Fúcihum 27
27
Sakob nabanten paayool min áruwaool
1Isaak nan áfaanul mee, gúcilool ngujok jaram ñeer añowériit. Funak fucee nawook aleehool amaañen átiyaara : « Esawu ! » Nátuulool : « Oóo ! Nuroge ? » 2Narogool : « Uñoñow ifallenfallen máamak ban ímirut funak fara ecehom. 3Uŋar fúkangai son elaaceni yara silaŋen min ujow bu futaŋaat uyimulom énunkureŋ. 4Nuñulom yo súum naŋ min icamen mee, nutebulom yo itogoñ ifaak níruwai bala icet. » 5Tootook min Rebeka akohe nan gáyenteniil.
Ñeer nan Esawu ápur mee ajow bu futaŋaat fuyimulool énunkureŋ yaayu, 6Rebeka narok aleehool Sakob : « Ijanjam paayi nelob bugo nꞌati'i Esawu. 7Arogoorok ajow amugulool énunkureŋ nꞌfutaaŋaat nañulool yo súum natogoñ yo afaak, náciin Acehériit mee min ásoonienool bala acet. 8Ñeer úyentenom jak min ukaan wan emmee néjool be elobi. 9Ujow bu nꞌekoore yaayu nuŋarulom dó ubarak úruba wara ejaameen wajajak min iñul wo paayi súum, naŋ min nja acamen mee. 10Nuteb usen paayi atogoñ min áruwai bala acet. »
11Sakob násuup jaaool arogool : « Umímir atiom Esawu afalefalet, ínje ifalehut. 12Eéni paayom amamayenom, ho be émir arok ínje gabantenool. Mat áruwaom, ho bu garankaom. » 13Jaaool nalobool hank arogool : « Injé ibaji, danka yaayu ñeer mbil ejok ínje ! Uyéntenom déhooro, nujow uŋarulom ubarak waawu. »
14Ñeer Sakob najow áŋarul wo asen jaaool, nañul wo súum naŋ min nja paayool acamen mee. 15Rebeka naŋar wañ wareg mee bajak wara aleehool átiyaara Esawu wan dó mee nꞌyaŋ yaayu, asen aleehool ásola Sakob akaano. 16Naŋar ubaŋ wara ubarak waawu aguben guñen Sakob son ekondoorool yakuur mee, 17afaak nasenool eluu yaayu yan añul mee súum son fúmbuur.
18Sakob najow bu dó mꞌpaayool narogool : « Paam ! » Isaak nátuulool : « Oóo ! Aw ay nꞌguleehom ? » 19Sakob násuupool arogool : « Injé Esawu, aleehi átiyaara. Ikankaan wan urogaam mee. Ñeer uyuho nutogoñ wan ibajulo mee nꞌfuyim faafu ufaak, núruwaom. » 20Isaak narogool : « Bare mo nuraŋenulo yo ! » Násuupool arogool : « Acehériit mee Atúuhai abaŋ yo mꞌbulago'om. » 21Isaak narok Sakob : « Ucigulom nimamayeni min ímir teer maregen aw ommee aleehom Esawu. » 22Ñeer Sakob nacik paayool Isaak. Isaak namamayenool narok : « Furim faafu fara Sakob, bare guñen gaagu gara Esawu. » 23Guñen Sakob ngufalet mee naŋ gara atiool Esawu, Isaak afaasutool, nasoŋ bu gáruwaool. 24Isaak nabaañ asonkenool : « Maregen aw aleehom Esawu ? » Sakob násuupool arogool : « Eem, ínje Esawu. » 25Isaak narogool : « Ugabulom eluu yaayu itogoñ mimbil íruwai. » Sakob nagabool eluu yaayu atogoñ. Naŋarulool may bunuk arem. 26Ñeer Isaak narogool : « Ucigulom nugaabom ! » 27Nacigulool nagaabool. Isaak najam gatiiŋ gara wañool náruwaool arok :
« Gatiiŋ ge, gara aleehom. Gunogoonogoor naŋ gatiiŋ gara ekunko yan Acehériit mee ásooniene.
28Emít ekaan Atúuha abehuli gamon,
nakaan may etaami nenog
min múcahoaayi mumeeŋ son bunuk !
29Mbil fiilóofiil nfusoŋi,
min giil gaagu peepe guyahi gújuul.
Nóoni anafaan guti'i
min guleeh jaai guyahi gújuul !
Atúuha adanka gabili mee gadanka,
násoonien gabili mee gáruwa. »
30Nan Isaak afaak mee gáruwa Sakob, Sakob nápurul. Apúrulopur dó mꞌpaayool déhooro, Esawu nábaañul nꞌfuyim fan ajow mee. 31Ho may nañul yo súum, natebúl asen paayool min arogool : « Paam, uyuho, nulako jak min utogoñ eluu yaayu yan iŋaruli mee ufaak, ñeer núruwaom. » 32Isaak narogool : « Aw ay hoom ? » Narogool : « Injé Esawu, aleehi átiyaara. » 33Isaak najaahali jaram atelen narok : « Taŋ ñeer ay amugulaam mee énunkureŋ natebúl asenom itogoñ bala útiiŋul ? Ho níruwa mee ban éruwa yaayu uyu nu ho. »
34Ñeer Esawu nan ajam mee balober paayool, nakooret nayah sikaaw sáamak. Náciin paayool arogool : « Paam, úruwaom may ! » 35Isaak násuupool arogool : « Ati'i kum ajaalo abantenom taahe min ayab éruwa yaayu yan ibileeni mee esen. » 36Esawu narok : « Naŋaŋar gajow gara Sakob jak (abantena) mara abantenambanten ñoono ñáruba. Nabohambot funafaanet, jaat bandiŋ nabaañ abohom éruwa. » Nabenen arogool : « Uŋañenut éruwa ecee bu nꞌínje ? » 37Isaak násuupool arogool : « Irúwaooruwa mimbil áani anafaani ban gutiool peepe bu gáani újagagaool. Ho be ebaj múcahoaay son bunuk. Iŋañenut ecee bu nꞌaw. » 38Esawu najok to liŋ nꞌelobool : « Erúwa yanur déhooro nubaje ? Paam, úruwaom may ! » Ajúhut ajok mufuool, nayah sikaaw. 39Paayool narogool : «
Tanootan nucine, etaam yaayu mat enog,
ubiloot eñow gamon galoheúl mee nꞌémit.
40Aw be éroŋum mꞌbákundui,
ban noon ájagaga ati'i.
Bare nan ubiloot mee esoŋool, aw be epak nꞌfumiigeelehi.#27.40 Gucee ngúlowul gurok : Galilioori guñum mee ecil nupak nꞌgunuur gan abili mee ekaan. »
Sakob natey bu Haran bo nꞌLaban
41Ñeer Esawu nabaŋ Sakob funamben mara éruwa yan ayab mee mꞌpaayool. Esawu narok dó mꞌbúyegehool : « Nan paayom abil mee ecet, ínje be emuk atiom Sakob. »
42Rebeka nan gugaanool mee gapinoor gara aleehool átiyaara Esawu, naboñ guwoogulool Sakob min arogool : « Ati'i Esawu gapinoorool bu galugen, ho be emugi. 43Maareer úyentenom jak ! Utey bu Haran bo nꞌáliinom Laban. 44Nucin bo jaram fiiñ ati'i fuyoom, 45nulako bo jaram amojen wan ukaanool mee. No ñeer ínje be eboñ guŋaruli mara icamenut jipagom funak fanur márubauul. »
46Ñeer Rebeka najow arok Isaak : « Buroŋom bútaañitaañi mara búkaanum úsaabulom ehiitiit yaayu gammee ukoña Esawu. Eéni Sakob bandiŋ ayab akoña hara mof me, hanogoore nꞌukoña Esawu, nicet ñeer kolo. »
നിലവിൽ തിരഞ്ഞെടുത്തിരിക്കുന്നു:
Fúcihum 27: gsl
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2023 (Active), Wycliffe Bible Translators, Inc. All rights reserved.
