Rúut 4
4
Buñuuho Rúut bugo mꞌBoos
1Ñeer Boos najow bu mꞌmúnogenum ésuk yaayu nalako to. Nan amaañen aahu han Boos alob mee moola ammee newuj, Boos nawoogool. Narogool : « Anne, újool ulako taahe ! » Amaañen aahu nasoŋ min alako to. 2Boos náwoogul unafaan guñen bugara dó nꞌésuk yaayu, narogiil : « Jilako taahe. » Ngulako to. 3Narok an aahu han gubaji mee nꞌElimelek : « Uñoñow mara Naomi abaañulobaañ mꞌmof mara Mowab. Umu nfunoomen barager bara atiolaal Elimelek. 4Yo ecil mee nirok nilobi min uŋar bo fácil unafaan bugara ésugolaal nꞌgammee taahe. Eéni ucamencamen, nunoom barager baabu. Eéni may ucamenut, nulobom. Mara púr to aw, ínje. Aw ommee átiyaara, ínje niroobi to. » Násuupool arogool : « Injé be eŋar. » 5Boos narogool : « Eéni uŋar barager baabu nꞌNaomi, aw be eyab Rúut amowabiit aahu, akoña atiolaal hacet mee mbil gajow atiolaal gon to, nkaan waaf woola. » 6Atiool narogool : « Eéni mo, íjuhut iŋar fuyuhoum faafu mara ísebisebi jambil fubajom fukajen. Ñeer uŋar gaŋarom mara ínje mat íjuh. »
7(No mꞌmúkaaniinaay Isiraayel, éeni bugan gúruba gujamoor mara funoom mba butit, acee mꞌbugo bu gápuren gasamato'ool asen aahu be eliik mara nasonsoŋ.) 8Ñeer amaañen aahu narok Boos : « Ikahenikahen bulago. Uŋar. » Ñeer nápuren gasamataool asenool. 9Boos narok unafaan bugara ésuk yaayu nꞌgalako to mee : « Jaat buguul úseedo mara iŋaŋar nꞌguñen Naomi wan Elimelek acil mee peepe wammee gaŋar guleehool Maalon nꞌKiliyon, 10ban nitun Rúut amowabiit aahu hara Maalon hacet mee. Mo fubajool bu galako dó nꞌfiilool, gajaool mat gunim ban bugara ésuk yaayu mat gumojenool. Jaat buguul úseedo. »
11Unafaan bugara ésuk yaayu nꞌgalako to mee ngurogool : « Eem, núseedoseedo. Mbil Acehériit mee akaan min akoña aahu anogen dó nꞌyaŋi, nanogoor naŋ Raseel bugo nꞌLeya gan úmir mee bugo gúruba gubaj mee bugara Isirayeel. Mbil ukaan an háamak dó nꞌgayooŋ gara Afúrata, gajai ngujamo mꞌmof mara Beteleem. 12Mimbil Acehériit mee aseni nꞌakoña aahu guleeh gamemmeeŋ, mo fiili bu ganogoor naŋ fara Peres ammee aleeh Suda bugo nꞌTamar. »
Rúut nabaj aleeh
13Ñeer Boos nayab Rúut. Ngunap, Acehériit mee nakaan min aŋar búteb nabaj aleeh amaañen. 14Ukoña bugara Beteleem ngurok Naomi : « Usalaal Acehériit mee mara jaat asenisen aleeh habili gacookoor. Mbil ajamo dáare nꞌIsirayeel 15nakaani núfillo, nacookoori mꞌbafalleneri. Asáabuli akoloi guleeh gumaañen goono futok nꞌgúruba mara nacamenicamen, nabajuli aleeh amaañen. » 16Ñeer Naomi nateb aleeh aahu akohen mꞌbágangool. Ho abilool gabaagen. 17Ucinoorool ngurok : « Naomi ababaj aleeh amaañen, alaal be erogool Obed. » Obed abaj mee Jesee min Jesee abaj Dawit.
18Waawe ujow wara sipay Dawit gufaan kábiriŋ mꞌPeres : Peres abaj mee Heseron. 19Heseron nabaj Raam. Raam nabaj Aminadab. 20Aminadab nabaj Naason. Naason nabaj Salaman. 21Salaman nabaj Boos. Boos nabaj Obed. 22Obed nabaj Jesee, min Jesee abaj Dawit.
നിലവിൽ തിരഞ്ഞെടുത്തിരിക്കുന്നു:
Rúut 4: gsl
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2023 (Active), Wycliffe Bible Translators, Inc. All rights reserved.