्याह् रे तेह्पफान्नान ङ्याह्, रे लबारन ल्होई र्वार्वा ङेनकोन बिरोधग तैस्याङ पुरून ल्होई अलः र्वानान ङ्याह्।#१ पत्र ४:१४ 12तब स्याँ, रे मिह्दा किम्म रा, तैङर्वाङिन स्वर्गः ङेनकोन इनाम किम राह्नान ङ्याह्। तैङर्वाङिन झामखेखेई ङेन खेरे ङून भबिस्यबक्ताकाङ्मोः ख्युई तेपफाम्पा ङ्याह्।”#२ इति ३६:१६; प्रे ७:५२
चा रे ताह्म
(मर्क ९:५०; लुक १४:३४-३५)
13“ङेन पिर्थीबिन चा जेङ्पा, जेङ्नै चान तोह्प्लाः वैङिन मन तैजै ह्याङ स्युर्पा दोङ्चे? मन ता खोलोः पच्चे रे सिमिन लेह्ई लेच्चेन नङ्म घङ तये फान्त्वानान मराह्नान।” 14“ङेन सन्सारन ताह्म जेङ्पा। धुरग नाम्पान सहर पेर मतैङ।#यूह ८:१२; ९:५ 15सिमिवजै लज्युङ पार्पार खेखे फाक्तिनजै ता मकप्ङ, जेङ्नै सामदानग नाह्ङ्ङ रे यिम ङिह्पा पुरून भिह्तु नुई साल्म बिङ्ङ।#मर्क ४:२१; लुक ८:१६; ११:३३ 16झामखेखेई ङेनकोन ताह्म सिमिवन ङू चम्कि राःयो, रे ख्युई ङेनकोन धोन लः रँयो, रे स्वर्गः ङिह्पान ङेनकोन पान महिमा ख्याःयो।”#१ पत्र २:१२
कानुन्न भारेः लम्पा
17“मोसाई बिम्पान कानुन आथबा भबिस्यबक्तावजै र्वापान ल्होई पह्म्मः ङा स्वापा जेङ्पा र्वार्वा नछुवा। ङा मन पह्म्मः नङ्पा, जेङ्नै पुरा खेमः स्वापा जेङ्पा।#रोम १०:४ 18तैङर्वाङिन तेम्माई ङा ङेनकाङ्मोः र्वाचे, जबथाल स्वर्ग रे पिर्थीबि ताह्ताह् मवैङ तबथाल कानुन्न ल्होई पुरू पुरा मरारे तै खेखेई अछेर कत्याम या थोप्लादी यङ ताह्ताह् वैनान मह्या।#लुक १६:१७ 19अन्नकारन सुई अन आग्यावन बर्ग पुरून खेरे कत्याःमः मङ्यान्दरा, रे सिमिकाङ्मोः उजुई खेमः लह्नदरा, स्वर्गन राज्यग नु पुरून खेरे कत्याम राह्नान ङ्याह्। जेङ्नै सुई मन आग्याव पालन खेदरा रे लह्नदरा, स्वर्गन राज्यग नु किम राह्नान ङ्याह्। 20तैङर्वाङिन ङा ङेनकाङ्मोः र्वाचे, ङेनकोन परमेस्वरन इच्छ्या कानुन लन्नान्न सिमि रे फरिसीवन खेरे ह्याल्म मराङिन ङेन तैस्याङ खेनै स्वर्गन राज्यग जाःनान मह्या।”
सेह्ताङन भारेः लम्पा
21“ङेनजै ताह्पा ङ्याह्, ताङ्बोन सिमिकाङ्मोः झाःम र्वापा ङ्याह्, ‘नाई सिमि नसह्रा, रे सुई सिमि सह्ङ्ङ नु धलन सम स्योरस्योर लैम राह्नान ङ्याह्।’#कानुन २०:१३; कानुन ५:१७ 22जेङ्नै ङा ङेनकाङ्मोः र्वाचे, सुस्याङ जेँन भाईन ङ्याबो सेह्ताङ खेँ नु धलन सम स्योरस्योर लैम राह्नान ङ्याह्, रे सुई जेँन भाइन अपमान खेँ, नु सिमि जोम्पू झब भिन मतैनान राह्नान ङ्याह्। जेङ्नै सुई जेँन भाइग ‘ना मुर्ख’ र्वाङ, नु ङ्यालान मेह्ग वैचेन जोखिमग राह्नान ङ्याह्।” 23“अन्नकारन नाई बेदीग जेँन भेति फुल्तौ नान भाईन समग नान बिरोधग तयाः ङ्याह् र्वानान नाः ह्याका राङिन, 24नान भेति स्याह्ई बेदीन ङू ख्योवा, रे वया। ङू जेँन भाईन ङ्याबो दीचे ख्या, रे मन्न छाम्म स्वास्वा जेँन भेती फुला।” 25“नान बैरीन ङ्याबो अदालतग वैतौ लमगै दिया, तेमन्ता बैरिजै नाः न्यायधीसन लाह्ग थोत्तरा, रे न्याधीसजै अधिक्रितन लाह्ग थोत्तरा, रे ना झ्यालखानाः थेप्नान ङ्याह्। 26तेम्माई, ङा ङेनकाङ्मोः र्वाचे, नाई सोह्ङ पुरु मफाःन बेर ना स्याह्लै बुप्नान मह्या।”
ब्यभिचारन भारेः लम्पा
27“ङेनजै झाम र्वापा ताह्पा ङिह्पाऊ, ‘नाई ब्यभिचार#5:27 पातार, नावा घोल्वा, धोन अलः आदि खेनान। नख्या।’#कानुन २०:१४; कानुन ५:१८ 28जेङ्नै ङा ङेनकाङ्मोः र्वाचे, सुई कान चिमिचाः नावा घोल्वान ईछ्याई सेह्ङ्ङ, नुई ङूलै जेँन समग नुन ङ्याबो ब्यभिचार खेतह्पा राह्नान। 29यदि नान मी याईपाई नाः तीपा खेफाङ्ङिन मनग छ्यूछ्यू पह्रा, तैङर्वाङिन नान ल्हो पुरू ङ्यालाः पच्चेन खेरे बरु नान अङ्गवन बर्ग ती मोल्चे नान भिह्तु ल: राह्नान।#मत्ती १८:९; मर्क ९:४७ 30नान याईपा लाह्ई नाः तीपा खेफाङ्ङिन मनग थुमथुम पह्रा। तैङर्वाङिन नान ल्हो पुरू ङ्यालाः वैचेन खेरे बरु नान अङ्गवन बर्ग ती मोल्चे नान भिह्तु ल: राह्नान।#मत्ती १८:८; मर्क ९:४३
मिह्जी भानान्न भारेः लम्पा
(मर्क १०:११-१२; लुक १६:१८)
31“झाम रे र्वापा ङ्याह्, कि ‘सुई जेँन मिसाः ख्योवाङ, नुई मिसाः ख्योवानान्न हिगा सह्राःयो।’#कानुन २४:१-४; मत्ती १९:७; मर्क १०:४ 32जेङ्नै ङा ङेनकाङ्मोः र्वाचे, सुई जेँन मिसा: ब्यभिचारन कारन नङ्म घङ कारनजै ख्योवादरा, नुई मिसाः ब्यभिचारिनी दोङ्नान, रे सुई ख्योवापान चिमिचान ङ्याबो मिह्जी खेदरा, नुई पातार खेनान ङ्याह्।#मत्ती १९:९; मर्क १०:११-१२; लुक १६:१८; १ कोर ७:१०-११
रेनरुपान भारेः लम्पा
33“ह्याङ ङेनजै ताह्पा ङ्याह्, कि ताङ्बोन सिमिकाङ्मोः र्वापा ङ्याह्, ‘नाई लबारन रेन नरुवा, जेङ्नै परमप्रभुन भिह्तु रुपान रेन नाई पुरा ख्या।’#लेवी १९:१२; गन्ती ३०:२; कानुन २३:२१ 34जेङ्नै ङा ङेनकाङ्मोः र्वाचे, रेन रुई नरुवा। स्वर्गन मिह्नग रेन नरुवा, तैङर्वाङिन मन परमेस्वरन सिङ्हासन जेङ्पा,#याक ५:१२; यसै ६६:१; मत्ती २३:२२ 35न ता पिर्थीबिन, तैङर्वाङिन मन नुन ल्हे नाम्पु जेङ्पा, न ता यरूसलेमन, तैङर्वाङिन मन मकेकुकेन किम झलीन सहर जेङ्पा।#यसै ६६:१; भजन ४८:२ 36जेँन थोप्पान रेन नरुवा, तैङर्वाङिन नाई छमदीग पाह्ल्म या म्याह्म्म दोङ मतैनान। 37ङेनजै र्वापान ल्होई चन ‘जेङ्पा’ र्वाङिन ‘जेङ्पा,’ ‘नङ्पा’ र्वाङिन ‘नङ्पा’ मात्र राःयो। अन्न खेरे ह्याल्म चन अलःलम स्वाङ।”
खूँ नान्नान्न भारेः लम्पा
(लुक ६:२७-३६)
38“झाम र्वापा ङेनजै ताह्पा ङ्याह्, ‘मीन पूँ मी, रे सोन पूँ सो।’#प्रस २१:२४; लेवी २४:२०; कानुन १९:२१ 39जेङ्नै ङा ङेनकाङ्मोः र्वाचे, सिमि अलःन ङ्याबो थाप्चि नख्या। सुई नान धामा याईपाः फ्याङदरा, नू घङ धामा यङ ताह्। 40यदि कान सिमिजै मुद्दा खेखे नान भन्दि वच्चे फाङ्ङिन, नू नान कोत यङ भिना। 41यदि सुई नाः ङन ङ्याबो किलोमितरदी थाल भै र्वार्वा धिपी खेङिन, नुन ङ्याबो किलोमितर ङेह् थाल वया। 42नान ङ्याबो तोल्नानग भिना, रे नान ङ्याबो छेर वस्सुम खेनानग अस्वीकार नख्या।
बैरिग मया ख्या
43“ङेनजै झाम र्वापा ताह्पा ङ्याह्, ‘नान खिम्जेःग मया ख्या, रे नान बैरी मस्याङ्चे ख्या।’#लेवी १९:१८ 44जेङ्नै ङा ङेनकाङ्मोः र्वाचे, जेँन बैरिकाङ्मोः मया ख्या, रे ङेनकाङ्मोः तेह्पफान्नानवन भिह्तु सोअताबा,#रोम १२:१४ 45रे ङेन स्वर्गः ङिह्पान जेँन पान ङोह्जोव राह्नान ङ्याह्। नुई अलः रे लः ङ्योरुमग ङिह्मान ताप बिन्नान, आलै धर्मी रे पापी ङ्योरुमग नाङ्का झ्युफान्नान। 46तैङर्वाङिन यदि ङेन जेँग मया खेनानकाङ्मोः मात्र मया खेङिन ङेनकाङ्मोः पुरस्कार तै ङ्याह्? तै कर तुईनानवजै र्वार्वा उजुई मखेनान तै? 47ङेनजै जेँन थिक्कोवग मात्र ध्वाः खेङिन घङवन खेरे ह्याल्म तै खेपा? तै यहूदीन खोलोःन सिमिवजै र्वार्वा उजुई मखेँ तै? 48अन्नकारन कताःम ङेनकोन स्वर्गः ङिह्पान पा वाम्म ङ्याह्, ङेन र्वार्वा उजुई वाम्म रात्वानान।”#लेवी १९:२; कानुन १८:१३
നിലവിൽ തിരഞ്ഞെടുത്തിരിക്കുന്നു:
:
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
The New Testament Books in Kaike Language © The Word for the World International and Kaike Translation Project, Nepal, 2025