Maatoosa 24

Yesuusa Xooss keethay laalilinttodana tiinatii odeeza

(Mar. 13:1-2; Luq. 21:5-6)

1Yesuusa Xooss keethapp kezii yhammadar, e tamaaritay eziko yi7ii, Xooss Keeth gimba beezeeza. 2Yesuusa unttiko mahii, «Ee! Yhaya ubbita yi bi7inee? Taanii yinttis turo odiza; shuchchi shuchchal afa ginbbintteezay laalinttekkazar attaamii» yeegeeza.

Tiinas hanod bazita

(Mar. 13:3-13; Luq. 21:7-19)

3Yesuusa Debrezayte amball afa betteezin, e tamaaritay fa aaddas eziko yi7ii, «Yey ayide hanodazako nuus odoba. Ma ne yi7ithayssinnee wode wurssithayis mallay abba?» yeegii oyceeza.

4Yesuusa mahii, «Yinttan oonkka balthaam garkk naaginttoytta! 5Abis giiko, gaame asay ta sunthar, ‹Taanii Kiristtoosa› giittar ta sunthar yi7ii gaame as balithoda. 6Olannee ola baz nashshodar yi si7odayis yeza. Yey hanodayis beeziza gishos hirigipatte. Zin wurssithay haga. 7Woyay woyara, pettii kaatetithay hara kaatetithar olinttoda. Nayennee biitta eni7o gaame aqo hanoda. 8Yey ubbay yelo iqithi zooke ayithgarkke.

9«Ye wode asay yinttan metos aathii immada, wodhoda. Ta sunthay gishos asii ubbay yinttan ixxoda.#Mat. 10:22 10Ye wode gaamitay ammano ashshoda. Fa gancce pettay petta aathii immada, pettay petta ixxoda. 11Ma gaame worddo nabitay denddii gaamita ballithoda. 12Wucetithi ganggizay gishos gaame asayis siiqo irxxoda. 13Zin wurssith hellodayis garzhiza athay attoda.#Mat. 10:22 14As ubbas markka maaqqad garkk Xooss kaatetith Wonggilay biitta ubbayil sabbakinttoda. Yeypp guye, wurssithay ye7oda.

Bixa beeziz meto

(Mar. 13:14-23; Luq. 21:20-24)

15«Yey gishos, nabe Daalene odeez dhabisiza tuna ooso geesh aqo eqqeezana yi be7ada.#Nam7i. 9:27; 11:31; 12:11 Nabbabizay akaako! 16Ye wode Yihuda biittal yezitay ambal qosintto. 17Keeth kusittel yez athay fa kara yez baz ekkodayis wodhdhippe.#Luq. 17:31 18Gade oosol yezay fa afila ekkodayis guye maaqqippe. 19Ye aginayid wodeth maachitayisnnee ammisiza maachchitayis iita metto maaqqada. 20Yi qosinttay Barigor woy Maala gallas maaqqaam garkk Xoossa woossoytta. 21Abis giiko, sa7a medhintteezaypp yhayino hellodays hanekka baz, ma tiinassikka yesha hanaam meto ye wode hanoda.#Medhe. 12:1; Wan. Qon. 7:14 22Ye gallasitay payida haatisekkazako asho ma7eez oonkka attaamii. Zin E fa dooreez asay gishos ye gallasitay payida haatithoda.

23«Ye wode oonkka yinttan, ‹Yhayishshee, Kiristtoosa yhaydda› woy ‹Sendaydda yeza› yeegiko ammanppatte. 24Abis giiko, worddo Kiristtoositayirannee worddo nabitayira dendoda. Unttis danda7inttiko, hara attozin Xoossii dooreezitakka balithod hellodayis mallannee malabaz beezoda. 25Akaakoytta, taanii yinttis yhaya tiinatii odeeza.

26«Yey gishos, asay yinttiko, ‹Kiristtoosa liizho yeza› giiko, ize yhanigppatte, woy yinttiko, ‹Qol7a yeza› giiko, ammanippatte.#Luq. 17:23-24 27Abis giiko, zeelinthii salo zeellinggii, awa kessapp awa gelo hellodayis benttizaygarkk, Asii Na7a yi7ithay yhayigarkk hanoda.

28«Gawuxa yeza aqo ankko shiiqoda.#Luq. 17:37

29«Ye wode ye meto gallasitaypp guye,

elle awa dhumoda,

agina fa poo7o kayoda.#Isa. 13:10; Erim. 2:10

Xoolinttitay salopp wodhdhoda,

ma salo yez wolqqitaykka buqinttoda.

30Ye wode As Na7a mallay salol afa benttoda. Sa7a yez as ubbay yeekkoda. Ma As Na7ay, wolqqarannee gita bonchchor salo shaara ganccer ye7odar unttii be7ada.#Nam7i. 7:13; Zak. 12:10 31E fa kiitanchchita puggiza damma tulitular kiittoda. U sa7a oyddii zooze yhanigii, gaxapp gaxa hellodayis yez eesi doorintteezita shiishoda.

Goday ye7od gallasayis malla

(Mar. 13:28-31; Luq. 21:29-33)

32«Belese#24:32 Belese: Nu biitta beella fudhiko bone kezizaygarkke mithapp tamaaroytta. I xeeray ciizhiko hayitay aaco aykkiko bone ukkeezana yi eriza. 33Yey garkkekka, yi yha ubba be7adar As na7ay yi7iza woday peenggel yezana eroytta. 34Taanii yinttis turo odiza; yha ubba bazay polinttod hellodayis, yha yeletithay aadhamii. 35Salonnee sa7ay aadhoda, zin ta qaalay aadham.#Medhe. 6:5

Goday ye7od gallasana oonkka erooya

(Mar. 13:32-37; Luq. 17:26-30, 34-36)

36«Ye gallasatinnee ye saatatii bagga salo yez ta adaypp attin hara salo kiitanchchita maaqqin woy Na7a maaqqin oonkka erooya. 37As Na7a yi7ithay, Nohe wode haneezay garkk maaqqada.#Medhe. 6:5 38Ye agintte dhabo haathay ye7odaypp tiina Nohe markkabe gancce gelod hellodayis, asay miitarannee uzhittar, ekkittarannee gelttar gam7eeza. 39Dhabo haathay yi7ii, unttan ubba dhabisod hellodayis akaakekaya. As Na7a yi7ithaykka yhay garkk hanoda.

40«Ye wode nam77ii asay gade gancce oothoda. Unttapp pettay ekkinttoda, yhankkay attoda. 41Nam77ii maachchitay wolla gaaccoda. Unttapp pettat ekkinttoda yhankkat attoda.

42«Yikkee, yi Goday aba gallas ye7odazako eroowa gishos miinggii naagoytta. 43Zin kayzo qammapp aappun saatel ye7odazako kara aday erizako, fa kara bookinttamay garkk barkk naagodazin.#Luq. 12:39-40 44Yey garkk, As Na7ay yi qoppekka saate ye7od gishos yinttikka giiginttii yezoytta.

Iitannee lo77o aylle aaziso

(Luq. 12:41-48)

45«Yeezin, fa kara asayis katha beeziza woder immad garkk e goday dooreez ammanthizaynnee wozinaama ayllay oonoo? 46E fa goday azazeezana oothodar e goday yi7ii denggiza ayllay anjjintteezaya. 47Taanii yinttis turo odiza; goday ye aylla fabaz ubbayil afa shuumoda. 48Iita ayllay, ‹Ta goday gam7ii ye7oda› yeegii fa wozinar qoppii, 49fa ooso laggita yhadho aykkiko, mathizitayira miikonnee uzhiko, 50ye ayllay goday E qoppekka gallasnnee E erekka saater, 51yi7ii eza nam77ii kessii phalqqoda. E anjakka cubbittayir udoda. Ezayid eesi yeefonnee achch coonch maaqqada.

നിലവിൽ തിരഞ്ഞെടുത്തിരിക്കുന്നു:

Maatoosa 24: MeloNTL

ഹൈലൈറ്റ് ചെയ്യുക

പങ്ക് വെക്കു

പകർത്തുക