Тархъанлъи 5
5
Мисриялда жугьутӀазе зулму цӀикӀкӀин
1Гьелдаса хадуб Мусаги Гьарунги рачӀана пиргӀавнасухъе, ва гьез абуна:
«ГӀизраилалъул БЕТӀЕРГЬАН Аллагьас гьадин абулеб буго: „Авлахъалда Дие байрам тӀобитӀизе букӀине, Дир халкъ биччанте“, – ян».
2ПиргӀавнас абуна:
«Дун Гьесухъ гӀенеккизе ва ГӀизраилал дица риччан тезе ккани, щив кколев БЕТӀЕРГЬАН? Дида БЕТӀЕРГЬАНГИ лъаларо, гӀизраилалги дица риччаларо», – ян.
3Гьез абуна:
«ЖугьутӀазул Аллагь рещтӀана нижехъе. Лъабго къоялъ ниж авлахъалде ине риччай; гьениб нижерго БЕТӀЕРГЬАН Аллагьасе къурбанал хъвезе ккола нижеца. Гурони, Гьес квешаб унти ялъуни рагъ биччан, жаза гьабила нижее».
4Мисриялъул пачаяс жаваб гьабуна:
«Мусаги Гьарунги, щиб къваригӀун нужеца халкъ хӀалтӀудаса буссинабулеб бугеб? Нужеда тӀад лъураб хӀалтӀи тӀубазабизе а!» – ян.
5ПиргӀавнас тӀадеги жубана:
«ГӀемерлъун бугеб куц бихьуларищ гьаб халкъ нижер ракьалда? Нужецайин абуни, гьезда хӀалтӀи рехун тезабулеб буго!»
6Гьебго къоялъ пиргӀавнас халкъалъул тӀадчагӀазе ва церехъабазе буюрухъ кьуна:
7«Гьезие тӀокӀалъ цебе гӀадин сумало кьоге саманалъул кирпичал гьаризе – биччанте гьез жалго ун балагьизе гьеб. 8Амма гьездаса тӀалаб гьабе букӀараб къадаралда саман къотӀи, гьелъул роцен гӀодобегӀан бачунге. ГӀураб хӀалтӀи гьечӀолъиялъ тасамахӀлъун руго гьел ва гьединлъидалин гаргадулелги ругел: „Риччанте ниж нижерго Аллагьасе къурбан хъвезе ине“, – ян. 9Гьезие хӀалтӀи бакӀлъизабе, хӀалтӀулел рукӀине, гьодорал харбазухъ гӀенеккун рукӀинчӀого!»
10ТӀадчагӀиги церехъабиги гьениса нахъе рилълъана ва халкъалда кӀалъана:
«ПиргӀавнас абулеб буго: „Дица тӀокӀалъ нужее сумало кьезе гьечӀо. 11Нужго ун, бокьаралъуса бахъун балагье гьеб. Амма къойил хӀалтӀул роцен гӀодобе бачине гьечӀо“, – ян».
12Ва тӀолабго Мисриялда биххун, сумалоялъул бакӀалда хӀалтӀизабизе хурзабахъа сум-гӀучӀ бакӀаризе лъугьана халкъ. 13ТӀадчагӀазги, гьезда тӀад зулму-хӀал гьабун, абулеб букӀана:
«Нужее сумало кьолеб заманалъ букӀараб гӀадаб къойил хӀалтӀул роцен тӀубазабе гьанжеги!» – ян.
14ПиргӀавнасул тӀадчагӀаз, жидецаго гӀизраилазда гьоркьоса рищун гьезда тӀад тарал церехъаби рухулел рукӀана ва гьезда кӀалгьикъулеб букӀана:
«Щай нужеца сонги жакъаги цебеккун къотӀулеб букӀараб гӀадаб роценалда саман къотӀичӀеб?» – инги абун.
15ГӀизраилазул церехъаби пиргӀавнасухъе гӀарзгун рачӀана:
«Щай гьадинаб зулму-хӀал гьабулеб бугеб дуца дурго лагъзадерида тӀад? 16Нижее, дур лагъзадерие, сумало кьолеб гьечӀо, амма саман къотӀи тӀалаб гьабулеб буго! Гьеб гуребги, дур тӀадчагӀаз ниж рухулелги руго! ХӀакъ чӀола дур халкъалда тӀад».
17ПиргӀавнас абуна:
«ХӀалтӀизе кӀвахӀаллъунин нуж ругел! Нуж руго чамгӀалал чагӀи! Гьеле гьединлъидалин нужеца абулеб бугеб: „Риччанте ниж авлахъалде ине БЕТӀЕРГЬАНАСЕ къурбанал тӀоритӀизе“, – ян.
18ХӀалтӀизе а! Нужее сумало кьезе гьечӀо, амма бихьизабураб къадаралда саман нужеца къотӀизе буго!»
19«Бихьизабураб къадаралдаса цо саман тӀаса камизе биччаге щибаб къоялъ», – ин абулеб рагӀидал, гӀизраилазул церехъабазда бичӀчӀана жал балагьалъукье ккараблъи. 20ПиргӀавнасухъа къватӀире рачӀунелъул, гьезухъ ралагьун чӀун рукӀарал Мусаги Гьарунги рихьана гьезда, 21ва гьез абуна:
«БЕТӀЕРГЬАНАСДА бихьаги нужеца гьабун тараб ва Гьесго жазаги гьабеги нужее! Нуж сабаблъун ниж тӀуран рихана пиргӀавнасдаги гьесул гӀага-божараздаги, ва ниж чӀвазе нус лъуна нужеца гьезул хъатиниб!»
Аллагьас эркен гьаризе рагӀи кьей
22Гьебмехалъ Муса БЕТӀЕРГЬАНАСДЕ гьардана, ва гьес абуна:
«Я БетӀергьан, щай Дуца гьаб халкъалде тӀаде гьаб балагь бачараб? Щай Дуца дун гьаниве витӀарав? 23Дур цӀаралдасан кӀалъазе дун пиргӀавнасухъе аралдаса нахъе гьес халкъалъе гӀазаб-гӀакъуба тӀадеги цӀикӀкӀинабуна, амма Дуца килищцин шуризабичӀо Дурго халкъ хвасар гьабиялъе!»
നിലവിൽ തിരഞ്ഞെടുത്തിരിക്കുന്നു:
Тархъанлъи 5: АварАК
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© Институт перевода Библии, 2005-2023
