Fúcihum 29
29
Sakob narehoor nꞌRaseel
1Púr to, Sakob najok dó mꞌbulago'ool ajollen bu ban bunak búpureul mee. 2Bu funak fucee, naŋanden ekoloŋ nꞌgataama gaagu tan nja guremen mee sikooreiil. Natook to sikoore sífaajiir sara sísaaja son sijaameen min sifiihoe. Elánkiin yáamak egubene butum ekoloŋ yaayu. 3Nan nja sikoore saasu síling mee, ngufaren élankiin yaayu min guremen so gufaak, ngubaañen yo guguben.
4Sakob nasonken umaha waawu arogiil : « Gutiom, béy njípurulo ? » Ngúsuupool gurogool : « Haran núpurulo. » 5Narogiil : « Jímimir Laban aleeh Nahoor ? » Ngúsuupool gurogool : « Eem, úmiroomir. » 6Narogiil : « Buu nakaane ? » Ngúsuupool gurogool : « Umu bo nꞌgásuumaay. Aleehool akoña han gurege mee Raseel umue néjool son ekooreool. » 7Sakob narogiil benen : « Bunak burondoŋ bu gahomen sikoore saasu. Jiremen so jifaak, njibaañ bu gamat. » 8Ngúsuupool gurogool : « Ujúhut ufaren élankiin yaguben mee butum ekoloŋ yaayu sikoore saasu bálingut. Elí be enaak so nsíling peh nufaren yo min újuh uremen so. » 9Nan Sakob ammee nelob mꞌbugo, Raseel no nátiiŋulo mee son ekoore paayool mara ho may amaha. 10Sakob nan añow mee Raseel aleeh akoña hara maamaayool Laban, son sísaaja saasu nꞌsijaameen saasu, nacik min afaren élankiin yaguben mee butum ekoloŋ yaayu min aremen ekoore maamaayool. 11Sakob nsúumool jaram agaab Raseel nahuu. 12Narok Raseel : « Injé mꞌpaayi ubajibaj, jaayom Rebeka. » Raseel natey agaan paayool. 13Nan Laban ajam mee mara Sakob ammee aleeh áliinool ajaalojow, natey ngurehoor, nagaabool, naŋarool bu yaŋool. Ngútiiŋ, Sakob narante bulago'ool. 14Laban narogool : « Aw maregen fúsimom. » Sakob nacin nꞌyaŋ Laban butum fujenna.
Sakob nayab ukoña
15Funak fucee Laban narok Sakob : « Aw anom, let yo yommee aw bu gújagagom emontoŋ. Ulobom bacaami. » 16Tooge Laban guleehool gukoña goono gúruba. Anafaan aahu gurogool Leya min áriita aahu gurogool Raseel. 17Leya bañeererool búgallogallo min Raseel ejanjaŋ, uñeerool mat upooñool. 18Sakob nacamen Raseel. Narok Laban : « Injé bu gújagagi símit futok nꞌsíruba min usenom aleehi áriita Raseel iyab. » 19Laban násuupool arogool : « Isonsoŋ. Esenool aw ekoloe esenool acee. Ulako taahe síndo'om. » 20Sakob nalako símit futok nꞌsíruba ngújagak Laban mimbil ájuh ayab Raseel. Bare símit saasu nsinogoorool naŋ gunak gupinaay mara gacamen Raseel.
21Ñeer Sakob narok Laban : « Símit san ukahoora mee sítintiiŋ. Usenom akoñaom iyab. » 22Laban nahomen bugan bugara ésuk yaayu, nakaan gagaan gáamak. 23Bare nan tinak tijon mee, Laban nátinen aleehool Leya asen Sakob min guŋot nu fuk faafu. 24Laban naŋar amiigeelool akoña han gurege mee Silipa asen aleehool Leya min akaan ájagagaool.
25Nan tinak tikahen mee, Sakob nañow mara taŋ bugo nꞌLeya nguŋohe ! Sakob narok Laban : « Taŋ buu nukaanaam mee mee ? Let mara eyab Raseel ecile min íjagak bu nꞌaw ? Waa ucile nubantenom ? » 26Laban násuupool arogool : « Múkaaniinaayoli musoŋut aleeh áriita buñuuho akat to atiool anafaan. 27Ñeer ufaak élabati yara gagaan ge, niseni Raseel min ubaañ újagak nꞌínje símit futok nꞌsíruba benen. » 28Sakob nasoŋ, nafaak élabati yaayu bugo nꞌLeya. Ñeer Laban nasenool aleehool Raseel ayab. 29Naŋar may amiigeelool Biliha asen aleehool Raseel min akaan ájagagaool. 30Sakob nanap may nꞌRaseel, nacamenool reg Leya. Naroŋ gújagak bu nꞌLaban benen símit futok nꞌsíruba.
Gabugoor Sakob
31Nan Acehériit mee añow mee mara Leya gukaanutool dó naŋ Raseel, nasen Leya gabugoor min Raseel ájuhut sah afaret. 32Leya naŋar búteb nabaj aleeh amaañen narogool Ruben (yo yommee : Jiñoñow, aleeh amaañen). Narok : « Acehériit mee ápurenampuren nꞌñisuu ; maareer araaŋom bu gacamenom. » 33Leya nabaañ aŋar búteb nabaj aleeh amaañen árubahen min arok : « Héeya, Acehériit mee nan ajam mee mara gucamenutom, nasenom aleeh acee amaañen. » Narogool Simeyoŋ (yo yommee : ajanjam). 34Nabaañ bandiŋ aŋar búteb nabaj aleeh amaañen. Narok : « Maareer araaŋom be ejogom mara ibajoobaj guleeh gumaañen goono gúfaajiir. » Sakob narok aleeh aahu Léwi (yo yommee : ejok). 35Nabaañ bandiŋ benen aŋar búteb nabaj aleeh amaañen abaaligen min arok : « Ñaañe isasal Acehériit mee. » Narok aleeh aahu Suda (yo yommee : esal). Ñeer nayihen gabugoor.
നിലവിൽ തിരഞ്ഞെടുത്തിരിക്കുന്നു:
Fúcihum 29: gsl
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2023 (Active), Wycliffe Bible Translators, Inc. All rights reserved.
