Mak 16
16
Ia Jisas e mauri visu soha
(Matiu 28:1-10; Luk 24:1-12; Jon 20:1-10)
1Mi bukena te kode na Sabat, koi Meri na vangana ni Magdala, mi koi Meri na tinana ia Jemes, ma ia Salome, ara dia mara volia na oela te sisihini talana vati ni savulaa tana kokorana ia Jisas. 2Mi tana mohomoho tana Sade, tahuna te tuturiha dato mai na aso, mara dia loera tana baba tara livua ira ia Jisas. 3Tana tahu vata tara diadia loera, mara vaigesuahi mara kori vahai de, “?E vahai vei, isei te ke sangalohita na kelu salihia na makara leho tana matana baba nia?” 4Mi tana tahu tara chau loera tana matana baba nia, mara morosia na makara leho tara livu utusia ira tana matana baba nia, tara kelu nohaa ira. 5Mara sahe dia loera lalona baba nia, mara morosia chikai na mane borau, te tohotuu levu tabana tana madoa, me sahelia na kaleko daho te sere solehana. Mara matahu solehana loera. 6Me valagu ia na mane borau nia, me kori vahai vaniloera de, “Kamu mui lohamu na matahu. Inau u hanaa lohamu amu mai na daiana ia Jisas ni Nasaret tara pohaa tana kros. Ma ia e teha na toha ide, matengana e mauri visu noha. !Kamu haea ba na malengana tara livua ira nimu ide! 7Mi lohamu kamu visu ma kamu saurongo vania ia Pita mi ira hana duli nira ia. Ma kamu kori vahai vanira de, ‘Ia Jisas e dia uluhi vanihamu i Galili. Mi tana vera nia ngeni ba kamu morosi lakaa ia, vahai te kori vanihamu kode noha.’”
8Mara mai salihi loera tana baba nia, mara choho matengana ara tugaleta mara matahu mara hahariri solehana. Mara teha laka loera na koria siki omea vani lakaa siki tinoni, matengana ara matahu solehana.
Ia Jisas e laba lenga vania koi Meri na vangana i Magdala#16:9 Kesana na kopi tuali tatana ia Mak ara teha tamania na ves 9-20.
9Tahuna te mauri visu ia Jisas tana mohomoho putiputi tana Sade, me laba lenga uluhi vania koi Meri, na vangana ni Magdala. Na daki de, ia nomu na daki te tu ia Jisas me huru chonia e vitu na tarunga sekoseko tatana. 10Ma koi Meri e dia me koria na saurongo de vanira hana duli nira ia Jisas. Mi tana tahu nia ara toha bamu tana sasahavi mara orasia ia. 11Mi tahuna tara valingea ira koi Meri te morosia ia Jisas te mauri visu soha, mara teha ira na donua.
Ia Jisas e laba lenga vanikoera ruka hana duli
(Luk 24:13-35)
12Mi bukena, me laba lenga laka ia Jisas vanikoera ruka hana duli tana sala tahuna tara ko basiaa na vera leho i Jerusalem. Mi tana tahu tara ko morosi uluhia koera ia Jisas, mara ko teha na morosi vagoa ia, matengana na hihilona ia te moro tovosi. 13Mara ko visu mai koera, mara ko kori lengaa ia na saurongo nia vanira kesana hana duli nira ia Jisas, mara teha lakamu ira na dodonu tatakodira koera nia.
Ia Jisas e laba lenga vanira sangavulu chikai hana duli
(Matiu 28:16-20; Luk 24:36-49; Jon 20:19-23; Aposol 1:6-8)
14Tana bukena ia, me laba lenga tovosi ia Jisas tatadira ia na sangavulu chikai hana duli nira ia, tana tahu tara hahani ira. Ma ia Jisas e valagu susuliha vanira matengana e teha suliha nidira dodonu ira, me ngachi vahai na makara na vungadira. Ia e kori vahai nia matengana ara teha ira na donura ira na tinoni tara morosia te mauri visu ia. 15Me kori vahai vanira de, “Kamu dia tana visa meana tana pari de, ma kamu kori lengaa na saurongo talana vanira visa na tinoni kode. 16Misei te ke donua na saurongo talana me ke lesotabu, ia ba ke tamania na mamauri sali. Misei te ke teha na dodonu, ia God ngeni ba ke pedea me ke ni mate. 17Mi ira tara dodonu, ngeni ba kara tamania na susuliha vati ni agosi koemana. Mi ngeni ba kara hanaa na huru tarunga sekoseko tana asagu nau, mi ngeni ba kara valagu tana valagu vahai tara teha vata ira na sasania. 18Me tina vahai kara taria ira na poli nira, teha ma kara inuvia na inu te ke kidoa siki tinoni, mi ngeni ba ke utu ke sekolira. Mi ngeni ba kara livu limadira tatadira na tinoni ocheoche, mi ira ngeni ba kara talana soha.”
Ia God e taha datoa ia Jisas i heven
(Luk 24:50-53; Aposol 1:9-11)
19Bukena te kode na Taovia ia Jisas na valagu kolura hana duli nira, ma ia God e taha datoa ia i heven, me tohotuu tana madoana ia. 20Mi ira hana duli nira ia Jisas ara dia mara kori lengaa na Saurongo Talana vanira na tinonina visa na vera, ma na Taovia e sangara, kara ni hanaa ira na agosira danga na koemana tana nina susuliha ia. Me tihisi lengaa ia na nidira saurongo ira e tutuni.
നിലവിൽ തിരഞ്ഞെടുത്തിരിക്കുന്നു:
Mak 16: mln
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2024 (active), Wycliffe Bible Translators, Inc. All rights reserved
