Marke 1
1
Jan Batise o nca biri e kayi
1Ebaanihi e Ncya e Mve e Jesu Krisi a Mwana a Njyami: 2Amateende nca osaangumu owobi a mbari e Njyami Esayi ndi:
«Me etuma ntuma a me na e we,
ma oyeese we njila.
3Juuyi le mvuuru lewʉla nkɨma nca kayi ndi:
Leyeese njila e Nkʉmu,
lesiila anjila a nde aka tele!» 4Jan owasihi o nca biri e kayi mo ompa ateeme, nde atoosihi ndi: «Lekaala eku, be leyaha ateeme ŋa Njyami oboloho ambiini a be.» 5Baari a mo osi o Jide oso bɨla Jerusaleme eso ayi na avunuŋa ŋa nde. Bo ayalihi o mwa baari aso ndi bo asi ma ambiini, Jan ompi bo ateeme nca okeri a Jurde. 6Jan alaasihi eso mfa e mo obaana o samo, bɨla kwamba onono o lehe. Nde ajiihi anterehe bɨla vuuyi. 7Nde atoosihi ndi: «Mvuuru aya ngula me ovuli me mpari, me ka tele mo okumuha mo onaana endi e ma akoroho a nde ni. 8Me emampa be ateeme ma anja, ŋa nde aje ompa be ateeme mo Oduduma Santi.»
Ateeme a Jesu
9Ŋa o nca ecuhu bya Jesu owi Najarete mpuhu e nca Ngalili, Jan ompi nde ateeme o Jurde. 10Ntini e Jesu acuuhi nca anja, nde omoni yuli enaaha, Oduduma Santi asuruha o yula nde mva kuumbi. 11Juuyi lewi yulu ndi: «We mwana a me a dya, oswere o me oso oli o yula we.»
Masoŋo Jesu o nca biri e kayi
12O nci na nci ŋa, Oduduma obiri Jesu o nca biri e kayi. 13Satan osoŋi nde lemihi le ekuumi me ecuuhu ena o nca biri e kayi. Nde akiihi bɨla anyama a swaha, okoroho abaanji ma janja o nde.
Jesu atooso Ncya e Mve o Ngalili
14Amana olehe Jan ongeneŋe, Jesu oyi o Ngalili, nde atoosihi Ncya e Mve e Njyami ndi: 15«Antini amito, Onkani o Njyami oya tuha! Lekaala eku be leyalaha Ncya e mve!»
Jesu acwolo alwoni ancomi
16Nde aki alaana osyese a jaanga e Ngalili, nde omoni Simo bɨla mwarihi a nde Andɨre. Bo aki maa lehe akya nca jaanga, obila bo aki ati a lobo. 17Jesu oduhi bo ndi: «Lelwono me, ŋa be lemadiima eya baari.» 18O nci na nci ŋa bo asubi akya a bo kalihi, alwoni nde. 19Jesu ociina nceeri, omoni Jake a mwana Jebede bɨla Jan a mwarihi a nde, bo aki nca mbuungu e bo ma selehe akya a bo. 20O nci na nci ŋa Jesu ocwoli bo. Bo anyili taara a bo Jebede o nca mbuungu bɨla ajanji, ayeni bɨla Jesu.
Jesu asalaha balaha odidime ebi eswesihi
21Jesu bɨla alwoni anyuniŋi nca Kapernahume. Ŋa o cuhu ma wuumaŋa, Jesu onyuniŋi nca njo mavwonoŋo oya ayisiha. 22Bo akimi eyisihi e nde, obila nde ayisihi bɨla onkʉmu oso ka mva ayisihi ma esaangumu ni. 23O nca njo mavwonoho jya se, eki na balaha eki na odidime ebi. Oguli nkɨma ndi: 24« Aa Jesu a Najarete, o we asaha na bisioma? We ayi na amana bɨla bisi? Me eyaa we mbɨri we Opeende a Njyami atumi!» 25Jesu obye na odidime ebi kya ndi: «Ka pi, we se ocuuha o balaha ji!» 26Odidime ebi kya onyisihi balaha jya na mpari eso, co ocuuhi o nde na ogʉla nkɨma yo mɨni. 27Bo aso aya nca lekemi aya mapɨsa abuha o mpaniŋi e bo ndi: «Co oma? Balaha ji eyisiha eyisihi me enyarihi e bɨla onkʉmu oso! Nde se na onkʉmu o yula edidima me ebi, jo se me enyiima nde!» 28Ŋa o ŋiŋa, ncya e Jesu eyeni me ebiri eso, o nca ngaala e Ngalili.
Jesu asalaha oko o Simo okaasi
29Bo acuuha o nca njo mavwonoŋo, bo ayeni bɨla Jake na Jan njo e Simo bɨla Andɨre. 30Ŋa oko o Simo okaasi aki o tolo na obaa, o nci na nci ŋa bo se awobi na Jesu o nde. 31Jesu ociini, okwari nde okwoho osaari nde, obaa owi nde oya ampa bo biila.
32Eto na ekikolo, tari eva, baari ayi na abyeri aso bɨla baari ma aki na edidima me ebi na e Jesu. 33Onguundu oso okuhi asisari ma onywa a njo. 34Jesu osalihi baari kuna ma aki na angaa aso, nde ocuuri edidima me ebi kuna. Nde aka nyila edidima me ebi ewobi ni, obila jo eki ejyabi nde.
Jesu acyehe Kapernahume mo otooso Ncya e Mve o Ngalili
35Eto nkara encyere, cuhu eki ekini onaaha ni, Jesu ocuuhi oyeni o nca biri e kayi, o ŋa nde oya avwono. 36Simo bɨla abuha a nde aya masaha nde, 37ntini e bo mabasihi Jesu, bo na nde ndi: «Baari aso masaha we.» 38Nde na bo ndi: «Lecwe biri nkɨma, nca ampuhu a mo paani mo bu ndi me etooso Ncya e Mve kwa: mo oma, kya obila o me eyi o co.» 39Emana nde opori Ngalili eso. Nde atosiihi Ncya e Mve nca anjo a bo mavwonoŋo o mo, nde se acuura edidima me ebi.
Jesu asalaha nga ebila omo
40Nga ebila omo ociini na e Jesu owʉri avwo o mwa nde, na nde ndi: «Yuhu we adya, we abuuna ocuka me.» 41Jesu omoni nde nkerihi olabi kwoho otiili nde, na nde ndi: «Ee me edya, ka cece.» 42O nci na nci ŋa, ebila ewi nde owuumi. 43Jesu ovuuri nde asisari, obye na nde, 44na nde ndi: «Sa ayiba, we oka duuha mvuuru jaa se mo ni! Ŋa jyehe na alaha nyuru na osi avwoŋi, omana we ompa vwoŋi mva o Moyise aduhi, ma olaha bo mbɨri we oya cece.» 45Balaha jya na oje ŋa, nde oya awobo nkara yulu, nde se oya atooso ncya jya, mo vwa se Jesu aka mabuuna onyuhina nca onguundu o mwa baari ni. Ŋa nde aki aya omakaaha o nji nca ebiri e kayi. Ŋa baari ma aya ne e nde ma angulu aso.
നിലവിൽ തിരഞ്ഞെടുത്തിരിക്കുന്നു:
Marke 1: MDT
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
