Maruk 2
2
Yéesu násonten an abafobafo
(Máca 9.1-8 ; Lúk 5.17-26)
1Gom bo gunak, Yéesu nábaañul bu Kaparanaum. Bugan gaagu gujanjam mara umu síndo, 2ngújool gayooŋ guhomenoor dó jaram gurehut, káŋ bu to nꞌgápeegum gaagu. Yéesu nalako egaaniil Furim Fásuum mee. 3Ñeer umaañen gubaagiir ngútebul an abafoe bu to nu ho. 4Ngújuhut mee gútiiŋ tan ammee mara mumeeŋ bugan gaagu, ngúkabul bumillum bara yaŋ yaayu jooŋoor tan Yéesu ayiho mee. Nguwalenúl to buyaaju baabu dan habafo mee ammee nafiihoe. 5Nan Yéesu añow mee gáyineniil, narok an aahu habafo mee : « Añúm, ubajut ñeer síjunube. »
6Upájula fuyuhoum Atúuha galako to mee nak gurok dó nꞌúyegehiil : 7« Amaañen aahu umu buu nájuhe alob mee ? Dáaru gajel bu nꞌAtúuha ! Ay ájuhe abonket síjunube, éeni let Atúuha noonool ? » 8Yéesu námir mee wan nꞌúyegehiil, narogiil to bújooŋoor : « Waa ucile njipinoor mee ? 9Jigaanom para : erok umu habafo mee “Ubajut ñeer síjunube”, son erogool “Uyiho, uŋar buyaajui nujow”, waa urege bayili ? 10Bare waaf wanur nicamene jímir : Aleeh An nayayab baabe nꞌdúniya sembe nꞌAtúuha sara gabonket síjunube bugan. » Narok an aahu habafo mee : 11« Irogi, uyiho nuŋar buyaajui noot bu síndoi. » 12Ñeer to bayaas, an aahu habafo mee nayiho, naŋar buyaajuool nápur fácil bugan gaagu peepe. Ngujaahali máamak ngon nesal Atúuha nak gurok : « Umusutaal uñowaal waaf naŋ waawu. »
Yéesu nawook Léwi mbil áani alagenaool
(Máca 9.9-13 ; Lúk 5.27-32)
13Púr to, Yéesu nabaañ ajow bu bo nꞌgabereberef gara fal fara Gálile. Gayooŋ gaagu peepe ngújool gutoogool bo min alako galiigeniil. 14Ñeer nan newuj, nañow acee amaañen gajaool Léwi, aleeh Alife alako tan nja ayab mee lémpo yaayu. Yéesu narogool : « Ulagenom ! » Léwi nayihoúl alagenool.
15Púr to, Yéesu nan fúcaho nꞌyaŋ Léwi, uyaba lémpo mꞌbugaagu gan bakaaneriil bujagériit mee ngújool gúcaho'oor nu ho nꞌulagenaool. Bugan naŋ ubugu, gameeŋe gon son ngalagen Yéesu. 16Ñeer úpajula fuyuhoum Atúuha bugara Efarisiit yaayu, nan guñowool mee nfúcaho bugo mꞌbugan gaagu ubugu, ngurok ulagenaool : « Waa ucile nan nfúcaho'oor nꞌuyaba lémpo bu mꞌbugan gan bakaaneriil bujagériit mee ró ? » 17Yéesu najam mee baloberiil, narogiil : « An ájujuh dit aŋes ásontena ; an ájuheriit nja aŋes ásontena. Mo may nijaaloot mee be ewook bugan gajogooro mee gútilintiliŋ, bare ukaana síjunube nijaalo ewook. »
Yéesu nápajul mara balat
(Máca 9.14-17 ; Lúk 5.33-39)
18Funak fucee, ulagena Saŋ Bátiis bugo nꞌEfarisiit yaayu ngon mbalat. Bugan gucee ngújool gurok Yéesu : « Waa ucile ulagena Saŋ Bátiis nꞌEfarisiit yaayu nak gulat min bugiiya dit gulat ? » 19Yéesu narogiil : « Mee pére bugan gan guwooge bu nꞌgakuuh#2.19 Gakuuh : yo yommee gagaan gara emaaño. gújuhe gulat ara emaaño yaayu to mꞌbugo ? Eéni afanjoorut mꞌbugo, mat gújuh gulat. 20Bare funak fucee be étiiŋ nan ara emaaño yaayu abil mee gákoosuli mꞌbugo, no ngubil mee balat.
21An mat aŋar gatek gara épiis ewuugul napoŋ gañ gacecet. Eéni akaan mee, gatek gawuugul gaagu bu gatuutul bapoŋer bara gañ gaagu min ñeer épongen yaayu ereg neruuke. 22An mat aror may bunuk buwuugul nꞌsituen sifaan afaak natoj so. Eéni atoj so, so bu gafumo min ñeer mat abaj etuen, mat abaj bunuk. Koloe eror bunuk buwuugul baabu nꞌsituen siwuugul. »
Yéesu nalob mara funak fara fulako
(Máca 12.1-8 ; Lúk 6.1-5)
23Yéesu nꞌulagenaool ngon nejow gusaat urager wara ebule nꞌfunak fara fulako, ulagenaool nak gumul ufalama. 24Ñeer Efarisiit ngújool gurok Yéesu : « Apa uñeer ! Waa ucile ulagenai ngon nekaan waaf wáfireni nꞌfunak fara fulako ? » 25Narogiil : « Buguul jimusut jikaraŋ wan áyiih aahu Dawid akaan mee funak fucee nan bacaar bujogool mee, ho nꞌgupaalool babajut múcahoaay ? 26Ganaay nan Abiataar aameen mee anafaan úsimena waawu, Dawid anogenogen kum nꞌyaŋ Atúuha, náŋarul fúmbuur fan gújii mee Atúuha atiñ bugo nꞌgupaalool. Ban fúmbuur faafu úsimena déhooro gújuhe gutiñ fo. » 27Yéesu nabenen arogiil : « Fulako fukaanikaan bu nꞌan, bare let an akaani bu nu fo. 28Yo ecil mee Aleeh An ho ammee anafaan hara fulako. »
നിലവിൽ തിരഞ്ഞെടുത്തിരിക്കുന്നു:
Maruk 2: gsl
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2023 (Active), Wycliffe Bible Translators, Inc. All rights reserved.
