Luke 18
18
1ဟောည်ႇဒီန် စဝ်ဖြားယေရှု ဒဲႈပုင်တဲႇ တတပဲ့တော်အ်ုန် ဘည်လိုတမှာန်းဆုတောန်ခိင် မည်ဒဲႈအ်ုန်တောပ်နောႈဇောႈ 2“ခေဲင်ကီုင်းအူကီုင်း မိူဝ်ႈတားဘ္လံက်ချှာင်တြား အူအီး စဝ်ဖြားမာ် အာဝ်ယော၊ တေဲင်ကူန်ရဝ်မာဂါင်မာ် အာဝ်မိူဝ်ႈနောႈ ဆိင်တိူဝ်ႈကနေဲႈ။ 3မိူဝ်ႈယာကမာည်းခေဲင်ကီုင်းဒီန် အူအီး ဂေါည်ဂေါည်က္လာင်း တားဘ္လံက်ချှာင်တြား ဒါလံပ်ဖြေင်ကဒိူဝ်ႈ ဘ္လဒဲႈခံင် အမှုအော။ 4အခိင်မာ်ဟည်လှေင်ဒေဲႈ အ်ုန်ဘိူည်အာဝ်တိူဝ်ႈအရေးမာ် ‘အောနီန် စဝ်ဖြားမာ်အောအာဝ်ယော။ အောဘိူည်အာဝ်ဆမာတိူဝ်ႈအရေးတိုအီးရဝ်ဂါင်မာ် 5ဂေါႇမိုႈယာကမာည်းနီန် ချှုက်ဇာဝ်းအောတောန်အခိင် ဆာ်အေဘ္လဒဲႈ အမှုအ်ုန်နီန် စီနံင်ဘိူန်းယာ့်။ ဆာ်ဘာည်းနီန် အ်ုန်စီနံင်ဇံင်းပ်ုန်မှာန်းအ်ုန်တအော အာဝ်ဂေါည်ဂေါည်ရောတ်ယာ့် တအော’ အ်ုန်တဂေန်းဒါႈဘည်နီန်။” 6ဟောည်ႇဒီန် “တဂေန်းဆဲ့ပဲဒါ ဘည်အာန်းဘည်တဂေန်းဇေဝ် တားဘ္လံက်ချှာင်တြားနီန်။ 7တာဘ္လံက်ချှာင်တြားနီန်လိူည် ဆာ်အ်ုန်ကဓေဒဲႈ တကဝ်အီဂေါည်ဂေါည်မှာန်း၊ ဟြာင်းတအ်ုန်ဒီန် ပဲထာင်လာ့် စဝ်ဖြားနံင်တီုတ်အခိင် ရဲ့လှေင် အာဝ်ပနိုက်ဒဲႈ တကဝ်အီမှာန်းဆုတောန်ဆိူမ်တောန်ညှာနီန်။ 8အောနံင်က္လာင်းတပဲ၊ စဝ်ဖြားနံင်ပနိုက်ဒဲႈချာ်န်းချာ်န်း တဆုပ်ုန်မှာန်းပဲပည်ဒိုႇဒိုည်ႇ။ မိုႈလိူည် ခိင်နံင်စွရောတ်စာ်မ်းကောန်စဝ်ဖြား တေဲင်ကံမ်ဖာနီန် နံင်ယိူဝ်းလာ့်ဒေတိူရ်ႈ ကဲအီမိူဝ်ႈပ်ုန်ညှူမ်။” 9ဟောည်ႇဒီန် စဝ်ဖြားဒဲႈပုင်တဲႇအူလှေ ကနာည်တိုအီး ဆမာထာင်တိုပြီမ်မြျံ တ် ပ်ုန်ဇောႈအီး 10“မိူဝ်ႈဖာရိရှဲအူအီး ကာည်း ကညာကဲပ်ကောပ်အူအီး ဂါရ်ဟာဝ်းပကျောင်ဖြား ကနာည်နံင်မှာန်းဆု။ 11ဖာရိရှဲဒီန် အ်ုန်ဇံင်းလာ်ဒါအူအီး မှာန်းဆု ‘အိုစဝ်ဖြား၊ အောအာဝ်မိူဝ်ႈမ လောဘဒါင်းဘာည်းအီး၊ ခံင်အာဝ်ဆီုဝ်အာဝ်ရိုမာ် အောအာဝ်ရေဲန်မ၊ ဆဲႈဒါႇအောအာဝ်လူည်ႇ တေဲင်ဘဝ်ရမာ၊ ဂေါႇမိုႈအောအာဝ်ဘာည်း တိုအီးကဲပ်ကောက်အီဇံင်း ပတွည်းတွည်းမာ် အောတာင်ကေးစူးဒါင်း တစဝ်ဖြားယာ့်။ 12အောႎဲႈဟောမ် မှာန်းဆု အူနှားဒိူန်အာရ်ဆငည်း ရိူန်းလီပအော ပည်ဒိုႇဒိုည်ႇ ကိူရ်ပူန်အူပူန်မာ် အောလှူအူန်း တဗိမာန်တော်။’ 13မိုႈလိူည် ကဝ်အီကဲပ်ကောက်ဒီန် စီဇံင်းဒါ ရာမ်ကဒိုင်းတတိုအီးကဲ ကာင်ဟာဝ်မာ် အာဝ်ယတိူရ်ႈ ရင်ဘတ်စည်တီးပြီး ‘အို စဝ်ဖြား၊ မှာန်းစဝ်ဖြား ကဓေဒဲႈဘိူဝ် ဂေါႇမိုႈ အီုင်ဂ္လံတ်ပ်ုန်ရေဲန်အောဂီုန်းဇာဝ်း။’ 14င်ႎီရ်ရောတ်ဂါရ်ပဂါင် ကဝ်အီဘိူန်းပ်ုန် ပ္လိုတ်ခွါင်းစဝ်ဖြားနီန် အာဝ်မိုႈမဖာရိရှဲ စီမိုႈကဝ်အီကဲပ်ကောက်ဒီန်။ ကဝ်အီထာင်ဒါင်းတိုနီန် ဆမာကတူႈပဇောႈ ကဝ်အီပဇောႈတိုပြီမ်နီန် အ်ုန်ဆမားဘိူန်း ဘည်ယိူဝ်ႈဇာရ်။”
ဘည်ဒဲႈကော်င်ချှီး တကောန်ကညောမ်ဂဲ 15တပဲ့တော်အ်ုန်ဟည်ယိူဝ်း တိုအီးမံင်ခ္လကဲဒိူန်မာ် တောႇဟာဝ်းကောန်ကဲတစဝ်ဖြား ကနာည်နံင်ဒဲႈစဝ်ဖြားဒါတည်းအ်ုန် စီႇကောန်ကဲဒီန် ကဲစီထိင်ခြဲ ကနာည်နှာင်းအာဝ်ချှုက်စဝ်ဖြား။ 16မိုႈလိူည် စဝ်ဖြားစီတောႇကောန်ကညောမ်ကဲဒီန် “လီုင်းကောန်ကညောမ်ကဲ ဒေဲႈရောတ်တအော။ မည်ထိင်ခြဲကဲ။ ဆာဆနာတော်စဝ်ဖြားနီန် မိုႈကနာည်ကဲအီကနှေရ်တောပ် ကောန်ကညောမ်ကဲနီန်။ 17ဆာ်အောက္လာင်းခည်းခည်းတပဲ ဆာ်အယ်အာဝ်ရံပ်ခါမ် ဆာဆနာတော်စဝ်ဖြားနီန် ဘည်ကောန်ကညောမ်အူအီး ဘံန်မှောမာ် ပဲနံင်အာဝ်ဘိူန်းမလီပ်။” 18မိူဝ်ႈတိုအီးဒါင်း အီခြုမ် “မိူဝ်ႈရိူန်းခြီရ်ဘ္လံမ်းအူအီး ဟြာင်းက္လာင်းတစဝ်ဖြား ဆြာ၊ ကနာည်နံင်ဘိူန်း အဆာက်နိစ္စထာဝရနီန် ဆေအောနံင်လိုလာ်ရေဲန်?” 19စဝ်ဖြားစီဒါႈ “ဆေဘာည်းမည်းစီတောႇအောဒါႈ တိုအီးမျြံ တ်မှိူမ်? ဆဲႈဒါႇစဝ်ဖြား အာဝ်မိူဝ်ႈအီမှိူမ်အီမြျံတ်။ 20မည်းဟည်နံပ်ဟောည်ႇ ပညက်တော် တြားတော်။ အာဝ်ဘိူန်းလည်ကဝ်း ဘဝ်ရမာ။ အာဝ်ဘိူန်းပျံမ်တိုအီး။ အာဝ်ဘိူန်းဘြား။ အာဝ်ဘိူန်းခ္လံဝ်း။ လိုကူပ်ယောမ် တကူန်မာa။” 21တိုအီးကဝ်ဒီန်မာ်ဒါႈ “အောတောပ်ဒါ တြားတော်ကဲနီန် ပည်ဒိုႇဒိုည်ႇ အိုရ်ဆီုင်ခည်ဒဲႇအော။” 22ခိင်စဝ်ဖြားဟောည်ႇယိူဝ်းဒေတငါဝ်း ပ်ုန်ဟြာင်းလှေနီန် “ပ်ုန်လိုမည်းတရေဲန် လိုဘိုးအူနဲ။ ယံင်းဒိုည်ႇဂြိုခြီရ်ထာင်မိူဝ်ႈမည်း စီႎီရ်လှူဒဲႈ တတိုအီးဖ္လါန်းကဲ။ ဆာ်ရေဲန်ဘာည်းနီန် မည်းနံင်ဘိူန်း ဂြိုခြီရ် ပဆျှိုည်မျို့တော်။ ဟောည်ႇဒီန် ပဲန်တပဲ့တော် တောပ်ဒေဲႈရဘံန်းအော။” 23တိုအီးဒါင်းခြိူဝ်းမျိုးဇူးဒီန် ဂေါႇမိုႈအ်ုန်ခြုမ်မိူဝ်ႈဇာဝ်းရိူန်းခြီရ်ဂီုန်း ခိင်ယိူဝ်းအ်ုန်တတငါဝ်း ကြောႈစဝ်ဖြားဒီန် အ်ုန်ဘယ်နောႈလေဲဝ်နောႈလှဲဝ်ႏပွံတ်။
ကဝ်အီခြုမ် ကာည်း ဆာဆနာတော်စဝ်ဖြား 24စဝ်ဖြားဟောည်ႇယိူဝ်း ဘည်နောႈလူနောႈလေဲဝ်အ်ုန် စဝ်ဖြားစီဒါႈ “တိုအီးခြုမ်ကဲနီန် ကဲလီပ်ဒည်းခည်း ခေဲင်ဆာဆနာတော်စဝ်ဖြား။ 25ဒဲႈကလာအုက်အူတို လီပ်ခေဲင်ဟျာ့်ဘံင်လဲ့နီန် အ်ုန်ငှိူည်မှယ်ဒိုရ် ကနာည်နံင်လီပ် တာဆထေးအူအီး ခေဲင်ဆာဆနာတော်စဝ်ဖြား။” 26ကူန်ရဝ်မာဂါင် ကဲအီယိူဝ်းဒေတငါဝ်း ကြောႈစဝ်ဖြား ကဲစီဆမွံတ် “စဝ်ဖြားယေရှု၊ ဆာ်ဘာည်းဒီန် အဆေနံင်ကတူႈ ပ်ုန်ကဇောည်လာ့်။” 27စဝ်ဖြားစီဒါႈ “မိူဝ်ႈအူန်းပ်ုန်အာဝ်ဘယ်တရေဲန် တိုအီးကဲ။ မိုႈလိူည် အာဝ်မိူဝ်ႈမ ပ်ုန်အာဝ်ဘယ်တရေဲန် စဝ်ဖြား။” 28ခိင်ဒီန် ပေတရုစီဟြာင်းဒါႈ “စဝ်ဖြား၊ ယဲမိုႈဒိုည်ႇအီႎီုန်ဒေဲႈ တောန်မျိုးတောန်နဲ တောပ်ဒေဲႈရဘံန်းစဝ်ဖြား။” 29စဝ်ဖြားစီဒါႈ “ဆာ်အောက္လာင်းအခည်းတပဲ၊ အဆေႎီုန် ကောန်ႎါး၊ ကူန်မာ၊ ႎါႎည်၊ ပီး၊ ဂါင်ကဲနီန် ကနာည်ဆာဆနာတော် 30ဟောည်ႇဘိူန်း အကျိုးမှိူမ်ဇာတ်နီန် အနာဂါတ်ရဘံန်းဒီန်မာ် နံင်ဘိူန်းအဆာက်နိစ္စထာဝရနီန် နှဲန်ဆေချာယာ့်။” 31ဟောည်ႇဒီန် စဝ်ဖြားတောႇ သာဝကကဲ အူကိူရ်လေႈအာရ်အီးကဲဒီန် ရောတ်ရီမ်းအ်ုန် “တငါဝ်းမှိူမ်မှိူမ်။ ကဇေန်နီန် အယ်ဟည်ရောတ်ဒေဲႈ ဒေင်ဟာဝ်းကီုင်ဂျေရုဆလင်။ ထာင်ပ်ုန်ကိက်အူန်း အာရိယာတိုအီးမှိူမ်ဂဲ ကနာည်ကောန်စဝ်ဖြား နံင်ပဲန်နံင်မိုႈဒေဲႈ ကဆီုဝ်နီန်ယာ့်။ 32ကဲနံင်အာပ်အ်ုန် တတည်းကောန်ကုင်အီဟံရ်။ နံင်ဆဲ့။ နံင်လီလာနဘာည်း။ နံင်ကတူႈအီး ဘဲ့ဒါအိုမ်ဘဲ့။ 33ဟောည်ႇဒီန် ဆာ်ဟောည်ႇမဲႈ ကဲနံင်ပျံမ်ယံမ်း။ မိုႈလိူည် ဆာ်ရောတ်ဆငည်းအိုည် နံင်ႎီရ်အီမ်း မိူဝ်ႈထဲင်ဘိုးအဆာက်။” 34မိုႈလိူည် ဂေါႇမိုႈသာဝကကဲ ကတူႈချြံင်ထဲဝ် အိုမ်ကြောႈအဓိပ္ပာယ်ပ်ုန်ဒါႈ စဝ်ဖြား ဘည်မိုႈဘည်ဘာည်း အူလှေမာ် အာဝ်လှံန်မတနောႈကဲ။ 35ဟောည်ႇဒီန် ခိင်ဟာဝ်းရောတ် စဝ်ဖြားကာည်းတပဲ့တော်အ်ုန်ကဲ ရီမ်းကီုင်းဂျေရိခေါဒီန် မိူဝ်ႈတိုအီးငါည်အံပ်အူအီး အံက်မှာန်းရီမ်းပြောဒေင်။ 36ခိင်အ်ုန်ယိူဝ်းဒေတငါဝ်း ဟံမ်းခ္လေါႈဟာဝ်း ဖုင်တိုအီးကဲဒီန် အ်ုန်စီဆမွံတ် ဆေမိုႈပ်ုန်ဘာည်း။ 37တိုအီးမံင်ခ္လစီႎီရ်ပ္လါန်ဒါႈ စဝ်ဖြားယေရှု ခ္လေါႈဟာဝ်းကီုင်းနာဇရက်။ 38ခိင်ဒီန် အ်ုန်စီရျံင်ပြိုႈလာ်ဒါ “ကောန်ဒါဝိဒ် ယေရှု၊ မှာန်းမည်း ကေႎဒဲႈဘိူဝ်တအော။” 39ခိင်ဒီန် စဝ်ဖြားစီဇံင်း ဆူည်ႇတိုအီးမံင်ခ္လ ကနာည်နံင်ဟာဝ်းတောႇဒေဲႈအ်ုန်။ ခိင်ဒေဲႈရောတ်ကဲ တစဝ်ဖြား 40ခိင်ဒီန် ကဲအီဟာဝ်းတောပ် စဝ်ဖြားကဲဒီန် ကဲအေႈ ကနည်နံင်ဂေါည်ယေန်အ်ုန်။ မိုႈလိူည် ကဝ်အီငါည်အံပ်ဒီန် အ်ုန်စီပြိုႈရျံင်လာ်ဒါႈ “ကောန်ဟောခံမ်းဒါဝိဒ် ယေရှု၊ ကေႎဒဲႈစံမ်တအော။” 41စဝ်ဖြားစီဆမွံတ် “ဆေအောနံင်လိုရေဲန်ဒဲႈတမည်း” အ်ုန်စီဒါႈ “စဝ်ဖြားယေရှု၊ အော ဆိင်ဒဲႈငါည်အောပ္လါင်။” 42စဝ်ဖြားမာ် “ဒဲႈငါည်မည်းႎီရ်ပ္လါင်။ ဂေါႇပ်ုန်ညှူမ် ဟည်ႎီရ်ပ်ုန်ပဲန်ခေါခါႇမည်း။” 43စံမ်ငါည်အ်ုန်ဟောည်ႇယိူဝ်းပွံတ်အူစာ်န်း အ်ုန်တိူဝ်ႈကနေဲႈဖါ်ႈ ဂုင်တော်စဝ်ဖြား တောပ်ဟာဝ်းပွံတ်ရဘံန်း စဝ်ဖြားယေရှုယာ့်။ ကဲအီယိူဝ်းတိူရ်ႈ ဘည်မိုႈဘည်ဘာည်းလှေနီန်မာ် ကဲတိူဝ်ႈကနေဲႈဒိုည်ႇ ဂုင်တော်စဝ်ဖြားယာ့်။
നിലവിൽ തിരഞ്ഞെടുത്തിരിക്കുന്നു:
Luke 18: stpv-rv
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
This translation of the Shwe Palaung Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
