Байбихьи 46
46
Якъуб Мисриялде гочи
1ГӀизраил, кинабго жиндирго буголъиги данде бакӀарун, нухда вахъана. Беэр-Шеваялде щвараб мехалда, жиндирго эмен ИсхӀакъица иман лъурав Аллагьасе къурбанал гьаруна ГӀизраилица. 2Ва гьениб, къаси макьилъ илгьам лъугьун, Аллагьас гьесде ахӀана:
«Якъуб, Якъуб!» – ин.
«Гьале дун», – илан жаваб кьуна ГӀизраилица.
3Аллагьас абуна:
«Дун вуго Аллагь, дур инсуца иман лъурав Аллагь. Щибго хӀинкъичӀого, Мисриялде а. Доба Дица дудасан лъугьинабила кӀудияб халкъ. 4Дица кумек гьабила дуе Мисриялде бухьараб дур сапаралда, ва хадуб Дица бачина дур наслу добаса къватӀибеги. Юсупица жиндирго квералъ къанщизарила дур берал».
5Цинги, Беэр-Шеваги тун, Якъуб сапаралъ вахъана.
ПиргӀавнас кьурал чолгьаказда тӀад рекӀинарун рукӀана ГӀизраилил васаз эменги, лъималги, руччабиги. 6Цере къотӀун унел гӀи-боцӀул рехъабиги рукӀана, ва Ханааналда данде гьабураб жидерго буголъиги букӀана гьез цадахъ босун унеб. Гьедин, жиндирго тӀолабго наслугун цадахъ, Якъубица Мисриялде гьижра гьабуна: 7лъималгун, лъималазул лъималгун, жиндирго тӀолабго агьлу бачана гьес Мисриялде.
8Гьале Мисриялде гьижра гьабурал ГӀизраилил васазул цӀарал.
Якъуб ва гьесул васал
Якъубие тӀоцеве гьавурав Рувим. 9Рувимил васал: Енох, Палу, ХӀецрон ва Карми.
10Шимеонил васал:
Емуэл, Ямин, Огьад, Яхин, Цохар ва ханааниязулалъ гьавурав вас Шаул.
11Левийил васал:
Гершон, Кехат ва Мерари.
12Ягьудал васал:
Эр, Онан, Шела, Парец ва ЗерахӀ. Эрги Онанги хвана Ханааналда. Парецие гьаруна ХӀецронги Хамулги.
13Иссахарил васал:
Тола, Пува, Йов ва Шимрон.
14Зевулунил васал:
Серед, Элон ва Яхлиэл.
15Рувимги, Шимеонги, Левийги, Ягьудаги, Иссахарги, Зевулунги, гьезул яц Динаги ккола Якъубие Леяца Паддан-Арамалда гьарурал лъимал. Кинавниги, васалги ясалги рикӀкӀун, гьезул лъебералда лъабго чи вукӀана.
16Гадил васал:
Цефон, Хагги, Шуни, Эцбон, Эри, Ароди, Ариэли.
17Ашерил васал:
Имнагь, Йишвагь, Йишви ва Бериагь. Гьезул яц – СерахӀ. Бериагьил васал: Хевер ва Малкиэл.
18Гьеб буго Лаваница жиндирго яс Леяе гъаравашлъун кьун йикӀарай Зилпадасан Якъубие лъугьараб наслу – анцӀила анлъго чи.
19Якъубие Рахелица гьарурал васал:
Юсупги Буняминги.
20Он абураб шагьаралъул кашиш Поти-Ферил яс Асенатица Мисриялда Юсупие гьаруна Манассги Ефраимги.
21Буняминил васал:
Бела, Бехер, Ашбел, Гера, Нааман, Эхи, Рош, Мупим, Хупим ва Ард.
22Гьеб буго Рахелидасан Якъубие лъугьараб наслу – анцӀила ункъго чи.
23Данил вас: Хушим.
24Нафталил васал: Яхцеэл, Гуни, Ецер ва Шилем.
25Гьеб буго Лаваница жиндирго яс Рахелие гъаравашлъун кьун йикӀарай Билгьадасан Якъубие лъугьараб наслу – анкьго чи.
26Якъубида цадахъ Мисриялде рачӀана, нусал рикӀкӀинчӀого, гьесул наслуялъул лъабкъоялда анлъго чи. 27Мисриялда Юсупиеги гьарун рукӀана кӀигоял. Гьелги рикӀкӀун, Мисриялде гочараб Якъубил наслуялъул кинавниги вукӀана лъабкъоялда анцӀго чи.
28Якъубица Ягьуда Юсупихъе цеве витӀана, Гошеналде нух лъазабизе. Гьел Гошеналде щваралго, 29чолгьаказда чуялги ран, Юсупги гӀедегӀана Гошеналде жиндирго эмен ГӀизраилида дандчӀвазе. Эмен вихьидал, гьесда къвалги бан, гӀемераб мехалъ гӀодана гьев. 30Цинги ГӀизраилица Юсупида абуна:
– Гьанже, мун чӀаго дир беразда вихьараб мехалъ, хваниги ургъел гьечӀо дие, – ян.
31Юсупица жиндирго киналго вацаздаги ва тӀолабго инсул хъизан-агьлуялдаги абуна:
«Дун пиргӀавнасухъе инехъин вуго, дихъе Ханааналдаса вацалги кинабго дир инсул хъизан-агьлуги бачӀун бугин абизе – 32гьел гӀухьби ругин, гӀи хьихьулин гьез, гӀи-боцӀиги кинабго жидерго буголъиги цадахъ бачӀун бугин гьезин абизе.
33ПиргӀавнас жиндихъего ахӀараб мехалда, нужеда гьикъани сундуе махщел бугебилан, 34нужеца гьадин абе: „Ниж, дур лагъзал, нижерго умумул гӀадин, гьитӀинаб къоялдаса нахъего гӀухьби руго“. Гьебмехалда гьесги нуж Гошеналъул ракьалда тела: рихараб жолъун рикӀкӀунелъулха мисрияз гӀиявехьлъи».
നിലവിൽ തിരഞ്ഞെടുത്തിരിക്കുന്നു:
Байбихьи 46: АварАК
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© Институт перевода Библии, 2005-2023
