Байбихьи 40
40
Юсупица кӀиго туснахъасул макьаби къотӀи
1Цо заманалдасан Мисриялъул пачаясул кӀудияв чагъирчиясулги чед бежулев чиясулги жидерго пачаясда цебе такъсир ккана. 2ПиргӀавнасул кутакалда ццин бахъана гьел жиндирго хъулухъчагӀазда – чагъирчиясдаги чед бежулев чиясдаги. 3Ва гьес гьел жиндирго хъаравулзабазул бетӀерасул рокъоб бугеб туснахъалда тӀамуна. Гьенивго вукӀана Юсупги. 4Хъаравулзабазул бетӀерас Юсуп тӀамуна гьезие хъулухъ гьабулев чилъун ва гьедин унеб букӀана заман. 5Цо сордоялъ гьев кӀиявго туснахъасда – пачаясул чагъирчиясда ва пачаясул чед бежулев чиясда – макьаби рихьана. Щивасул макьуялъул жиндирго магӀнаги букӀана. 6Радал гьезда аскӀове вачӀараб мехалъ, гьел рахӀат хун пашманго ратана Юсупида.
7«Щай нуж пашманго ругел?» – ин гьикъана Юсупица. Юсупида цадахъ гьесул хважаинасул рокъор туснахъалда тӀамун ругел гьел пиргӀавнасул хъулухъчагӀаз 8жаваб кьуна:
«Нижеда макьаби рихьана, амма гьел къотӀизе чи гьанив гьечӀо», – ян.
Юсупица абуна:
«Макьу къотӀи Аллагьасдасан гурищ букӀунеб? Дида рице нужер макьаби», – ян.
9Цинги бетӀерав чагъирчияс бицана:
«Дида макьилъ бихьана цо цӀолбол гъабу. 10Гьелда букӀана лъабго чӀор. Гьел халалъун рачӀана, тӀегьана, цӀолбол хьопал рижана ва цӀибил барщана. 11Дир хъатикь букӀана пиргӀавнасе чагъир тӀолеб щурун. Дица цӀолбол хьопал тӀуна, гьел щурминире цӀцӀуна ва пиргӀавнасухъе кьуна».
12«Гьале гьеб макьуялъул магӀна, – ян абуна гьесда Юсупица. – Лъабго чӀор ккола лъабго къо. 13Лъабго къоялдасан пиргӀавнас мун нахъеги тӀадегӀан гьавила: дурго букӀараб ишалде тӀад вуссинавила ва, цебего гӀадин, нахъеги гьесул щурминибе чагъир тӀела ва гьеб гьесухъе кьела. 14Цо лъикӀлъи гьабе дие – талихӀалъ дуда къвал бараб къоялъ дунги ракӀалде щва. ПиргӀавнасулгун хабар ккараб бакӀалда дир рахъалъ кӀалъай гьабе ва гьаниса къватӀиве ворчӀизаве дун. 15Дун вуго жугьутӀазул ракьалдаса хъамурав чи! Туснахъалда тӀамизегӀанасеб квешлъи гьанибги гьабичӀо дица!»
16БетӀерав чед бежулев чиясда бихьана гьес макьу лъикӀалъе къотӀулеб букӀин ва гьес Юсупида абуна:
«Дидаги бихьана макьу: дир бетӀералда тӀад лъабго чӀеп букӀана. 17Бищун тӀаса бугеб чӀепалъуб букӀана пиргӀавнасе бежараб батӀи-батӀияб нигӀмат. Ва хӀанчӀи рукӀана дир ботӀрода лъураб гьеб чӀепалъусан кваналел».
18«Гьале гьеб макьуялъул магӀна, – ян абуна Юсупица гьесда. – Лъабго чӀеп ккола лъабго къо. 19Лъабго къоялдасан пиргӀавнас мунги „тӀаде ворхизавила“: хӀобода вала гьес мун ва дур черхги хӀанчӀаз тӀутӀун бала».
20Лъабго къоялдасан букӀана пиргӀавн гьавураб къо. Жиндирго хъулухъчагӀазе бертин-той гьабуна гьес ва, киназдаго цересан, бетӀерав чагъирчиги бетӀерав чед бежулев чиги туснахъалдаса къватӀире рачана. 21БетӀерав чагъирчи нахъеги жиндирго ишалде тӀамуна ва гьес цӀидасан, чогъролги цӀун, щурун пиргӀавнасухъе кьуна. 22БетӀерав чед бежулев чиясе хӀукму къотӀана ва гьев хӀобода вана. Кинабго ккана Юсупица макьу къотӀараб къагӀидаялъ.
23Амма бетӀерав чагъир тӀолев чиясда Юсупги гьесул гьариги ракӀалдецин щвечӀо, гьесда кӀочон тана гьеб.
നിലവിൽ തിരഞ്ഞെടുത്തിരിക്കുന്നു:
Байбихьи 40: АварАК
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© Институт перевода Библии, 2005-2023
