गलाती 4

मसीह मेहे परमेश्वरोओ स्वतंत्र सुउ

1आय ओ कोहो का वारिस जाहा जाआ पोरयो होय ताहा जाआ आखी वास्तु तो मालक होय तेबी तियामेहे अने दासो मेहे कीबी भेद नाहा. 2पोन बाह्हाआ ठर्विलो टायमो पोअजा तियाहा किबी कारभारी अने मास्तराआ होपित रोलो ओते. 3तेहलूज आमाहा पण जांहा पोऱ्यो ओते तेहलाम जगामेरया पालील्यो सिकाइलोकोता होपित ओतगोयु दास बोन्यो ओते. 4पोन जाहा काळा पुरो ओवयू तियाअ परमेश्वराने आपाआ पोऱ्याहा मोक्ल्यीत जो बुई त्यापोरोत जन्मूला अने नियमशास्त्राआ होपित उत्पन्न ओवयू, 5म्हणजे नियमशास्त्राआ होपित होय तियाहा वेसातो घेऊन वासाडीत अने आमाहा वारस उविला हक्क मिळूहुजोवे ओ उद्देश ओतु. 6अने तुमु जे पुत्र होय त्यापोत परमेश्वराने पोऱ्याआ आत्माहा जोओ ओबा, अने ओ ओबा एहलो कोत आवाज देत्लू. 7त्यापोत तू ओमे सेवक नाहा पण पोऱ्या होय अने जांहा पोऱ्या ओवयू ताहा परमेश्वरोओ त्यापोरत वारस पण ओवयू.

कलीसिया कोअता पौलुस चिंता

8पहीले तुमामे परमेश्वरोओ ओळखत नाहाओती कोईत तुमु तियाआ दास ओते जो स्वभावो वाही ईश्वर नाहा, 9पोन ओमे ज्या परमेश्वरोओ ओलखीत लेधलो होय एवडोज नाहा ताहा परमेश्वराने पण तुमामे ओलखीत लेधलो ताहा तियाअ निर्बल अने बेन कामोओ पाल्या शिक्षाआ गोठीरी काहा फिरीवलो जीई तुमु फासी दास बोनहू इच्छितात? 10तुमु दिह्याहा, मोहिनाहा, नेमल्या मेहे टामो अने वोरोहो मानतेहे. 11आय तुमाआ विषयाम बित्लू का एहलो उवूंहू नाहा का जी मेहनतो आय तुमा कोअता कोअयी होय ती व्यर्थ ठराविलो. 12ऐ पाही आय तुमामे विनंती कोअत्लू का तुमु माआ सारखो बन्यो; काहाके आय पण तुमा होस ओत गोल्यो होय; तुमु माआ किबी बिघडावीत्लो नाहा 13पोन तुमामे मालुम होय का पहिलुच आयुज डीलोओ निर्बल त्यावाईहि तुमामे सुवार्ता आप्यी. 14अने तुमु माआ शारीरिक स्थितीला जी तुमाआ परीक्षाए काहाके ठर्विल्यो तुमु तुच्छ होमज्ये नाहा; अने धिक्कार पण कोअयु नाहा अने परमेश्वरोओ नाहा ताहा स्वर्गदूत स्वतः येशु ख्रिस्तासारखे माहु ग्रहण कोल्यु. 15ताहा तो तुमाआ आनंद कोअला का गोये? आय तुमाआ साक्ष होय का शक्य उवे ओते ताहा तुमाआ डोउ पण माहु काढीत आप्यू ओतलू. 16ताहा की खोरो कोल्यावाही आय तुमाआ दुश्मन होय के? 17ते तुमामे हेगांति बनाडूहु मागतले खोरो पण हाजा उद्देशाने नाहा पण तुमामे अलग कोइला कोअता ओ कोईत होय का तुमु तियाहा हेगांति बोणाडीत ल्या. 18पोन ओओबी हाजो होय का हाजा गोठीमेहे सदा हरेक टेमे हेगांति बनविलो प्रयत्न कोअला जोवे नाहा ताहा जांहा आय तुमाआरी रोतलू तोयोज कोअनारू. 19ऐ माआ पोऱ्या जोपोरोत तुमामे ख्रिस्ताचे रूप बोनावोओ नाहा तोपोरोत आय तुमा कोअता फासी प्रसुती वेदना होसे तारास खेटेहे. 20इच्छा ताहा एहली ओते का ओमे तुमापोओ आविलो दिहराआ प्रकाराने गोगू काहाके तुमा बारामे आय उलझन पडिलो होय.

बेन वाचा-सारा अने हाजिरा

21तुमु जे नियमशास्त्राआ होपित ओवुहू इच्छितात ताहा माहु कोआ की तुमु नीयमशास्त्राचे होमलित नाहा? 22ओ लेखिलो होय का अब्राहम सी बेन पोऱ्ये उवे; एक दासी त्यापोरोत अने दिहरु स्वतंत्र बुई त्यापोरोत. 23पोन जो दासिही देखू ओवयू तो डीलो रीतीवाही जन्मला होय अने जो हाजो बुई त्यापोरोत जन्मूला तो प्रतिज्ञा प्रमाने. 24आव गोठी माय दाखलू होय आव बोई म्हणजे बेन करार होय एक ताहा सीनै डोगों जीही सेवक उत्पन्न ओये अने ती हागार होय. 25अने हागार जेहेकाय अरबाची सीनै डोगो होय अने आधुनिक यरुशालेमा सारखी होय काहाके ती आपाआ पोर्यआरी दासत्व मेहे होय. 26पण उसेरोत यरुशलेम हाजो होय अने ती आमाआं याह्ही होय. 27काहाके खिलो होय पोऱ्ये उवनारा कायनाहां बाय आनंद को, “ज्या ताहु प्रसूती तारास उवनारा नाहा, एखटो खलिते जयजय को, काहाके टाकीत देदिलो पोऱ्ये माटी ओतल्या बोहीही पोऱ्यापोरोत खूप होय” 28ऐ पाही, आमाहा इसहाक सारखे प्रतिज्ञा पोऱ्ये होय. 29अने जेहलो त्या टायमोहो शरीरा प्रमाणे जन्म उवलू आत्मा परत जन्म लेदलों छळ कोईत ओते तेहलूज ओमे पण उवनारा होय. 30पोन पवित्रशास्त्र काहा कोयु होय? दासी अने तिया पोऱ्याहा काढीत आप काहाके दासीचा पोऱ्या हाजो बुई च्या पोऱ्या आरी वारस उवे नाहा. 31ताहा पाही, आपु दासीइ पोऱ्ये नाहा ताहा स्वतंत्र बुई तियाआ पोऱ्ये होये.

നിലവിൽ തിരഞ്ഞെടുത്തിരിക്കുന്നു:

गलाती 4: NOINT

ഹൈലൈറ്റ് ചെയ്യുക

പകർത്തുക

താരതമ്യം

പങ്ക് വെക്കു