Matiós 26
26
Idɔg gá busió buá Yésuse
(Mál 14.1-2; Lúk 22.1-2; Sáŋ 11.47-49, 53)
1Henyé, Yésuse umaámáman guhuínyihuinye, uwɔyidɛn bebinene bég áneé: «Nuálinsan áneé búmésién mɔɔ́sɛ máandɛ áneé budɔ́mb buá Páska wa bayúdɛn búbá. 2Bégedué Muɔ́n wa mɔndɔ gá gueleé bɔ́ndɔn yɔ́ uguá nuag.» 3Bagɔ́n bá bedúmbinusámb na bɔgɔ́ga bá buán ebébídidid agá nihiá niá edúmbinusámb wa ɔgɔ́n uyɔɔ́ bɔ́dɔ́ŋɔnaá áneé Kayíf. 4Abáhám ugelu gá gimbin Yésuse uguá mamb gá guɔ́n yɔ́. 5Gɔgaá, bɔ́ya áneé: «Didial buɔ́ uguá ginɛŋ giá budɔ́mb, gá gueleé ombuŋímbuŋié húdibíŋín agá ɔdɛ́m na ɔdɛ́m huá buán.»
Ugándɔ woóguodinon Yésuse megúd má ohind uguá ɔduá
(Mál 14.3-9; Sáŋ 12.1-8)
6Yésuse umabá Betaní uguá giansɛ giá eŋúnuŋún Símune, 7umaágányánan, ugándɔ uwonoól na ginɔ́g giá gidódé giá megúd má ohind ɔmɔ́ŋunɔnɔ́ giod giá ŋŋúme. Búmabá megúd má bunimɛ́d ubuɔ́ bɔ́dɔ́ŋɔnaá áneé albátlɛ. Uwenugun gidódé, uwɛɛ́d gá guodinon Yésuse mɔ́ uguá ɔduá. 8Bebinene bámaámáan anagányɛ ubúésésídinye bɔ́ ɔbɔ́yɛd áneé: «Gá giagɛ gɔg úmɔ́lɔg mɔ́?» 9Dimábá dia dué mɔ́ gá giod giá ŋŋúme diaban basúgasuga. 10Yésuse umaámálɛns buɔ́ uwɔyɛd áneé: «Gá giagɛ núsésenyeé ugándɔ ugányɛ? Buand ubuɔ́ úmal gámɛ gá busió búnyɛ beseé. 11Ɛɛ́ɛ, nunyɛ na basúgasuga mɔɔ́sɛ gidigid. Gɔgaá, yaŋuá ndigabá naánanɔ gá ságásagá. 12Umóŋodín megúd má ohind uguá nuɔ́l gá guaŋanan nuɔ́ gá ginyo. 13Uguá meliŋ, yɔɔ́núɔyɔn buɔ́, hɔɔ́m gidigid ɔhɔɔ́ bénésesenyeé Ginɔ́g giá Nsɔ́m giáguɔ́ uguísi gidigid, bɔ́nɔ́ya súsɔ́n buónyi ubuɔ́ úmáal, bónd bébídúmenye yɔ́.»
Yúdas waáguamba gudué Yésuse
(Mál 14.10-11; Lúk 22.3-6)
14Uguá bebinene bá Yésuse báad na báandɛ, omodi umabá hɔ́ ɔhɛ́n áneé Yúdas Iskaliót, uwɛɛ́d agá bagɔ́n bá bedúmbinusámb, 15úmuanyɛ gɔ́b áneé: «Mménúduín Yésuse, numpuá giagɛ?» Abádánɛ́n yɔ́ bikɔ́ŋ biá ŋŋúme nitín na bíad. 16Gubulin agányɛ, Yúdas uwebul guamba ginɔ́g gía giásɛ giá dué Yésuse.
Gubíaŋan gá budɔ́mb buá Páska
(Mál 14.12-16; Lúk 22.7-13)
17Buɔ́sɛ buá budɔ́mb buá gilɛ́d giá kanda buanyɛ buá guóbonye oguŋ, bebinene ɔbɔ́yidɛn Yésuse áneé: «Hanyɛ agaá ɔ́yɔnɔ́ áneé dianaguaŋánɛ́n gá nyá budɔ́mb buá Páska hɔ́?» 18Yésuse uwɔyidɛn bɔ́ áneé: «Idánánɔ agá tísɔna, agá nihiá niá déné gígeli, nuɔyidɛn yɔ́ áneé ehuínyihuínyi uméleé, diguɔyidɛn áneé: “Gisigɛl giámɛ gíganyɛ mɔdɔg, agáhɔ ŋŋanyanɔ́ budɔ́mb buá Páska wa bayúdɛn na bebinene bámɛ.”» 19Bebinene abál hana Yésuse úmɔyidɛ́n bɔ́, abál inámb hiá Páska.
Ginɛŋ giá gunyá
(Mál 14.17-21; Lúk 22.14; Sáŋ 13.21-30)
20Ginɛ́ŋ gimaámágua, Yésuse uwedugumin agá nubáŋ na bebinene bég báad na báandɛ. 21Bámaágányánán, uwɔyidɛn bɔ́ áneé: «Uguá meliŋ, yɔɔ́núɔyɔn buɔ́ áneé mɔndɔ omodi uguánɔ guá ɔlɔŋ uguɔ́g, ugéndué.» 22Ɔbɔ́b gusugɛn giod mbánan uguɔ́b guá idɛ́m, abɛ́d gá guóhon gá omoómi gá omoómi áneé: «Ɔgúná, búnyɛ búábá yaŋuá lí?» 23Yésuse uwondinye bɔ́ áneé: «Mɔndɔ uyɔɔ́ ɔmbɔ́g huég húgaáguádána naá huámɛ uguá osóyi, úgénduénú. 24Muɔ́n wa mɔndɔ ugɛ́d hana búabá ubúɔ́ŋɔ́n gég gá busió. Gɔgaá, búnyɛ Meyú na mɔndɔ ugaásilíga Muɔ́n wa mɔndɔ. Búmandábá beseé áneé udibíbíén búmbúm.» 25Yúdas úmaábá áneé ugeédué yɔ́, úmuanyɛ súsɔ́n uwoóhún áneé: «Ehuínyhuínyi, búnyɛ búábá yaŋuá lí? » Yésuse uwondinye yɔ́ áneé: «Aŋuá ɔmɔ́yɛd buɔ́.» 26Bámaágányánán, Yésuse uwɔgɔ́l gilɛ́d, uwasayɛ, uwasɔ́mb uweéŋin bebinene bég úmuanyɛ áneé: «Gɔ́lɔ́nɔ́nɔ nunyá, ubuɔ búnyɛ nuɔ́l nuámɛ!» 27Egélém gá gunyá, uwɔgɔ́l gibólé giá magɛ́b uwasayɛ, uweéŋin bɔ́ úmuanyɛ gɔ́b áneé: «Gɔ́lɔ́nɔ́nɔ nubíhuá banuá bem, 28gá giagiá ubuɔ búbúnya manɔ́ŋ mámɛ, manɔ́ŋ má nigál omógodugeé gá busió buá giod giá bandɔ gá giyibinina giá bilɔga, 29yɔɔ́núɔyɔn buɔ́, ta buɔ́sɛ ndienéndesién mbíhuá bumagɛ́b ubuɔ, ubúnya buá bibɔg biá búdɛ ubuɔ́ bɔ́dɔ́ŋɔnaá áneé fínyi, gueneg buɔ́sɛ ubuɔ́ yanábíhuánɔ́ giŋɔ́nsa gía magɛ́b náananɔ uguá Niguili niá Baba.»
Yésuse umódógie áneé Piéle ugaábísásɛ́ɛg yɔ́
(Mál 14.26-31; Lúk 22.33-34; Sáŋ 13.37-38)
30Egélém agányɛ, ɔbɔ́dɔ́ŋɛ́ɛd gilɛ́l abádigɛn gá guɛ́d agá ɔŋuɛnyɛ huá madɛ́ ɔmɔɔ́ bɔ́dɔ́ŋɔ́naá áneé: Olifié. 31Yésuse uwɔyidɛn bɔ́ gɔg áneé: «Búdúg buá hínen ubuɔ, nugaáguán gámɛ gá busió, gá gueleé búnyɛ ubúɔ́ŋɔ́n áneé: “Yɔnɔ́ɔn egíg bidúg, bidúmbúa gidigid bísálámand.” 32Gɔgaá, egélém gá hám uguá gibɛ́l, yenébue gánɔ Galilé.» 33Piéle gég áneé: «Mmába bandɔ obólbóndeé bábágaáguanɔ́ gáhɔ gá busió, yaŋuá ndianágua ta buɔ́sɛ.» 34Yésuse uwondinye yɔ́ áneé: «Uguá meliŋ, yɔ́guɔyɔn buɔ́ áneé: budúg buá hínen, gidédi gígaábá gímanyɛ gídidádɛ́ɛd, agaábá amámánámbísásɛ́ɛg iŋand ídádɔ.» 35Piéle uwondinye Yésuse áneé: «Ta búbá áneé digué ɔlɔŋ húmomi, yaŋuá ndibá wa bísásɛ́ɛg.» Bebinene bem ɔbɔ́yɛd buɔ́ nɔ́.
Yésuse woóbísógólonye Gesemaní
(Mál 14.32-42; Lúk 22.40-46)
36Yésuse uweneg nɔɔ́nɔb agá hɔɔ́m ɔhɔɔ́ bɔ́dɔ́ŋɔnaá áneé Gesemaní, uwɔyidɛn bɔ́ áneé: «Ánaá núbá aga, yaŋuá ŋkilidɛd egéné gá bísógólonye hɔ́.» 37Uwɔdɔ́ŋɛ́ɛn Piéle na baán bá Sebedé bem báandɛ, bugádɔ ubúégimbin yɔ́ na mesígíl, uwɔyidɛn bɔ́ áneé: 38«Mesígíli mányɛ agámɛ gá ɔdɛ́m, nnyɛ wa gué. Ánaá díbá aga digúle.» 39Uwandakɛl enéné, uwɔbɔmbɛg nudúg uguísi, uwɛɛ́d gá bísógólonye áneé: «Síe wamɛ mmába búnyɛ búábíal, ánaá gibólé igiɛ gíɛ́d hádɛ naánamɛ. Ta anagányɛ, búdigódi áneé búbá gámɛ gá guɔyɛd, gɔgaá búbá gá guáhɔ.» 40Egélém agányɛ, uwosiond agaá bebinene bámabá, uwegégie bɔ́ gá dúnɔ́, uwahuɛnyɛ Piéle úmuanyɛ gég áneé: «Kásɛ numásábia bugaga buá gulíd naánamɛ ta gá gisigɛl gímomi a? 41Ánaá núgúle nubísógólonye gá gueleé nudiguɛɛ́n uguá ísɔgida, Gileénde gínyɛ na bugaga gɔgaá, mmegu inyɛ bugué.» 42Yésuse uwonduguond gá bísógólonye gá uŋand huá gáandɛ wɔya áneé: «Síe wamɛ mmába gibólé igigányɛ gídibá giá dɔ́mb kandabá áneé mmábíhuá giɛ́, ánaá guɔyɛd guáhɔ gúbíhónye!» 43Umoógóndosiond mɔdɔg na bebinene bég, uwendegégie bɔ́ gá dúnɔ, gá giagiá eŋís yɔ́b yámabá yáganyɛ gunɔ́h na dunɔ́. 44Umasándahuɛnyɛ bɔ́ gɔg. Uwond gá mbísógóli gá uŋand huá gádádɔ, wondonyondonye pɛ́ŋ nugálɔ nuáguɔ́ númomi. 45Uwosiond agá buáyɛ buá bebinene bég, úmuanyɛ gɔ́b áneé: «Ánaá núdúmbenye na bídímanan nuhoge! Gisigɛl gíganyɛ mɔdɔg, igiɛ́ bágásílíga Muɔ́n wa mɔndɔ uguá imbɔ́g siá bɔlɔga. 46Ánaá núádigan didɔ́mb! Mɔndɔ uŋiónoneé uganyɛ hɔ́ na bandɔ bég.» 47Yésuse umabá umanyɛ gá gálgal, Yúdas, umaábá uguá ɔlɔŋ huá báad na báandɛ uwasihámínɛ́n na ndíd ya nsénsi, símabianán nnyémél na imbóŋ, bagɔ́n bá bedúmbinusámb na bogógi bá buán bábámadɔ́m bɔ́. 48Mɔndɔ umaásílígán yɔ́, umeéŋín bɔ́ bulins. Umuányɛ gɔ́b áneé: «Mɔndɔ uyɔɔ́ ŋŋɔɔ́gɔ́lɔ́nɔ́ ŋŋuindi, búnyɛ úmuanyɛ! Gimbínénu yɔ́.» 49Yúdas uwedúmbie uwakilɛn Yésuse, uwɔyidɛn yɔ́ áneé: «Ehuínyihuínyi, mbígélíd!» Uwɔgɔ́l yɔ́ gɔg ŋŋuindi 50Yésuse uwɔyidɛn yɔ́ áneé: «Ogúleé, al buóli buáhɔ ubuɔ́ ósógúól gá buɔ́, al buɔ́ gunsáns.» Nsénsi isíégimbin Yésuse. 51Mɔndɔ omodi umabá uguá ɔ́lɔŋ huá Yésuse, uwɔsɔ́gɔ́n nnyémél yeg uguá gibágál, uwafílɛ́ɛd odú huá edúmébi wa edúmbinusámb wa ɔgɔ́n. 52Yésuse uwɔyidɛn yɔ́ áneé: «Ondié nnyémél yahɔ uguá gibágál. Gá giagiá búnyɛ ubúɔ́ŋɔ́n áneé, mɔndɔ gidigid usɔ́guɔ́n sɔ́gá na nnyémél, bɔ́nɔ́n yɔ́ súsɔ́n na nnyémél. 53Aábídága áneé ndibá wa baŋidɛn Síe wamɛ, undúmɛ́n ndíd siá bilúna síad na íhandɛ, bínuanan gámɛ gá busió a? 54Naánanyá Ŋŋɔ́ŋɛ síónóbíhónyenú gɔg? Ŋŋɔ́ŋɛ isíɔ́yɔnɔ́, áneé ɛɛ́ɛ, ánaá búbíal anagányɛ.» 55Uguá ginɛŋ igigányɛ, Yésuse uwabígagalɛd giíŋ igímól gá gimbin yɔ́ uwoóhún giɛ́ áneé: «Búnyɛ áneé nnyɛ uŋébi a? Nuólésiŋimbén na imbóŋ na nnyémél a? Mɔɔ́sɛ gidigid yaábá ndugumen naánanɔ uguá idúl gá huínyihuinye, nuéséŋimbin. 56Muand umugányɛ gidigid múábíala gá gueleé Ŋŋɔ́ŋɛ siá ebunebúné síbíhónye.» Bebinene bég abásálámand gidigid, ɔbɔ́bínɔh.
Yésuse agá idɔg ihigɔ́n
(Mál 14.53-65; Lúk 22.54-55, 63-71; Sáŋ 18.12-18)
57Bandɔ ebémegímbín Yésuse abɛ́d neéneg agá Kayíf, ɔgúnɔ́gɔ́n wa bedúmbinusámb, hɔ́ boóŋi na bɔgɔ́ga bámabígúsá. 58Piéle umabá ubinen bɔ́ gueneg agá nígadá niá nihiá niá ofuŋ uhugɔ́n huá bedúmbinusámb. Uwebíŋín, uwedugumin ɔlɔŋ na bedúmébi gá guán hana búgaábídúmbanaá. 59Henyé, bagɔ́n bá bedúmbinusámb na idɔg ihigɔ́n, bámambá bilɔg biá bamaáná gá busió buá Yésuse, gá gueleé bágɔ́d áneé bɔ́n yɔ́. 60Tá hana bilɔg biá bamaáná bímafánán, bámasúguán buand. Báandɛ gɔg abáhámínɛn. 61Bámuanyɛ áneé: «Mɔndɔ uyɔ wɔɔ́yɛd áneé: “Nnyɛ wa gad idúl hiá Uhaluá yond gá hág hiɛ́ uguá mɔɔ́sɛ mádádɔ.”» 62Ofuŋ uhugɔ́n huá bedúmbinusámb nuá Uhaluá uhúádigɛn uhúóhún Yésuse áneé: «Odióguondonyinye gá moónyi ɔmɔɔ́ bɔ́yɔnɔ́ gáhɔ gá busió a?» 63Gɔgaá, Yésuse uwen guondinye. Ofuŋ uhugɔ́n huá bedúmbinusámb nuá Uhaluá uhúóndúguóhún yɔ́ áneé: «Uguá ɔhɛ́n huá Uhaluá unyaá ɔgɔ́sɛ, diɔ́yídɛ́n mmába anyɛ Bémeyíde, Muɔ́n wa mɔndɔ.» 64Yésuse uwondinye yɔ́ áneé: «Aŋuá ɔyɔnɔ́ buɔ́. Gɔgaá, yɔɔ́núɔyɔn buɔ́: gugɔns dabdab, nuánánan Muɔ́n wa mɔndɔ dugumine ɔmbɔ́g uhunɛ́m huá Uhaluá wa buŋaŋa gidigid, nuonónd nuán yɔ́ guosiondín uguá igil hiá gumɔn.» 65Gá nugálɔ unugányɛ, ofuŋ uhugɔ́n huá bedúmbinusámb nuá Uhaluá uhúálahúná bisɔn biég húɔya áneé: «Diánduguamba bamaáná bá giagɛ! Banuá mbánan numɔ́bíɔ́bɛ́n haná ufénefenineé Uhaluá. 66Nuégueleé giagɛ gá buɔ́?» Bandɔ gidigid obóndinye áneé: «Waánigimanan na nigué.» 67Egélém abɛ́d gá gasan yɔ́ bidá uguá busió, bómodi bádúdan yɔ́ bitúun, bódodi bágúban yɔ́ imbɛ́l, 68bɔ́yɔn yɔ́ áneé: «Hana ányá Bémeyíde bɔ́g! Ɔdiɔ́yidɛn mɔndɔ umágɔ́b.»
Nubísásɛ́g nuá piéle
(Mál 14.66-72; Lúk 22.56-62; Sáŋ 18.17, 25-27)
69Henyé, Piéle umabá dugumine agá nígadá. Ugándɔ omodi umabá edúmébi wa ugándɔ wa ofuŋ uhugɔ́n huá edúmbinusámb nuá Uhaluá uwonoól. Uwaán yɔ́ haná úmabá ubíésébe, uwɔyidɛn yɔ́ áneé: «Aŋuá súsɔ́n aábá na Yésuse wa Galilé!» 70Gɔgaá, uwabísásɛ́ɛg agá eŋís ya mɔndɔ gidigid, wɔya áneé: «Ndiálinsan ubuɔ́ ámbanɔ́ guɔyɛd.» 71Haná úmiídan ɔmbɔ́g huá buyal, ugándɔ odódi umabá edúmébi uwaán yɔ́ uwɔyidɛn abámabá hɔ́ áneé: «Uyɔ waábá na Yésuse wa Nasalɛ́d.» 72Gá uŋand huá gáandɛ uwabísásɛ́ɛg na bílianan áneé: «Ndiényi mɔndɔ ugányɛ!» 73Maná ginɛŋ, abámabá hɔ́ abákɛl ɔbɔ́yidɛn Piéle áneé: «Búnyɛ meliŋ, aŋuá súsɔ́n anyɛ wa guɔ́b! Ugelu huáhɔ húmógió.» 74Piéle gɔg uwehéhídinye áneé: «Mmába yaásúŋan, ánaá Uhaluá únsésídinye. Yaábílianan, ndiényi mɔndɔ ugányɛ.» Uguá ginɛŋ igigányɛ gidédi igíádádɛ́ɛd. 75Piéle uwebídúmdenye gɔg nugálɔ unuɔ́ Yésuse úmɔyɛ́d: «Gidédi gígágásidádɛ́d, agaábá amámánámbísásɛ́ɛg iŋand ídádɔ.» Piéle uwahám, uwabaŋa giod.
നിലവിൽ തിരഞ്ഞെടുത്തിരിക്കുന്നു:
Matiós 26: EKM
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Matiós 26
26
Idɔg gá busió buá Yésuse
(Mál 14.1-2; Lúk 22.1-2; Sáŋ 11.47-49, 53)
1Henyé, Yésuse umaámáman guhuínyihuinye, uwɔyidɛn bebinene bég áneé: «Nuálinsan áneé búmésién mɔɔ́sɛ máandɛ áneé budɔ́mb buá Páska wa bayúdɛn búbá. 2Bégedué Muɔ́n wa mɔndɔ gá gueleé bɔ́ndɔn yɔ́ uguá nuag.» 3Bagɔ́n bá bedúmbinusámb na bɔgɔ́ga bá buán ebébídidid agá nihiá niá edúmbinusámb wa ɔgɔ́n uyɔɔ́ bɔ́dɔ́ŋɔnaá áneé Kayíf. 4Abáhám ugelu gá gimbin Yésuse uguá mamb gá guɔ́n yɔ́. 5Gɔgaá, bɔ́ya áneé: «Didial buɔ́ uguá ginɛŋ giá budɔ́mb, gá gueleé ombuŋímbuŋié húdibíŋín agá ɔdɛ́m na ɔdɛ́m huá buán.»
Ugándɔ woóguodinon Yésuse megúd má ohind uguá ɔduá
(Mál 14.3-9; Sáŋ 12.1-8)
6Yésuse umabá Betaní uguá giansɛ giá eŋúnuŋún Símune, 7umaágányánan, ugándɔ uwonoól na ginɔ́g giá gidódé giá megúd má ohind ɔmɔ́ŋunɔnɔ́ giod giá ŋŋúme. Búmabá megúd má bunimɛ́d ubuɔ́ bɔ́dɔ́ŋɔnaá áneé albátlɛ. Uwenugun gidódé, uwɛɛ́d gá guodinon Yésuse mɔ́ uguá ɔduá. 8Bebinene bámaámáan anagányɛ ubúésésídinye bɔ́ ɔbɔ́yɛd áneé: «Gá giagɛ gɔg úmɔ́lɔg mɔ́?» 9Dimábá dia dué mɔ́ gá giod giá ŋŋúme diaban basúgasuga. 10Yésuse umaámálɛns buɔ́ uwɔyɛd áneé: «Gá giagɛ núsésenyeé ugándɔ ugányɛ? Buand ubuɔ́ úmal gámɛ gá busió búnyɛ beseé. 11Ɛɛ́ɛ, nunyɛ na basúgasuga mɔɔ́sɛ gidigid. Gɔgaá, yaŋuá ndigabá naánanɔ gá ságásagá. 12Umóŋodín megúd má ohind uguá nuɔ́l gá guaŋanan nuɔ́ gá ginyo. 13Uguá meliŋ, yɔɔ́núɔyɔn buɔ́, hɔɔ́m gidigid ɔhɔɔ́ bénésesenyeé Ginɔ́g giá Nsɔ́m giáguɔ́ uguísi gidigid, bɔ́nɔ́ya súsɔ́n buónyi ubuɔ́ úmáal, bónd bébídúmenye yɔ́.»
Yúdas waáguamba gudué Yésuse
(Mál 14.10-11; Lúk 22.3-6)
14Uguá bebinene bá Yésuse báad na báandɛ, omodi umabá hɔ́ ɔhɛ́n áneé Yúdas Iskaliót, uwɛɛ́d agá bagɔ́n bá bedúmbinusámb, 15úmuanyɛ gɔ́b áneé: «Mménúduín Yésuse, numpuá giagɛ?» Abádánɛ́n yɔ́ bikɔ́ŋ biá ŋŋúme nitín na bíad. 16Gubulin agányɛ, Yúdas uwebul guamba ginɔ́g gía giásɛ giá dué Yésuse.
Gubíaŋan gá budɔ́mb buá Páska
(Mál 14.12-16; Lúk 22.7-13)
17Buɔ́sɛ buá budɔ́mb buá gilɛ́d giá kanda buanyɛ buá guóbonye oguŋ, bebinene ɔbɔ́yidɛn Yésuse áneé: «Hanyɛ agaá ɔ́yɔnɔ́ áneé dianaguaŋánɛ́n gá nyá budɔ́mb buá Páska hɔ́?» 18Yésuse uwɔyidɛn bɔ́ áneé: «Idánánɔ agá tísɔna, agá nihiá niá déné gígeli, nuɔyidɛn yɔ́ áneé ehuínyihuínyi uméleé, diguɔyidɛn áneé: “Gisigɛl giámɛ gíganyɛ mɔdɔg, agáhɔ ŋŋanyanɔ́ budɔ́mb buá Páska wa bayúdɛn na bebinene bámɛ.”» 19Bebinene abál hana Yésuse úmɔyidɛ́n bɔ́, abál inámb hiá Páska.
Ginɛŋ giá gunyá
(Mál 14.17-21; Lúk 22.14; Sáŋ 13.21-30)
20Ginɛ́ŋ gimaámágua, Yésuse uwedugumin agá nubáŋ na bebinene bég báad na báandɛ. 21Bámaágányánán, uwɔyidɛn bɔ́ áneé: «Uguá meliŋ, yɔɔ́núɔyɔn buɔ́ áneé mɔndɔ omodi uguánɔ guá ɔlɔŋ uguɔ́g, ugéndué.» 22Ɔbɔ́b gusugɛn giod mbánan uguɔ́b guá idɛ́m, abɛ́d gá guóhon gá omoómi gá omoómi áneé: «Ɔgúná, búnyɛ búábá yaŋuá lí?» 23Yésuse uwondinye bɔ́ áneé: «Mɔndɔ uyɔɔ́ ɔmbɔ́g huég húgaáguádána naá huámɛ uguá osóyi, úgénduénú. 24Muɔ́n wa mɔndɔ ugɛ́d hana búabá ubúɔ́ŋɔ́n gég gá busió. Gɔgaá, búnyɛ Meyú na mɔndɔ ugaásilíga Muɔ́n wa mɔndɔ. Búmandábá beseé áneé udibíbíén búmbúm.» 25Yúdas úmaábá áneé ugeédué yɔ́, úmuanyɛ súsɔ́n uwoóhún áneé: «Ehuínyhuínyi, búnyɛ búábá yaŋuá lí? » Yésuse uwondinye yɔ́ áneé: «Aŋuá ɔmɔ́yɛd buɔ́.» 26Bámaágányánán, Yésuse uwɔgɔ́l gilɛ́d, uwasayɛ, uwasɔ́mb uweéŋin bebinene bég úmuanyɛ áneé: «Gɔ́lɔ́nɔ́nɔ nunyá, ubuɔ búnyɛ nuɔ́l nuámɛ!» 27Egélém gá gunyá, uwɔgɔ́l gibólé giá magɛ́b uwasayɛ, uweéŋin bɔ́ úmuanyɛ gɔ́b áneé: «Gɔ́lɔ́nɔ́nɔ nubíhuá banuá bem, 28gá giagiá ubuɔ búbúnya manɔ́ŋ mámɛ, manɔ́ŋ má nigál omógodugeé gá busió buá giod giá bandɔ gá giyibinina giá bilɔga, 29yɔɔ́núɔyɔn buɔ́, ta buɔ́sɛ ndienéndesién mbíhuá bumagɛ́b ubuɔ, ubúnya buá bibɔg biá búdɛ ubuɔ́ bɔ́dɔ́ŋɔnaá áneé fínyi, gueneg buɔ́sɛ ubuɔ́ yanábíhuánɔ́ giŋɔ́nsa gía magɛ́b náananɔ uguá Niguili niá Baba.»
Yésuse umódógie áneé Piéle ugaábísásɛ́ɛg yɔ́
(Mál 14.26-31; Lúk 22.33-34; Sáŋ 13.37-38)
30Egélém agányɛ, ɔbɔ́dɔ́ŋɛ́ɛd gilɛ́l abádigɛn gá guɛ́d agá ɔŋuɛnyɛ huá madɛ́ ɔmɔɔ́ bɔ́dɔ́ŋɔ́naá áneé: Olifié. 31Yésuse uwɔyidɛn bɔ́ gɔg áneé: «Búdúg buá hínen ubuɔ, nugaáguán gámɛ gá busió, gá gueleé búnyɛ ubúɔ́ŋɔ́n áneé: “Yɔnɔ́ɔn egíg bidúg, bidúmbúa gidigid bísálámand.” 32Gɔgaá, egélém gá hám uguá gibɛ́l, yenébue gánɔ Galilé.» 33Piéle gég áneé: «Mmába bandɔ obólbóndeé bábágaáguanɔ́ gáhɔ gá busió, yaŋuá ndianágua ta buɔ́sɛ.» 34Yésuse uwondinye yɔ́ áneé: «Uguá meliŋ, yɔ́guɔyɔn buɔ́ áneé: budúg buá hínen, gidédi gígaábá gímanyɛ gídidádɛ́ɛd, agaábá amámánámbísásɛ́ɛg iŋand ídádɔ.» 35Piéle uwondinye Yésuse áneé: «Ta búbá áneé digué ɔlɔŋ húmomi, yaŋuá ndibá wa bísásɛ́ɛg.» Bebinene bem ɔbɔ́yɛd buɔ́ nɔ́.
Yésuse woóbísógólonye Gesemaní
(Mál 14.32-42; Lúk 22.40-46)
36Yésuse uweneg nɔɔ́nɔb agá hɔɔ́m ɔhɔɔ́ bɔ́dɔ́ŋɔnaá áneé Gesemaní, uwɔyidɛn bɔ́ áneé: «Ánaá núbá aga, yaŋuá ŋkilidɛd egéné gá bísógólonye hɔ́.» 37Uwɔdɔ́ŋɛ́ɛn Piéle na baán bá Sebedé bem báandɛ, bugádɔ ubúégimbin yɔ́ na mesígíl, uwɔyidɛn bɔ́ áneé: 38«Mesígíli mányɛ agámɛ gá ɔdɛ́m, nnyɛ wa gué. Ánaá díbá aga digúle.» 39Uwandakɛl enéné, uwɔbɔmbɛg nudúg uguísi, uwɛɛ́d gá bísógólonye áneé: «Síe wamɛ mmába búnyɛ búábíal, ánaá gibólé igiɛ gíɛ́d hádɛ naánamɛ. Ta anagányɛ, búdigódi áneé búbá gámɛ gá guɔyɛd, gɔgaá búbá gá guáhɔ.» 40Egélém agányɛ, uwosiond agaá bebinene bámabá, uwegégie bɔ́ gá dúnɔ́, uwahuɛnyɛ Piéle úmuanyɛ gég áneé: «Kásɛ numásábia bugaga buá gulíd naánamɛ ta gá gisigɛl gímomi a? 41Ánaá núgúle nubísógólonye gá gueleé nudiguɛɛ́n uguá ísɔgida, Gileénde gínyɛ na bugaga gɔgaá, mmegu inyɛ bugué.» 42Yésuse uwonduguond gá bísógólonye gá uŋand huá gáandɛ wɔya áneé: «Síe wamɛ mmába gibólé igigányɛ gídibá giá dɔ́mb kandabá áneé mmábíhuá giɛ́, ánaá guɔyɛd guáhɔ gúbíhónye!» 43Umoógóndosiond mɔdɔg na bebinene bég, uwendegégie bɔ́ gá dúnɔ, gá giagiá eŋís yɔ́b yámabá yáganyɛ gunɔ́h na dunɔ́. 44Umasándahuɛnyɛ bɔ́ gɔg. Uwond gá mbísógóli gá uŋand huá gádádɔ, wondonyondonye pɛ́ŋ nugálɔ nuáguɔ́ númomi. 45Uwosiond agá buáyɛ buá bebinene bég, úmuanyɛ gɔ́b áneé: «Ánaá núdúmbenye na bídímanan nuhoge! Gisigɛl gíganyɛ mɔdɔg, igiɛ́ bágásílíga Muɔ́n wa mɔndɔ uguá imbɔ́g siá bɔlɔga. 46Ánaá núádigan didɔ́mb! Mɔndɔ uŋiónoneé uganyɛ hɔ́ na bandɔ bég.» 47Yésuse umabá umanyɛ gá gálgal, Yúdas, umaábá uguá ɔlɔŋ huá báad na báandɛ uwasihámínɛ́n na ndíd ya nsénsi, símabianán nnyémél na imbóŋ, bagɔ́n bá bedúmbinusámb na bogógi bá buán bábámadɔ́m bɔ́. 48Mɔndɔ umaásílígán yɔ́, umeéŋín bɔ́ bulins. Umuányɛ gɔ́b áneé: «Mɔndɔ uyɔɔ́ ŋŋɔɔ́gɔ́lɔ́nɔ́ ŋŋuindi, búnyɛ úmuanyɛ! Gimbínénu yɔ́.» 49Yúdas uwedúmbie uwakilɛn Yésuse, uwɔyidɛn yɔ́ áneé: «Ehuínyihuínyi, mbígélíd!» Uwɔgɔ́l yɔ́ gɔg ŋŋuindi 50Yésuse uwɔyidɛn yɔ́ áneé: «Ogúleé, al buóli buáhɔ ubuɔ́ ósógúól gá buɔ́, al buɔ́ gunsáns.» Nsénsi isíégimbin Yésuse. 51Mɔndɔ omodi umabá uguá ɔ́lɔŋ huá Yésuse, uwɔsɔ́gɔ́n nnyémél yeg uguá gibágál, uwafílɛ́ɛd odú huá edúmébi wa edúmbinusámb wa ɔgɔ́n. 52Yésuse uwɔyidɛn yɔ́ áneé: «Ondié nnyémél yahɔ uguá gibágál. Gá giagiá búnyɛ ubúɔ́ŋɔ́n áneé, mɔndɔ gidigid usɔ́guɔ́n sɔ́gá na nnyémél, bɔ́nɔ́n yɔ́ súsɔ́n na nnyémél. 53Aábídága áneé ndibá wa baŋidɛn Síe wamɛ, undúmɛ́n ndíd siá bilúna síad na íhandɛ, bínuanan gámɛ gá busió a? 54Naánanyá Ŋŋɔ́ŋɛ síónóbíhónyenú gɔg? Ŋŋɔ́ŋɛ isíɔ́yɔnɔ́, áneé ɛɛ́ɛ, ánaá búbíal anagányɛ.» 55Uguá ginɛŋ igigányɛ, Yésuse uwabígagalɛd giíŋ igímól gá gimbin yɔ́ uwoóhún giɛ́ áneé: «Búnyɛ áneé nnyɛ uŋébi a? Nuólésiŋimbén na imbóŋ na nnyémél a? Mɔɔ́sɛ gidigid yaábá ndugumen naánanɔ uguá idúl gá huínyihuinye, nuéséŋimbin. 56Muand umugányɛ gidigid múábíala gá gueleé Ŋŋɔ́ŋɛ siá ebunebúné síbíhónye.» Bebinene bég abásálámand gidigid, ɔbɔ́bínɔh.
Yésuse agá idɔg ihigɔ́n
(Mál 14.53-65; Lúk 22.54-55, 63-71; Sáŋ 18.12-18)
57Bandɔ ebémegímbín Yésuse abɛ́d neéneg agá Kayíf, ɔgúnɔ́gɔ́n wa bedúmbinusámb, hɔ́ boóŋi na bɔgɔ́ga bámabígúsá. 58Piéle umabá ubinen bɔ́ gueneg agá nígadá niá nihiá niá ofuŋ uhugɔ́n huá bedúmbinusámb. Uwebíŋín, uwedugumin ɔlɔŋ na bedúmébi gá guán hana búgaábídúmbanaá. 59Henyé, bagɔ́n bá bedúmbinusámb na idɔg ihigɔ́n, bámambá bilɔg biá bamaáná gá busió buá Yésuse, gá gueleé bágɔ́d áneé bɔ́n yɔ́. 60Tá hana bilɔg biá bamaáná bímafánán, bámasúguán buand. Báandɛ gɔg abáhámínɛn. 61Bámuanyɛ áneé: «Mɔndɔ uyɔ wɔɔ́yɛd áneé: “Nnyɛ wa gad idúl hiá Uhaluá yond gá hág hiɛ́ uguá mɔɔ́sɛ mádádɔ.”» 62Ofuŋ uhugɔ́n huá bedúmbinusámb nuá Uhaluá uhúádigɛn uhúóhún Yésuse áneé: «Odióguondonyinye gá moónyi ɔmɔɔ́ bɔ́yɔnɔ́ gáhɔ gá busió a?» 63Gɔgaá, Yésuse uwen guondinye. Ofuŋ uhugɔ́n huá bedúmbinusámb nuá Uhaluá uhúóndúguóhún yɔ́ áneé: «Uguá ɔhɛ́n huá Uhaluá unyaá ɔgɔ́sɛ, diɔ́yídɛ́n mmába anyɛ Bémeyíde, Muɔ́n wa mɔndɔ.» 64Yésuse uwondinye yɔ́ áneé: «Aŋuá ɔyɔnɔ́ buɔ́. Gɔgaá, yɔɔ́núɔyɔn buɔ́: gugɔns dabdab, nuánánan Muɔ́n wa mɔndɔ dugumine ɔmbɔ́g uhunɛ́m huá Uhaluá wa buŋaŋa gidigid, nuonónd nuán yɔ́ guosiondín uguá igil hiá gumɔn.» 65Gá nugálɔ unugányɛ, ofuŋ uhugɔ́n huá bedúmbinusámb nuá Uhaluá uhúálahúná bisɔn biég húɔya áneé: «Diánduguamba bamaáná bá giagɛ! Banuá mbánan numɔ́bíɔ́bɛ́n haná ufénefenineé Uhaluá. 66Nuégueleé giagɛ gá buɔ́?» Bandɔ gidigid obóndinye áneé: «Waánigimanan na nigué.» 67Egélém abɛ́d gá gasan yɔ́ bidá uguá busió, bómodi bádúdan yɔ́ bitúun, bódodi bágúban yɔ́ imbɛ́l, 68bɔ́yɔn yɔ́ áneé: «Hana ányá Bémeyíde bɔ́g! Ɔdiɔ́yidɛn mɔndɔ umágɔ́b.»
Nubísásɛ́g nuá piéle
(Mál 14.66-72; Lúk 22.56-62; Sáŋ 18.17, 25-27)
69Henyé, Piéle umabá dugumine agá nígadá. Ugándɔ omodi umabá edúmébi wa ugándɔ wa ofuŋ uhugɔ́n huá edúmbinusámb nuá Uhaluá uwonoól. Uwaán yɔ́ haná úmabá ubíésébe, uwɔyidɛn yɔ́ áneé: «Aŋuá súsɔ́n aábá na Yésuse wa Galilé!» 70Gɔgaá, uwabísásɛ́ɛg agá eŋís ya mɔndɔ gidigid, wɔya áneé: «Ndiálinsan ubuɔ́ ámbanɔ́ guɔyɛd.» 71Haná úmiídan ɔmbɔ́g huá buyal, ugándɔ odódi umabá edúmébi uwaán yɔ́ uwɔyidɛn abámabá hɔ́ áneé: «Uyɔ waábá na Yésuse wa Nasalɛ́d.» 72Gá uŋand huá gáandɛ uwabísásɛ́ɛg na bílianan áneé: «Ndiényi mɔndɔ ugányɛ!» 73Maná ginɛŋ, abámabá hɔ́ abákɛl ɔbɔ́yidɛn Piéle áneé: «Búnyɛ meliŋ, aŋuá súsɔ́n anyɛ wa guɔ́b! Ugelu huáhɔ húmógió.» 74Piéle gɔg uwehéhídinye áneé: «Mmába yaásúŋan, ánaá Uhaluá únsésídinye. Yaábílianan, ndiényi mɔndɔ ugányɛ.» Uguá ginɛŋ igigányɛ gidédi igíádádɛ́ɛd. 75Piéle uwebídúmdenye gɔg nugálɔ unuɔ́ Yésuse úmɔyɛ́d: «Gidédi gígágásidádɛ́d, agaábá amámánámbísásɛ́ɛg iŋand ídádɔ.» Piéle uwahám, uwabaŋa giod.
നിലവിൽ തിരഞ്ഞെടുത്തിരിക്കുന്നു:
:
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക