Zaŋ 5
5
Yezu eetsik dhiiti mot ɛbɛ́ nyel nazesɔɔb ɔ
1Bhii tak, ye nabɛ ɛ́ nɛ dhiiti ɛbyoŋ ɛ eYuda. Tin, Yezu ɛ́ boobyet tɔ́ pɛ Yeluzalɛm. 2Pɛ Yeluzalɛm, é ngwoob ɛbɛ nadi edjóoaa «Eniel Bhata» ɛ, ye nabɛ ɛ́ nɛ dhiiti boo tok ɛgwyiia nadi edjóoaa tɔ lii ebhele, Bhetɛsdha ɛ. É di tak, ye nabɛ ɛ́ nɛ bɔɔ mɛbhaaz mɛtɛn. 3-4Tɔ mɛbhaaz mɛ tak, ye nabɛ ɛ́ nɛ bɛtɛ nɛ membel mendjaamesi. Bot ɛ mɛbɛ́ mɛ tak nabɛ ɛ́, bot ɛ edhim, bɛ na edjam, bot ɛ mɛnyel nazesɔɔb bɛ ɔ#5.3-4 Tɔ dhiiti Ekwyala, yɛ ɛ́ nɛ mɛkpa mak: Bɛ nadi ebwood ɛ́, mɛdii dheegel. Etɛɛ náá, ye nabebɛ ɛ́ nɛ fofop ɛ Ghɛŋ ngɔt nadidi esul tin étɛp ɛzɛdhedheeg mɛdii. Tin, mot ɛbɛ́ aaleeghaaga tɔ tok ɛsok nɛ bɛsɔ, mɛdii dinaa edheegel ɔ, mot tak ɛpetsak, ye nakoozodi yak kwaambi ɛbɛ́.. 5É di'enek, ye nabɛ ɛ́ nɛ dhiiti mot nabɔya nɛ ɛbɛ́ membu mɛkam-mɛlɛl nɛ membu mɛtɛn nɛ elɛl (38) ɔ. 6Dáa Yezu nabee nyɛ ndjaasi ɛ, nɛ dáa nyɛ nagu náá, nyɛ eeloozebɔya nɛ ɛbɛ́ ɛ tak ɛ, nyɛ ɛ́ boozɛdji nyɛ náá: «Wɔ ɛpekwyɛl ɛtsak é?» 7Tin, mot ɛbɛ́ ɛlɛnɔk eezɛbɔɔza nɛ nɛ náá: «Ghɛŋ, mɛ tok nɛ mot ghɛɛg mɛ tɔ boo tok ɛgwyiia, é ghɛŋ mɛdii aadheegel ɛ. Esok djas mɛ di esaa náá, mɛ tɔ́ kɛghaaga ɛ, ye dyeebabela ɛ́ mot sis eezeghaaga ɛsok nɛ nam.» 8É di'enek, Yezu eezɛke nɛ nɛ náá: «Wyɛla, nɔŋa mwaala yɔ, da wɔ ɛ́ kɛ!» 9É di'enek, mot yenɔk eezɛtsak. Nyɛ eezɛghɛɛ mwaala yɛ, nyɛ moo ekɛ.
Tin, etɛp binek nasael ɛ́ dwoo saba. 10Bhii tak, ekukuma eYuda eezɛke nɛ mot natsikaa ɔ náá: «Wɔ ààgoka nɛ ɛghɛɛ mwaala yɔ mos. Etɛɛ náá, mos ɛ́ dwoo saba.» 11Nyɛ eezɛbɔɔza nɛ nɔɔ náá: «Mot tsik mɛ ɔ, lɛɛ nɛ nam ɛ́ náá: “Ghɛɛa mwaala yɔ, da wɔ ɛ́ kɛ!”» 12Bɛ eezɛdji nyɛ náá: «Yenɔk ɛ́ nwyaa mot lɛɛ wɔ náá: “Ghɛɛa mwaala yɔ, da wɔ ɛ́ kɛ”?» 13Tin, mot natsikaa ɔ nabɛ ààgwyak mot natsik nyɛ ɔ. Etɛɛ náá, ye nabɛ ɛ́, Yezu naazesyela tɔ ɛdhuu bot ɛ nadi é di'enek ɔ.
14Ba mɛwala bhii tak, Yezu eezɛboma nɛ nɛ tɔ kok Ndjaa-ebuwa. Nyɛ eezɛke nɛ nɛ náá: «Beea! Wɔ eezetsak. Sa wɔ ààbaasa mesyem ekaab náá, dhiiti mbee sonok ɛzɛkɛbaabela wɔ.» 15Tin, mot yenɔk eezɛtɔ́, wɔ gwaa nyɛ kɛlɛɛ nɛ ekukuma eYuda náá, yɛ ɛ́ Yezu ɛ natsik nyɛ. 16Yɛ ɛ́ étɛp tak ɛ ekukuma eYuda nadi esaa dáa bɛ sa étɛp bɛ neetiig Yezu. Bɛ nakwyɛl ɛsa deenek ɛ́ etɛɛ náá, Yezu natsik mot yenɔk ɛ dwoo saba. 17Deenek, Yezu eezɛbɔɔza nɛ nɔɔ náá: «Mɛlu djas, Saagam ɛpesa mɛsa, dɔɔ nɛ mam pe, mɛ ɛpesa mɛsa.» 18Kɔ ɛsu ɛ etɛp binek, ekukuma eYuda nadi esaa dáa sa étɛp bɛ neegó nyɛ. Bɛ nadi esa deenek ɛ́ etɛɛ náá, Yezu nabɛ ɛ́ ààdi eduwal dwoo saba, nyɛ baadi eke ɛ́ náá, Zɛɛb ɛ́ Sɛɛg met. Yɛ ɛ́ deenek ɛ́ nyɛ nadi egek náá, nyɛ tyee wat nɛ Zɛɛb.
Zɛɛb eedjɛ Mɔn eghɛŋ bɛ
19Yezu eezɛlii nɛ nɔɔ náá: «Tsɛɛtsɛ nɛ tsɛɛtsɛ mɛ lɛɛ bin ɛ́ etɛp e tsɛɛtsɛ náá: Mɔn tok nɛ ghwyil ɛsa dhiiti sonok nɛ ɛkwosak ɛ lɛ. Nyɛ dyeebabee ɛ́ mɛsa mɛ Sɛɛg di ezyɛ nɛ sa sok ɛ. Sa Sɛɛg di esa ɛ, Mɔn pe nɛ sa yɛ. 20Bela náá, Sɛɛg nɛ kwyɛl Mɔn. Tin, nyɛ ɛ́ boodi elyaal nyɛ esesɛɛ djas nyɛ di esa ɛ. Tin, nyɛ waalyaal nyɛ eboo esonok dhaa yii bi di bee'aak, étɛp bi needjoka ɛbuɛpe. 21Etɛɛ náá, Sɛɛg nɛ gomal bot tɔ ɛsyee, da djɛ bɛ tsik. Yɛ ɛ́ deenek ɛ́ Mɔn'ɛ pe nɛ djɛ tsik nɛ mot nyɛ di ekwyɛl ɔ. 22Sɛɛg ààpɛ́ɛ bot, tin, nyɛ naadjɛ Mɔn eghɛŋ e ɛpɛ́ɛ ɛ bot. 23Deenek, bot djas needuwal Mɔn, dáa Mɔn di eduwal Sɛɛg ɛ. Mot di ààduwal Mɔn'ɛ ɔ, nyɛ ààduwal Sɛɛg mot nadhis Mɔn ɔ.
24Tsɛɛtsɛ nɛ tsɛɛtsɛ mɛ lɛɛ bin ɛ etɛp e tsɛɛtsɛ náá, mot di egwak mɛlyo mam, da nyɛ ɛ́ dum koŋ nɛ mot nadhis mɛ ɔ, nyɛ waabela tsik na kɔm-kɔm. Tin, yenɔk aanàkwaapɛ́ɛaa, deenek, nyɛ eezedus tɔ ɛsyee, ni pɛ tɔ tsik. 25Tsɛɛtsɛ nɛ tsɛɛtsɛ, mɛ lɛɛ bin ɛ́ náá, ɛwala ɛpezyɛ, ɛwala ɛ tak eezekum, ɛwala bot ɛ nazegwyɛ ɔ aagwak gwood Mɔn ɛ Zɛɛb. Tin, bot djas aagwak gwood tak ɔ, bɛ waabela tsik. 26Yɛ waasael etɛɛ náá, tyee wat nɛ dáa Sɛɛg di ɛsuk ɛ tsik ɛ, deenek, nyɛ eesa náá, Mɔn pe di ɛsuk ɛ tsik. 27Deenek, Zɛɛb naadjɛ nyɛ eghɛŋ yii ɛpɛ́ɛ ɛ bot, etɛɛ náá, nyɛ ɛ́ Sɛɛŋɛlɛ Mɔn Mot. 28Sa mot ààdjoka. Etɛɛ náá, ɛwala ɛpezyɛ, ɛwala di náá, bot ɛ nazegwyɛ, delaa tɔ mɛvit ɔ, bɛ aagwak gwood'ɛ. 29Bhii tak bɛ waawyis tɔ mɛvit mɔɔ. Bot ɛ nasa enɛm esa ɔ, bɛ waagom tɔ ɛsyee etɛp ɛdi tɔ tsik. Tin, bot nasa embee mɛsa ɔ waagom etɛp bɛ neezɛkwyeselaa ndjɛ sɔs.
30Mam tok nɛ ghwyil ɛsa esonok dáa lyem'am di ekwos ɛ. Mɛ pɛ́ɛ ɛ́, dáa Saagam di lɛɛ ɛ náá, mɛ pɛ́ɛ ɛ. É di'enek, epɛ́ɛ mɛ aapɛ́ɛ bot ɛ, yɛ aadi ɛ́, tɔ epiki, etɛɛ náá, mam ààsa ɛkwosak ɛ lam. Mɛ sa ɛ́ ɛkwosak ɛ mot nalwom mɛ ɔ.
31Mɛ lɛɛ bin sa mɛ di egu kɔ ɛsu ɛ lam ɔɔ, bot aanàkwaamyaal sa mɛ aalɛɛ ɛ. 32Yɛ ɛ́ dhiiti mot ɛ di egoka nɛ ɛlɛɛ bot etɛp ee mɛ di esa ɛ. Tin, mɛ nɛ gu náá, etɛp ee nyɛ di elɛɛ bot kɔ ɛsu ɛ lam ɛ́ tsɛɛtsɛ. 33Ye nabɛ ɛ́, bi naalwom bot pɛ daa Zaŋ. Tin nyɛ naalɛɛ bin etɛp ee etsɛɛtsɛ dum nɛ nam. 34Yɛ bɛ mam ɔɔ, mɛ tok nɛ gwyes náá, mot lɛɛ bot sa mɛ di ɛ, nɛ esa ee mɛ di esa ɛ. Tin, mɛ lii etɛp bak ɛ́, étɛp bi neetsak. 35Zaŋ nabɛ ɛ́ dáa lama di etuubel, da yɛ ɛ́ wa bot djas tɔ eselele e gwyɛ ɛ. Deenek bi nabɛ ɛ́, bi eemyaala ba ɛwala wat tɔ eselele e gwyɛ yɛ.
36Guka náá, mam ɛ́ nɛ boo lɛŋ ɛkaada dhaa Zaŋ. Etɛɛ náá, mɛsa mɛ Saagam djɛ mɛ náá mɛ sa kɛkum ɛsik ɛ, yɛ ɛ́ mɛsa mɛ tak ɛ di elyaal bot, mot mɛ di ɛ. Yɛ ɛ́ di elyaal bot náá, Saagam ɛ́ nadhis mɛ. 37Deenek, Saagam, mot nalwom mɛ ɔ, nyɛy nyɛ ɛmet ɛ di ekɛm nɛ ɛlyaal ɛ bot kɔkɔ mbi mot mɛ di ɛ. Bi dinaa ààpakogwak-gwakak gwood'ɛ. Bi dinaa ààpakobee-beeak bhwoob'ɛ. 38Bi ààbaal mɛkpa mɛ tɔ len, étɛp tak ɛ bi di ààdum koŋ nɛ mot nyɛ nadhis ɔ.
39Bi ɛpewa lyem tɔ ɛdjek ɛ mɛkana ɛ Zɛɛb. Bi bwaal ɛ́ náá, tɔ ɛwa ɛ zii é mɛdjek mɛ bi di edjek ɛ, bi ɛ́ waabela tsik na kɔm-kɔm. Tin, guka náá, Ekwyala binek ɛ di elii nɛ ɛlɛɛ nɛ bot, mot mɛ di ɛ, nɛ mɛsa mam. 40Tin, bi kadi ɛ́, ààkwyɛl ɛzyɛ pɛ daa lam, étɛp bi neebela tsik!
41Mam aanàsaa náá, bot djɛ mɛ duu. 42Tin, mɛ nɛ gu náá, kwyɛl Zɛɛb tok tɔ elyem bin. 43Saagam ɛ́ nalwom mɛ, bi kadi ɛ́, ààmyaal mɛ. Tin, dhiiti mot ɛ zyɛ nɛ ghwyil'ɛ met ɔɔ, bi ɛ́ waamyaal nyɛ. 44Biyɔ ɛ́ di náá, mot nɛ mot saŋ ɛ́ yɛ duu nyɛ ɛmet yenek. Bi ààsaa duu di edus pɛ daa Zɛɛb nyɛy nyɛ ɛmet ɛ. Bi aakwak ɛdum koŋ nɛ nam dáa?
45Sa mot ààgek náá, mam ɛ́ waakɛpit bin pɛ daa Saagam. Mot aakɛpit bin ɔ, yɛ aadi ɛ́ Moiiz, mot bi nawa ɛbwaalel ɛ len kɔ lɛ ɔ. 46É di'enek, guka náá, bi ɛpedi ɛ́ di emyaal Moiiz ɔɔ, pe bi eemyaal mɛ, etɛɛ náá, Moiiz nakwyal ɛ́ kɔ ɛsu ɛ lam. 47Tin, bi ɛ di ààmyaal sa Moiiz nakwyal ɔɔ, haaa bi aamyaal mɛlyo mam dáa?»
നിലവിൽ തിരഞ്ഞെടുത്തിരിക്കുന്നു:
Zaŋ 5: bkwNT
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© (Active), Wycliffe Bible Translators, Inc. All rights reserved.
