Varoma 16
16
Makundo gomupositoli Paurusa
1Tani gava kweni munwazinyetu gomwaKristusa, Foibe, mukwafi gombungakriste zomoKenkereya. 2Mu tambwireni medina lyaHompa, moomu ya fira vapongoki, mu ya mu kwafe hena mwankenye eyi nga hepa ko kweni. Yeeyi nage vanzi nga kwafa, rambanga ko nanyamwange.
3Kundisireni po oPilisikiraa naAkura, varugani vakwetu mosirugana saJesus Kristusa 4ava va gavere nomwenyo dawo va popere mwenyo gwange. Kapisi nyamelike nina kuvapanda, nani nonombungakriste nadinye dava va tunda moupagani. 5Kundisireni po mbungakriste ezi azi pongere membo lyawo.
Kundisireni po mukwetu ogu na hara Epainetusi. Age yige muhoverera kupura Kristusa mosirongo saAsiya. 6Kundisireni po Mariya ogu ga mu ruganena unene. 7Kundisireni po Andoronikusa naJuniasa, Vajuda vakwetu ava twa kere nawo modorongo. Awo kwa divikwa mokatji kovapositoli, awo hena yiwo va hoverere kwange kukara vakriste. 8Kundisireni po Ampiliyatusi, mukwetu ogu na harera mwaHompa. 9Kundisireni po Urubanusi, murugani mukwetu mwaKristusa, naSitakusi ogu na hara. 10Kundisireni po Aperesi, ogu ga fundira maheteko mwaKristusa. Kundisireni po vembo lyaAlisitoburusi. 11Kundisireni po Mujuda mukwetu Herodiyoni. Kundisireni po vembo lyaNarekisusi ava va kara mwaHompa.
12Kundisireni po Tilifaina naTilifosa, ava ava rugana nomupampi mwaHompa Kundisireni po Peresisi, munwamali gomukadi gokuhara ogu a rugana unene mwaHompa. 13Kundisireni po Rufusi, muhoroworwa gwaHompa nozina, ava va kara ngwendi onane name. 14Kundisireni po Asinkeretusi naFeregoni naHeremesi naPatorobasi naHerumasi novakwetetu ava va kara nawo. 15Kundisireni po Firorogusi naJuliya naNereusi nampanzendi Olimpasi novapongoki navenye ava va kara nawo.
16Likundisira‐kundisireni po nencumito lyoumumbya. Nombungakriste nadinye daKristusa tadi mu kundu.
Mapukururo gokuhulilira
17Tani mu korangeda vakwetu, va vangarareni ava ava reta maligaunuko nomalilimbo nerongo eli mwa lironga. One omu va lipore! 18Vantu vangoso kapi ava ruganene Hompa gwetu Kristusa, awo mazimo gavene ava ruganene. Awo kupukisisa wonomutjima dononderu kononkango dawo dombili dokumugombeka. 19Kulimburukwa kweni kwaKarunga kwa divikwa kwanavenye. Yiyo nye na mu haferere, nye ame kuna hara mu kare vanandunge mweyi yoyiwa, one hena mu pire nondunge mweyi yoyidona. 20Karunga gombili ntaantani a sanswinine Satana konhi zonompadi deni.
Hompa gwetu Jesus Kristusa a mu fire nkenda!
21Timoteusa, murugani mukwetu, ta mu kundisire po, kumwe noVajuda vakwetu oRusiusi naJasoni naSosipateli.
22Ame Teretiusa, ogu ga tjangesesa Paurusa mbilivhe ezi, tani mu kundire mwaHompa.
23Gayusi, murangeki gwange, ogu a tambura mbungakriste nazinye azi ponge membo lyendi, ta mu kundu. Erasitusa, gweyi yoyimaliva yositata namukwetu Kwarutusi, tava mu kundu.
24Hompa gwetu Jesus Kristusa a mu fire nkenda! Amen.
Ehageseso nefumadeko
25Tu fumadekeni Karunga! Age kwa kara nononkondo dokumukorekesa mepuro lyeni lyokuhamena koMbudi zoNgwa zaJesus Kristusa, ezi ani udisa. Mbudi ezi kwa horamene nomvhura dononzi da ka pita. 26Nye ntaantani zina horoka poruzera momatjangwa goVaporofete. Kompango zaKarunga gwanarunye kwa zi divisira nomuhoko nadinye, asi navenye va pure oku tava zi limburukwa.
27Karunga, munandunge gelike thi, va mu fumadeke narunye‐narunye morwaJesus Kristusa. Amen.
© Egwanekerobibeli Lyanamibia 1987, 2003
© Bible Society of Namibia 1987, 2003