Rúut 2
2
Búrehoor Rúut bugo mꞌBoos
1Tooge araaŋ Naomi, anool umu dó nꞌésuk yaayu gurogool Boos, an háamak ban asaanum. 2Funak fucee, Rúut amowabiit aahu narok asomool Naomi : « Icamencamen ejow nꞌurager waawu, ban guyim mee gufaak min ífalanken, nicee nibaj galiten. Bare mꞌbarager ban ara bo abil mee esoŋ nakahenom ninogen. » Naomi narogool : « Asáabulom ujow. » 3Ñeer Rúut najow anogen mꞌbarager nalagen uyima waawu mꞌbúsol min aan gáfalanken. Nabaj harije naloh mꞌbarager bara Boos hara fiil fara Elimelek.
4Piyout, Boos nátiiŋul min ápurulo Beteleem nalob nꞌuyima waawu arogiil : « Mbil Acehériit mee áani mꞌbuguul. » Ngúsuupool : « Mbil Acehériit mee ásoonieni. » 5Boos nasonken anafaan uyima waawu arogool : « Akoña aahu uma ay hoom ? » 6Anafaan uyima waawu násuupool arogool : « Akoña aahu amowabiit. Bugo nꞌNaomi gúpurulo mꞌmof mara Mowab. 7Arogandok ikahool min áfalanken búsol uyima waawu. Bo nammee kábiriŋ bújom bu maareer ban áyolenut piyo. »
8Ñeer Boos narok Rúut : « Añúm, úyentenom jak. Jambil ujow bu gáfalanken mꞌbarager bara acee. Ulako taahe min ulalenoor nꞌújagagaom ukoña. 9Uñeer ban umaañen waawu gommee neyim, nulagen ukoña waawu ban gommee ngahomen uliten waawu. Ujágagaom umaañen, ífireniifiren gakaaleni. Eéni marem mujogi, nujow urem dó nꞌgúpalaŋ gan gumoj mee. » 10Rúut nayah gújuul, násit, narok Boos : « Waa ucile nuwalenom jak mee ban búyegehi mbon nꞌínje ammee ajawoora ? » 11Boos násuupool arogool : « Gugaanangaan min ujogoor mee asomi kábiriŋ nan araaŋi acehe. Ukahulokat paayi bugo nꞌjaayi son mof man ubaji mee min újool bu galako mꞌbugan gan umusut úmir. 12Mbil Acehériit mee acaami wan ukaan mee peepe. Mimbil Atúuha ara Isirayeel han ujaalo mee umeeyo, apooyi. » 13Rúut násuupool arogool : « Anafaanom, búyegehi buseset nꞌínje. Elobi ekankaan min búyegehom bubeb haani min ilet mee ájagagai. »
14Nan gommee nejow bu fúcaho, Boos narok Rúut : « Ujóol núcahoaal. Uŋar gasaat gara fúmbuur nuyah go dó mꞌbasohen baabu. » Ñeer Rúut nájool alako to nꞌújagaga waawu. Boos nasenool múcahoaay masowisow. Nácaho jaram apooñ, nabaŋ waŋaño mee. 15Rúut nayuho nabaañ bu gáfalanken. Boos narok újagagaool : « Jikahool min alagenuul mꞌbúsol nafor wammee netuhoor sikok saasu ban jambil an arotoorool. 16Njípuren uliten ucee dó nꞌsikok saasu jibaŋ nꞌetaam min afor. Jambil an alobool furim. » 17Ñeer Rúut nafor uliten waawu mꞌbarager bara Boos káŋ bu gárusa, nahomen wan afor mee abaŋ tin tanur min ajos wo jaram apuusen fulaacen fara bakager.
18Rúut nátebul fulaacenool min abaañ bu bo nꞌésuk yaayu, naliik asomool Naomi wan áfalankenulo mee. Nasenool wan aŋañenulo mee ácaho. 19Ñeer Naomi narogool : « Béy nuforulo mee mee jaat bajoser be ? Mꞌbarager bara ay nújagage ? An aahu han búyegehool buset mee nꞌaw, mbil Acehériit mee ásoonienool. » Rúut násuupool arogool : « Mꞌbarager bara amaañen acee níjagage, gurogool Boos. » 20Ñeer Naomi narok ásaabulool : « Acehériit mee aliige mujagool garoŋ mee nꞌgacet mee. Mbil ásoonien an aahu. » Nabenen to arogool : « Boos kum anom bújooŋoor. Umu dó mꞌbugan gaagu gan nja gujogooróli mee. » 21Rúut amowabiit aahu nabenen arok : « Boos arogandok nak ijow búsol uyimaool nífalanken káŋ jaram eyim efaago. » 22Naomi narok ásaabulool : « Añúm, jajak. Ujok liŋ nak ulagen uyima Boos. Eéni ujow bu mꞌbarager bara acee, gújuhe gukaani gúnuur. » 23Ñeer Rúut nak alagen uyima Boos náfalanken káŋ jaram eyim yara ors yaayu son may eyim ebule yaayu efaago. Naroŋ mbucin bugo nꞌasomool.
നിലവിൽ തിരഞ്ഞെടുത്തിരിക്കുന്നു:
Rúut 2: gsl
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2023 (Active), Wycliffe Bible Translators, Inc. All rights reserved.