Maatoosa 26

Yesuusal tobbeeza

(Mar. 14:1-2; Luq. 22:1-2; Wan. 11:45-53)

1Yesuusa yha timirtta ubba wursseezaypp fa tamaaritayko, 2«Nam77ii gallasapp guye, Paaziqa Baale bonchchiza gallas maaqqizana yi eriza. Ye gallas As Na7ay mazqalel afa sotinttodayis as kushe aadhii inginttoda» yeegeeza.#Kes. 12:1

3Ye wode qeese halaqitaynnee gade cimitay, Qayyaafa giz qeese halaqay kara shiiqii, 4asii erekkazin Yesuusa aykkii, wodhodayis tobbeeza. 5Zin unttii, «Asay cabotaamay garkk gi, Paaziqa bonchchiza gallas yeya oothaamii» yeegeeza.

Yesuusana shitto tizheez asito

(Mar. 14:3-9; Wan. 12:1-8)

6Yesuusa Bitaana katama gancce borqqontto hargger yez Simoona kara yeza. 7Yesuusa muntttal yezin pettii astta albasxirosa bilggaaxe kunthi gaame al7o shitto ekkii yi7ii Yesuusa ommayil qoleeza.#Luq. 7:37 8Zin Yesuusa tamaaritay yeya bi7ii kacinttii, «Yha shitta cere iissizay abiso? 9Yha shittay al7o waagar bayizinttii, miishay manqqitayis ingginttodayis danda7inttizazin» yeegeeza.

10Yesuusa unttii geezana erii, unttiko, «Yha astto abis waaythe? Iza taasi lo77o baz ootheeza. 11Manqqitay ubba wode yinttar yezoda. Zin taanii yinttar ubba wode yezaamii.#Nam7i. 15:11 12Iza yha shitta taal afa qoleezay tana moogos giigiseeza. 13Taanii yinttis turo odiza; biitta ubbayil yha Wonggilay sabbakinttiza aqo abamaaqqikokka, asay izis qoppiso maaqqaday garkk odinttoda» yeegeeza.

Yihuda Yesuusana aathii immadayis giigintteeza

(Mar. 14:10-11; Luq. 22:3-6)

14Ye wode taphpho nam77ii Yesuusa tamaaritaypp pettay, Asiqorontto Yihuda ginttinttizay qeese halaqitayiko, 15yhanigii, «Taanii yinttis Yesuusa aathii inggiko, yi taasi ab immadee?» yeegii unttan oyceeza.#Nam7i. 11:12 Unttii tobbii hasttam bira#26:15 Bira santte: Akkokka guzhinttekka geeshshi bira guussii.#26:15 Hasttam bira santte: Hasttam bira santtife Isreele biitta aylle woonggitizanne bayizinttiza gatee. inggeeza. 16Yeypp guye, Yihuda Yesuusa aathii immadayis giiga gallas koyiza.

Yesuusa paaziqa kaho fa hawaaritayir meeza

(Mar. 14:12-21; Luq. 22:7-14, 21-23; Wan. 13:21-30)

17Boora Baale bonchchiza tiina gallas, Yesuusa tamaaritay eziko yi7ii, «Paaziqa bonchchiza gallas neenii maad katha nuunii aba makko?» yeegeeza.

18Yesuusa unttiko, «Katama yi gelodar helleez athayiko yhanigii, ‹Asitamaaray, taas wode helleez gisho ta tamaaritayir Paaziqa bonchchiza gallasa ne kara aathoda yeegeeza› goytta» geeza.

19E tamaaritay Yesuusa kiiteezay garkk udii, Paaziqa Baale gallas maad katha giigiseeza.

20Sa7ay omathodar Yesuusa taphpho nam77ii hawaaritayir katha maadayis betteeza. 21U maadar, Yesuusa unttiko, «Taanii yinttis turo odiza; yinttapp pettay tana aathii immada» yeegeeza.

22U iita dagamii, ommar ommar, «Godayyo, turo tanashsha?» gi eza oyceeza.

23Yesuusa mahii, «Fa kusha taar wolla fil7o gancce dakkizay E tana aathii immada.#Maz. 41:9 24As Na7ay, Xooss qaalayid ezis xaafintteezay garkk yhayqqoda. Zin As Na7a aathii inggiza atha ayye; ye athay yelinttekka atteezako ezisi lo77ozin» yeegeeza.

25Eza aathii immadayis yez Yihuda mahii, «Asitamaarayyo, ne gizay tanannee?» yeegeeza.

Yesuusa mahii, «Ne geezaygarkk» yeegeeza.

Goday kaho

(Mar. 14:22-26; Luq. 22:15-20; 1 Qor. 11:23-25)

26Unttii maadar, Yesuusa boora ekkii Xoossa galateeza. Ye boora baxxii fa tamaaritayis inggii, «Yhashittee, moytta, yhayi ta asho» yeegeeza.

27Xuu7a ekkii, Xoossa galateeza. Unttis inggii, «Ubbay yhaypp uzhoytta. 28Yhayi gaame asay nagaray atto inttinttoday garkk gogiz oroth ta caaqo suuthii.#Kes. 24:8; Erim. 31:31 29Zin taanii yinttis odiza; taanii ta Aday kaatetititha oroth woyne ushsh yinttar uzhod gallasa hellodayis yhannipp gede yha woyne ushsha uzhaamii» yeegeeza.

30Galata mazmuure yexxeezaypp guye Debre zayite ambal qitteeza.

Yesuusa Phixiroosa kaddodana tiinatii odeeza

(Mar. 14:27-31; Luq. 22:31-34; Wan. 13:36-38)

31Ye wode Yesuusa unttiko,

«‹Xoossay heenggizana shocoda

duritaykka laalinttoda›

ginttinttii Xooss qaalayid xaafintteezay garkk yhayino qamma yi ubbitay taal dhubinttoda.#Zak. 13:7 32Zin taanii yhayiqopp denddeezaypp guye yinttipp tiinatii Galila yhammada» yeegeeza.#Mat. 28:16

33Phixiroosa mahii, «Unttii ubbay nena ashshii dhabikokka, taanii nena ashshaamii» yeegeeza.

34Yesuusa Phixiroosako, «Taanii nees turo odiza; yhayino qamma shugula uukkodaypp tiina neenii tana hayidzii toke kaddoda» yeegeeza.

35Phixiroosa mahii, «Taanii neer wolla yhayiqopp attin nena yesha kaddamii» yeegeeza.

Yhankko e tamaarttay ubbitaykka yhay garkk geeza.

Yesuusa Geetesemaane giz aqo woosseeza

(Mar. 14:32-42; Luq. 22:39-46)

36Ezaypp guye, Yesuusa fa tamaaritayir Geetesemaane giz aqo yhanigii, unttiko, «Taanii sendayid yhanigii Xooss woossoda, yi yhaydda bettoytta» yeegeeza. 37Phixiroosannee Zabidoosa na7a nam7ita paar ekkii yhanigii azanonnee yilo aykkeeza. 38Maakka unttiko, «Taanii yhayqqod hellodayis azzaneeza. Yhaydda gam7oyttannee barkkii naagoytta» yeegeeza.

39Xiqqa tiinal yhanigii biittal fa sinayir xuggunii, «Ta adayyo, danda7inttiza baz maaqqiko yha meto xuu7ay taapp aadho. Zin ne shene hanopp attin ta shenay hanppe» yeegii Xoossa woosseeza.

40Yesuusa fa tamaaritayiko maaqqii yi7ii unttii gentteezin denggii, Phixiroosako, «yinttii pettii saatezakkonnee genttekkazar taar minggodayis danda7ekkasa? 41Paace gancce yi gelaamay garkk barkkii naagoyttannee Xoossa woossoytta. Ayyanay ingginttii yezin asho daabureeza» yeegeeza.

42Yesuusa ma nam7intho yhanigii woossii, «Ta adayyo, taanii yha meto xuu7aypp uzhekazin aadhodayis danda7inttoowa baz maaqqiko ne shenay hano» yeegii Xoossa woosseeza. 43Maakka maaqqii ye7odar e tamaaritay gentta gamin, woyi7eezin denggeeza.

44Maakka unttan ashshii yhanigii, tiina geez qaalato izo mahii hayidzintho woosseeza. 45Yeypp guye, fa tamaaritayiko yi7ii, «yhanno hellodayis genttallannee shemppol yenee? yikkee genttoytta. Yikkee, As Na7ay, nagara oothizittay kushe aadhii ingginttiza saatay helleeza. 46Denddii yedhdhoytta, tana aathii inggizay yhayishshee helleeza» yeegeeza.

Yesuusa morkkitay kushe ayikintteeza

(Mar. 14:43-50; Luq. 22:47-53; Wan. 18:3-12)

47Yesuusa haga yeya odinttodar, taphpho nam7i tamaaritaypp pettay, Yihuda ye7eeza. Qeese halaqitaynnee gade cimitay kiitteez gaame asay mashshannee gufe aykkeezittay ezar wolla ye7eeza. 48Yesuusa aathii inggiz Yihuda ye gaame asayiko, «Taanii yeerizay yi koyizay eza, eza aykkoytta» yeegii malla inggii gaddeeza.

49Ellisii Yesuusako shiiqii, «Asitamaarayyo, saro nees maaqqo» yeegii eza yeereeza.

50Yesuusa eziko, «Ta dabbayyo, neenii abis ye7eenee»#26:50 Ta laggayyo, neenii oothod bastto oothii ashshoba: woy hara birshshithay ta laggayyo, ne yhaydda abi oothee? yeegeeza.

Yeypp guye, shiiqii, fa kusha Yesuusal gaddii aykkeeza. 51Yesuusar yezitaypp pettay fa mashsha shoddii qeese halaqay aylla shocii, e haya gachchii oleeza. 52Zin Yesuusa, «Ne mashsha guye shookayid mahoba. Abis giiko, mashsha shoddiz ubbitay mashshar yhayqqoda. 53Ta, ta Adana woossizako gaame mukulo payidinttiz kiitanchchita dakkodayis danda7oowa baz neess aazinnee? 54Yeya maaqqiko, Xoossa qaalayid yhay garkk hanodayis beeziza ginttinttizay wayizii polinttode?» yeegeeza.

55Ye saatte, Yesuusa ye shiiqeez gaame woyayiko, «Tana paanno mahii aykkodayis mashshannee gufe aykkii ye7eenee? Taanii Xooss Keetha gallas gallas taamaristtar yinttar yez wode yi tana aykkibe7ekkaya.#Luq. 19:47; 21:37 56Zin yhay ubbay haneezay nabitay Xooss qaalayid xaafeezay polinttoday garkke» yeegeeza.

Ye wode e tamaaritay ubbitay eza ashshii qosintteeza.

Yesuusa pirdde Shanggo tiina Shiiqeeza

(Mar. 14:53-65; Luq. 22:54-55, 63-71; Wan. 18:13-14, 19-24)

57Yesuusa aykkeezitay qeese halaqa Qayyaafa eza kanggeeza. Ezayid higge asitamaaritaynnee biitta cimitay shiiqii yeza. 58Zin Phixiroosa qeese halaqay zabba hellodayis haakor eza kaalleeza. E wurssitha be7adayis zabba gelii naagiztayir betteeza.

59Qeese halaqitaynnee shiiqeez as ubbitay Yesuusa wodhodayis ezal afa worddo markka koyeeza. 60Gaamitay yi7ii ezal afa worddo markka markkatteeza, zin abikka denggekkaya. Guyepp nam77ii asay yi7ii, 61«Yha athay, ‹Taanii Xoossa Keeth laalii hayidzii gallasar mahii keexxodayis danda7iza› geeza» yeegeeza.#Wan. 2:19

62Qeesitay halaqay denddii eqqii Yesuusako, «yhayititay nena mootiza mootayis neenii mahizbaz baasa?» yeegeeza. 63Zin Yesuusa si77i atteeza. Maakka qeese halaqay, «Taanii nena de7o Xoossa sunthar aykkiza; neenii Xoossa Na7a Kiristtoosa maaqqiko nuus odoba» yeegeeza.

64Yesuusa mahii, «Yeya ne geeza. Zin taanii yinttis odiza; yhaypp guye, As Na7ay wolqqama Xoossa ushachch baggar betteezin, salo shaarar ye7odar yi be7ada» yeegeeza.#Daan. 7:13

65Ye wode qeese halaqay fa afila peedhii, «Yhaya bo7oytta Xooss cazheeza! Nuna hara markka ab koshshee? E yhatti cazheezana yi si7eeza.#Lewii. 24:15-16 66Yi qofay abba?» yeegeeza.

Unttikka, «Ezis yhayiqo beeziza» yeegii maheeza.

67Ye wode, u e sinayid cuttii zhultteeza, yhankkitay eza baqqii,#Isa. 50:6 68«Kiristtoosa! Nena shoceezay oonoo? An nuus tinbbite odoba» yeegeeza.

Phixiroosa Yesuusana kaddeeza

(Mar. 14:66-72; Luq. 22:56-62; Wan. 18:15-18, 25-27)

69Phixiroosa zabbayid betteezin, pettii gadhindata eziko yi7ii, «Neekka Galila Yesuusar wolla yeza baasa» yeegeeza.

70Zin E u ubbitay tiina ye gadhindatiko, «Ne giz bazay abizako ta erooya» yeegii kaddeeza.

71Ma yhanigii gase pengeko hellodar yhankkat eza bi7ii, ize yeza asayiko, «Yha athay Naazirete Yesuusar yeza» yeegeeza.

72Phixiroosakka nam7intho caaqqii, «Taanii ye aththa erooya!» yeegeeza.

73Xiqqa gam7odar, ize eqqeez asay Phixiroosako yi7ii, «Neekka turo unttar wolla yeza bay; neenii ne nashshayir erinttiza» yeegeeza.

74Yeypp guye, Phixiroosa, «Taanii ye atha erooya!» yeegii, fana baadithinnee caaqo aykkeeza.

Ye wode izir shugula uukkeeza. 75Yesuusa eziko, «Neenii shugula uukodaypp tiina tana hayidzii toke kaddoda» geezana Phixiroosas elqqi gin, bale kezii dukka suuthth yeekkeeza.

നിലവിൽ തിരഞ്ഞെടുത്തിരിക്കുന്നു:

Maatoosa 26: MeloNTL

ഹൈലൈറ്റ് ചെയ്യുക

പങ്ക് വെക്കു

പകർത്തുക