Байбихьи 38
38
Ягьудаги Тамарги
1Гьеб заманалда Ягьуда, вацалги тун, цогидаб бакӀалде ана гӀумру гьабизе ва Хира абун цӀар бугев Адуламалдаса цо чиясда аскӀов чӀана. 2Гьений гьесда йихьана ШуагӀ абурав цо ханааниясул яс, ва гьей ячана Ягьудаца жиндиего лъадилъун. 3Гьелъул ургьибе лъимер ккана ва гьелъие вас гьавуна; Ягьудаца гьесда цӀар ГӀер абун лъуна. 4Гьесул лъадуде нахъеги лъимер ккана, кӀиабилевги вас гьавуна ва гьесда цӀар Онан лъуна. 5Хадуб гьелъ цоги вас гьавуна ва гьесда цӀар Шела лъуна (гьеб ккана Кезивалда). 6Жиндирго кӀудияв вас ГӀерие Ягьудаца ячана Тамар абун цӀар бугей яс. 7Амма, ГӀерил квешаб гӀамал сабаблъун, БЕТӀЕРГЬАНАСДА рихана гьев ва БЕТӀЕРГЬАНАС гьесие гӀажал батана. 8Ягьудаца Онанида абуна:
«Вацасул йикӀарай чӀужу яче. Вацасул бакӀ ккве, гьесул наслу букӀине», – ян.
9Амма Онанида лъалаан Тамарица гьабураб лъимер жиндирлъун рикӀкӀунареблъи. Гьединлъидал гьелда аскӀов веганщинахъе жиндирго бачӀунеб мани гьес гӀодобе чвахизабулаан, вацасул цӀар чӀвазе ва гьесул наслулъун лъугьине лъимер гьабичӀого букӀине. 10Амма гьеб БЕТӀЕРГЬАНАСЕ бокьулареб иш гьабуралъухъ, гьесиеги БЕТӀЕРГЬАНАС гӀажал батана. 11Гьанже, кӀудиял васалго гӀадин, гьитӀинавги хвезе гурин хӀинкъарав Ягьудаца жиндирго нус Тамарида абуна:
«Дир вас Шела кӀудияв гӀезегӀан, дурго эбел-инсуда аскӀое ун, къороллъуда чӀа», – ян.
Гьедин Тамар жиндирго эбел-инсул рокъое нахъ юссана.
12Гьелдаса нахъе гӀемераб заман ана. Ягьудал лъади – ШуагӀил яс хвана. Гьелда хадур магӀил къоял ахиралде щведал, Ягьуда, Адуламалдаса жиндирго гьудул Хираги цадахъ вачун, Тимнаялде вилълъана жиндирго гӀи къунцӀизе.
13Вакьад Тимнаялде гӀи къунцӀизе унев вукӀин лъана Тамарида. 14Гьелъ къоролалъул ретӀел тӀаса бахъана ва, чадраялъ гьумерги бацун, Тимнаялде унеб нухда бугеб Енаим шагьаралъул кавудухъ гӀодой чӀана. (Гьелда бихьулеб букӀиндалха, Шела кӀудияв гӀун вугониги, гьесие жий ячуней гьечӀолъи.)
15Гьей йихьидал, Ягьудада ккана гьей хъахӀба йигилан, чадраялъ бахчун букӀиндал гьелъул гьумер. 16Гьев гьелда аскӀове вачӀана. Нухлул рагӀалда гӀодой чӀун йигей гьелда Ягьудаца абуна:
«Йилълъа дунгун егизе», – ян. Гьесда лъалеб букӀинчӀелъулха гьей жиндирго нус йигеблъи! Гьелъ гьикъана:
«Дунгун вегаралъухъ дуца дие щиб кьелеб?» – ин.
17«Дица дуе цо бурутӀ битӀила», – ян жаваб кьуна гьес.
«Гьеб битӀун бачӀинегӀан, гъоркьлъалие щибниги кьелебищ?» – ан абуна гьелъ.
18«Гъоркьлъалие щиб дуе бокьилеб?» – ан гьикъана Ягьудаца.
Гьелъ жаваб кьуна:
«Чалуялда бухьараб дур мугьруги, дуда кодоб бугеб гӀансаги кье», – ян.
Гьелъ абураб кьуна гьес гьелъие. Гьев гьелда аскӀов вегана, ва Тамарил ургьибе лъимер ккана.
19Хадуй гьей рокъое тӀадюссана ва, гьурмадаса чадраги нахъе рехун, нахъеги къоролалъул ретӀел ретӀана.
20Адуламалдаса дов жиндирго гьудул витӀана Ягьудаца гьелъие бурутӀги бачун, дол гъоркьлъалие лъурал жал нахъе росизе. Амма, кигӀан ялагьаниги, гьесда гьей ятичӀо. 21Гьеб бакӀалъул гӀадамазда цӀехолдизе лъугьана гьев:
«Енаималда нухда гӀодой чӀун йикӀарай хъахӀба кий йигей?» – абун.
«Доя гьединай гӀадан йикӀинчӀо», – ян жаваб кьуна гьез.
22ТӀадвуссун вачӀун, гьес Ягьудада абуна:
«Дида дой ятичӀо. Доб бакӀалъул гӀадамазги абуна доя хъахӀба йикӀинчӀилан».
23Ягьудаца абуна:
«Риччанте гьел жал долъухъго хутӀизе, нилъедаго тӀад гӀадамал релъанхъичӀого рукӀине. Дица ракӀбацӀцӀадго мун гьелъие бурутӀги бачун витӀана, духъайин абуни, гьей ялагьун бажаричӀо!»
24Лъабго моцӀгӀан заман индал, Ягьудахъе хабар бачӀана:
«Дур нус Тамарица зина гьабун рагӀула, лъимерги ккун буго гьелде».
«Шагьар тун къватӀиехунги ячун, цӀадуца юхӀе гьей», – ян абуна Ягьудаца.
25ЧӀвазе рокъоса къватӀие гьей ячине лъугьараб мехалда, Тамарица хабар битӀана вакьадасухъе:
«Гьале гьазул хважаинасдасан ккана диде лъимер. Валагьун вихье гьазухъ. Гьаб чалуялда бухьараб мугьруги гьаб гӀансаги лъил кколебали лъалищ дуда?»
26Ягьудада лъана гьел жиндир рукӀин. Гьебмехалъ гьес абуна:
«Гьей йитӀарай йиго, дун мекъи вуго. Гьеб кинабго ккана гьей дица дирго вас Шелае ячинчӀолъи сабаблъун».
ТӀокӀалъ гьелда аскӀов вегичӀо Ягьуда.
27Тамарица лъимер гьабизе мех щвана, кӀиго лъимер ккун батана гьелда. 28Лъимер гьабулеб заманалда, цо квер къватӀибе баккана. ЧӀарахъаналъ гьелда багӀараб чӀоло бухьана:
«Гьав цеве гьавуна», – янги абун.
29Амма гьеб лъимаца квер нахъбуссун жанибе босун ана ва гьесдаса цеве къватӀиве вачӀана гьесул вац.
«ВахӀ, кин дуца къватӀибе нух бахъараб!» – абун гӀажаиблъана чӀарахъан. Цинги гьеб лъимада цӀар лъуна Парец#38:29 Парец – гьаб цӀар релълъуна «къватӀиве ворчӀарав», ялъуни «нух (каратӀ) борлъарав» абураб магӀна бугел рагӀабазда.. 30Гьесда хадув гьавуна кверда багӀараб чӀоло бухьаравги. Гьесда цӀар лъуна ЗерахӀ#38:30 ЗерахӀ – кунчӀизе, гвангъизе. Гьаб цӀар релълъуна «багӀарккараб рогьалил гвангъи» абураб магӀна бугеб рагӀуда..
നിലവിൽ തിരഞ്ഞെടുത്തിരിക്കുന്നു:
Байбихьи 38: АварАК
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© Институт перевода Библии, 2005-2023
